Oware nọ Evra E Rẹ Sai Wuhrẹ Omai

“RI ERAO ora ehru na; a rẹ kọ họ, a rẹ kọrọ họ, a re koko họ eru hu, rekọ Ọsẹ obọ odhiwu rai ọ rae ẹkuọ. Kọ wha gbẹ ghare vi ai hi?” (Matiu 6:26) Jesu Kristi ọ ta eme nana evaọ ovuẹ riẹ nọ o viodẹ nọ ọ kẹ evaọ akotọ ugbehru kẹle Abade Galili na. Orọnikọ ilele riẹ ọvo e jọ ogbotu na ha. Otu obuobu ọrọ ahwo nọ a rẹ sai zihe ruọ ilele riẹ nọ i no abọ sa-sa ẹkwotọ na ze a jariẹ. Ibuobu rai yọ iyogbere nọ e rehọ ahwo nọ e be mọ bru Jesu ze re o siwi ai.—Matiu 4:23–5:2; Luk 6:17-20.

Nọ o siwi enọ e be mọ kpobi no, Jesu ọ tẹ tẹrovi ẹgwọlọ abọ-ẹzi nọ ọ mai wuzou. Usu eware nọ o wuhrẹ họ onọ ma jọ obehru fodẹ na.

Emevra e rrọ akpọ kri no. Ejọ rai e rẹ re emera, efa kọ ibi-ire. Otẹrọnọ Ọghẹnẹ o ru eware eyena kpobi kẹ evra, avro ọ riẹ hẹ inọ ọ sai fi obọ họ kẹ idibo ahwo-akpọ riẹ ruẹ emuore okpẹdẹ rai. Ọ rẹ sai ru onana ẹkwoma obọ nọ o re fihọ kẹ ae ruẹ iruo re a ruẹsi wo ugho nọ a rẹ rọ dẹ emuore. Hayo ọ rẹ sai ru re eware nọ a kọ i woma. Eva okenọ ẹbẹbẹ idudhe ọ tẹ roma via, Ọghẹnẹ ọ rẹ sai duobọte idu emamọ erivẹ gbe egbẹnyusu re a ghale umutho emu nọ a wo kugbe enọ i wo ho.

Eware efa buobu e riẹ nọ ma rẹ sai wuhrẹ otẹrọnọ ma roma totọ rri uzuazọ ọmọvra. Ọghẹnẹ ọ ma ereghẹ fihọ evra re a sae bọ iwou nọ a rẹ jọ yọrọ emọ rai. Muẹrohọ oghẹrẹ iwou ivẹ nọ emevra e rẹ bọ. Uwoho uwou arata o rrọ ẹkpẹlobọ na. A rẹ bọe fihọ akotọ utho hayo ugbẹhẹ uwou. Ehru utho o rẹ jọ wọhọ idhe riẹ hayo, wọhọ epanọ o rrọ uwoho nana, ebọ uwou na oye o rẹ jọ idhe kẹ uwou ọvra na. Ọ rẹ ta ẹkpẹ kugbe rọ gba otọ uwou na kugbe wọhọ egho. Te ọrọ ọzae gbe ọrọ aye na a re ruiruo gaga gwọlọ ẹkpẹ, yọ o rẹ sae rehọ ae vrẹ amara ọvo re a tẹ bọ uwou na re. A vẹ rọ ẹbe gbe ileli hwa otọ uwou na. Ai ivẹ na a rẹ gb’obọ kugbe ko emọ rai. Uwou nọ o rrọ obotọ na yọ orọ omuedi. Ọvra nana nọ ọ g’oma iruo na ọ rẹ viẹ ebe-ẹwọ rọ bọ uwou riẹ. Ọ rẹ sae bọ uwou re evaọ ẹdọvo, yọ ọ rẹ sae bọ iwou nọ i bu vi 30 evaọ ezi ọvo!

Eme ma wuhrẹ no onana ze? Otẹrọnọ Ọghẹnẹ ọ rẹ kẹ evra ona gbe ekwakwa buobu nọ a rẹ rọ bọ iwou, avro ọ riẹ hẹ, ọ rẹ sai fi obọ họ kẹ idibo ahwo-akpọ riẹ ruẹ oria nọ a rẹ rọ uzou kpahe. Dede na, Jesu o dhesẹ nọ oware ofa jọ o r’oja otẹrọnọ ma gwọlọ re Jihova Ọghẹnẹ o fi obọ họ kẹ omai ruẹ ẹgwọlọ abọ-iwo mai. Jesu ọ y’eyaa nọ: “Wha kake guọlọ uvie riẹ gbe [ẹrẹreokie] riẹ, eware enana kpobi a reti fi ai họ kẹ owhai.” (Matiu 6:33) O rẹ sai gbe owhẹ unu inọ, ‘Eme o gwọlọ re a kake gwọlọ Uvie Ọghẹnẹ?’ Eva e te were Isẹri Jihova enọ e be ghale emagazini nana, re a kẹ uyo yena.