UWUHRẸ AVỌ 36
Ru Eware Kpobi avọ Oruọzewọ
Ohwo kpobi ọ rẹ gwọlọ wo egbẹnyusu nọ e rrọ ahwo oruọzewọ, hayo ahwo uzẹme. Ere Jihova ọ gwọlọ mi egbẹnyusu riẹ re. Rekọ onana o be hae jọ bẹbẹ evaọ akpọ nana nọ ahwo buobu a be jọ ta uzẹme he na. Kọ didi irere i re te ohwo nọ o bi ru eware kpobi avọ oruọzewọ?
1. Fikieme u ro wuzou gaga re ma jọ ahwo oruọzewọ?
Ma tẹ be ta uzẹme kẹ amọfa yọ ma bi dhesẹ nọ ma you Jihova jẹ be kẹe adhẹẹ. Kareghẹhọ nọ: Jihova ọ riẹ oware kpobi nọ ma bi roro je ru. (Ahwo Hibru 4:13) Ọ rẹ riẹ nọ ma tẹ be ta uzẹme, yọ o rẹ were iẹe. Ebaibol na ọ ta nọ: “Ohwo eviẹhọ ọ rẹ tọtọ Jihova oma, rekọ o wo usu okpekpe kugbe enọ i kiete.”—Itẹ 3:32.
2. Eware jọ vẹ ma rẹ jọ dhesẹ kẹdẹ kẹdẹ nọ mai yọ ahwo oruọzewọ?
Jihova ọ gwọlọ nọ ma “ta uzẹme kẹ ohwohwo.” (Zẹkaraya 8:16, 17) Eme onana u dhesẹ? Nọ ma tẹ be ta ẹme kẹ ahwo uviuwou mai, ahwo nọ ma gbe bi ru iruo, inievo ukoko na, hayo ahwo egọmeti, ma rẹ ta ọrue he hayo vuẹ ae eware nọ e gba ha ha. Ohwo oruọzewọ o re tho uji hi hayo fi amọfa iwhayo ho. (Se Itẹ 24:28 gbe Ahwo Ẹfisọs 4:28.) Ọ rẹ hwa osa-uzou kpobi nọ u fo nọ ọ rẹ hwa. (Ahwo Rom 13:5-7) Ma re “ru eware kpobi avọ oruọzewọ” evaọ eware nana gbe efa.—Ahwo Hibru 13:18.
3. Irere vẹ i re te ohwo oruọzewọ?
Nọ amọfa a tẹ riẹ omai nọ ma rẹ ta uzẹme, a re fievahọ omai. Ma rẹ rọ ere ru udu ahwo ukoko na nọ a wọhọ uviuwou ovo na te otọ. Ma re wo obruoziẹ-iroro ọfuafo. Oruọzewọ mai o rẹ sae jẹ “whẹ erru họ uwuhrẹ Osiwi mai, Ọghẹnẹ,” u ve si ahwo nọ a rrọ ukoko na ha ziọ egagọ uzẹme.—Taitọs 2:10.
GBE WUHRẸ EWARE EFA
Wuhrẹ epanọ oruọzewọ ra u re ro ru eva were Jihova gbe owhẹ omara, gbe epanọ whọ sae rọ jọ ohwo oruọzewọ evaọ kabọ kabọ uzuazọ.
4. Ohwo uzẹme ọ rẹ were Jihova
Se Olezi 44:21 gbe Malakae 3:16, kẹsena wha vẹ ta ẹme kpahe enọ nana:
Fikieme who ro roro nọ o rrọ oware ugheghẹ re ma roro nọ ma sae ko uzẹme na dhere?
Ẹvẹ who roro nọ Jihova o re rri rie nọ ma tẹ ta uzẹme makọ okenọ o rrọ bẹbẹ gaga kẹ omai?
Emọ a re ru eva were ọsẹgboni rai nọ a tẹ be ta uzẹme. Ere ọvona ma re ru eva were Jihova nọ ma tẹ be ta uzẹme
5. Ru eware avọ oruọzewọ hayo ta uzẹme ẹsikpobi
Ahwo buobu a roro nọ o lọhọ họ re a ta uzẹme ẹsikpobi. Rekọ rri oware nọ u ro fo re ma ta uzẹme ẹsikpobi. Kporo IVIDIO na.
Se Ahwo Hibru 13:18, kẹsena wha vẹ ta ẹme kpahe epanọ ma sae rọ jọ ahwo oruọzewọ evaọ . . .
uviuwou mai.
obọ iruo hayo isukulu.
eware efa sa-sa.
6. Oruọzewọ o rẹ wha eghale se omai
Oghẹrẹ ebẹbẹ jọ e sai te omai fikinọ ma rrọ ahwo oruọzewọ. Rekọ ukuhọ riẹ ma rẹ ruẹ nọ oware nọ o mai woma kpaobọ oye. Se Olezi 34:12-16, kẹsena wha vẹ ta ẹme kpahe onọ nana:
Ẹvẹ uruemu oruọzewọ u re ro ru uzuazọ ra woma ziezi?
Orọo ọzae-avọ-aye nọ a rẹ ta uzẹme o rẹ jọ gaga
Ọga-iruo o re fievahọ ahwo iruo riẹ nọ a rẹ ta uzẹme
Ahwo egọmeti a rẹ rọ emamọ ubiẹro rri ahwo nọ a rẹ ta uzẹme evaọ orẹwho rai
AHWO JỌ A RẸ TA NỌ: “Nọ ohwo ọ tẹ ta ọmọrue u yoma ha.”
Fikieme who ro roro nọ erue kpobi e rẹ dha Jihova eva?
EME WHO WUHRẸ NO?
Jihova ọ gwọlọ nọ egbẹnyusu riẹ a rẹ jọ ahwo oruọzewọ hayo ta uzẹme evaọ oware kpobi.
Ọkiẹkpemu
Eware jọ vẹ ma re ru ro dhesẹ nọ mai yọ ahwo oruọzewọ?
Fikieme o rọ rrọ oware ugheghẹ re ma roro nọ ma sae ko uzẹme na dhere?
Fikieme whọ rọ gwọlọ jọ ohwo oruọzewọ evaọ ẹsikpobi?
KIẸ KPAHE EFA
Ẹvẹ esẹgbini a sai ro wuhrẹ emọ rai re a jọ ahwo nọ a rẹ ta uzẹme?
Didi eghale i re noi ze nọ ma te bi koko eyaa mai?
Se re whọ ruẹ sọ o gba omai họ nọ ma rẹ hwa osa-uzou o tẹ make rọnọ a be re igho na no.
“Kọ O Gbahọ nọ Whọ rẹ Hwa Osa-Uzou?” (Uwou-Eroro Na, Azie 1, 2011)
Eme ọ wọ ọzae jọ nọ o re fi iwhayo nwene uzuazọ riẹ ọ tẹ siọ iwhayo ba efi?
“Mẹ Ruẹ Vuhumu nọ Jihova Ọ Vọ avọ Ohrọ gbe Erọvrẹ” (Uwou-Eroro Na, Ahrẹ 1, 2015)