Kọ Who Wo ‘Ẹzi Ohẹrẹ’?

“Didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ [na]!” —2 PITA 3:11, 12.

 1, 2. Oriruo vẹ ma sai ro dhesẹ ewo ‘ẹzi ohẹrẹ’ kpahe ẹdẹ Jihova?

REHỌ iẹe nnọ uviuwou jọ u bi rẹro erara nọ e be te kpahe ae re a re emu kugbe. Oke nọ a fihọ inọ a te rọ nyaze u bi te no. Aye na ọ j’oma bi there emu na re no. Ọzae riẹ gbe emọ rai a bi fi obọ họ ruẹrẹ eware họ. Oma u bi mu ohwo kpobi. Ẹhẹ, uviuwou na kpobi o be rehọ ọwhọ hẹrẹ ẹnyaze erara na yọ a bi rẹro ẹriọ emamọ emu avọ omakugbe evawere.

² Wọhọ Ileleikristi, ma be hẹrẹ oware nọ u tubẹ w’uzou viere. Eme ma be hẹrẹ? Ẹhẹ, mai kpobi ma be hẹrẹ “ẹdẹ Ọghẹnẹ”! Bẹsenọ ọ rẹ tha, u fo re ma jọ wọhọ Maeka ọruẹaro na, ọnọ ọ ta nnọ: “Me re riwi ỌNOWO na, mẹ rẹ hẹrẹ Ọghẹnẹ usiwo mẹ.” (Maeka 7:7) Kọ oyena u dhesẹ abọ oro muoma? Ijo. Iruo e vọ riẹ nọ a re ru.

 3. Wọhọ epanọ o rrọ 2 Pita 3:11, 12, uruemu vẹ u fo nọ Ileleikristi i re wo?

³ Pita ukọ na o fi obọ họ k’omai re ma wo emamọ uruemu nọ ma be hẹrẹ na. Ọ ta nnọ: “Didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ [na]!” (2 Pita 3:11, 12) Ẹme nọ Pita ọ jọ etenẹ ta na o do wọhọ onọ. Rekọ orọnikọ onọ ọ bẹ rehọ iẹe nọ họ. Evaọ ileta ivẹ riẹ nọ ọ rehọ ẹgba Ọghẹnẹ kere na, o dhesẹ oghẹrẹ ahwo nọ u fo nnọ Ileleikristi e rẹ jọ. Ọ tẹ jẹ kẹ ae ohrẹ inọ a ruabọhọ ‘uzuazọ ẹfuọ gbe orọ omarọkẹ Ọghẹnẹ.’ Dede nọ oware wọhọ ikpe 30 e vrẹ no anwẹnọ Jesu Kristi o ro dhesẹ eka “urere akpọ na,” o soriẹ ze nọ Ileleikristi a gbẹ rọ jaja aro vi hi hi. (Matiu 24:3) A rẹ gbẹ ‘hẹrẹ je rẹro’ ẹtha ẹdẹ Jihova.

 4. Eme o gwọlọ re a “rẹro ẹtha ẹdẹ Ọghẹnẹ vẹrẹ vẹrẹ”?

⁴ Ẹme Griki nọ a jọ etenẹ fa “rẹro” na u wo otofa ọ “eru kpata.” Uzẹme o rrọ, ma rẹ sai ru ẹdẹ Jihova nyaze ‘kpata kpata’ ha. Ma tubẹ “riẹ ẹdẹ na hayo oke [na dede] he,” onọ Jesu Kristi ọ te rọ nyaze ti bruoziẹ kpe ewegrẹ Ọsẹ riẹ. (Matiu 24:36; 25:13) Obe jọ o fotọ ubiẹme nọ a ro se “eru kpata” eva etenẹ na inọ u dhesẹ epanọ a re “ ‘ru ovẹrẹ’ fikiere o kẹle ‘ọwhọ gbe ọdawẹ nọ a re wo kpahe oware.’ ” Fikiere Pita ọ be kpakpa ibe enọ e rọwo na re a rehọ “ọwhọ rẹro” ẹtha ẹdẹ Jihova. A rẹ sai ru onana ẹkwoma iroro nọ a re fi ei họ ẹsikpobi. (2 Pita 3:12) Avọ “ẹdẹ ologbo avọ idudu ỌNOWO na” nọ ọ kẹle gaga no na, ma re wo oghẹrẹ iroro evona.—Joẹl 2:31.

Hẹrẹ avọ “Uzuazọ Ẹfuọ”

 5. Ẹvẹ ma sai ro dhesẹ nọ ma be rehọ “ọwhọ hẹrẹ” ẹtha “ẹdẹ Ọghẹnẹ”?

⁵ Ma tẹ be rehọ “ọwhọ rẹro” inọ ma te zọ vrẹ ẹdẹ Jihova, ma re dhesẹ oyena via ẹkwoma “uzuazọ ẹfuọ gbe orọ Ọghẹnẹ” nọ ma re yeri. Ẹme na “uzuazọ ẹfuọ” o rẹ sae kareghẹhọ omai ohrẹ Pita na: “Wọhọ emọ nọ i re yo ẹme, wha duoma họ urusio ho enọ wha rehọ ogbori ru vẹre na: rekọ epanọ ohwo nọ o se owhai ọ rọ fuafo na, whai omarai wha jọ eva uruemu rai kpobi jọ fuafo re; keme a kere nọ, ‘Wha rẹte [jọ] ọrẹri, keme mẹ ọrẹri.’ ”—1 Pita 1:14-16.

 6. Re ma jọ fuafo, eme ma re ru hrọ?

⁶ Re ma jọ fuafo, o gbahọ nọ ma rẹ yọrọ ẹfuọ ugboma, iroro, uruemu, gbe ọrọ abọ-ẹzi. Kọ ma be ruẹrẹ oma họ kẹ “ẹdẹ Ọghẹnẹ” ẹkwoma oma mai omomọvo nọ ma re ru fo wọhọ ahwo nọ a be rehọ odẹ Jihova se? O lọhọ tere re a yọrọ ẹfuọ otiọye na nẹnẹ hẹ, keme ute ẹfuọ akpọ na u be kiekpo ọvo. (1 Ahwo Kọrint 7:31; 2 Timoti 3:13) Kọ ma bi muẹrohọ inọ ohẹriẹ nọ o rrọ udevie ute ẹfuọ mai avọ orọ akpọ na o be kẹre? O gbẹrọ ere he, kiyọ ẹbẹbẹ jọ ọ riẹ. Kọ o sae jọ nọ itee ẹfuọ mai, dede nọ i kpehru vi erọ akpọ na, i bi kie kpotọ? Otẹrọ ere, o gwọlọ nọ ma rẹ jẹ emamọ owọ rọ kpọ eware vi re ma ruẹsi ru Ọghẹnẹ eva were.

 7, 8. (a) Ẹvẹ epanọ u w’uzou te re ma yeri “uzuazọ ẹfuọ” o sae rọ thọrọ omai ẹro? (b) Owojẹ vẹ o rẹ sae gwọlọ re a kpọ onana vi?

⁷ Avọ omarọvia ifoto ẹbẹba evaọ Itanẹte gbe fikinọ a rẹ sae rri rai evaọ idhere, ahwo jọ nọ a jẹ sae ruẹ ighe ọfariẹ itieye na vẹre he a wo “uvẹ buobu rọkẹ ighe ọfariẹ-ogbe no,” ere edọkita jọ ọ tae. Otẹrọnọ ma re rovie kpohọ oria evuẹ Itanẹte etọtọ itieye na, kiyọ ma bi ghine veghe uzou kẹ ujaje Ebaibol na onọ o ta nọ “whọ rehọ obọ te oware onyenye ovo ho.” (Aizaya 52:11) Kiyọ ma be ghine “rẹro ẹtha ẹdẹ Ọghẹnẹ vẹrẹ vẹrẹ”? Manikọ ma be va ẹdẹ yena evaọ iroro mai, bi roro nọ ma tẹ make be rehọ ighe etọtọ gbe iroro mai ku, oke o gbẹ riẹ nọ ma ti ro nwene? Otẹrọnọ ma wo ẹbẹbẹ jọ kpahe ighe ẹbẹba, ẹvẹ o rrọ oware ovẹrẹ te re ma yare Jihova inọ ajọ o ‘si aro mai no eware ifofe iriwo; re ọ kẹ omai uzuazọ evaọ edhere riẹ’!—Olezi 119:37.

⁸ Ogbotu Isẹri Jihova buobu, te emaha te ekpako, a dadamu itee ẹfuọ ikpehru Ọghẹnẹ a tẹ jẹ be whaha urusio ọfariẹ-ogbe akpọ nana. Fikinọ a riẹ ovẹrẹ oke nọ ma rrọ na gbe ohrẹ Pita na inọ “ẹdẹ Ọnowo ọ rẹ te tha wọhọ oji,” a be ruabọhọ “uzuazọ ẹfuọ.” (2 Pita 3:10) Iruẹru rai i dhesẹ nnọ a be “hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ.”a

Hẹrẹ avọ ‘Iruẹru Uzuazọ Omarọkẹ Ọghẹnẹ’

 9. Eme omarọkẹ Ọghẹnẹ o rẹ wọ omai ru?

⁹ ‘Iruẹru uzuazọ omarọkẹ Ọghẹnẹ’ e r’oja re otẹrọnọ ma re si ẹdẹ Jihova te iroro. ‘Omarọkẹ Ọghẹnẹ’ u kugbe adhẹẹ nọ ma rẹ rọ kẹ Ọghẹnẹ, onọ o rẹ wọ omai ru oware nọ o rẹ were ẹe. Omarokpotọ nọ ma re ro bigba Jihova họ oware nọ o rẹ wọ omai ru iruẹru omarọkẹ Ọghẹnẹ itieye na. O rrọ oreva riẹ inọ “ahwo kpobi a wo usiwo, re a ze te riẹ uzẹme na.” (1 Timoti 2:4) Ọghẹnẹ ọ “guọlọ nọ ohwo ọvo o whu hu, rekọ [re] ahwo kpobi a zite ekurẹriẹ.” (2 Pita 3:9) Nọ o rrọ ere na, kọ omarọkẹ Ọghẹnẹ mai u gbe ru omodawọ mai ga viere nọ ma re ro fi obọ họ kẹ ahwo re a wuhrẹ kpahe Jihova jẹ raro kele iei?—Ahwo Ẹfẹsọs 5:1.

10. Fikieme ma jẹ yọrọ oma kẹ “eviẹhọ efe”?

¹⁰ Uzuazọ mai o te vọ avọ iruo omarọkẹ Ọghẹnẹ otẹrọnọ ma rehọ Uvie Ọghẹnẹ karo. (Matiu 6:33) Onana u kugbe eriwo owowa nọ ma re wo kpahe ekwakwa iwo. Jesu ọ vẹvẹ unu nọ: “Wha yọrọ oma, re wha si oma rai no uru eware eguọlọ kpobi; keme uzuazọ ohwo o rọ udevie ekuakua eyero obuobu riẹ hẹ.” (Luk 12:15) Dede nọ o sae jọ bẹbẹ re ma rẹro nnọ uyoyou igho u re di omai ude, u fo re ma muẹrohọ inọ ‘awa akpọ na ọruọ gbe eviẹhọ efe’ e rẹ sai “duwu ẹme” Ọghẹnẹ. (Matiu 13:22) O sae jọ nọ o ghinẹ lọhọ tere he re a re eva vọ. Evaọ abọ jọ akpọ na, onana o be lẹliẹ ahwo jọ roro inọ re akpọ rai ọ sai woma, a rẹ kwa kpohọ orẹwho ọruẹriọ, ẹsejọhọ a rẹ tubẹ nya siọ uviuwou rai ba eva unuikpe jọ. Makọ ahwo Ọghẹnẹ jọ dede a roro enẹ no. Ẹkwoma ekpohọ orẹwho ofa, ẹsejọhọ a rẹ sae ruẹ ẹgwọlọ eyero ọgbọna kẹ uviuwou rai. Rekọ, eme ọ rẹ sae via kẹ edikihẹ abọ-ẹzi ọrọ iyoyou rai nọ e rrọ obọ uwou? Ababọ ọzae nọ o re dhesẹ uvi uzou-uwou, kọ a ti wo edikihẹ abọ-ẹzi nọ o gwọlọ re a zọ vrẹ ẹdẹ Jihova?

11. Ẹvẹ ohwo jọ nọ o re ruiruo no orẹwho ruọ orẹwho o ro dhesẹ nnọ iruẹru omarọkẹ Ọghẹnẹ e r’oja vi efe?

¹¹ Ohwo obọ Filipai jọ nọ o re ruiruo no orẹwho ruọ orẹwho, o wuhrẹ uzẹme Ebaibol na mi Isẹri Jihova evaọ Japan. Nọ o ti wuhrẹ kpahe owha-iruo uzou-uwo rono Ikereakere na ze no, o te vuhumu inọ u fo re o fi obọ họ kẹ uviuwou riẹ re a jọ egegagọ Jihova. (1 Ahwo Kọrint 11:3) Aye riẹ nọ ọ rrọ obọ uwou ọ wọso ẹrọwọ ọkpokpọ riẹ gaga, ọ gwọlọ nọ ọ hai vi ugho ze viukpenọ o re kpozi ti wuhrẹ uviuwou na kpahe ẹrọwọ nọ o wo no Ebaibol ze. Dede na, fiki ovẹrẹ oke na gbe ọdawẹ nọ o wo kẹ enọ o you, oma o tẹ wọe kwa kpo. Odiri nọ ọ rọ rehọ uyoyou yeri kugbe ahwo uviuwou riẹ o wha irere ze. Ukuhọ riẹ, uviuwou riẹ u te kuomagbe evaọ egagọ uzẹme, aye riẹ ọ tẹ te ruọ iruo odibọgba oke-kpobi na.

12. Fikieme ma jẹ rehọ isiuru abọ-ẹzi rọ k’aro evaọ uzuazọ?

¹² A sae rehọ uyero mai ro dhesẹ orọ ahwo nọ a rrọ evaọ uwou nọ o be to. Kọ o sae jọ oware areghẹ re ma dhẹ wahawaha be gwọlọ wọ eware no uwou nọ o be to nọ o kẹle ekie no na? Ukpoye, kọ o gbẹ mai w’uzou gaga re ma siwi izuazọ—uzuazọ mai avọ orọ uviuwou mai gbe amọfa nọ a be rria uwou na? Whaọ, eyerakpọ omuomu ọnana o bi kpohọ ọraha vẹrẹ vẹrẹ, yọ izuazọ e rrọ ọza. Nọ ma riẹ onana no na, u muẹro inọ ma rẹ rehọ isiuru uvie na k’aro jẹ rehọ ọwhọ t’ẹrovi iruo usiuwoma ota Uvie na nọ u re siwi uzuazọ na.—1 Timoti 4:16.

O Gwọlọ nọ Ma rẹ Jọ “Ababọ Epe”

13. Uyero vẹ ma gwọlọ nọ ma rẹ jọ eva okenọ ẹdẹ Jihova ọ te tha?

¹³ Bi fi ẹgba họ epanọ u w’uzou te re a yọrọ ẹzi ohẹrẹ, Pita ọ ta nnọ: “Iyoyou, fiki epanọ wha bi rẹro eware nana, wha fi-ududhe re [Ọghẹnẹ] ọ ruẹ owhai ababọ epe hayo afuẹwẹ, rekọ [evaọ] udhedhẹ.” (2 Pita 3:14) U te no ohrẹ riẹ nọ a rẹ rọ jọ fuafo evaọ uruemu gbe iruẹru omarọkẹ Ọghẹnẹ no, Pita o fi ẹgba họ epanọ u w’uzou te re ma jọ ahwo nọ azẹ ọghaghae Jesu o ru fo no eva aro Jihova. (Eviavia 7:9, 14) Onana o gwọlọ nọ ohwo o re fi ẹrọwọ họ idhe Jesu, o ve je zihe ruọ odibo Jihova nọ ọ rehọ oma mudhe jẹ họ ame no.

14. Eme u dhesẹ re ma jọ “ababọ epe”?

¹⁴ Pita ọ kpakpa omai re ma dao utho ẹgba mai kpobi re ma jọ “ababọ epe.” Kọ ma bi ru ẹgọ uruemu Oleleikristi gbe oghẹrẹ ohwo nọ ma rrọ kare epe, nọ ogbekuo akpọ ovuovo o bi kpomahọ họ? Ma te gbẹro ku epe jọ eva ewu mai, ma rẹ daoma si ei no ẹsiẹsiẹ. Otẹrọnọ obọdẹ ewu mai jọ oware u gbe na, ma rẹ nabe rọma totọ si ei no. Kọ ma bi ru epọvo na otẹrọnọ oka jọ o rrọ ẹgọ Oleleikristi mai, wọhọ odẹme, fiki epe jọ nọ ọ rrọ uruemu mai?

15. (a) Fikieme emọ Izrẹl a je ru iluelue fihọ akọ iwu rai? (b) Fikieme idibo Jihova ọgbọna a ro wo ohẹriẹ?

¹⁵ Emọ Izrẹl a re ru “iluelue fihọ akọ iwu rai kpobi” a vẹ jẹ “rehọ ufi uburu mu iluelue na ọvuọvo wariẹ.” Fikieme? Re a ruẹse kareghẹhọ ijaje Jihova, koko ai, je “ru oma rai ọrẹri” kẹ Ọghẹnẹ rai. (Ikelakele 15:38-40) Wọhọ idibo Jihova ọgbọna, ma re wo ohẹriẹ no akpọ na keme ma bi koko izi Ọghẹnẹ. Wọhọ oriruo, ma be yọrọ ẹfuọ uruemu, ma be rehọ adhẹẹ kẹ ẹfuọ azẹ, yọ ma be whaha oghẹrẹ ẹdhọgọ kpobi. (Iruẹru 15:28, 29) Ahwo buobu a be k’omai adhẹẹ fiki ọtamuo mai nọ ma bi ro gbe oma ku hu.—Jemis 1:27.

O Gwọlọ nọ Ma rẹ Jọ ‘Ababọ Afuẹwẹ’

16. Eme u dhesẹ re ma ‘kare afuẹwẹ’?

¹⁶ Pita ọ ta re inọ ma rẹ ‘kare afuẹwẹ.’ Ẹvẹ oyena o sae rọ lọhọ? O rẹ lọlọhọ re a wozẹ epe no, rekọ ere o rrọ kẹ afuẹwẹ hẹ. Afuẹwẹ o dhesẹ nọ oware jọ o thọ evaọ obeva. Pọl ukọ na ọ hrẹ ibe Ileleikristi nọ e rrọ Filipai nnọ: “Ru eware kpobi ababọ ẹguọ hayo enanọ, re wha kare afuẹwẹ jẹ jọ enọ e foro, emọ Ọghẹnẹ ababọ afuẹwẹ, eva evie oge ọbẹbẹ nọ ọ rẹ barosa ru iyoma eva enọ wha rẹ jọ udevie rai lo wọhọ ikpẹ eva akpọ na.” (Ahwo Filipai 2:14, 15) Ma te lele ohrẹ yena, ma rẹ whaha ẹguọ avọ avro, ma vẹ jẹ rehọ iroro efuafo gọ Ọghẹnẹ. Uyoyou rọkẹ Jihova gbe erivẹ o vẹ te wọ omai whowho “ovuẹ usiuwoma uvie na.” (Matiu 22:35-40; 24:14) Ofariẹ, ma rẹ ruabọhọ ewhowho emamọ usi na o tẹ make rọnọ ẹsejọ ahwo buobu a re wo otoriẹ oware nọ ma bi ro si obọ no oke mai evaọ omodawọ nọ ma bi ro fi obọ họ kẹ amọfa wuhrẹ kpahe Ọghẹnẹ avọ Ẹme riẹ, Ebaibol na ha.

17. Eme u fo nọ o rẹ j’omai iroro nọ ma te te ọkwa-iruo evaọ ukoko Ileleikristi?

¹⁷ Fikinọ ma gwọlọ “kare afuẹwẹ,” u fo re ma kiẹ ẹjiroro nọ ọ rrọ emu ilale mai kpobi riwi. Ma nya siọ idhere oriobọ nọ akpọ na o bi ro ru eware ba no, wọhọ efe hayo okpodẹ nọ a re le. Otẹrọnọ ma bi le ute ọkwa-iruo evaọ ukoko Ileleikristi na, ajọ iroro mai e jọ fuafo re e jẹ jọ enọ uyoyou nọ ma wo kẹ amọfa gbe Jihova o rẹ sae wha ze. O rrọ oware omosasọ re a ruẹ ezae abọ-ẹzi nọ e be ‘gwọlọ ọkwa-iruo ọsẹro’ avọ oghọghọ gbe isiuru omarokpotọ nọ a gwọlọ rọ gbodibo kẹ Jihova gbe ibe enọ e rọwo. (1 Timoti 3:1; 2 Ahwo Kọrint 1:24) Uzẹme, enọ i te re a jọ ekpako, a rẹ “sẹro uthuru Ọghẹnẹ [avọ unevaze,] orọnọ rọ kẹ erere nọ o re fou omovuọ họ, rekọ iroro nọ e gba kiete. Orọnọ wha re ru oma oruoro [wọhọ] enọ-iwuzou otu nọ ọrọ otọ rai hi, rekọ wha rẹ jọ oriruo kẹ uthuru na.”—1 Pita 5:1-4.

O Gwọlọ nọ Ma rẹ Jọ “Evaọ Udhedhẹ”

18. Ekwakwa vẹ a riẹ ziezi kpahe Isẹri Jihova?

¹⁸ Orọ urere, Pita ọ vuẹ omai nọ ma jọ “evaọ udhedhẹ.” Re ma ruẹse rria te ute nana, ma gwọlọ jọ evaọ udhedhẹ kugbe Jihova avọ erivẹ mai. Pita o fi ẹgba họ epanọ u w’uzou te re mai “ohwo ọ rọ uyoyou nọ o rẹ hiẹ hẹ you ohwo,” re ma jẹ yọrọ udhedhẹ kugbe ibe Ileleikristi mai. (1 Pita 2:17; 3:10, 11; 4:8; 2 Pita 1:5-7) Re ma yọrọ udhedhẹ mai, mai ohwo o re you ohwo hrọ. (Jọn 13:34, 35; Ahwo Ẹfẹsọs 4:1, 2) Uyoyou gbe udhedhẹ mai e rẹ mai dhesẹ oma via eva okenọ ma te bi ru ikokohọ akpọ-soso mai. Eva okokohọ nọ a ru evaọ Costa Rica evaọ 1999, eva e dha ohwo nọ ọ rẹ zẹ ebe-usi eva ogege arupre fikinọ Isẹri emotọ nọ i bi dede inievo nọ e ziọ okokohọ na a bi di ude eki riẹ no. Dede na, eva ẹdẹ avivẹ, o muẹrohọ uyoyou gbe udhedhẹ nọ u dhesẹ oma via eva oma osasa nọ a ro dede ahwo nọ a ziọ okokohọ na rehọ, dedenọ Isẹri emotọ na a riẹ rai vẹre he. Eva ẹdẹ urere na, ọnọ ọ rẹ zẹ ebe-usi na o te kuomagbe inievo na evaọ odederehọ na jẹ yare uwuhrẹ Ebaibol.

19. Fikieme u je w’uzou re ma le udhedhẹ kugbe ibe Ileleikristi?

¹⁹ Unevaze nọ ma be rọ rehọ udhedhẹ yeri kugbe inievo mai o rẹ sai kpomahọ epanọ ma be rehọ osegboja hẹrẹ ẹdẹ Jihova te gbe akpọ ọkpokpọ nọ ọ y’eyaa riẹ na. (Olezi 37:11; 2 Pita 3:13) Ma dae rehọ iẹe nnọ o rrọ bẹbẹ k’omai re ma jọ udhedhẹ kugbe ibe ọgegagọ mai jọ. Kọ ma sai roro nnọ ma ti lele iei rria dhedhẹ evaọ Aparadase? Otẹrọnọ ma ru oniọvo jọ thọ, jọ o vẹrẹ omai obọ re ‘ma ruẹrẹ họ kugbei.’ (Matiu 5:23, 24) Ere oruo o r’oja otẹrọnọ ma rẹ jọ udhedhẹ kugbe Jihova.—Olezi 35:27; 1 Jọn 4:20.

20. Oghẹrẹ vẹ u fo nọ ma re ro dhesẹ ‘ẹzi ohẹrẹ’?

²⁰ Kọ ma “be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ”? Isiuru ajọwha mai re ma ruẹ ekuhọ emuemu u re dhesẹ oma via ẹkwoma ẹfuọ nọ ma rẹ yọrọ eva akpọ ogbekuo nana. Ofariẹ, isiuru egaga nọ ma wo kpahe ẹtha ẹdẹ Jihova gbe uzuazọ eva otọ esuo Uvie riẹ u re dhesẹ oma via ẹkwoma iruẹru omarọkẹ Ọghẹnẹ mai. Yọ irẹro nọ ma te rọ rria evaọ akpọ ọkpokpọ udhedhẹ u re dhesẹ oma via evaọ oghẹrẹ nọ ma bi ro le udhedhẹ kugbe ibe egegagọ mai enẹna. Ẹkwoma idhere eyena, ma re dhesẹ inọ ma wo ‘ẹzi ohẹrẹ’ gbe nnọ ma “be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ.”

[Oruvẹ-obotọ]

Kọ Whọ Kareghẹhọ?

• Eme u dhesẹ re a “rẹro ẹtha ẹdẹ Ọghẹnẹ vẹrẹ vẹrẹ”?

• Ẹvẹ ma rẹ rọ rehọ uruemu mai dhesẹ ‘ẹzi ohẹrẹ’ via?

• Fikieme ‘uzuazọ omarọkẹ Ọghẹnẹ’ o rọ r’oja?

• Eme ma re ru hrọ re ma ruẹse jọ “ababọ epe hayo afuẹwẹ, rekọ [evaọ] udhedhẹ” eva aro Jihova?

[Uwoho nọ o rrọ ẹwẹ-obe avọ 9]

“Ẹzi ohẹrẹ” o re dhesẹ oma via evaọ iruẹru ẹfuọ

[Iwoho nọ e rrọ ẹwẹ-obe avọ 10]

Iruo usiuwoma ota Uvie na i re siwi uzuazọ

[Uwoho nọ o rrọ ẹwẹ-obe avọ 12]

Nọ ma be hẹrẹ ẹdẹ Jihova na, j’oma le udhedhẹ kugbe amọfa