Ahwo Buobu A Ruẹ E Riẹ Taure Ẹdẹ Pẹntikọst O te ti Te

Nọ Jesu ọ kparoma no uwhu ze no, ọ tẹ vuẹ ikọ 11 riẹ inọ a nya bru ei kpobọ ugbehru jọ evaọ Galili. Ilele riẹ efa nọ i bu te enwenọ egba isoi (500) a jọ etẹe re, yọ ejọ rai a jẹ vro vẹre. (Matiu 28:17; 1 Ahwo Kọrint 15:6) Rekọ ẹme nọ Jesu ọ ta kẹ ae o kẹ rai omomọvo imuẹro nọ ọ ginẹ kparoma no.

Jesu ọ vuẹ rai nọ Ọghẹnẹ ọ kẹ riẹ udu kpobi no evaọ odhiwu gbe otọakpọ. Ọ tẹ tuduhọ ae awọ nọ: “Fikiere, wha nyai wuhrẹ ahwo erẹwho kpobi re a zihe ruọ ilele, wha họ ae ame evaọ odẹ Ọsẹ na gbe Ọmọ na gbe ẹzi ọfuafo na, wha wuhrẹ ae re a ru eware kpobi nọ me jie uzi rai kẹ owhai.” (Matiu 28:18-20) Ẹhẹ, Jesu ọ rrọ uzuazọ, yọ iruo usiuwoma ota na e gbẹ riẹe oja.

Ilele riẹ kpobi Jesu ọ kẹ iruo nana, te ezae, te eyae, gbe emọ. Ewegrẹ a te gwọlọ whaha ae iruo na, rekọ Jesu ọ kẹ rai imuẹro nọ: “A rehọ udu kpobi kẹ omẹ no evaọ odhiwu gbe otọakpọ.” Kọ erere vẹ ilele riẹ a ti wo no onana ze? Ọ vuẹ rai nọ: “Rri! Mẹ rrọ kugbe owhai edẹ na kpobi rite oke urere uyero-akpọ na.” Orọnikọ Jesu ọ ta nọ ohwo kpobi nọ o bi ru iruo usiuwoma ota na o ti wo ẹgba nọ o re ro ru eware igbunu hu. Dede na, ẹzi ọfuafo na o ti fiobọhọ kẹ ae evaọ iruo na.

Nọ Jesu ọ kparoma no uwhu ze no, ọ romavia kẹ ilele riẹ “edẹ udhuvẹ soso.” Oghẹrẹ ugboma sa-sa ọ rọ romavia je “dhesẹ oma riẹ kẹ ae avọ imuẹro ivevẹ buobu inọ ọ kparoma ze no,” o te je wuhrẹ ai “kpahe Uvie Ọghẹnẹ.”—Iruẹru Ikọ 1:3; 1 Ahwo Kọrint 15:7.

U muẹro nọ okenọ ikọ na a gbẹ jọ Galili ẹsiẹe Jesu ọ rọ vuẹ ae nọ a zihe kpobọ Jerusalẹm. Okenọ ọ jọ kugbe ai evaọ Jerusalẹm, ọ ta kẹ ae nọ: “Wha no Jerusalẹm ho, rekọ wha hẹrẹ oware nọ Ọsẹ na ọ ya eyaa riẹ, onọ wha yo mi omẹ na; keme Jọn ọ rọ ame họ ahwo ame, rekọ a te rọ ẹzi ọfuafo họ owhai ame nọ emedẹ jọ e tẹ vrẹ no.”—Iruẹru Ikọ 1:4, 5.

Uwhremu na, Jesu ọ tẹ wariẹ romavia kẹ ikọ riẹ. “O te su ae vrẹ rite obọ Bẹtani,” onọ o rrọ ofẹ ovatha-ọre Ugbehru Olivi. (Luk 24:50) Dede nọ Jesu ọ vuẹ rai eware buobu no kpahe epanọ o ti ro zihe kpobọ odhiwu, a gbe bi roro nọ otọakpọ na Uvie riẹ o te jọ.—Luk 22:16, 18, 30; Jọn 14:2, 3.

Ikọ na a tẹ nọ Jesu nọ: “Olori, kọ who bi zihe uvie na ziọ Izrẹl evaọ oke nana?” Ọ tẹ ta kẹ ae nọ: “U du gwọlọ nọ wha rẹ riẹ oke hayo ezi na ha onọ Ọsẹ na ọvo o wo udu riẹ.” Kẹsena ọ tẹ wariẹ fiẹgba họ iruo nọ u fo nọ a re ru inọ: “Wha ti wo ogaga nọ ẹzi ọfuafo na o te bru owhai ze no, wha ve ti se isẹri kpahe omẹ evaọ Jerusalẹm, evaọ Judia soso gbe Sameria, je rite oria nọ o mai thabọ evaọ otọakpọ na.”—Iruẹru Ikọ 1:6-8.

Epanọ ikọ na a rọ rrọ kugbe Jesu evaọ Ugbehru Olivi na, Jesu o te muhọ emuvrẹ kpobọ odhiwu. U kri hi, ẹgho o te ruru ei, a gbẹ ruẹ e riẹ hẹ. Nọ Jesu ọ kparoma no uwhu ze no, ọ jẹ rọ oghẹrẹ ugboma sa-sa romavia kẹ ahwo. Rekọ obọnana, o zihe ruọ omama ẹzi no yọ ugboma ẹzi o bi ro muvrẹ na. (1 Ahwo Kọrint 15:44, 50; 1 Pita 3:18) Nọ ikọ Jesu a bi rri rie nọ o bi muvrẹ na, “ezae ivẹ nọ i ku iwu efuafo họ” a tẹ romavia idudhe je dikihẹ kẹle ae. Ezae nana yọ ikọ-odhiwu nọ i zihe oma ruọ ahwo, a tẹ nọ ikọ Jesu nọ: “Whai ezae Galili, fikieme wha ro dikihẹ bi rri ehru? Jesu nana nọ a rehọ vrẹ kpohọ ehru siọ owhai ba na, ọ te nyaze evaọ oghẹrẹ ovona nọ wha ruẹ nọ ọ be rọ nyavrẹ kpohọ ehru na.”—Iruẹru Ikọ 1:10, 11.

Nọ Jesu o je no otọakpọ na, orọnikọ ahwo-akpọ kpobi a ruẹ e riẹ hẹ, ilele riẹ ọvo. O ti zihe ze “evaọ oghẹrẹ ovona,” orọnikọ ahwo-akpọ kpobi a te riẹ kpahe iẹe he, ilele riẹ ọvo a ti vuhumu nọ o zihe ze no evaọ ogaga Uvie riẹ.

Ikọ na a te zihe kpobọ Jerusalẹm. Nọ edẹ jọ e vrẹ no, ikọ na gbe ilele efa a te kokohọ, yọ “Meri oni Jesu avọ inievo riẹ” a jariẹ re. (Iruẹru Ikọ 1:14) Aikpobi a jẹ lẹ gaga. Oware jọ nọ a lẹ kpahe họ, epanọ a rẹ rọ salọ olele nọ ọ te rehọ ẹta Judas Iskariọt, re ikọ 12 na a sae gba. (Matiu 19:28) A gwọlọ nọ olele nọ a te salọ na ọ rẹ jọ ọnọ ọ rọ ẹro ruẹ iruẹru Jesu gbe ẹkparomatha riẹ. A tẹ ma ẹta re a riẹ ohwo nọ Ọghẹnẹ ọ salọ, yọ onana họ orọ urere nọ a ma ẹta nọ a kere fihọ Ebaibol na. (Olezi 109:8; Itẹ 16:33) A tẹ salọ Matayas, ọnọ o sae jọnọ ọ jọ usu ilele 70 nọ Jesu o vi kpohọ usiuwoma ota na, kẹsena “a te kele iei kugbe ikọ ikpegbọvo na.”—Iruẹru Ikọ 1:26.

Nọ Jesu o muvrẹ kpobọ odhiwu no, nọ edẹ ikpe e jẹ ruemu no, ahwo Ju a te ru Ehaa Pẹntikọst na evaọ 33 C.E. Ilele Jesu nọ i bu te oware wọhọ udhozeza (120) a kokohọ ubruwou ehru jọ evaọ Jerusalẹm. Idudhe na, edo jọ nọ ọ wọhọ edo ofou ọgaga ọ tẹ vọ uwou na soso. A tẹ ruẹ eware nọ e wọhọ ẹrọo nọ e be ware erae nọ e rrọ uzou omomọvo evaọ uwou na. Ilele na a te mu evẹrẹ sa-sa họ ẹjẹ. Ẹzi ọfuafo nọ Jesu ọ ya eyaa nọ a ti ku ku ae na o te rai obọ no!—Jọn 14:26.