13. Fikieme ahwo buobu a gbe ro lele Jesu hu?

¹³ Evaọ oke Jesu, u je gbe ilele Jọn Ọhọahwo-Ame na unu inọ ilele Jesu a be siọ emuọriọ ba ha. Jesu ọ ta kẹ ae nọ u du gwọlọ nọ ilele riẹ a rẹ siọ emuọriọ ba ha nọ ọ gbẹ rrọ uzuazọ na. (Mat. 9:14-17) Ghele na, ahwo Farisi gbe amọfa nọ a wọso Jesu a jẹ ta nọ ọ be rọwo kuomagbe ai ru eware egagọ rai nọ a ru no otọ ze he. Eva e dha rai gaga nọ a ruẹ nọ Jesu o siwi ohwo jọ nọ ọ jẹ mọ evaọ Ẹdijala. (Mak 3:1-6; Jọn 9:16) A jẹ rọ obọ sudu inọ a bi koko Ẹdijala na, rekiyọ a jẹ kẹ ahwo uvẹ re a jọ etẹmpol Ọghẹnẹ thueki. Eva e dha rai gaga nọ Jesu o le ahwo na no etẹmpol na. (Mat. 21:12, 13, 15) U te no ere no, u wo oke jọ nọ Jesu ọ jẹ ta usi uwoma kẹ ahwo evaọ isinagọgo obọ Nazarẹt. Kẹsena o te gbiku eware jọ nọ e via evaọ Izrẹl ro dhesẹ kẹ ahwo na inọ a wo ẹrọwọ họ, a tẹ jẹ rrọ ahwo oriobọ. Onana u ru eva dha ae gaga. (Luk 4:16, 25-30) Ahwo buobu a rọwo lele Jesu hu keme ọ rọwo ru eware nọ a je roro nọ o ti ru hu.​—Mat. 11:16-19.

14. Fikieme Jesu ọ rọ ta nọ iruemu nọ i no otọ ze nọ e rọwokugbe Ikereakere na ha e thọ?

¹⁴ Eme Ikereakere na e ta? Jihova ọ rọ Aizaya ọruẹaro na ta nọ: “Unu gheghe ahwo nana a bi ro bru omẹ ze yọ igbenu rai a be rọ kẹ omẹ ọghọ, rekọ udu rai u thabọ no omẹ gaga; yọ ijaje ahwo-akpọ nọ a ro wuhrẹ ai no a bi lele rọ dhozọ mẹ.” (Aiz. 29:13) Jesu ọ ta gba inọ iruemu ahwo nana nọ i no Ikereakere na ze he na e thọ. Ahwo nọ a roro nọ iruemu ẹwho rai gbe izi rai i wuzou vi oware nọ Ikereakere na e ta, a be siọ Jihova gbe Mesaya nọ o vi ze.

17. Eme ahwo buobu a je rẹro nọ Jesu o ti ru?

¹⁷ Ahwo jọ evaọ oke Jesu a jẹ gwọlọ nọ egọmeti Rom o gbe su ai hi. A je rẹro nọ Mesaya na o ti siwi ai no obọ egọmeti Rom nọ o je kienyẹ ae. A jẹ tubẹ gwọlọ rehọ Jesu mu ovie dede, rekọ ọ se. (Jọn 6:14, 15) U wo amọfa, te izerẹ egagọ ahwo Ju nọ ozọ u je mu inọ Jesu o te si ai no otọ egọmeti Rom, o sae wha ẹbẹbẹ se ai. A riẹ nọ Jesu o te ru ere, eva e te dha ahwo Rom, a ve ti si ai no ọkwa nọ a kẹ rai. Eware nana i ru nọ ahwo Ju buobu a gbe ro lele Jesu hu.

18. Eruẹaruẹ vẹ ahwo Ju buobu a jẹ gwọlọ yo?

¹⁸ Eme Ikereakere na e ta? Dede nọ eruẹaruẹ buobu i dhesẹ nọ Mesaya na ọ te jọ Ọgbaẹmo nọ o ti fi kparobọ, eruẹaruẹ efa i dhesẹ nọ o ti whu fiki izieraha mai tao. (Aiz. 53:9, 12) O tẹ rrọ ere, kọ fikieme ahwo Ju a je ro rẹro oware ofa? A je rẹro ere keme eruẹaruẹ nọ e ta kpahe epanọ ebẹbẹ rai i re ro kuhọ ẹsiẹsiẹe ọvo a gwọlọ yo.​—Jọn 6:26, 27.