Uzou avọ 9

‘Wha Nyai Ru Ilele’

1-3. (a) Eme ọwhẹrẹ o re ru nọ ekakọ riẹ i te bu vi epanọ ọye ọvo ọ sai ro vu ai? (b) Use-abọ vẹ Jesu ọ rẹriẹ ovao dhe evaọ ezi okpakpọ ọrọ 33 C.E., kọ eme o ru kpahe iẹe?

ỌWHẸRẸ jọ ọ rẹriẹ ovao dhe ẹbẹbẹ ologbo. Emerae jọ nọ i kpemu, o kporo udhu riẹ jẹ kọ ibi fihọ iẹe. Ọ ruẹ ekakọ na okenọ e jẹ dhẹ ze, yọ eva e were riẹ nọ i muhọ ẹwho no. Oke ivuẹvu nọ ọ te rọ re erere iruo riẹ u te no. Rekọ ẹbẹbẹ nọ o wo họ: Ekakọ na i bu vi epanọ ọye ọvo ọ sai ro vu ai. Re ọ sai vu ekakọ na, ọ tẹ jiroro nnọ ọ rẹ rehọ iruiruo jọ re a lele iei vu udhu na. O gbe ru ere he ekakọ na e te raha ku ei.

² Evaọ ezi okpakpọ ọrọ ukpe 33 C.E., Jesu nọ ọ kparoma ze no na ọ rẹriẹ ovao dhe use-abọ utioye. Evaọ etoke odibọgba riẹ evaọ otọakpọ, ọ kọ ibi uzẹme na. Whaọ oke ivuẹvu u te no, yọ ekakọ na i re buobu. O gwọlọ nọ a re fi obọ họ kẹ ahwo nọ i wo isiuru re a zihe ruọ ilele. (Jọn 4:35-38) Eme Jesu o ru kpahe use-abọ nana? Nọ ọ jọ ehru ugbehru jọ evaọ obọ Galili taure o te ti kpohọ odhiwu, ọ kẹ ilele riẹ ujaje inọ a gwọlọ iruiruo efa. Ọ ta nọ: “Fikiere wha [nyai ru ilele] ahwo erẹwho kpobi, wha họ ae ame . . . , wha wuhrẹ ai, re a ru eware kpobi nọ mẹ vuẹ owhai.”—Matiu 28:19, 20.

³ Iruo yena a rẹ rọ riẹ uvi olele Jesu kpobi. Fikiere, joma kiẹ enọ esa jọ riwi. Fikieme Jesu ọ rọ kẹ ujaje inọ a zizie iruiruo efa? Oghẹrẹ vẹ o wuhrẹ ilele riẹ inọ a rọ gwọlọ iruiruo na? Didi abọ ma wo evaọ iruo nana?

Oware nọ A rọ Gwọlọ Iruiruo Efa

4, 5. Fikieme Jesu o gbe ti ro ku iruo nọ o muhọ na họ họ, kọ amono a te ruabọhọ iruo na nọ o te zihe kpohọ odhiwu no?

⁴ Okenọ Jesu o mu odibọgba riẹ họ evaọ 29 C.E., ọ riẹ inọ iruo nọ ọye ọvo ọ sai ti kuhọ họ ọ be tohọ na. Evaọ umutho oke nọ u kiọkọ kẹe evaọ otọakpọ, umutho eria gbe ahwo jọ ọvo ọ sae te wha ovuẹ Uvie na te. O ginẹ rrọ uzẹme inọ evaọ usiuwoma ota riẹ, ọ tẹrovi ahwo Ju gbe enọ i kurẹriẹ ziọ egagọ ahwo Ju, koyehọ “igodẹ nọ ivru eva uwou Izrẹl.” (Matiu 15:24) Dede na, “igodẹ nọ ivru” na a rrọ eria sa-sa evaọ ẹkwotọ Izrẹl, orẹwho nọ o jọ ruaro. U te no onana no, o gwọlọ nọ a rẹ wha usiuwoma na te eria efa evaọ akpọ na.—Matiu 13:38; 24:14.

⁵ Jesu ọ riẹ inọ iruo buobu i ti kiọkọ nọ a ti ru nọ o te whu no. Ọ ta kẹ ikọ 11 riẹ nọ i wo ẹrọwọ nọ: “Uzẹme, uzẹme, mẹ ta kẹ owhai, ọ nọ ọ [rọwo] omẹ, iruo nọ me ru o re ti ruẹ re; o re ti ru iruo ilogbo nọ i vie enana, epanọ mẹ be nya bru Ọsẹ na.” (Jọn 14:12) Nọ Ọmọ na o te zihe kpohọ odhiwu no, ikọ riẹ avọ enọ i ti zihe ruọ ilele riẹ kpobi a te ruabọhọ iruo usiuwoma ota na je wuhrẹ ahwo. (Jọn 17:20) Avọ omaurokpotọ, Jesu ọ ta inọ iruo rai e te rro vi enọ o ru. Evaọ oghẹrẹ vẹ? Evaọ idhere esa.

6, 7. (a) Idhere vẹ ilele Jesu a ti ro ru iruo nọ e rro vi enọ o ru? (b) Ẹvẹ ma sai ro dhesẹ inọ Jesu o fievahọ ilele riẹ thọ họ?

⁶ Orọ ọsosuọ, ilele Jesu a te nyate ewho nọ e mai bu. Nẹnẹ, usiuwoma ota rai u te ọnyaba akpọ na no, thabọ gaga vi ekwotọ nọ Jesu ọ jọ ta usiuwoma. Orọ avivẹ, a te ta usiuwoma kẹ ahwo nọ e mai bu. U kri hi, umutho ilele nọ Jesu ọ nya seba a te ti bu te idu buobu. (Iruẹru Ikọ Na 2:41; 4:4) Nẹnẹ a bu te ima buobu no, yọ enọ e be họ-ame kukpe kukpe i bu te idu buobu. Orọ avesa, a te ta usiuwoma evaọ etoke krẹkri—no anwọ okenọ Jesu o ro ku iruo usiuwoma ota ikpe esa gbe ubro riẹ họ rite inẹnẹ, enwenọ ikpe idu ivẹ (2,000).

⁷ Jesu o dhesẹ inọ o fievahọ ilele riẹ nọ ọ ta inọ a ti “ru iruo ilogbo nọ i vie enana.” Ọ kẹ rai iruo nọ i wuzou kẹe gaga, koyehọ “usiuwoma uvie Ọghẹnẹ.” (Luk 4:43) U mu rie ẹro inọ a ti ru iruo na ziezi. Eme onana o gwọlọ mi omai nẹnẹ? Ma tẹ be rọ ọwhọ gbe udu mai kpobi ta usiuwoma na, yọ ma bi dhesẹ inọ Jesu o fievahọ ilele riẹ thọ họ. Kọ ọghọ nana ọ gbẹ rro?—Luk 13:24.

O Wuhrẹ Ilele Riẹ re A Ta Usiuwoma

8, 9. Oriruo vẹ Jesu o fihọ otọ evaọ odibọgba na, kọ ẹvẹ ma sae rọ raro kele oriruo riẹ?

⁸ Jesu o wuhrẹ ilele riẹ ziezi epanọ a rẹ ta usiuwoma. Maero, o fi obọdẹ oriruo họ otọ kẹ ae. (Luk 6:40) Evaọ uzoẹme nọ o vrẹ na, ma ta kpahe oghẹrẹ nọ o rri odibọgba na. Dai roro kpahe ilele nọ e jọ kugbe Jesu evaọ erẹ usiuwoma ota riẹ. A muẹrohọ inọ ọ jẹ ta usiuwoma evaọ oria kpobi nọ a rẹ jọ duku ahwo—evaọ unueri gbe akotọ igbehru, evaọ ikpẹwho gbe eki, gbe evaọ iwou ahwo. (Matiu 5:1, 2; Luk 5:1-3; 8:1; 19:5, 6) A ruẹ inọ ọ jọ ọgba-iruo, ọ rẹ kpama evaọ irioke ọ vẹ ta usiuwoma rite aso. Orọnikọ omoke nọ o wo uvẹ ọ jẹ hae rọ ta usiuwoma ha. (Luk 21:37, 38; Jọn 5:17) A ruẹ inọ o gine wo uvi uyoyou kẹ ahwo. Ẹsejọhọ a jọ ovao riẹ ruẹ ohrọ nọ o gine wo kẹ ahwo. (Mak 6:34) Oghẹrẹ vẹ who roro nọ oriruo Jesu o kpomahọ ilele riẹ? Ẹvẹ oriruo riẹ ọ hai kpomahọ owhẹ?

⁹ Fikinọ mai yọ ilele Jesu, ma rẹ raro kele iei evaọ odibọgba mai. Fikiere, ma rẹ roma totọ “se isẹi” na te ahwo kpobi oma. (Iruẹru Ikọ Na 10:42) Wọhọ Jesu, ma re kpohọ iwou ahwo. (Iruẹru Ikọ Na 5:42) O tẹ gwọlọ, ma rẹ sae ruẹrẹ oke mai họ re ma kpohọ usiuwoma evaọ okenọ ahwo a rẹ mae rọ jọ uwou. Ma rẹ sae jẹ gwọlọ ahwo jẹ rehọ onaa ta usiuwoma kẹ ae evaọ eria efa—evaọ iyẹrẹ, egareji, iwou-eki, gbe eria iruo rai. Ma rẹ dawo ẹgba mai kpobi evaọ odibọgba na keme ma se iruo na gboja. (1 Timoti 4:10) Uvi uyoyou nọ ma wo kẹ amọfa o rẹ wọ omai gwọlọ uvẹ nọ ma rẹ rọ ta usiuwoma evaọ oke gbe oria kpobi nọ a sai jo duku ahwo.—1 Ahwo Tẹsalonika 2:8.

10-12. Eware iwoma vẹ Jesu o wuhrẹ ilele riẹ taure o te ti vi ai kpohọ usiuwoma ota?

¹⁰ Edhere ọfa nọ Jesu o ro wuhrẹ ilele riẹ họ ithubro nọ ọ kẹ rai. Taure Jesu o te ti vi ikọ 12 riẹ je vi ilele 70 uwhremu na kpohọ usiuwoma ota, o wuhrẹ i rai tao. (Matiu 10:1-15; Luk 10:1-12) Eware nọ o wuhrẹ ilele na i fi obọ họ gaga keme Luk 10:17 o ta nọ ilele “udheosa gbe ikpe na a tẹ ghọghọ ziheze!” Evaọ usu eware aghae nọ Jesu o wuhrẹ ilele riẹ na, joma ta kpahe ivẹ jọ, je woi họ iroro inọ oghẹrẹ nọ uruemu ahwo Ju erọ oke yena o jọ ọ rọ kẹ ae ithubro na.

¹¹ Jesu o wuhrẹ ilele riẹ re a rẹroso Jihova. Ọ ta kẹ ae nọ: “Wha wha igoru hayo idọlọ-efuafo, hayo eroo evaọ igbe rai hi, wha wha ekpa kpo erẹ rai hi, hayo iwu ivẹ hẹ, hayo eviẹ hẹ, wha wha ọkpọ họ; keme emu oruiruo [nọ] o te rie obọ u tei.” (Matiu 10:9, 10) O jọ uruemu ahwo Ju nọ i re kperẹ re a wha ẹkpa nọ a re fi ugho họ, ẹkpa nọ a rẹ rọ wha emuore, a vẹ jẹ wha ẹko-eviẹ ọfa lele oma.a Nọ Jesu ọ ta kẹ ilele riẹ inọ a ruawa eware nana ha, koyehọ ọ be ta kẹ ae nọ: “Fi udu ra kpobi họ Jihova, keme ọ te kẹ owhai eware nọ wha gwọlọ.” Jihova o ti duobọte udu enọ e jẹ usiuwoma na rehọ re a kẹ ae eware nọ a gwọlọ, onọ o jọ uruemu ahwo Izrẹl.—Luk 22:35.

¹² Jesu o te je wuhrẹ ilele riẹ re a whaha eware nọ e rẹ raha oke rai. Ọ ta nọ: “Wha yere ohwo ọvo eva edhere he.” (Luk 10:4) Kọ Jesu ọ be ta kẹ ae inọ a rẹ sasa oma kẹ amọfa ha? Ijo. Evaọ oke Jesu, uyere o jẹ hae rehọ oke gaga. Ọgba-eriariẹ Ebaibol jọ ọ ta nọ: “Orọnikọ epanọ ma re yere uyere nẹnẹ a jẹ hai yere evaọ oke emọ Izrẹl he, rekọ a jẹ hae gba oma dede ohwohwo unuẹse buobu tube kiegbulẹ-otọ. Enana kpobi e rẹ rehọ oke gaga.” Fikiere nọ Jesu ọ ta kẹ ilele riẹ inọ a yere ohwo ho, ọ be ta nọ: “Wha raha oke kufiẹ hẹ, keme ovuẹ rai o rrọ kpata kpata.”b

13. Ẹvẹ ma sai ro dhesẹ inọ ma se ithubro nọ Jesu ọ kẹ ilele ikpe-udhusoi ọsosuọ riẹ na gboja?

¹³ Ma re se ehrẹ nọ Jesu ọ kẹ ilele riẹ erọ ikpe-udhusoi ọsosuọ na gboja. Evaọ odibọgba mai, ma re fi eva mai kpobi họ Jihova. (Itẹ 3:5, 6) Ma riẹ inọ ma tẹ “kake guọlọ uvie riẹ,” ugogo eware nọ ma gwọlọ evaọ uzuazọ e te kare omai hi. (Matiu 6:33) Enọ e rrọ iruo odibọgba oke-kpobi wariẹ akpọ na họ a rẹ sae rọ obọ s’udu ta nnọ Jihova o vu rai wa ha evaọ etoke ẹgaga. (Olezi 37:25) Wọhọ ilele Jesu, ma rẹ whaha eware nọ e rẹ raha oke mai. Ma gbẹ yọroma ha, uyerakpọ nana o sai reghe omai. (Luk 21:34-36) Onana o rrọ oke nọ ma re ro rri emu hu. Ovuẹ mai o kpata gaga keme uzuazọ ahwo o rrọ ọza. (Ahwo Rom 10:13-15) Ma tẹ be kareghẹhọ epanọ ovuẹ mai o kpata te ẹsikpobi u re fi obọ họ kẹ omai whaha eware akpọ nana nọ e rẹ rehọ oke gbe ẹgba mai nọ ma hae raha fihọ odibọgba na. Kareghẹhọ inọ oke nọ u kiọkọ u tulo ho yọ ivuẹvu na e re ruaro.—Matiu 9:37, 38.

Iruo nọ I Kpomahọ Omai

14. Eme o dhesẹ inọ iruo nọ Jesu ọ kẹ ilele riẹ nọ a kere fihọ Matiu 28:18-20 na i kie kpahe ilele riẹ kpobi? (Je rri oruvẹ-obotọ na.)

¹⁴ Jesu ọ kẹ ilele riẹ owha-iruo ulogbo nọ ọ ta nọ: ‘Wha nyai ru ilele.’ Orọnikọ ilele riẹ nọ e jọ kugbei evaọ ugbehru Galili na ọvo o wo họ iroro ta ẹme yena ha.c Iruo nọ ọ kẹ rai na họ re a wha usiuwoma na te “ahwo erẹwho kpobi” oma, yọ iruo usiuwoma ota na e te gbẹ nyaharo rite “urere akpọ na.” U re vevẹ inọ iruo nana i kpomahọ ilele Jesu kpobi, te omai nẹnẹ. Joma ta kpahe eme ọ Jesu nọ e rrọ Matiu 28:18-20 na.

15. Fikieme o rọ rrọ oware areghẹ re ma ru ilele wọhọ epanọ Jesu o vi omai na?

¹⁵ Taure Jesu ọ tẹ te kẹ ai iruo na, ọ ta nọ: “A rehọ ogaga kpobi nọ o rọ eva odhiwu gbe akpọ na kẹ omẹ no.” (Owọ avọ 18) Kọ Jesu o gine wo ogaga tere? Ee. Ọye họ olori ijẹle na, ọnọ o wuzou ijẹle buobu gbidi gbidi. (1 Ahwo Tẹsalonika 4:16; Eviavia 12:7) Fikinọ ọye ‘o wo uzou ukoko’ na, o bi su ilele riẹ nọ e rrọ otọakpọ. (Ahwo Ẹfẹsọs 5:23) Anwọ 1914 ze ọ rọ rrọ Ovie nọ o bi su evaọ obọ odhiwu. (Eviavia 11:15) O tube wo ogaga nọ ọ te rọ kpare enọ i whu no ze. (Jọn 5:26-28) Jesu ọ kake fodẹ ogaga nọ a kẹ riẹ ro dhesẹ inọ eme nọ ọ ta lele iei na orọnikọ iroro-ejẹ hẹ, rekọ uwou o vi rai. O rrọ oware areghẹ re ma nya uwou na keme Ọghẹnẹ họ ọnọ ọ kẹ riẹ ogaga na.—1 Ahwo Kọrint 15:27.

16. Nọ Jesu o vi omai inọ ma nya na, eme ọ be ta nọ ma ru, kọ ẹvẹ ma rẹ sai ro ru abọ nana ọrọ iruo mai gba?

¹⁶ Okenọ Jesu o je vi ilele riẹ uwou na, ọ ta kẹ ae inọ a nya. (Owọ avọ 19) Fikiere ọ be ta kẹ omai inọ ma rẹ wha ovuẹ Uvie na te amọfa oma. Idhere buobu e riẹ nọ ma rẹ sai ro te ahwo oma. Usiuwoma ota n’uwou ruọ uwou na họ edhere nọ ọ mai woma nọ ma rẹ rọ nyate ahwo oma. (Iruẹru Ikọ Na 20:20) Ma rẹ jẹ gwọlọ uvẹ nọ ma re ro se isẹri evaọ oke gheghe; oma o rẹ kpakpa omai re ma mu ẹme họ kpahe emamọ usi na evaọ oria kpobi nọ uvẹ na u je rovie fihọ. Epanọ ẹgwọlọ gbe uyero ahwo e rrọ ma re rri rọ ta usiuwoma kẹ ae. Oghẹrẹ nọ o rrọ kpobi, ma rẹ nyae gwọlọ enọ i wo udu oruọzewọ.—Matiu 10:11.

17. Ẹvẹ ma re ro ru ilele?

¹⁷ Jesu ọ tẹ jẹ fodẹ ẹjiroro uwou nọ o vi omai na, koyehọ, re ma ru ilele “ahwo erẹwho kpobi.” (Owọ avọ 19) Ẹvẹ ma re ro ru ilele? Olele yọ ohwo nọ a bi wuhrẹ. Rekọ re a ru ilele orọnikọ re a fi obọ họ kẹ amọfa wo eriariẹ ọvo ho. Ma te bi wuhrẹ Ebaibol kugbe enọ i wo isiuru, utee mai họ re ma fi obọ họ kẹ ae zihe ruọ ilele Jesu. O tẹ lọhọ, ma rẹ ta kpahe oriruo Jesu ẹsikpobi re enọ ma bi wuhrẹ na a vuhumu inọ ọye họ Owuhrẹ rai gbe Ọnọ a rẹ raro kele, yeri oghẹrẹ uzuazọ nọ o yeri je ru iruo nọ o ru.—Jọn 13:15.

18. Fikieme ame-ọhọ ọ rọ rrọ owojẹ nọ o mae rro evaọ uzuazọ olele?

¹⁸ Abọ ologbo jọ ọrọ iruo na họ: ‘Họ ae ame evaọ odẹ Ọsẹ, gbe Ọmọ gbe Ẹzi Ẹri.’ (Owọ avọ 19) Ame-ọhọ yọ owojẹ nọ o mae rro evaọ uzuazọ olele, keme u dhesẹ udu kpobi nọ o ro mudhe kẹ Ọghẹnẹ. Fikiere, ame-ọhọ ọ r’oja kẹ esiwo. (1 Pita 3:21) Ẹhẹ, olele nọ ọ họ-ame no na ọ tẹ be rọ ẹgba riẹ kpobi gọ Jihova, ọ rẹ sai rẹro eghale ebẹdẹ bẹdẹ evaọ akpọ ọkpokpọ nọ ọ be tha na. Kọ who fi obọ họ kẹ ohwo jọ zihe ruọ olele Jesu nọ ọ họ-ame no? Oware nọ o rẹ were ohwo eva tere evaọ odibọgba Oleleikristi na o riẹ hẹ.—3 Jọn 4.

19. Eme ma re wuhrẹ enọ i bi kurẹriẹ ze obọ, kọ fikieme ma re gbe ro wuhrẹ ai nọ a tẹ họ-ame no?

¹⁹ Jesu ọ fodẹ abọ ọfa ọrọ iruo usiuwoma ota na, inọ: ‘Wuhrẹ ai, re a ru eware kpobi nọ mẹ vuẹ owhai.’ (Owọ avọ 20) Ma re wuhrẹ enọ i bi kurẹriẹ ze obọ re a koko ijaje Jesu, enọ i kugbe ujaje nọ o ta nọ a you Ọghẹnẹ, you ọrivẹ, je ru ilele. (Matiu 22:37-39) Ma re wuhrẹ ai epanọ a re ro dhesẹ uzẹme Ebaibol kẹ amọfa gbe epanọ a rẹ rọ thọ ẹrọwọ nọ a rehọ ẹmẹrera wo na. A tẹ nyaharo te epanọ a re ro kuomagbe ukoko na kpohọ usiuwoma no, ma rẹ jọ kugbe ai, rehọ ẹmeunu gbe oriruo wuhrẹ ai epanọ a re ro wo obọ vọvọ evaọ iruo na. Orọnikọ ilele ekpokpọ a tẹ họ-ame no yọ iruo mai i re no ho. A rẹ sae gwọlọ ithubro efa re a sae dadamu kẹ ebẹbẹ nọ i re te ohwo nọ ọ rrọ olele Jesu.—Luk 9:23, 24.

“Mẹ avọ Owhai A gbẹ Jọ Kẹse Kẹse”

20, 21. (a) Evaọ eruo iruo nọ Jesu ọ kẹ omai na, fikieme ozọ u gbe ro mu omai hi? (b) Fikieme onana o gbẹ rrọ oke nọ a re ro si uke kpemu hu, kọ eme ọ rẹ jọ ọtamuo mai?

²⁰ Eme ọ urere nọ Jesu ọ ta okenọ ọ kẹ ilele riẹ iruo usiuwoma ota na e kẹ omosasọ gaga, nọ ọ ta nọ: “Ri, mẹ avọ owhai a gbẹ jọ kẹse kẹse, makọ te urere akpọ na.” (Matiu 28:20) Jesu ọ riẹ inọ iruo nana e rro gaga. Ọ tẹ jẹ riẹ inọ iruo na e rẹ sae lẹliẹ ewegrẹ wọso omai ẹsejọ. (Luk 21:12) Rekọ ma re du dhozọ họ. Osu mai o ti vu omai wa ha re mai ọvo ma ru iruo na. Kọ o gbẹ rrọ oware omosasọ nọ ma rọ riẹ inọ Ọnọ o wo “ogaga kpobi . . . eva odhiwu gbe akpọ na” ọ rrọ gbe omai re ọ tha omai uke evaọ iruo nana?

²¹ Jesu ọ kẹ ilele riẹ imuẹro inọ ọ te jọ kugbe ai evaọ odibọgba rai bẹsenọ “urere akpọ na” u re te. Bọwo okenọ urere na u re te, ma rẹ ruabọhọ iruo nọ Jesu ọ kẹ omai na. Onana o rrọ oke nọ ma re ro si uke kpemu hu. Iruo ivuẹvu abọ-ẹzi buobu e rrọ otọ. Ahwo buobu a bi kurẹriẹ. Jọ o jọ ọtamuo mai ilele Jesu inọ ma re ru okpiruo nana nọ a muhọ omai obọ na gba. Joma gbaemu inọ ma rẹ rehọ oke, ẹgba, gbe eyero mai kpobi rọ wha ujaje Kristi na haro inọ: Wha nyai ru ilele.

[Oruvẹ-obotọ]

Ẹvẹ Whọ Sai ro Lele Jesu?

● Oghẹrẹ vẹ ma rẹ rọ wha usiuwoma Uvie na se amọfa?—Matiu 10:11-13; Luk 10:5.

● Ahwo a tẹ wọso usiuwoma ota mai, ẹvẹ eme ọ Jesu e sai ro fi obọ họ kẹ omai thihakọ?—Mak 13:9-13.

● Ẹvẹ ma re yeri kugbe ahwo nọ a be kezọ kẹ ovuẹ mai hi?—Luk 10:10, 11.

● Ma tẹ rọ iruo usiuwoma ota na karo, eme o rẹ sai mu omai ẹro?—Luk 12:22-31.

[Uwoho nọ o rrọ ẹwẹ-obe avọ 87]

Eme ọwhẹrẹ o re ru otẹrọnọ ekakọ riẹ i bu vi epanọ ọye ọvo ọ sai ro vu ai?

[Uwoho nọ o rrọ ẹwẹ-obe avọ 91]

Uyoyou o rẹ wọ omai ta usiuwoma evaọ oria kpobi nọ ma jẹ sae ruẹ ahwo

[Uwoho nọ o rrọ ẹwẹ-obe avọ 92]

Ilele “udheosa gbe ikpe na a tẹ ghọghọ ziheze!”