“Urere Na”​—Eme U Dhesẹ?

Eme ọ rẹ ziọ owhẹ iroro nọ who te yo nọ “Urere na o kẹlino?” Kọ utho ulogbo jọ nọ o te tehe akpọ na je kpe ahwo kpobi no oye o rẹ ziọ owhẹ iroro? Manikọ oware imuozọ ofa jọ hayo ẹmo akpọ avọ esa? Udu o rẹ sai bru ahwo jọ nọ a te roro kpahe oware utioye na, rekọ o rẹ sai fou amọfa họ ehwẹ hayo tubẹ rehọ iẹe jijehwẹ.

Ebaibol na ọ ta nọ: “Urere na” o “te ze.” (Matiu 24:14) A jọ oria ofa evaọ Ebaibol na sei “ẹdẹ ologbo Ọghẹnẹ” gbe “Amagẹdọn.” (Eviavia 16:14, 16) Uzẹme riẹ họ, egagọ buobu a bi wuhrẹ ọvuọ oriẹ kpahe oware nọ urere na o rrọ, fikiere ahwo buobu a gbẹ riẹ onọ a rẹ rehọ họ. Rekọ Ebaibol na ọ ta uzẹme na kpahe urere na kẹ omai, oware nọ urere na u dhesẹ gbe oware nọ u dhesẹ hẹ. Ebaibol na o te je fiobọhọ kẹ omai riẹ inọ urere na o kẹle no. Yọ mai woma na, Ebaibol na ọ vuẹ omai oware nọ ma re ru re ma sae zọ! Rekọ, ma kake ta kpahe avro sa-sa nọ ahwo a wo kpahe urere na gbe oware nọ urere na u gine dhesẹ. Eme Ebaibol na ọ ta nọ “urere na” u gine dhesẹ?

1. ORỌNIKỌ URERE NA YỌ AKPỌ NỌ A TE RỌ ERAE RAHA HA.

   Ebaibol na ọ ta nọ: “[Ọghẹnẹ o] fi etọhotọ akpọ na họ, re e seba ekpoho.” (Olezi 104:5) Oria Ebaibol yena gbe eria efa evaọ Ebaibol na e ta nọ Ọghẹnẹ ọ te raha otọakpọ na no ho, yọ ọ te kẹe uvẹ re ahwo-akpọ a raha iẹe he—Ọtausiuwoma Na 1:4; Aizaya 45:18.

2. ORỌNIKỌ URERE NA YỌ OWARE NỌ O TE VIA ABABỌ OMAA HA.

   Ebaibol na ọ ta nọ Ọghẹnẹ ọ ma omaa okenọ urere na o te rọ ze no, inọ: “Rọ kpahe ẹdẹ yena hayo auwa na, ohwo ọvo ọ riẹ hẹ, makọ ikọ-odhiwu hayo Ọmọ na rekọ Ọsẹ na. Wha muẹrohọ otọ ẹsikpobi, wha jaja aro vi ẹsikpobi, keme wha riẹ oke nọ a fihọ na ha.” (Mak 13:32, 33) Avro ọ riẹ hẹ inọ, Ọghẹnẹ (“Ọsẹ na”) o wo oke nọ o fihọ nọ urere na o te rọ ze.

3. ORỌNIKỌ AHWO-AKPỌ HAYO EWARE JỌ NỌ I TI KIE NO OBỌ EHRU ZE EYE E TE RAHA AKPỌ NA HA.

   Kọ eme ọ te raha akpọ na? Obe Eviavia 19:11 o ta nọ: “Mẹ ruẹ odhiwu nọ o rovie, gbe anyenya ọfuafo jọ. Odẹ ọnọ ọ keria ehru riẹ họ Ọnọ A re Fievahọ gbe Ọrọ Uzẹme.” Owọ avọ 19 o tẹ ta nọ: “Mẹ tẹ ruẹ arao ojihẹ na gbe ivie otọakpọ na avọ egbaẹmo rai nọ a kokohọ re a lele ọnọ ọ keria anyenya na avọ egbaẹmo riẹ fi ẹmo.” (Eviavia 19:11-21) Dede nọ eware eka a ro dhesẹ eware nọ e be te via evaọ oria Ebaibol nana, ma wo otoriẹ rai vevẹ, inọ Ọghẹnẹ ọ te rehọ egbaẹmo ikọ-odhiwu riẹ rọ guọghọ ewegrẹ riẹ no.

1. EKUHỌ EGỌMETI AHWO-AKPỌ.

   Ebaibol na ọ ta nọ: “Evaọ ezi ivie eyena, Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.” (Daniẹl 2:44) Wọhọ epanọ ma jọ obehru ta vẹre no na, a te raha “ivie otọakpọ na avọ egbaẹmo rai” no, enọ i “kokohọ re a lele ọnọ ọ keria anyenya na avọ egbaẹmo riẹ fi ẹmo.”—Eviavia 19:19.

2. EKUHỌ ẸMO, OZIGHI GBE OKIENYẸ.

   Ọghẹnẹ ‘o ti ru ẹmo serihọ ri te oka akpọ.’ (Olezi 46:9) “Keme okiẹrẹe ọ rẹ te ria otọ na, ahwo oruọzewọ a rẹ te ria ae eva; rekọ a re ti kpe ahwo omuomu no otọ na, gbe ahwo [ẹgwae] omuomu a re ti si ai no otọ na.” (Itẹ 2:21, 22) “Rri! Me bi ru eware kpobi họ ekpokpọ.”—Eviavia 21:4, 5.

3. EKUHỌ EGAGỌ ERUE.

   “Eruẹaro na a be ruẹaro erue, izerẹ na a be rehọ iroro obọ rai suẹ ahwo . . . rekọ ẹvẹ who re ti ruẹ nọ ẹdẹ urere u te te?” (Jerimaya 5:31) “Ahwo buobu a rẹ te ta kẹ omẹ ẹdẹ yena nọ: ‘Olori, Olori, kọ ma gbẹ rọ odẹ ra ruẹaro jẹ rọ odẹ ra le idhivẹri jẹ rọ odẹ ra ru iruo igbunu buobu?’ Ghele na, mẹ rẹ te ta kẹ ae nọ: ‘Mẹ riẹ owhai vievie he! Wha no aro mẹ no, whai enọ i re koko uzi hi’”—Matiu 7:21-23.

4. EKUHỌ AHWO NỌ A BE LẸLIẸ EYOMA VIHỌ JE BI WOBỌ EVAỌ IRUẸRU AKPỌ NA.

   Jesu Kristi ọ ta nọ: “Fiki onana a ti ro gu ahwo ẹdhọ: inọ elo na ọ ziọ akpọ na, rekọ ahwo a you ebi viukpọ elo na, keme iruo rai e rrọ muomu.” (Jọn 3:19) Ebaibol na ọ kake ta kpahe oghẹrẹ nọ Ọghẹnẹ ọ rọ rehọ ame raha akpọ na evaọ oke Noa. “Ẹkwoma eware yena a rọ raha akpọ oke yena okenọ ame o ku ei. Rekọ ẹkwoma ẹme ọvo yena, a vu idhiwu gbe otọakpọ nọ e rrọ enẹna wa kẹ erae je bi vu ai wa bọo ẹdẹ ẹdhoguo gbe ẹdẹ nọ a te rọ raha ahwo nọ a riẹ Ọghẹnẹ hẹ.”—2 Pita 3:5-7.

Muẹrohọ nọ a rọ “ẹdẹ ẹdhoguo gbe ẹdẹ nọ a te rọ raha ahwo nọ a riẹ Ọghẹnẹ hẹ” wawọ “akpọ oke yena,” koyehọ akpọ oke Noa. Eme họ akpọ nọ a raha evaọ oke yena? A raha otọakpọ na kufiẹ hẹ; “ahwo nọ a riẹ Ọghẹnẹ hẹ,” koyehọ ewegrẹ a “raha” kufiẹ evaọ oke yena. Evaọ “ẹdẹ ẹdhoguo” Ọghẹnẹ nọ ọ be tha na, ahwo nọ a ru omarai họ ewegrẹ Ọghẹnẹ ae a te raha kufiẹ re. Rekọ Ọghẹnẹ o ti siwi egbẹnyusu riẹ wọhọ epanọ o siwi Noa avọ uviuwou riẹ na.—Matiu 24:37-42.

Dae jọ iroro ra ruẹ oghẹrẹ nọ akpọ na ọ te jọ nọ Ọghẹnẹ o te si enọ e be wha ethube ziọ akpọ na noi no! Uzẹme riẹ họ, ovuẹ Ebaibol na kpahe urere na yọ emamọ usi orọnikọ ekpehre usi hi. Rekọ o rẹ sai gbe owhẹ unu nọ: ‘Kọ Ebaibol na ọ vuẹ omai uzedhe oke nọ urere na o te rọ ze? Kọ o sae jọnọ o kẹle no? Ẹvẹ mẹ sae rọ zọ?’