Uzou 23

Si Ẹdẹ Jihova te Iroro Kpekpekpe

 1. (a) Okenọ whọ kaki wuhrẹ nọ esiwo no idhọvẹ eyero eware enana o kẹle ino, ẹvẹ who ru? (b) Didi enọ kpahe onana u fo nọ ma re roro kpahe gaga?

ABABỌ avro oware ọsosuọ jọ nọ whọ kaki wuhrẹ no uwuhrẹ Ebaibol na ze họ, esiwo ro no idhọvẹ uzuazọ nọ e rọ eyero eware enana o kẹle ino. Who vuhumu nọ ẹjiroro Ọghẹnẹ họ re otọakpọ na kpobi ọ te jọ Aparadase. Ethube, ẹmo, ẹyao gbe uwhu e gbẹ te jọ ofa ha, yọ makọ enọ a you nọ i whu no dede e te jẹ wariẹ rria. Ẹvẹ ẹruore ọyena ọ jaja udu te! Ẹkẹle riẹ kpobi a dhesẹ i rie ẹkwoma imuẹro inọ ọriakugbe Kristi nọ a rẹ ruẹ hẹ wọhọ Ovie nọ o bi su u muhọ evaọ 1914 C.E. gbe nnọ anwọ okioye ze ma rọ rọ edẹ urere ọ akpọ omuemu ọnana. Kọ eriariẹ eyena i fi enwene họ uzuazọ ra no? Kọ edhere uzuazọ ra u bi ghine dhesẹ imuẹro inọ “ẹdẹ Jihova” ọ kẹle ino?

 2. (a) Okevẹ “ẹdẹ . . . ỌNOWO na” ọ rẹ te tha? (b) Ẹvẹ uzẹme na nnọ Jihova ọ fodẹ ‘ẹdẹ hayo auwa na’ via ha o rọ rọ erere?

² Ikereakere na i dhesẹ vevẹ no nnọ “oge” nọ ọ ruẹ oka ọzino Kristi na ọ te jẹ ruẹ “ẹdẹ ologbo ỌNOWO na” re, nọ o ti ro gu eviẹwẹ kpobi ẹdhọ. (Mat. 24:34; Zef. 1:14–2:3) Rekọ Ebaibol na e nwane riobọ họ uzedhe ẹdẹ nọ Jesu Kristi ọ te rọ nya tha wọhọ okpikpakpe Jihova mukpahe eyero eware akpọ Setan he. Jesu ọ ta nọ: “Rekọ ẹdẹ ọyena hayo auwa ọyena ohwo ọ riẹ hẹ, makinọ ikọ nọ e rọ obọ odhiwu, hayo Ọmọ na dede, rekọ Ọsẹ na ọvo.” (Mak 13:32) Onana o tẹ rọ oware erere gaga. Evaọ edhere vẹ? Onana u fiobọhọ dhesẹ eware nọ e rọ idu ahwo via. Otẹrọnọ ejọ i ghine you Jihova ha, udu rai o rẹ wọ ae va “ẹdẹ” ọnana evaọ iroro rai a vẹ rẹriẹ ovao dhe ilale obọ rai nọ udu rai o wọ rai kpohọ. Jihova ọ rẹ jẹ enọ i ghine you riẹ rehọ wọhọ idibo riẹ jegbe enọ e be rọ eva rai kpobi dhesẹ iẹe nọ a be gọe, makọ oke kpobi nọ urere eyero omuemu ọnana ọ nyaze. Ọjẹrehọ Ọghẹnẹ gbe Ọmọ riẹ orọ k’enọ e rọ ruọruọruọ hayo enọ i wo iroro ivẹ hẹ.—Evia. 3:16; Ol. 37:4; 1 Jọn 5:3.

 3. Eme Jesu ọ ta wọhọ ọjọriẹ k’omai evaọ ẹme ọnana?

³ Evaọ ẹme ọjọriẹ kẹ enọ i you Jihova, Jesu ọ tẹ ta nọ: “Wha yọrọ oma, wha rroro; keme wha riẹ ezi nọ oke na u re ti te he.” (Mak 13:33-37) Ọ kpakpa omai nọ ma kẹ uvẹ re emuọriọ gbe edada hayo “iroro akpọ” u mi omai iroro kpobi no ho re ma si ẹro no epanọ oke na u wuzou te.—Luk 21:34-36; Mat. 24:37-42.

 4. Wọhọ epanọ Pita o ru rie vevẹ, eme “ẹdẹ Ọnowo” na ọ te wha tha?

⁴ Uwhremu na, Pita ukọ na ọ tẹ hrẹ enọ i wo uvi ẹrọwọ kpobi nnọ a ‘hẹrẹ je rẹro ẹtha ẹdẹ Ọghẹnẹ na vẹrẹ vẹrẹ, keme eva oyena ihru e jẹ te ware errae e vẹ to, ekwakwa na errae e vẹte ghra ae no!’ Ẹkẹle “ẹdẹ Ọnowo” na yọ uzẹme nọ mai ohwo ọvo o re gbolo aro kẹ hẹ. Isuẹsu odhiwu nọ a be ruẹ na gbe eyero ukoko ahwo a te rehọ “ihru ekpokpọ avọ akpọ ọkpokpọ” enọ Ọghẹnẹ o ru ro nwene ai no obọnana, yọ “ekwakwa” nọ i bi lele eyero akpọ ọnana kpobi—uruemu mẹrẹjomẹsa riẹ, uzuazọ ugbegbe riẹ gbe ilale efe riẹ—a rẹ te rehọ ai te oba evaọ ọraha ọroro ọ “ẹdẹ ỌNOWO” na. (2 Pit. 3:10-13) U fo re ma jaja aro vi, ma vẹ riẹ nọ eware nana nọ i ti guegue akpọ na e sai muhọ eva idudhe.—Mat. 24:44.

Jaja Aro Vi Kẹ Eware nọ I Bi Ru Oka na Gba

 5. (a) Ẹvẹ uyo Jesu kẹ onọ nọ a kere fihọ Matiu 24:3 na u wo obọ kpahọ ekuhọ eyero ahwo Ju na te? (b) Abọ uyo riẹ vẹ o rẹriẹ ovao ku eware nọ e via no umuo 1914 C.E. ze kpo obaro?

⁵ Maero rọ kpahọ oke nọ ma be rria na, u fo nọ ma rẹ riẹ eware nọ i ru oka na kpobi gba nọ i dhesẹ “edẹ urere na” via, hayo ‘urere eyero eware na.’ Re ma ruẹse fotọ oka na gbagba, ma re wo họ iroro nọ eva okenọ Jesu ọ rọ kẹ uyo enọ ilele riẹ wọhọ epanọ a kere fihọ Matiu 24:3, eware jọ nọ ọ ta i kie kpahe ekuhọ eyero ahwo Ju evaọ ikpe udhusoi ọsosuọ, rekọ uvi orugba rai u theri abọ viọ oyena. Eware nọ o dhesẹ eva owọ avọ 4 rite 22 i wo orugba kakao gheghe evaọ udevie ikpe 33 gbe 70 C.E. Rekọ eruẹaruẹ na i wo uvi orugba rai eva edẹ mai na, o te je dhesẹ etoke no 1914 C.E. ze wọhọ oke ọ ‘ọriakugbe Kristi gbe urere eyero eware na.’ (Jegbe Mak 13:5-20 avọ Luk 21:8-24) Matiu 24:23-28 ọ ta k’omai eware nọ e te via no umuo 70 C.E. ze ruọ oke ọriakugbe Kristi.—Mak 13:21-23.

 6. (a) Fikieme ma jẹ jaja aro vi kpahe eware ekpokpọ nọ i bi ru “oka na” gba? (b) K’uyo enọ nọ e rọ urere edhe-ẹme ọnana ro dhesẹ oghẹrẹ nọ “oka na” o bi ro ru gba anwọ 1914 ze.

⁶ U fo nọ mai omomọvo o muẹro họ otọ ziezi kpahe eware nọ i bi ru “oka na” gba. Ma tẹ be rehọ eware enana rọ wawo eruẹaruẹ Ebaibol na, u re fiobọhọ k’omai si ẹdẹ Jihova ‘te iroro kpekpekpe.’ U re je fiobọhọ k’omai ta ahwo kurẹriẹ re nọ ma tẹ be vẹvẹ amọfa unu kpahọ ẹkẹle ọ “ẹdẹ orukele Ọghẹnẹ mai.” (Aiz. 61:1, 2) Avọ eware nana nọ who re wo họ iroro, kiẹ abọ sasa ọ “oka na” rri.

Evaọ edhere oghẹrẹsa vẹ ẹkpare ‘orẹwho bru orẹwho gbe uvie bru uvie’ nọ a ruẹaro riẹ na i bi ro ru gba muhọ no 1914 C.E. ze? Eme ọ via eva emera kakao nọ i kpemu no nọ i fiba orugba na?

Ẹvẹ okakao emuore u kpoma họ otọakpọ na te no ghele eriariẹ ekiẹ-otọ ikpe udhusoi avọ 20 mai na dede?

Kọ ohẹriẹ jọ o ghinẹ riẹ kpahọ etọ nọ i bi nuhu evaọ no oria ruọ oria anwọ 1914 C.E. ze?

Evaọ 1918 didi ẹyao okpomahọ o kpe ahwo vi ẹmo akpọ na soso? Ghele eriariẹ imu dede, didi eyao nọ i re vo i gbe bi vihọ?

Eme o k’owhẹ imuẹro nọ eware nọ a dhesẹ eva 2 Timoti 3:1-5 na o rọ nọ ere uzuazọ o rọ anwọ ẹdẹ hẹ rekọ inọ i gbe bi vihọ gaga kpohọ oria imuozọ ulogbo nọ ma be nya kpohọ ekuhọ edẹ urere na?

Ẹhẹriẹ Ahwo

 7. (a) Didi oware ofa, nọ a dhesẹ eva Matiu 13:36-43, Jesu o kugbe ekuhọ eyero eware nana? (b) Eme họ otofa ọtadhesẹ yena?

⁷ Eware ilogbo efa jọ e riẹ re nọ Jesu o kugbe ekuhọ eyero eware na. Ovo enana jọ họ ẹhẹriẹ “emọ uvie na” no “emọ oyoma na.” Jesu ọ ta ẹme kpahe onana evaọ ohare riẹ kpahọ udhu eka nọ ọwegrẹ jọ ọ kọ ikpoko fihọ. “Eka” na evaọ ọtadhesẹ riẹ u dikihẹ kẹ Ileleikristi uzẹme nọ a wholo. “Ikpoko” na yọ Ileleikristi igbenu. Evaọ ekuhọ eyero eware na, “ikpoko” na—enọ e be rehọ igbenu ta nọ ae yọ Ileleikristi rekọ yọ a bi dhesẹ oma rai fihọ “emọ oyoma na” fikinọ a tala mu akpọ nọ Ẹdhọ ọ rọ osu riẹ na—a te hẹriẹ ai no “emọ uvie” Ọghẹnẹ, a ve kpoka ọraha họ ai. (Mat. 13:36-43) Kọ onana o ghinẹ via no?

 8. (a) Nọ Ẹmo Akpọ I ọ vrẹ no, didi ẹhẹriẹ ologbo erọ enọ e be ta nọ ae yọ Ileleikristi o rehọ oma via? (b) Ẹvẹ Ileleikristi uzẹme nọ a wholo a rọ kẹ imuẹro nnọ a ghinẹ rọ “emọ uvie” na?

⁸ Nọ Ẹmo Akpọ I ọ vrẹ no, ẹhẹriẹ ologbo ọrọ ahwo kpobi fihọ itu ivẹ ọ tẹ roma via enọ e ta nọ ae yọ Ileleikristi: (1) Isu-ichọche Ikpichọche na jegbe ilele rai, enọ e nya via te tha Ọvọ Erẹwho na uke (nọ ọ rọ Orẹwho Okugbe enẹna), yọ a gbẹ dada abọ mu uruemu orẹwho rai. (2) Umutho Ileleikristi kakao nọ a wholo na eva oke nọ ẹmo na ọ vrẹ no, enọ e rọ uke otha rai kpobi kẹ Uvie Mesaya Ọghẹnẹ. Fikinọ a thọ egọmeti akpọ na uke wọhọ edhere nọ a rẹ rọ rehọ udhedhẹ gbe omofọwẹ tha, otu ọsosuọ na a te ru ei vevẹ nọ ae yọ Ileleikristi uzẹme he. (Jọn 17:16) Ukpoye, idibo Jihova i te ghine vuhu Ọvọ Erẹwho na mu wọhọ “oware aghọ ofofe” oke nana, nọ a t’ẹme te eva Matiu 24:15. Bi ghine dhesẹ oma rai wọhọ “emọ uvie” Ọghẹnẹ, a tẹ ruabọ họ “ovuẹ usiuwoma uvie na kẹ akpọ na kpobi.” (Mat. 24:14) Eme o no rie ze?

 9. (a) Ẹvẹ a ro ru iruo usiuwoma ota ulogbo no? (b) Eme orugba eruẹaruẹ enana i dhesẹ?

⁹ Okioye, wọhọ epanọ Jesu ọ ruẹaro, o te mu iruo ilogbo usiuwoma ota kẹ ahwo erẹwho kpobi họ. (Mak 13:10) Iruo nana, nọ Kristi ọ be kpọ no akaba-uvie odhiwu riẹ ze, o be gbẹ nyaharo rri te inẹnẹ, yọ u kpoma họ owhẹ. Ahwo buobu a bi gbolo aro kẹ Uvie Ọghẹnẹ gbe “emọ” riẹ nọ a rọ ẹzi wholo, fikiere a re ti kpohọ ‘ọraha ebẹdẹ bẹdẹ,’ evaọ uwhu. Dede na, rọ kẹ amọfa Olori na ọ te kẹ ai uzizie na re a te rria abọ otọakpọ Uvie riẹ, avọ uzuazọ ebẹdẹ bẹdẹ eva obaro. Itieye na a kuoma rai kugbe “emọ uvie na” enọ a wholo na, dede nọ enana yọ enọ a be lahiẹ thesiwa. (Mat. 25:31-46) Avọ omarokpotọ a bi fiobọhọ kẹ ai whowho ovuẹ obọdẹ Uvie na. Ogbotu obuobu nọ i bu te ima buobu a bi wo obọ kugbe iruo nana. A bi yo ovuẹ Uvie na rite oka otọakpọ na. Eme eware enana i dhesẹ? Inọ ma si kẹle ekuhọ “edẹ urere” na gaga no jegbe nọ “ẹdẹ . . . ỌNOWO na” o si kẹle ino.

Eme Ọ rọ Obaro?

10. Kọ iruo usiuwoma ota ofa jọ o gbẹ riẹ taure “ẹdẹ Ọnowo” na ọ tẹ te tha?

¹⁰ Kọ eruẹaruẹ e gbẹ riẹ nọ i ti gbe ru gba taure ẹdẹ ologbo idudu Jihova na o te ti muhọ? E! Ẹhẹriẹ ahwo kpahọ avro Uvie na u ti kuhọ no ho. Evaọ eria jọ nọ a jẹ ruẹ ọwọsuọ ọgaga evaọ ikpe buobu no, ahwo buobu erọ ilele ekpokpọ e riẹ enẹna. Yọ makọ evaọ eria nọ ahwo a be jọ siọ usiuwoma na, a re kru ẹdhoguo okiẹrẹe gbe ohrọriọ Jihova kpehru ẹkwoma isẹri nọ ma bi se. Fikiere, ruabọ họ iruo na! Jesu ọ k’omai imuẹro nọ, a te ru ei no, “urere u te zi te.”—Mat. 24:14.

11. (a) Wọhọ epanọ a dhesẹ i rie eva 1 Ahwo Tẹsalonaika 5:2, 3, oware ulogbo ofa vẹ o te gbẹ rehọ oma via? (b) Eme u re ti dhesẹ k’omai?

¹¹ Eruẹaruẹ logbo Ebaibol ọfa jọ o ta nọ: “Keme okenọ ahwo a rẹ te ta nọ, ‘Oke onana oke udhedhẹ gbe omofọwẹ,’ idudhe na ọraha ọ vẹ nwane bru ae ze, nwane wọhọ epanọ aye ọ rẹ thuẹ othuẹ eyẹ, a rẹ sae dhẹ vabọ họ.” (1 Tẹs. 5:2, 3) Oghẹrẹ nọ uworo “udhedhẹ gbe omofọwẹ” oyena o rẹ te jọ oye u kiọkọ nọ ma te ruẹ. Rekọ u ti dhesẹ nọ isu akpọ na i ghine ku ebẹbẹ ahwo họ no ho. Enọ i bi ghine ‘si ẹdẹ Jihova te iroro kpekpekpe’ na, uworo oyena u re ti su ai thọ họ. A riẹ nọ, otẹ nwane vrẹ ere no, “ọraha idudhe” ọ vẹ te tha.

12. Didi oware o te nwani lele uworo “udhedhẹ gbe omofọwẹ,” kọ oghẹrẹvẹ o te rọ via?

¹² Orọ ọsosuọ, wọhọ epanọ Ikereakere na i dhesẹ, isu na kpobi e rẹ te wọ mukpahe Babilọn Ologbo na, isuẹsu egagọ ọrue akpọ na, a vẹ te raha iẹe no. (Evia. 17:15, 16) O rọ vevẹ inọ uruemu egrẹ rai mukpahe egagọ Ikpichọche na i bi dhesẹ oma rai via enẹna. Egọmeti avọ izi ilogbo nọ i mukpahe egagọ i wo ogaga ulogbo no enẹna evaọ obọ Erẹwho Okugbe, yọ ahwo gheghe na oma rai evaọ etọ egagọ anwae, ibuobu rai a be dhẹ siọ egagọ esẹ rai ba. Eme enana kpobi i dhesẹ? Inọ ọraha egagọ erue kpobi o kẹle ino. Eva obaro, nọ erẹwho na a tẹ rẹriẹ aro ku enọ i bi kru esuo Jihova kpehru ababọ adhẹẹ, ofu Ọghẹnẹ o ve ti hwẹ ku isu egọmeti na gbe enọ e be thọ ai uke, ọraha ebẹdẹ bẹdẹ o ve ti noi ze te ai. Ukuhọ riẹ, Setan omariẹ gbe idhivẹri riẹ a ve ti gbolo ai fihọ ọgọdọ odidi na, a vẹ te whaha ae re a siọ ahwo ba ekpokpo. Onana o te ghinẹ jọ “ẹdẹ Ọnowo” na, ẹdẹ nọ a te rọ kpare odẹ riẹ kpehru.—Izik. 38:18, 22, 23; Evia. 19:11–20:3.

13. Fikieme o jẹ rọ oware ugheghẹ re ma roro nọ ẹdẹ Jihova ọ gbẹ rọ thethabọ?

¹³ O te nyaze evaọ ẹruoke, wọhọ oghẹrẹ nọ Ọghẹnẹ ọ ma oma riẹ fihọ. U re ti lehe ie he. (Hab. 2:3) Kareghẹhọ, ọraha Jerusalem eva 70 C.E. ọ nyaze kpatakpata, okenọ ahwo Ju na a rẹro riẹ hẹ, okenọ a roro nọ enwoma ọ vrẹ no. Kọ ẹvẹ kpahe Babilọn anwae? Ọ jọ gaga, avọ udu, avọ igbẹhẹ ilogbo nọ e wariẹ e riẹe họ. Rekọ o kie evaọ aso ọvuọvo. Fikiere, ere re, “ọraha idudhe” ọ te nyaze ọ eyero eware enana. Okenọ o tẹ via, jọ a ruẹ omai nọ ma rọ okugbe evaọ egagọ, nọ ma bi si ẹdẹ Jihova ‘te iroro kpekpekpe’ na.

Eme Ọkiẹkpemu

● Fikieme u je wuzou re ma si ẹdẹ Jihova ‘te iroro kpekpekpe’? Ẹvẹ ma sae ro ru oyena?

● Ẹvẹ ohẹriẹ ahwo nọ a bi ru na u ro kpoma h’omai omomọvo?

● Eme o gbẹ rọ obaro taure ẹdẹ Jihova o te ti muhọ? Fikiere eme mai omomọvo ọ rẹ hai ru?