‘Usiwo kẹ Uhwohwo Ra’

ARỌWO nọ eware idhọvẹ iroro wọhọ ozodhẹ, ọkora, ihri-eriọ, ẹgo, egrẹ, gbe abe-ọriọ e be wha eyao ohwo-akpọ buobu ze. Ma te roro kpahe onana, ẹvẹ eme Ebaibol na e kẹ omosasọ te inọ ‘ozodhẹ ỌNOWO na’ yọ ‘usiwo kẹ uhwohwo ra, eri kẹ igbegbe ra’!—Itẹ 3:7, 8.

Igbegbe na họ ekpọ nọ i re kru oma na dikihẹ. Fikiere, Ebaibol na ọ rehọ ubiẹme na “igbegbe” ro dhesẹ ugboma ohwo—maero abọ nọ o re kpomahọ iroro na. Kọ ẹvẹ ozodhẹ ỌNOWO na o rọ rrọ ‘usiwo kẹ uhwohwo ra’?

Egba eriariẹ Ebaibol a wo ohẹriẹ evaọ iroro rai kpahe ‘uhwohwo’ nọ a fodẹ evaọ uhie-ẹme onana. Ọtota jọ ọ ta nọ fikinọ o rọ “oria udevie ugboma na,” ‘uhwohwo’ na o sai dikihẹ kẹ ekwakwa oma na nọ i wuzou kpobi. Ọwena ọfa ọ ta nọ ẹme na ‘uhwohwo’ o sai dikihẹ kẹ uwohi nọ u re kru ọmọ nọ ọ r’eva, wọhọ onọ a t’ẹme te eva Izikiẹl 16:4 na. O tẹ rọ ere, koyehọ Itẹ 3:8 u bi fiẹgbahọ ẹgwọlọ mai kẹ ẹrorọsuọ Ọghẹnẹ riẹriẹriẹ—wọhọ epanọ ọmọ nọ ọ r’eva ọ rẹ rẹroso oni riẹ riẹriẹriẹ kẹ oma-okuọ na. Ghele na, ẹjiroro ọfa họ ‘uhwohwo’ evaọ etenẹ o sai dikihẹ kẹ iwo gbe iriẹ oma na. Evaọ eme nọ e wariẹ owọ onana họ, o sae jọ nọ a be rọ abọ enana rọ wawọ “igbegbe” na—abọ nọ ọ mae ga evaọ ugboma na.

Oghẹrẹ nọ uzedhe otofa na o rọ kpobi, oware jọ u muẹro: Edhesẹ ozodhẹ Jihova họ edhere areghẹ. Ẹnya lele itee Ọghẹnẹ o sae zọhọ fihọ omakpokpọ mai enẹna. Maero, o rẹ sae wha aruoriwo Jihova s’omai, onọ u re su kpohọ uzuazọ ebẹdẹ bẹdẹ avọ omakpokpọ ogbagba—te evaọ ugboma gbe iroro—evaọ akpọ ọkpokpọ riẹ nọ ọ be tha.—Aizaya 33:24; Eviavia 21:4; 22:2.

[Ọnọ o wo uwoho nọ o rrọ ẹwẹ-obe avọ 32]

Dr. G. Moscoso/SPL/Photo Researchers