Amono A be Ta Usi Uwoma Na?

“A rẹ te vuẹ ovuẹ . . . na kẹ akpọ na kpobi.”—MATIU 24:14.

ISẸRI JIHOVA a be ta usi uwoma na wariẹ akpọ na soso họ. Idhere sa-sa a bi ro ru onana. Edhere jọ họ ẹkwoma . . .

Ẹmeunu. Wọhọ Jesu avọ ikọ riẹ, Isẹri Jihova a be rọ emamọ usi na bru ahwo evaọ obọ iwou rai. (Luk 8:1; 10:1) A rẹ keria hẹrẹ re ahwo a bru ai ze he. Usi uwoma kpahe Uvie Ọghẹnẹ nọ a rẹ ta kẹ ahwo o rrọ oware nọ Isẹri na kpobi, nọ i bu vi ima ihrẹ na a bi ru. A be ta usi uwoma na no uwou ruọ uwou, evaọ iyẹrẹ, ẹkwoma ifonu gbe idhere efa. Evaọ ukpe nọ u kpo, Isẹri na a raha euwa nọ i bu vi ima-odu ọvo gbe ubro evaọ iruo usi uwoma ota na.

Orọnikọ Uvie Ọghẹnẹ ọvo a bi wuhrẹ ahwo kpahe he rekọ te ‘eware kpobi nọ Jesu ọ vuẹ rai.’ (Matiu 28:20) A bi ru ebe-iwuhrẹ Ebaibol ọvọvẹ nọ i bu vi ima eree kẹse kẹse.

Isẹri na a be jọ otọakpọ na soso ta usi uwoma na—evaọ ekwotọ nọ i bu te 236. A be ta usi uwoma na kẹ oghẹrẹ ahwo kpobi. A be ta usi uwoma na evaọ iwhre gbe ikpewho, te obọ itẹwọ Amazon, itẹwọ obọ Siberia, te obọ idhude Africa gbe igbehru Himalaya. A be hwosa kẹ ae evaọ iruo nana ha, uyoyou nọ a wo kẹ Ọghẹnẹ gbe erivẹ o be wọ ae raha ugho gbe oke obọrai kẹ iruo na. A bi je whowho emamọ usi na ẹkwoma . . .

Ebe nọ A bi Kere. Enẹna, a be rọ evẹrẹ nọ i bu te 185 kere emagazini nana, onọ uzoẹme riẹ o rrọ Uwou-Eroro Na Nọ U Bi Whowho Uvie Jihova, yọ unu nọ a bi kere evaọ uvitha ovuọvo u bu vi ima 42. A bi je kere emagazini avivẹ rai nọ a re se Awake!, nọ u bi whowho Uvie na re evaọ evẹrẹ nọ i bu te 83 yọ oware wọhọ ima 40 e be hae roma via evaọ uvitha kpobi.

A wo ebe, ibroshọ, emebe-evẹvẹ, CD/MP3, gbe DVD nọ i fi oruvẹ họ iwuhrẹ Ebaibol evaọ oware wọhọ evẹrẹ nọ i bu te egba isoi gbe ikpe ene (540). Evaọ ikpikpe nọ i kpemu na, Isẹri na a ru je si obọ no unu ekwakwa nana nọ i bu te ima-odu udhe no, onọ omọvo ọ rẹ sai jo wo te esa nọ a tẹ ghale ae fihọ unu ahwo nọ a rrọ otọakpọ na kpobi!

Isẹri Jihova a kporo jẹ whobọhọ ekporo efafa Ebaibol sa-sa no. Ma rẹ ruẹ ọsoso hayo abọjọ Ebaibol New World Translation of the Holy Scriptures nọ Isẹri Jihova a fa, kporo jẹ be rọ kẹ ahwo na evaọ evẹrẹ nọ i bu te 96. A rehọ unu nọ u bu vi ima 166 rọkẹ ahwo no. Isẹri na a be jẹ vuẹ emamọ usi Uvie na . . .

Evaọ Eria Iwuhrẹ Rai. Ọruẹrẹfihotọ omakugbe ọrọ ik’oka k’oka evaọ Egwa Uvie rai, o rrọ oware sidhe nọ a ru iruẹru egagọ ọvo ho; a be jariẹ wuhrẹ eware. A rẹ kẹ ovuẹ kpahe izoẹme sa-sa rono Ebaibol na ze, a rẹ jẹ rehọ ẹkwoma emagazini Uwou-Eroro Na gbe ebe efa ro wuhrẹ Ebaibol na. Evaọ iwuhrẹ rai, Isẹri na i re je wuhrẹ epanọ a rẹ rọ rehọ onaa whowho usi uwoma na.

Isẹri na a re wuhrẹ oware ovona evaọ ikoko rai nọ i bu vi 107,000 wariẹ akpọ na họ, onọ u bi ru okugbe rai ga. Iwuhrẹ nana e rrọ kẹ ohwo kpobi. A re ghoro umudo ho. Rekọ iruẹru Isẹri na kpobi e rẹ jọ ufofe nọ a gbe ru lele oware nọ a be ta ha. Fikiere, a be daoma ta usi uwoma na . . .

Ẹkwoma Oriruo nọ A bi Fihotọ. A be daoma yeri emamọ uzuazọ nọ u fo Ileleikristi, daoma ru kẹ amọfa epanọ a gwọlọ nọ amọfa a ru kẹ ae. (Matiu 7:12) Dede nọ a re ru thọ ẹsejọ fikinọ a gba ha, o rrọ isiuru rai re a dhesẹ uyoyou kẹ ahwo kpobi, orọnọ ẹkwoma usi uwoma na nọ a rẹ vuẹ ae ọvo ho rekọ te obọ nọ a re fihọ kẹ ae nọ o tẹ lọhọ.

Orọnọ utee Isẹri Jihova họ re a rọ usiuwoma ota rai ku ahwo-akpọ kpobi rẹriẹ hẹ. Ukpoye, nọ a te ru iruo na te epanọ Jihova ọ gwọlọ no, kẹsena urere na o vẹ te ze, wọhọ epanọ Jesu ọ ta. Ẹvẹ oyena u ti ro kpomahọ otọakpọ na gbe ahwo nọ a rrọ eva riẹ?

[Uwoho nọ o rrọ ẹwẹ-obe avọ 7]

Isẹri Jihova a be jọ otọakpọ na soso ta usi uwoma na

Eme Họ “Urere” Na?

“. . . kẹsena urere u te zi te.”—MATIU 24:14.

EME kpahe urere akpọ na e da oria kpobi fia. Te ebe, ifimu, gbe emagazini, erọ eme atahwẹ gbe enọ egba-eriariẹ i kere, e ta eware sa-sa kpahe ẹdẹ okpẹtu jọ nọ ọ rẹriẹ ovao dhe akpọ na. Eware jọ nọ a fodẹ inọ e te wha okpẹtu nana ze họ, ẹmo okpemuotọ, emama odhiwu nọ i ti kpeke, ẹyao nọ o ti kpe ahwo, ikpisoi, ẹroro hayo ifou nọ e rẹ te ga thesiwa, hayo egwara jọ nọ i re ti no idedeghe ze.

Egagọ i wo eriwo sa-sa re kpahe ẹme nana; ibuobu rai a re wuhrẹ nọ oware nọ u wo uzuazọ kpobi evaọ otọakpọ o te raha evaọ ẹdẹ “urere.” Nọ owuhrẹ-egagọ jọ ọ jẹ ta kpahe ẹme Matiu 24:14 na, o kere eme ọwhewhe nana: “Onana yọ ojọ evaọ usu eme nọ e mai wuzou evaọ Ẹme Ọghẹnẹ . . . Oge mai na ọ rẹriẹ ovao dhe ọraha-muotọ nọ o muozọ te epanọ umutho ahwo jọ ọvo a wo udu nọ a rẹ sai ro roro kpahe iẹe.”

Eriwo otiọye na o bi gbolaro kẹ oware jọ: Jihova Ọghẹnẹ ọ ma akpọ na je “ru ei dikihẹ;” “ọ ma riẹ kẹ ozighi hi, ọ ma ae re a ria ae.” (Aizaya 45:18) Fikiere, okenọ Jesu ọ fodẹ “urere” na, orọnọ ọ jẹ ta nọ a te raha otọakpọ na ha; yọ orọnọ ọ jẹ ta nọ a te raha ahwo-akpọ kpobi muotọ họ. Oware nọ ọ jẹ ta kpahe na họ, a te raha ahwo nọ a bi veghe uzou, nọ a gwọlọ yeri uzuazọ rai lele ọkpọvio oyoyou nọ o bi no obọ Jihova ze he.

Roro kpahe oriruo nana. Ma rehọ iẹe nọ who wo uwou uwoma jọ nọ whọ rọ kẹ ahwo inọ a rria ọvọvẹ. Otu rai jọ a bi yeri uzuazọ rai dhedhẹ kugbe amọfa evaọ ighẹ na jẹ be rẹrote uwou ra na ziezi. Rekọ efa jọ ẹbẹbẹ ọvo a be whaze, be họre ohwohwo jẹ be gwọlọ ẹme otu nọ ọ be rẹrote ighẹ na ziezi na. A be raha eware evaọ ighẹ na yọ a be daezọ dede he nọ whọ be ta kẹ ae nọ a seba.

Eme who re ru ro ku ẹbẹbẹ na họ? Kọ who re kporo uwou ra fihotọ? O wọhọ nọ ere who ti ru hu. Ẹsejọhọ who ti le ikpehre ahwo na no ighẹ ra whọ vẹ ruẹrẹ eware nọ a raha na.

Epọvo na Jihova o ti ru. Ọ rọ ẹzi riẹ kẹ ọso-ilezi na kere nọ: “A ti kpe iru-umuomu na kufiẹ; rekọ enọ e be hẹrẹ ỌNOWO kpobi, a rẹ te rehọ otọ na reuku. Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:9-11.

Pita ukọ na ọ ta kpahe oware ovona. Ẹzi Ọghẹnẹ ọ wọ riẹ kere nọ: “Ihru e [rrọ] anhwọ ọgbọ, gbe otọ-oyaya nọ a rọ ame ru no ame ze . . . ẹvo nọ [o ku] akpọ ọyena ọ tẹ raha iẹe.” (2 Pita 3:5, 6) Ukọ na ọ jọ etenẹ ta ẹme kpahe Ẹvo ọrọ edẹ Noa. Akpọ ọrọ ahwo nọ a riẹ Ọghẹnẹ hẹ ọ raha kufiẹ, rekọ otọakpọ na o raha ha. Ẹvo ologbo yena nọ o ku akpọ soso na o rrọ “oriruo rọ kẹ enọ e hae te jọ erọ Ọghẹnẹ hẹ.”—2 Pita 2:6.

Pita o fibae nọ: “A . . . ruẹrẹ ihru gbe akpọ nọ erọ enẹna kpahe kẹ erae.” Ma te no etenẹ kuhọ, ma rẹ sai rri ẹme na thọ. Muẹrohọ inọ owọ ikere nana o nyaharo ta nọ: “Gbe ẹraha otu nọ ekare erọ Ọghẹnẹ.” Orọnikọ otọakpọ na a te raha ha, rekọ ahwo nọ a riẹ Ọghẹnẹ hẹ. Kọ eme o ti lele iei? Pita o kere nọ: “Wọhọ epaọ eya riẹ, ma rẹ hẹrẹ ihru ekpokpọ [Uvie Mesaya nọ Ọghẹnẹ o ro mu] avọ akpọ ọkpokpọ [ahwo-akpọ ikiẹrẹe] enọ ẹrẹreokie ọ be ria.”—2 Pita 3:7, 13.

Eruẹaruẹ Ebaibol i dhesẹ re inọ okenọ “urere” na o te rọ ze o kẹle no. Se Matiu 24:3-14 gbe 2 Timoti 3:1-5 re whọ ruẹ eware nọ i dhesẹ nọ onana uzẹme.a

Kọ u bi gbe owhẹ unu inọ ahwo a bi wo otoriẹ obe Matiu 24:14 thọ, oria ikere nọ makọ ọmaha dede ọ rẹ sai wo otoriẹ riẹe? Eware buobu e riẹ nọ e wha onana ze. Setan o wuhu iroro ahwo di no re a siọ uzẹme oghaghae nọ o rrọ Ebaibol na ba ẹriẹ. (2 Ahwo Kọrint 4:4) Ofariẹ, Ọghẹnẹ ọ ko ẹjiroro riẹ dhere no ahwo nọ a re fu uke, o te dhesẹ iẹe kẹ otu nọ o wo omaurokpotọ. Onana o soriẹ nọ Jesu ọ rọ ta nọ: “Ọsẹ Ọnowo odhiwu gbe akpọ, me yere owhẹ, epanọ who si eware enana no dhere iwoareghẹ gbe enọ e riẹ, whọ tẹ rehọ ae via kẹ emọ efofa.” (Matiu 11:25) Ọghọ riẹ ọ rro kẹhẹ re ohwo ọ jọ usu ahwo omaurokpotọ nọ i wo otoriẹ oware nọ Uvie Ọghẹnẹ o ginẹ rrọ, enọ e rẹ sai rẹro eghale nọ Uvie na o te wha se ahwo nọ e tha riẹ uke!