2. Re ma jọ fuafo, iruemu vẹ ma rẹ whaha?

Ebaibol na ọ ta kẹ omai nọ ma “ru omamai fo no eware kpobi nọ i re zue oma gbe ẹzi.” (2 Ahwo Kọrint 7:1) Fikiere, ma rẹ daoma whaha oware kpobi nọ o rẹ raha ugboma hayo iroro mai. U fo nọ eware nọ ma bi roro e rẹ were Jihova, fikiere ma rẹ daoma re ma siọ ekpehre iroro ba. (Olezi 104:34) Ma rẹ jẹ daoma ta emamọ eme.—Se Ahwo Kọlọsi 3:8.

Eware efa jọ vẹ e rẹ sai ru nọ ma gbẹ jọ fuafo ho? U wo eware jọ nọ e rẹ sai gbe oma mai ku. Fikiere ma rẹ whaha eware wọhọ utaba use, isigareti ivovo, ubi-ure nọ a re se betel nut hayo ẹbe coca nọ a rẹ re, gbe imu egaga nọ a rẹ rehọ ugbẹrehọ. Ma tẹ whaha eware nana o rẹ lẹliẹ omai wo omokpokpọ je dhesẹ nọ ma wo adhẹẹ kẹ uzuazọ. Ma rẹ jẹ jọ fuafo evaọ uruemu nọ ma tẹ be whaha iruemu igbegbe wọhọ obọ nọ ohwo ọ rẹ rọ whrawhra ẹba obọriẹ gbe ifoto-ẹbẹba iriwo. (Olezi 119:37; Ahwo Ẹfisọs 5:5) O sae jọ bẹbẹ re ohwo o siobọno iruemu nana, rekọ Jihova ọ sai fiobọhọ kẹ owhẹ ru ere.—Se Aizaya 41:13.

5. Daoma re whọ siọ ekpehre iroro gbe iruemu ba

Se Ahwo Kọlọsi 3:5, kẹsena wha vẹ ta ẹme kpahe enọ nana:

• Ẹvẹ ma rọ riẹ nọ ifoto-ẹbẹba nọ a re rri, ifoto-ẹbẹba hayo eme oworu nọ a rẹ rọ ifonu vi, gbe obọ nọ ohwo ọ rẹ rọ whrawhra ẹba obọriẹ yọ iruemu igbegbe evaọ aro Jihova?

• Kọ who roro nọ u kiehọ nọ Jihova ọ rọ gwọlọ nọ ma jọ fuafo evaọ uruemu? Fikieme?

Wuhrẹ epanọ ohwo ọ sae rọ siọ ekpehre eware ba eroro. Kporo IVIDIO na.

IVIDIO: Ru Oware nọ U re Fiobọhọ Kẹ Owhẹ Jọ Fuafo (1:51)

Jesu ọ kẹ oriruo jọ ro dhesẹ nọ ma rẹ dawo oma mai kpobi re uruemu mai o sae jọ fuafo. Se Matiu 5:29, 30, kẹsena wha vẹ ta ẹme kpahe onọ nana:

• Dede nọ Jesu ọ be ta nọ ma vre ubiẹro hayo bru obọ mai no dẹẹ hẹ, ẹme riẹ na u dhesẹ nọ ma re ru oware jọ hrọ. Oware jọ vẹ ohwo ọ rẹ sai ru re ọ siọ ekpehre iroro ba eroro?b

Otẹrọnọ whọ be daoma re whọ siọ ikpehre eware ba eroro, riẹ nọ onana o be were Jihova gaga. Se Olezi 103:13, 14, kẹsena wha vẹ ta ẹme kpahe onọ nana:

• Otẹrọnọ whọ be daoma siọ ekpehre uruemu jọ ba, ẹvẹ oria Ebaibol nana o rọ tuduhọ owhẹ awọ re o gbẹ bẹ owhẹ no ho?

O tẹ make va owhẹ abọ, jọ o bẹ owhẹ hẹ!

Ohwo ọ sai roro nọ, ‘O jẹ va omẹ abọ no, kọ eme mẹ gbẹ be daoma kẹ?’ Rekọ roro kpahe onana: Nọ ohwo nọ ọ be dhẹ ohrẹ o te zoruẹ o je kie, orọnikọ u dhesẹ nọ ohrẹ na u kiekpei no ho, hayo ọ rẹ wariẹ nyai muhọ no obemu ze he? Epọvo na re, ekpehre uruemu na o tẹ make va owhẹ abọ, orọnikọ u dhesẹ nọ whọ te sae siọ ekpehre uruemu na ba ha ha. Yọ orọnikọ omodawọ ra kpobi uvrẹvru hu. O sae via ere ẹsejọ nọ whọ gbẹ be thuẹhọ iẹe na. O bẹ owhẹ no ho! Jihova o ti fiobọhọ kẹ owhẹ siobọnoi riẹriẹriẹ.