“Who ti Lele Omẹ Jọ Aparadase”

 1. Taure Jesu o te ti whu, eme ọ ta kẹ ogbulegbu jọ nọ a kare kẹle iẹe? (Luk 23:39-43)

JESU avọ igbulegbu ivẹ nọ a kare fihọ tabọ tabọ riẹ na a jẹ reakọ evaọ ure na taure a te ti whu. (Luk 23:32, 33) Ma riẹ nọ aimava na yọ ilele Jesu hu keme a je se Jesu ẹkoko. (Mat. 27:44; Mak 15:32) Rekọ ọjọ o te nwene iroro. Ọ tẹ ta kẹ Jesu nọ: “Jesu, kareghẹhọ omẹ okenọ whọ tẹ ruọ Uvie ra no.” Jesu ọ tẹ ta kẹe nọ: “Uzẹme mẹ be ta kẹ owhẹ nẹnẹ na, who ti lele omẹ jọ Aparadase.” (Se Luk 23:39-43.) Jesu ọ jẹ hai whowho kẹ ahwo anwẹdẹ inọ: “Uvie odhiwu o kẹle no.” Rekọ Ebaibol ọ ta ẹme ọvo nọ u dhesẹ nọ ogbulegbu na o kurẹriẹ hẹ. Yọ Jesu ọ ta kẹe gbe he inọ o ti kpobọ odhiwu. (Mat. 4:17) Ukpoye kọ aparadase otọakpọ oye Jesu ọ ta kẹ ọzae na kpahe na. Ẹvẹ ma rọ riẹ ere?

 2. Eme u dhesẹ nọ ogbulegbu nọ o kurẹriẹ na yọ ohwo Ju?

² O wọhọ nọ ogbulegbu nọ o kurẹriẹ na yọ ohwo Ju. Ọ ta kẹ ogbulegbu ọdekọ na nọ: “Kọ whọ be dhozọ Ọghẹnẹ vievie he, nọ orọnọ obrukpe ọvona o te owhẹ na?” (Luk 23:40) Ọghẹnẹ ọvuọvo ahwo Ju a jẹ gọ. Rekọ ahwo erẹwho nọ i kiọkọ na a wo eghẹnẹ buobu nọ a jẹ gọ. (Ọny. 20:2, 3; 1 Kọr. 8:5, 6) O hae jọ nọ ogbulegbu na yọ ohwo Ju hu, onọ nọ ọ hae te nọ ogbulegbu ọdekọ na họ, “Kọ whọ be dhozọ eghẹnẹ na vievie he?” U te no ere no, “igodẹ uwou Izrẹl nọ i vru,” eye a vi Jesu bru, orọnọ ahwo erẹwho efa ha. (Mat. 15:24) Ere ọvo ho, Ọghẹnẹ ọ ta ẹme nọ o lẹliẹ ahwo Izrẹl riẹ nọ ọ te kpare ahwo nọ a whu no ze. O sae jọ nọ ogbulegbu na ọ riẹ kpahe ẹme yena. Ẹvẹ ma rọ ta ere? Keme ẹme nọ ọ ta kẹ Jesu u dhesẹ nọ ọ riẹ nọ Jesu ọ tẹ maki whu no, Jihova ọ te kpare iẹe ze, ọ vẹ te jọ Ovie. O te je wo ẹruore nọ ẹsejọhọ Ọghẹnẹ ọ te kpare ọyomariẹ ze re.

 3. Eme o sae jọ nọ ogbulegbu na o ti roro kpahe nọ Jesu ọ ta ẹme Aparadase kẹe? (Emuhọ 2:15)

³ Wọhọ epanọ ma ta no na, o wọhọ nọ ogbulegbu na yọ ohwo Ju. O tẹ rrọ ere, kiyọ ọ te riẹ kpahe Adamu avọ Ivi gbe ọgbọ owowoma nọ Ọghẹnẹ ọ ma rai fihọ, nọ o jọ aparadase. Fikiere o sae jọ nọ ọ riẹ nọ Aparadase nọ Jesu ọ ta ẹme riẹ kẹe na yọ ọgbọ owowoma nọ o te jọ otọakpọ na.—Se Emuhọ 2:15.

 4. Ma te roro te ẹme nọ Jesu ọ ta kẹ ogbulegbu na, eme o rẹ lẹliẹ omai roro kpahe?

⁴ Ma te roro te ẹme nọ Jesu ọ ta kẹ ogbulegbu na, o rẹ lẹliẹ omai roro kpahe epanọ Aparadase ọ te jọ. Nọ ma te se kpahe oghẹrẹ nọ esuo Solomọn o jọ, epanọ udhedhẹ o rọ dafia evaọ oke yena, ma rẹ riẹ eware jọ kpahe epanọ Aparadase ọ te jọ. Jesu ọ rro vi Solomọn, yọ ọye avọ ahwo nọ a ti lele iei su a ti ru nọ otọakpọ na u ti ro zihe ruọ aparadase owowoma. (Mat. 12:42) Fikiere o rọ “igodẹ efa” na oja gaga re a riẹ oware nọ a re ru re a sae rria bẹdẹ bẹdẹ evaọ Aparadase.—Jọn 10:16.

 5. Eme who bi rẹro riẹ evaọ Aparadase?

⁵ Nọ a tẹ fodẹ Aparadase, eme iroro ra e be hai kpohọ? Ẹsejọhọ who re roro kpahe ọgbọ owowoma, wọhọ ọgbọ Idẹn. (Emu. 2:7-9) Ẹsejọhọ iroro ra i ti je kpohọ ẹme nọ Maeka ọruẹaro na o kere inọ idibo Ọghẹnẹ kpobi omomọvo “ọ te keria ọvuọ otọ ure evaene gbe otọ ure ifigi riẹ.” (Mae. 4:3, 4) Yọ ẹme nọ Ebaibol ọ ta u dhesẹ nọ emu ọ te dafia nọ ahwo a te re evaọ oke yena. (Ol. 72:16; Aiz. 65:21, 22) Fikiere ẹsejọhọ whọ be hai roro kpahe epanọ whọ te rọ keria evaọ ọgbọ owowoma jọ, yọ obọdẹ emu ọwewere buobu e rrọ ehru emẹjẹ nọ whọ gwọlọ re. Oria kpobi u bi gbo emamọ ore fiki ebe gbe idodo nọ e rrọ oyena. Yọ ẹsejọhọ ahwo jọ avọ imoni rai gbe egbẹnyusu rai, te enọ a kpare ze, a rrọ ofẹ jọ gbiku, be hwẹ ehwẹ, yọ eva e be were ae. Ma riẹ nọ oghẹrẹ eware itienana e te via evaọ Aparadase. Rekọ emamọ iruo e te jariẹ nọ ahwo a ti ru re evaọ oke yena.

 6. Iruo vẹ ma ti ru evaọ Aparadase? (Rri uwoho na.)

⁶ Jihova ọ ma omai evaọ oghẹrẹ nọ eva e rẹ rọ were omai nọ ma te bi ru iruo. (Ọtausi. 2:24) Iruo buobu e te jariẹ nọ ma ti ru evaọ oke Esuo Odu-Ikpe Kristi na. Wọhọ oriruo, ahwo nọ a zọ evaọ uye ulogbo na gbe ima ahwo buobu nọ a te kpare ze, a rẹ re emu, a re ku ewu họ, a ve je wo ẹkẹ uwou rai. Re ma sai wo eware yena kpobi, okolo iruo ho. Rekọ eva e te were omai nọ ma ti ru iruo na. Yọ wọhọ epanọ Adamu avọ Ivi a jẹ rẹrote ọgbọ Idẹn na, ere ma te rẹrote otọakpọ na, o ve ti zihe ruọ Aparadase. Iruo na e te were oma kẹhẹ! Yọ eva e te were omai gaga nọ ma ti wuhrẹ ima ahwo buobu nọ a te kpare ze re a riẹ Jihova gbe oware nọ ọ gwọlọ ru. Ma ti je wuhrẹ ahwo nọ a jẹ gọ Jihova nọ i whu kri no taure Jesu ọ tẹ te ziọ otọakpọ.

 7. Ẹvẹ Aparadase ọ te jọ, kọ ẹvẹ ma rọ riẹ ere?

⁷ Ma riẹ nọ akpọ ọ te were gaga evaọ Aparadase, udhedhẹ o te jọ oria kpobi, yọ eware kpobi e te jọ kpatiẹ. Ẹvẹ ma rọ riẹ ere? Keme Jihova ọ jọ Ebaibol vuẹ omai eware nọ e lẹliẹ omai riẹ epanọ eware e te jọ oke nọ Ọmọ riẹ o ti su otọakpọ na. Ma te se kpahe epanọ eware e jọ oke nọ Solomọn o je ro su, ma rẹ ruẹ onana.

 8. Ẹvẹ eme nọ e rrọ obe Olezi 37:10, 11, 29 na i ro rugba? (Rri “Enọ Ahwo nọ A s’Ebe” evaọ Uwou-Eroro nana.)

⁸ Ọghẹnẹ ọ rọ Devidi kere kpahe epanọ eware e te jọ oke nọ ovie jọ nọ o wo areghẹ gaga nọ o bi ru oreva Ọghẹnẹ o ti su. (Se Olezi 37:10, 11, 29.) Ẹsibuobu nọ ma tẹ be ta usi uwoma kẹ ahwo kpahe akpọ ọkpokpọ na, ma re se obe Olezi 37:11 na kẹ ae. Yọ ma se thọ họ keme Jesu ọ ta ẹme nọ ọ rrọ oria Ebaibol yena oke nọ ọ jẹ kẹ ovuẹ obọ ugbehru na. Oyena u dhesẹ nọ oria Ebaibol yena o be ta kpahe akpọ ọkpokpọ na. (Mat. 5:5) Rekọ ẹme nọ Devidi ọ ta evaọ oria Ebaibol yena u dhesẹ epanọ eware e te jọ evaọ oke esuo Solomọn ovie na re. Evaọ oke nọ Solomọn o je ro su orẹwho Izrẹl, eware e jẹ riẹ nya kẹ idibo Ọghẹnẹ, yọ ẹkwotọ nọ a jọ na yọ oria nọ “ame-ivie gbe ọnyọ i [je] jo su.” Ọghẹnẹ ọ ta nọ: “Otẹrọnọ wha ruabọhọ be nya evaọ izi mẹ . . . , me ti fi udhedhẹ họ ẹkwotọ na, yọ wha ti kiẹzẹ ababọ ohwo nọ o ti ru ozọ mu owhai.” (Izerẹ 20:24; 26:3, 6) Ẹme yena o rugba evaọ oke nọ Solomọn o je su. (1 Irv. 22:9; 29:26-28) Yọ Jihova ọ ya eyaa inọ ahwo nọ i bi ru eware iyoma “a gbẹ te jọ họ.” (Ol. 37:10) Enana kpobi i dhesẹ nọ eme nọ e rrọ Olezi 37:10, 11, 29 na i rugba evaọ oke anwae, yọ i ti rugba evaọ obaro.

 9. Eme ovie-aye obọ Shiba ọ ta kpahe esuo Solomọn?

⁹ Udhedhẹ gbe ọruẹriọ nọ o jọ ẹkwotọ Izrẹl evaọ oke esuo Solomọn u do te ovie-aye obọ Shiba oma. Ere o ro no ugbo obọ ẹwho riẹ ziọ Jerusalẹm re ọ rọ ibiaro riẹ ruẹ epanọ eware e ginẹ rrọ evaọ ẹkwotọ na. (1 Iv. 10:1) Nọ ọ te ruẹ oghẹrẹ nọ eware e rrọ evaọ esuo Solomọn, ọ tẹ ta nọ: “Kpakọ amabọ jọ gheghe a vuẹ omẹ. . . . Eva e be were ahwo ra, yọ eva e be were idibo ra nọ i bi dikihẹ aro ra kẹse kẹse be kezọ kẹ eme areghẹ ra!” (1 Iv. 10:6-8) Rekọ epanọ eware i woma te evaọ oke esuo Solomọn na, eware i ti woma viere kpekufiẹ nọ Jesu o te mu otọakpọ na họ esu no. Jihova o ti ru eware iwoma buobu kẹ omai.

10. Idhere jọ vẹ Jesu o ro woma vi Solomọn?

¹⁰ Jesu ọ rọ oghẹrẹ kpobi woma vi Solomọn. Wọhọ oriruo, Solomọn yọ ohwo-akpọ nọ ọ gba ha. Yọ o ru eware jọ nọ Jihova o mukpahe, o tẹ wha uye se ahwo nọ o je su. Rekọ Jesu ọ rrọ gbagba, yọ o re ruthọ họ. (Luk 1:32; Hib. 4:14, 15) Dede nọ Setan ọ dawo Jesu gaga, Jesu o kie kẹe he. Yọ eware nọ Jesu o ru no i dhesẹ nọ o ti ru oware nọ o rẹ dha Jihova eva ha, hayo ru oware nọ o rẹ wha uye se ahwo nọ o bi su hu. Jesu ginọ emamọ osu gaga nọ u fo nọ o re su omai.

11. Amono a ti lele Jesu su?

¹¹ Ahwo idu udhuhrẹ-gbene (144,000) a ti lele Jesu su, yọ a ti ru nọ eware i ti ro woma kẹ ahwo-akpọ. A ti je ru nọ ẹjiroro Ọghẹnẹ u ti ro rugba evaọ otọakpọ na. (Evia. 14:1-3) Ahwo nọ a ti lele Jesu su na yọ ahwo nọ a thihakọ ebẹbẹ buobu no taure a te ti kpobọ odhiwu. Fikiere ma riẹ nọ a ti roro kẹ omai keme a riẹ oghẹrẹ nọ eware e rrọ kẹ omai. Kọ iruo vẹ a ti ru?

12. Amono ahwo idu udhuhrẹ-gbene na a ti su?

¹² Iruo nọ Jesu avọ ahwo nọ a ti lele iei su na a ti ru e rro vi iruo nọ Solomọn o je ru kpekufiẹ. Wọhọ oriruo, ahwo nọ a jọ orẹwho Izrẹl na ọvo Solomọn o je su. Rekọ Jesu avọ ahwo nọ a ti lele iei su na a ti su ima ahwo buobu evaọ otọakpọ na soso. Ọghọ nọ Jihova o bru họ ahwo idu udhuhrẹ-gbene (144,000) na oma o rro kẹhẹ!

13. Iruo jọ vẹ ahwo nọ a ti lele Jesu su na a ti ru?

¹³ Jesu avọ ahwo idu udhuhrẹ-gbene (144,000) na a te jọ ivie gbe izerẹ. (Evia. 5:10) Evaọ oke Mosis, izerẹ na a jẹ hai ru epanọ ẹyao o gbe ro vo ho evaọ udevie ahwo na, a ve je ru eware nọ i re fiobọhọ kẹ ahwo na kẹle Jihova. Whaọ uzi nọ Ọghẹnẹ ọ rọ Mosis kẹ ahwo Izrẹl na yọ “uwoho eware iwoma nọ e te tha.” Fikiere Jesu avọ ahwo nọ a ti lele iei su na a ti ru oghẹrẹ iruo evona nọ izerẹ a jẹ hai ru na. A ti ru re ahwo-akpọ a wo omokpokpọ, a vẹ jẹ kẹle Jihova ziezi. (Hib. 10:1) Ma riẹ oghẹrẹ nọ Jesu avọ enọ i ti lele iei su na a ti ro ru re ahwo-akpọ a riẹ oware nọ a re ru hu. Oke yena u te te, ma te riẹ. Rekọ oghẹrẹ kpobi nọ Jihova o ti ru eware na fihọ kẹhẹ, ma riẹ nọ evaọ Aparadase, Jihova o ti ru re ahwo nọ a rrọ otọakpọ a riẹ oware nọ a re ru.—Evia. 21:3, 4.

14. Eme enọ a rọ ẹzi wholo na avọ “igodẹ efa” na a bi ru?

¹⁴ Jesu o se ahwo nọ a ti lele iei su na “uthuru okakao.” (Luk 12:32) Ọ fodẹ utu ahwo ọfa jọ re, yọ o se rai “igodẹ efa.” Uthuru ọvona itu ahwo ivẹ nana a rrọ. (Jọn 10:16) Itu ahwo ivẹ nana a bi ru iruo kugbe enẹna, yọ a ti gbe ru iruo kugbe nọ Aparadase ọ tẹ ze no. Rekọ oke yena, ahwo nọ a rrọ “uthuru okakao” na a te jọ obọ odhiwu. Yọ uvẹ u ti rovie kẹ enọ e rrọ “igodẹ efa” na re a rria otọakpọ na bẹdẹ bẹdẹ. Rekọ u wo eware nọ “igodẹ efa” na a re ru enẹna re a sae jọ Aparadase.

15. (a) Ẹvẹ “igodẹ efa” na a sai ro fiobọhọ kẹ inievo Jesu? (b) Ẹvẹ ma sae rọ rehọ aro kele oniọvo nọ ọ nyae dẹ oware na? (Rri uwoho na.)

¹⁵ Ogbulegbu nọ a kare kẹle Jesu na, uvẹ u rovie kẹe he nọ o re ro dhesẹ nọ oware nọ Jesu o ru kẹe o da riẹ ẹro. Rekọ mai “igodẹ efa” na, uvẹ u rovie fihọ kẹ omai nọ ma sai ro ru ere. Wọhọ oriruo, nọ ma tẹ be daoma fiobọhọ kẹ inievo Jesu, koyehọ enọ a rọ ẹzi wholo na, yọ ma bi dhesẹ nọ ma you Jesu. Yọ Jesu ọ ta nọ ma te ru ere, o ti kuenu kẹ omai nọ ma te ahwo nọ a rẹ jọ Aparadase. (Mat. 25:31-40) Edhere jọ nọ ma re ro fiobọhọ kẹ inievo Jesu họ, ma rẹ rọ ajọwha ta usi uwoma na je wuhrẹ ahwo. (Mat. 28:18-20) Fikiere joma rọ eware nọ ukoko u ru ze rọ ta usi uwoma je wuhrẹ ahwo ziezi. Eware wọhọ obe Reawere Uzuazọ Bẹdẹ Bẹdẹ! na. Otẹrọnọ who ri mu ohwo ọvo Ebaibol họ ewuhrẹ hẹ, kọ who gbe sei gboja inọ whọ te daoma mu ahwo họ ewuhrẹ ziezi?

16. Eme ma re ru enẹna re ma dhesẹ nọ ma be ruẹrẹ oma kpahe kẹ Aparadase?

¹⁶ Orọnikọ ma rẹ hẹrẹ nọ ma ruọ akpọ ọkpokpọ na no taure ma te ti wo uruemu nọ o rẹ were Jihova ha. Enẹna ma re ro woi. Wọhọ oriruo, ma rẹ hae ta uzẹme, ma rẹ wha ahwo re he, ma vẹ jẹ whaha eware nọ a re ru vrẹta. Ma rẹ hae jẹ daoma kẹle Jihova gbe inievo ukoko na ziezi. Yọ otẹrọnọ ma rọo no, ma re siuru aye hayo ọzae ọfa ha. Ma tẹ be daoma koko izi Jihova ziezi enẹna je wo emamọ uruemu, o te gbẹ bẹ omai hi re ma ru ere nọ ma tẹ ruọ Aparadase no. Ma sai je wuhrẹ imiruo jọ hayo oware jọ nọ ma ti ro fiobọhọ evaọ akpọ ọkpokpọ na. Rri uzoẹme na, “Kọ Whọ Ruẹrẹ Oma Kpahe no re Whọ ‘rọ Otọakpọ na Reuku’?” nọ ọ rrọ Uwou-Eroro nana.

17. Kọ u fo re ma kuvẹ re udu u gbe brukpe omai fiki izi nọ ma raha oke jọ? Ru ei vẹ.

¹⁷ Otẹrọnọ udu u bi brukpe omai fiki eware iyoma nọ ma ru oke jọ, ma rẹ daoma kpairoro vrẹ oware na. Rekọ oyena u dhesẹ nọ ma re “keke aro fihọ raha uzi” hi fikinọ Jesu o whu kẹ omai. (Hib. 10:26-31) Otẹrọnọ ma ru oware uyoma jọ oke jọ, rekọ oware na o da omai, ma tẹ jẹ nyabru ekpako na re a fiobọhọ kẹ omai no, jẹ siọ oware na ba eru no, joma riẹ nọ Jihova ọ rọvrẹ omai no riẹriẹriẹ. (Aiz. 55:7; Iruẹru 3:19) Kareghẹhọ ẹme nọ Jesu ọ ta kẹ ahwo Farisi oke jọ inọ: “Erahaizi mẹ nyaze ti se, orọnikọ ahwo okiẹrẹe he.” (Mat. 9:13) Ghelọ epanọ uzi nọ ma raha o gbẹdẹ te kẹhẹ, Jihova ọ rẹ sae rọvrẹ omai fiki idhe ẹtanigbo na.

18. Eme whọ te gwọlọ nọ ogbulegbu nọ a kare kẹle Jesu na evaọ Aparadase?

¹⁸ Kọ whọ gwọlọ ruẹ ogbulegbu nọ o je lele Jesu ta ẹme na evaọ Aparadase? Dae rehọ iẹe nọ whẹ avọ iẹe wha ruẹro, wha tẹ be ta ẹme kpahe epanọ eva e be were owhai te fikinọ Jesu o whu kẹ omai. Ẹsejọhọ whọ te nọe kpahe epanọ eware e jọ kẹ Jesu oke nọ o je ro whu gbe epanọ o jọ kẹe nọ Jesu ọ vuẹe nọ o ti lele iei jọ Aparadase. Yọ ẹsejọhọ ọyomariẹ ọ te nọ owhẹ kpahe epanọ eware e jọ evaọ edẹ urere akpọ omuomu nana. U ti gine woma gaga re ma rọ Ẹme Ọghẹnẹ wuhrẹ ahwo otiọye na oke yena.—Ẹf. 4:22-24.

19. Eware vẹ e te vọe nọ ma te hai ru evaọ Aparadase? (Rri uwoho nọ o rrọ uke emagazini na.)

¹⁹ Emamọ eware buobu e te hae vọe nọ ma ti ru evaọ Aparadase. Ma ti ru emamọ iruo, yọ ahwo a vọ riẹ nọ ma te gwọlọ ruẹ. Maero na, kẹdẹ kẹdẹ akpọ na, ma te hae riẹ Jihova Ọsẹ obọ odhiwu mai na viere, yọ ma te re erere eware nọ o ti ru kẹ omai. Eware e te hae vọe nọ ma te hae gbẹ riẹ kpahe Jihova ẹsikpobi, yọ ma ti wuhrẹ eware buobu kpahe eware nọ ọ ma. Epanọ ma rria kri te evaọ akpọ ọkpokpọ na, ere ma te riẹ Jihova te. Ma yere Jihova avọ Jesu gaga nọ a rọ ya eyaa kẹ omai nọ ma sae rria bẹdẹ bẹdẹ evaọ Aparadase.