Oware nọ Ebaibol na Ọ Ta Kpahe Iruo gbe Ugho

Kọ iruo gbe ugho e wha awaọruọ se owhẹ no ẹdẹ jọ? O sae jọ bẹbẹ re ma rẹrote omamai jẹ sae gọ Jihova epanọ ọ gwọlọ. Ebaibol na ọ kẹ ehrẹ nọ e rẹ sai fiobọhọ kẹ omai.

1. Eme Ebaibol na ọ ta kpahe iruo?

Ọghẹnẹ ọ gwọlọ nọ ma reawere iruo mai. Ebaibol na ọ ta nọ “oware ovo o rrọ họ nọ u woma kẹ ohwo-akpọ vi . . . omaweromẹ [nọ o re wo] evaọ iruo egaga riẹ.” (Ọtausiuwoma Na 2:24) Jihova yọ ọgba-iruo. Ma tẹ be rọ aro kele iei bi ru iruo gaga, eva e rẹ were iẹe, yọ eva e rẹ were omai re.

Iruo yọ oware nọ u wuzou. Rekọ ma rẹ kuvẹ hẹ re u wuzou vi egagọ Jihova. (Jọn 6:27) Ọ ya eyaa kẹ omai nọ, ma tẹ rehọ ọyomariẹ karo, ọ te rẹrote omai.

2. Ẹvẹ u fo nọ ma re rri ugho?

Dede nọ Ebaibol na ọ ta nọ “ugho o rẹ thọ ohwo,” ọ vẹvẹ omai unu re nọ, ugho ọvo o sai ru omai wo evawere he. (Ọtausiuwoma Na 7:12) Fikiere, Ebaibol na ọ tuduhọ omai awọ nọ ma you ugho ho, ukpoye, jọ eware nọ ma wo obọnana ‘e da omai ẹro.’ (Se Ahwo Hibru 13:5.) Nọ oware nọ ma wo o tẹ da omai ẹro, ma rẹ dhẹ ogbalegbo efa nọ ma re wo kugbe he. Ma ti mu re esa vọ uzou hu. (Itẹ 22:7) Iye nọ i re te ahwo nọ a re fiedhọ hayo ru eware nọ a re ro fe vẹrẹ vẹrẹ i ti te omai gbe he.

3. Oghẹrẹ vẹ u fo nọ ma re ru ugho nọ ma wo?

Jihova yọ Ọghẹnẹ nọ o re ru ọghọ, yọ otẹrọnọ ma re “ru ọghọ [je] siobọno kẹ amọfa” kiyọ ma be rọ aro kele iei. (1 Timoti 6:18) Ma sae rọ ugho mai fiobọhọ evaọ ukoko na jẹ rehọ iẹe fiobọhọ kẹ amọfa nọ eware e rrọ gaga kẹ, maero kọ ibe eg’Ọghẹnẹ mai. Orọnikọ unuigho nọ ma rọ kẹ okẹ o mae rọ Jihova oja ha, rekọ ẹjiroro nọ ma rọ kẹ okẹ na. Nọ ma tẹ kẹ okẹ no udu mai ze, eva e te were omai, yọ ma ti ru eva were Jihova re.—Se Iruẹru Ikọ 20:35.

GBE WUHRẸ EWARE EFA

4. Rọ oghẹrẹ nọ who bi ro ru iruo wha orro se Jihova

IVIDIO: Rehọ Uzuazọ Ra Kpobi Ruiruo kẹ Jihova (4:39)

• Evaọ ividio na, oghẹrẹ iruemu vẹ Jason o je dhesẹ evaọ obọ iruo riẹ? Kọ e were owhẹ?

• Eme o ru re ọ gbẹ rọ oke eware efa nọ i wuzou ru iruo ho?

Se Ahwo Kọlọsi 3:23, 24, kẹsena wha vẹ ta ẹme kpahe onọ nana:

• Fikieme oghẹrẹ nọ ma rehọ iruo u ro wuzou?

Iruo yọ oware nọ u wuzou. Rekọ ma rẹ kuvẹ hẹ re u wuzou vi egagọ Jihova

5. Ma te wo edẹro ma re wo evawere

Ahwo buobu a be rufe tufe he fikinọ a be gwọlọ koko igho buobu họ. Rekọ ohrẹ nọ Ebaibol na ọ kẹ u wo ohẹriẹ. Se 1 Timoti 6:6-8, kẹsena wha vẹ ta ẹme kpahe onọ nana:

• Eme Ebaibol na ọ ta kẹ omai nọ ma ru?

IVIDIO: Jọ “Onọ Wha Wo O Da Owhai Ẹro” (3:20)

• Dede nọ iviuwou nana a wo ugho tere he, eme ọ be lẹliẹ eva were ae?

Kọ otẹrọnọ ma wo buobu no yọ ma gbẹ be gwọlọ efa kugbe ghele? Jesu o gbiku jọ nọ u dhesẹ uye nọ u re noi ze. Se Luk 12:15-21, kẹsena wha vẹ ta ẹme kpahe onọ nana:

• Eme who wuhrẹ evaọ iku nọ Jesu o gbe na? —Rri owọ avọ 15.

Se Itẹ 10:22 gbe 1 Timoti 6:10 re whọ rehọ ae wawo ohwohwo. Kẹsena wha vẹ ta ẹme kpahe enọ nana:

• Eme who roro nọ o mai wuzou? Usu nọ a re wo kugbe Jihova manikọ ugho buobu nọ a re wo? Fikieme?

• Didi ebẹbẹ i re noi ze nọ ohwo o te bi le ugho?

6. Jihova ọ te rẹrote omai

IVIDIO: Jihova Ọ te Rẹrote Ẹgwọlọ Mai (6:21)

• Evaọ ividio na, ebẹbẹ vẹ oniọvo na o wo?

• Eme o ru nọ ọ sai ro thihakọ ebẹbẹ na?

Se Matiu 6:25-34, kẹsena wha vẹ ta ẹme kpahe onọ nana:

• Eme Jihova ọ ya eyaa nọ o re ru kẹ ahwo nọ a fi rie họ oria ọsosuọ?

EME WHO WUHRẸ NO?

Iruo hayo okọ gbe ugho i wuzou, rekọ ma rẹ kuvẹ vievie he re i ru omai gbabọkẹ egagọ Jihova.

Ọkiẹkpemu

• Eme ọ rẹ sai fiobọhọ kẹ owhẹ rri iruo epanọ u fo?

• Eme edẹro o re fiobọhọ kẹ owhẹ wo?

• Ẹvẹ whọ sai ro dhesẹ nọ who fievahọ eyaa nọ Jihova ọ ya inọ ọ rẹ rẹrote ahwo riẹ?

KIẸ KPAHE EFA

Se re whọ riẹ sọ Ebaibol na ọ ta nọ ugho u yoma.

“Kọ Ugho Yọ Ekpehre Oware?” (Uzoẹme nọ o rrọ itanẹte)

Wuhrẹ kpahe oghẹrẹ okẹ nọ o rẹ were Ọghẹnẹ.

“Eme Ebaibol na Ọ ta Kpahe Okẹ nọ A rẹ Kẹ?” (Uzoẹme nọ o rrọ itanẹte)

Kọ edhọ-ifio yọ oware erozaha gheghe?

“Oware nọ Ebaibol Ọ Ta—Edhọ-Ifio” (Awake!, Asa 2015)

Ruẹ oware nọ o wọ ohwo jọ nọ o je fi edhọ, nọ ọ jẹ kpare ethẹ ruọ iwou ahwo nwene uzuazọ riẹ.

“Enyenya nọ A rẹ rọ Dhohrẹ E Jẹ Hae Were Omẹ Gaga” (Uwou-Eroro Na, Ọvo 1, 2012)