“Wha . . . Muẹrohọ Eware Nọ E Mae R’oja”

1, 2. Eruẹaruẹ vẹ kpahe edẹ urere na o jọ oware isiuru kẹ ilele Jesu, kọ fikieme?

PITA, Jemis, Jọn, gbe Andru a rrọ kugbe Olori rai. Ẹme nọ Jesu ọ ta kẹ ae inọ a te raha etẹmpol na o gbe bi gbe ae unu. (Mak 13:1-4) Fikiere a tẹ nọ inọ: “Ta kẹ omai, oke ovẹ eware nana ete via, gbe eme ọ rẹ te jọ oka ẹtha ra gbe urere akpọ na?” (Mat. 24:1-3) Jesu ọ tẹ vuẹ ae eware nọ e te via evaọ akpọ na nọ e te wha inwene ilogbo ze, nọ e te jẹ jọ oka ọ edẹ urere akpọ omuomu Setan. Oware jọ nọ ọ fodẹ u si ilele riẹ urru gaga. Nọ Jesu ọ fodẹ ẹmo, ohọo, umuomu, gbe eware iyoma itieye efa nọ e te via no, ọ tẹ fodẹ oware uwoma jọ nọ o te jọ usu oka edẹ urere na. Ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Mat. 24:7-14.

² Ilele Jesu a reawere iruo usiuwoma ota na kugbe Olori rai, Jesu Kristi. (Luk 8:1; 9:1, 2) Ẹsejọhọ a kareghẹhọ nọ Jesu ọ ta nọ: “Ivuẹvu na i ghine bu, rekọ iruiruo e rẹ kakao; fikiere wha lẹ Olori ivuẹvu na re o vi iruiruo kpo obọ ivuẹvu riẹ.” (Luk 10:2) Rekọ ẹvẹ a te sae rọ ta usiuwoma kẹ “akpọ na kpobi” je se “isẹi kẹ erẹwho akpọ na kpobi”? Bovẹ iruiruo na i ti noze? Dodokọ ilele na a rẹ sae kparo ruẹ oware nọ o te jọ obaro via nọ a jọ kugbe Jesu ẹdẹ yena. U he ti gbe ai unu gaga nọ a hae ruẹ oghẹrẹ nọ ẹme nọ ọ rrọ obe Matiu 24:14 na o bi ro rugba.

 3. Ẹvẹ ẹme nọ ọ rrọ obe Luk 21:34 o bi ro rugba nẹnẹ, kọ enọ vẹ u fo nọ ma nọ omamai?

³ Ma be rria etoke nọ eruẹaruẹ Jesu nana i bi ro rugba. Ima ahwo buobu a bi kuomagbe ta usiuwoma Uvie na evaọ akpọ-soso. (Aiz. 60:22) Rekọ Jesu ọ ta nọ o te jọ bẹbẹ kẹ ahwo jọ re a tẹrovi iruo Uvie na evaọ edẹ urere na. Eware akpọ na i ti ru ai “zoruẹ.” (Se Luk 21:34.) Ma be ruẹ orugba ẹme yena re. Otujọ evaọ ukoko na a gbẹ be rọ iruo Uvie na karo ho. Ma rẹ sae ruẹ onana evaọ eware nọ a bi le, eware wọhọ iruo, isukulu ikpehru, ekwakwa efe, gbe oke nọ a be raha fihọ arozaha oma-uru-jaja gbe eware ẹkeriotọ omawere. Ebẹbẹ uzuazọ ikẹdẹ kẹdẹ gbe awa-ọruọ akpọ na i bi ru amọfa si uke kpemu. Nọ omara nọ: ‘Ẹvẹ mẹ be daoma te? Eme eware nọ mẹ salọ i bi dhesẹ nọ mẹ rọ karo?’

 4. (a) Eme Pọl ọ lẹ kpahe Ileleikristi obọ Filipai, kọ fikieme? (b) Eme ma te ta kpahe evaọ uzoẹme nana gbe onọ o rrọ aro na, kọ fikieme?

⁴ Ileleikristi ikpe-udhusoi ọsosuọ a jẹ daoma gaga re a sae rọ egagọ Ọghẹnẹ karo. Fikiere Pọl ọ ruẹ nọ u fo re ọ lẹ kpahe inievo obọ Filipai re a ‘muẹrohọ oware nọ o mae r’oja.’ (Se Ahwo Filipai 1:9-11.) Wọhọ Pọl ukọ na, inievo buobu a jẹ “ta ẹme Ọghẹnẹ ababọ ozọ” oke yena. (Fil. 1:12-14) Epọvo na, mai idibo Ọghẹnẹ buobu ma be ta usiuwoma na avọ udu nẹnẹ. O make rrọ ere na, kọ ma sai gbe ru viere nẹnẹ evaọ iruo nana nọ i wuzou gaga na nọ ma te roro kpahe eware sa-sa nọ ukoko Ọghẹnẹ u bi ru? Ee. Evaọ uzoẹme nana, ma te ta kpahe ọruẹrẹfihotọ nọ Jihova o ru no, re ọ ruẹsi fi obọ họ ru ẹme Matiu 24:14 na gba. Eme ukoko riẹ o tẹrovi, kọ ẹvẹ onana nọ ma rẹ riẹ o sae rọ k’omai gbe ahwo uviuwou mai ajọwha? Evaọ uzoẹme nọ o rrọ aro na, ma te ta kpahe oware nọ o rẹ sai fi obọ họ kẹ omai daji jẹ nya lele ọruẹrẹfihotọ ukoko Ọghẹnẹ.

5, 6. (a) Fikieme Jihova o ro dhesẹ abọ odhiwu ọrọ ukoko riẹ? (b) Eme Izikiẹl ọ ruẹ evaọ eruẹaruẹ?

⁵ Eware buobu e riẹ nọ Jihova ọ salọ nọ o re fiba Ebaibol na ha. Wọhọ oriruo, ọ ta oghẹrẹ nọ ẹvori na hayo ekwakwa ehrugbakpọ na i bi ro ru iruo ho, dede nọ evuẹ itienana e hae te jọ oware isiuru k’omai gaga. Ukpoye, Jihova ọ kẹ omai evuẹ nọ ma sae rọ riẹ ẹjiroro riẹ je yeri uzuazọ mai lele oreva riẹ. (2 Tim. 3:16, 17) O rrọ oware evawere gaga inọ Ebaibol na ọ ta eware jọ kpahe abọ odhiwu ọrọ ukoko Jihova nọ a rẹ ruẹ hẹ. O rẹ sasa omai oma nọ ma te se oware nọ Aizaya, Izikiẹl, gbe Daniẹl a kere kpahe ọruẹrẹfihotọ ukoko obọ odhiwu Jihova gbe epanọ Jọn o dhesẹ i rie evaọ obe Eviavia. (Aiz. 6:1-4; Izik. 1:4-14, 22-24; Dan. 7:9-14; Evia. 4:1-11) O wọhọ ẹsenọ Jihova o go ohọ unuẹthẹ obọ odhiwu họ akotọ re ma dina ruẹ oware nọ o rrọ obei. Fikieme o ro ru omai riẹ eware nana?

⁶ Jihova ọ gwọlọ nọ ma hae kareghẹhọ nọ ma rrọ ukoko ehrugbakpọ riẹ. Eware buobu e riẹ nọ Jihova o bi ru re ọ ruẹsi ru ẹjiroro riẹ gba nọ ma rẹ ruẹ hẹ. Wọhọ oriruo, Izikiẹl ọ jọ eruẹaruẹ ruẹ abọ ukoko Jihova nọ o rrọ obọ odhiwu, onọ a rehọ akẹkẹ ologbo dhesẹ. Akẹkẹ nana ọ rẹ dhẹ vẹrẹ gaga yọ ọ sae rẹriẹ kpohọ ofẹ kpobi idudhe. (Izik. 1:15-21) Akẹkẹ na ọ rẹ dhẹ thabọ gaga nọ etẹ riẹ i te ghelie kurẹriẹ ẹsiẹvo. Izikiẹl ọ tẹ jẹ ruẹ ẹmẹvo Ọnọ ọ be dhẹ akẹkẹ na. Izikiẹl ọ ta nọ: “Nọ umuo eku riẹ kpehru o jọ wọhọ ẹroo nọ o bi lo nwranwranwra wọhọ ebrerae, nọ umuo eku riẹ kpotọ o tẹ jọ wọhọ elo erae nọ eware riẹ e họ. . . . O jọ wọhọ elo oruaro ỌNOWO na.” (Izik. 1:25-28) Avro ọ riẹ hẹ, eruẹaruẹ nana i gbe Izikiẹl unu gaga. Ọ ruẹ Jihova nọ ọ be rọ ẹzi ọfuafo riẹ kpọ ukoko riẹ. Akẹkẹ nana nọ o dikihẹ kẹ abọ odhiwu ọrọ ukoko Jihova na ọ be nyaharo.

 7. Ẹvẹ eruẹaruẹ nọ Jihova o dhesẹ kẹ Daniẹl na i ro ru omai fievahọ Jihova gbe Jesu Kristi?

⁷ Daniẹl ọ ruẹ eware buobu nọ i re ru omai fievahọ Jihova gbe Jesu Kristi. A kẹ riẹ uvẹ nọ ọ rọ ruẹ “ọnọ ọ rọ no oke anwae ze,” koyehọ Jihova nọ ọ keria agbara Uvie avọ ebrerae. Agbara-Uvie na ọ rrọ ehru etẹ. (Dan. 7:9) Jihova ọ gwọlọ nọ Daniẹl ọ rọ ẹro ruẹ inọ ukoko Riẹ o be nyaharo je bi ru ẹjiroro Riẹ gba. Daniẹl ọ tẹ jẹ ruẹ ọnọ ọ “wọhọ ọmọ ohwo,” Jesu nọ a bi ro mu ọnowuzou abọ otọakpọ ọrọ ukoko Jihova. Orọnikọ umutho ikpe jọ esuo okiẹrẹe Kristi o ti kri te he. “Isuẹsu riẹ e rẹ jọ bẹdẹ bẹdẹ, o nọ u re re he, uvie riẹ họ onọ o rẹ raha ha.” (Dan. 7:13, 14) Oma o be wọ omai fievahọ Jihova je wo ovuhumuo kẹ eware nọ o bi ru. Jihova ọ rehọ “isuẹsu gbe oruaro gbe uvie” kẹ Jesu, Ọmọ riẹ nọ a dawo jẹ ruẹ nọ o te. Jihova o fievahọ Ọmọ riẹ. Fikiere ma sai fievahọ isuẹsu Jesu Kristi re.

 8. Ẹvẹ eware nọ Jihova o dhesẹ kẹ Izikiẹl gbe Aizaya e jarai oma, kọ eme u fo nọ e rẹ wọ omai ru?

⁸ Ẹvẹ u fo nọ eware nana nọ ma riẹ kpahe abọ odhiwu ọrọ ukoko Jihova u re kpomahọ omai? Wọhọ Izikiẹl, oware nọ Jihova o bi ru, u mu omai urirẹ. (Izik. 1:28) Ma te roro didi kpahe ukoko Jihova, o rẹ wọ omai jẹ ọkpọ owọ nọ Aizaya ọ jẹ. Okenọ uvẹ u rovie kẹe re ọ vuẹ amọfa kpahe eware nọ Jihova o bi ru, o si uke kpemu hu. (Se Aizaya 6:5, 8.) Aizaya o wo evaifihọ nọ Jihova o ti fi obọ họ kẹe fi ebẹbẹ nọ ọ nyaku kpobi kparobọ. Ere ọvona u fo nọ ẹmẹvo abọ odhiwu ọrọ ukoko Ọghẹnẹ nọ ma ruẹ na o rẹ wọ omai ru. O rẹ kẹ omai ajọwha gaga nọ ma te roro kpahe oghẹrẹ nọ ukoko Ọghẹnẹ o be rọ nyaharo gbe epanọ o tẹrovi oreva Jihova.

9, 10. Fikieme ọruẹrẹfihotọ abọ otọakpọ ukoko Ọghẹnẹ u ro wuzou?

⁹ Jihova ọ rehọ ẹkwoma Jesu ru ọruẹrẹfihotọ evaọ otọakpọ nọ u bi ru iruo kugbe abọ ukoko Jihova nọ o rrọ obọ odhiwu. Fikieme o rọ gwọlọ nọ ọruẹrẹfihotọ jọ ọ rẹ jọ otọakpọ re a sai ru iruo nọ a fodẹ evaọ obe Matiu 24:14 na gba? Joma ta kpahe ẹjiroro esa.

¹⁰ Orọ ọsosuọ, Jesu ọ ta nọ ilele riẹ a te ta usiuwoma na “rite ọnyaba akpọ na.” (Iruẹru 1:8) Orọ avivẹ, re a sai wuhrẹ amọfa ẹme Ọghẹnẹ jẹ rẹrote ahwo nọ a ti ru iruo nana, o gwọlọ ọruẹrẹfihotọ. (Jọn 21:15-17) Orọ avesa, o gwọlọ nọ a re ru ọruẹrẹfihotọ re ahwo nọ a be ta usiuwoma na a kuomagbe evaọ oria nọ a rẹ jọ gọ Ọghẹnẹ je wuhrẹ epanọ a sai ro ru iruo na. (Hib. 10:24, 25) Enana kpobi i re mu romavia ha. O gwọlọ nọ ilele Jesu a re wo obọdẹ ọruẹrẹfihotọ nọ a sai ro ru eware nana kpobi.

11. Ẹvẹ ma re ro dhesẹ nọ ma be rọ uketha kẹ eruẹrẹfihotọ ukoko Jihova?

¹¹ Ẹvẹ ma sai ro dhesẹ nọ ma be rọ uketha kẹ eruẹrẹfihotọ ukoko Jihova? Edhere jọ nọ o wuzou gaga nọ ma sai ro ru ere họ, ma re fievahọ ahwo nọ Jihova gbe Jesu a ro mu re a rẹrote iruo usiuwoma ota na. Evaọ akpọ inẹnẹ, eware buobu e rẹ gwọlọ rehọ oke inievo nọ a ro mu re a rẹrote iruo usiuwoma ota na. O make rrọ ere na, ugogo oware vẹ abọ otọakpọ ukoko Jihova o tẹrovi?

12, 13. Ẹvẹ ekpako ukoko a bi ro ru iruo rai, kọ ẹvẹ onana o rọ rrọ uduotahawọ k’owhẹ?

¹² A rehọ ekpako ukoko nọ i wo eriariẹ mu evaọ eria sa-sa akpọ na re a rẹrote jẹ kobaro evaọ iruo usiuwoma ota Uvie na. Fikiere inievo nana a tẹ gwọlọ ru oware jọ, a rẹ gwọlọ ohrẹ Ebaibol, ‘onọ o rẹ jọ ukpẹ kẹ awọ rai gbe elo kẹ edhere rai,’ yọ a rẹ lẹ gaga kẹ ọkpọvio Jihova.—Ol. 119:105; Mat. 7:7, 8.

¹³ Wọhọ enọ e jẹ kobaro evaọ iruo na evaọ ikpe-udhusoi ọsosuọ, ekpako Ileleikristi nọ e be kobaro nẹnẹ a be roma kpobi kẹ iruo “usiuwoma” ota na. (Iruẹru 6:4) Eva e be were ae gaga fiki ẹnyaharo iruo usiuwoma ota na evaọ oborai gbe eria efa sa-sa akpọ na. (Iruẹru 21:19, 20) A bi fi izi buobu họ evaọ ukoko Ọghẹnẹ hẹ. Ukpoye, a re lele ọkpọvio Ikereakere na gbe ẹzi Ọghẹnẹ nọ a te bi ru eruẹrẹfihotọ nọ a rẹ rọ wha iruo usiuwoma ota na haro. (Se Iruẹru 15:28.) Ekpako nana a be rọ enẹ fi emamọ oriruo h’otọ kẹ inievo nọ e rrọ ukoko rai.—Ẹf. 4:11, 12.

14, 15. (a) Eruẹrẹfihotọ vẹ a ru nọ a be rọ tha iruo usiuwoma ota na uke evaọ akpọ-soso? (b) Ẹvẹ who rri uvẹ-ọghọ nọ who bi ro w’abọ evaọ iruo usiuwoma ota na?

¹⁴ Iruo jọ nọ inievo jọ a rrọ ukoko na ru nọ amọfa a rẹ ruẹ hẹ họ, ebe nọ a bi kere, iwuhrẹ sa-sa gbe ikokohọ nọ a be ruẹrẹhọ. U te no ere no, inievo buobu a bi ru iruo t’aso t’uvo re a ruẹ nọ a fa ebe fihọ evẹrẹ nọ i bu te egba ezeza (600) re ahwo a sai wuhrẹ kpahe ‘iruo urirẹ Ọghẹnẹ’ evaọ ẹvẹrẹ obọrai. (Iruẹru 2:7-11) Izoge inievo emetẹ gbe emezae a bi ru iruo evaọ oria nọ a rẹ jọ rọ ijini printi ebe mai gbidi gbidi. Kẹsena a vẹ wha ebe nana kpohọ ikoko sa-sa nọ e rrọ eria avọ eria akpọ na.

¹⁵ A ru eruẹrẹfihotọ sa-sa nọ i re fi obọ họ k’omai tẹrovi iruo usiuwoma ota na evaọ ukoko mai. Wọhọ oriruo, inievo buobu a fialoma via kẹ iruo ebabọ Egwa Uvie gbe Egwa Ikokohọ. A bi je fi obọ họ kẹ ahwo nọ eware okpẹtu e via kẹ, hayo otu nọ ọ be mọ. A bi ru ọruẹrẹfihotọ kẹ ikokohọ, je bi wuhrẹ inievo evaọ isukulu sa-sa nọ e rrọ ukoko na. Enana yọ umutho eware nọ inievo na a bi ru nọ amọfa a rẹ nwane riẹ kpahe tere he. Ẹjiroro vẹ a bi ro ru iruo nana kpobi? Re a sae wha iruo usiuwoma ota na haro, je fi obọ họ kẹ inievo nọ e rrọ iruo usiuwoma ota na dikihẹ ga evaọ egagọ Ọghẹnẹ. Kọ ma sae ta nọ abọ otọakpọ ukoko Ọghẹnẹ o ginẹ tẹrovi eware nọ e mae r’oja? Ee.

16. Eware iwoma vẹ whẹ hayo uviuwou ra o rẹ sai wuhrẹ kpahe?

¹⁶ Kọ whọ be hae rọ omoke jọ roro kpahe eware nọ ukoko Jihova u bi ru? Ahwo jọ a ruẹrẹ oke jọ họ evaọ etoke egagọ uviuwou hayo ewuhrẹ omobọ rai nọ a re ro ru ekiakiẹ je roro didi kpahe eware itienana. Eware nọ a dhesẹ kẹ Aizaya, Izikiẹl, Daniẹl, gbe Jọn evaọ eruẹaruẹ na yọ eware isiuru jọ nọ ohwo ọ rẹ sai wuhrẹ kpahe. Obe na, Jehovah’s Witnesses—Proclaimers of God’s Kingdom gbe ebe efa hayo DVD nọ a fa fihọ ẹvẹrẹ ra e rẹ sai fi obọ họ k’owhẹ riẹ kpahe ukoko na ziezi.

17, 18. (a) Erere vẹ who wo no uzoẹme uwuhrẹ nana ze? (b) Enọ vẹ u fo nọ ma rẹ nọ omamai?

¹⁷ U woma gaga re ma hai roro didi kpahe eware nọ Jihova ọ be rọ ẹkwoma ukoko riẹ ru. Wọhọ ukoko Ọghẹnẹ, jọ omai omomọvo ọ hae tẹrovi eware nọ e mae r’oja. Ere oruo u ti fi obọ họ k’omai wo ọkpọ ọtamuo Pọl ukọ na, ọnọ o kere nọ: “Nọ oma wo iruo enana no, fiki epaọ ohrọ Ọghẹnẹ nọ u te omai obọ no, ma gbe wo ozọ họ.” (2 Kọr. 4:1) Ọ tẹ jẹ tuduhọ ibe iruiruo riẹ awọ nọ: “Je oma oware uwoma uruo o rọ omai hi: keme u re ti krẹ hẹ re ma te kọrọ ibi rai, otẹrọnọ oma o rọ omai hi.”—Gal. 6:9.

¹⁸ Kọ inwene jọ e riẹ nọ u fo nọ mai omomọvo hayo uviuwou mai u re ru evaọ uzuazọ ikẹdẹ kẹdẹ mai re ma sae tẹrovi eware nọ e mae r’oja? Kọ ma sai ru uzuazọ mai lọhọ, hayo si obọ no eware jọ nọ ma bi le re ma sai wo oke ziezi kẹ iruo usiuwoma ota nọ e mai wuzou na? Evaọ uzoẹme nọ o rrọ aro na, ma te ta kpahe eware isoi jọ nọ i ti fi obọ họ k’omai nya lele ukoko Jihova.