Uye U Te Oge Aghẹmeeyo

Jesu o rri Jọn Ọhọahwo-Ame na ghaghae, rekọ ẹvẹ ahwo buobu a rri Jọn? Jesu ọ ta nọ: “Oge ọnana . . . o wọhọ emaha nọ e keria oria eki nọ e be ta kẹ emaha efa nọ, ‘Ma kporo urete kẹ owhai, rekọ wha gbile he; ma viẹ, rekọ wha weri hi.’”—Matiu 11:16, 17.

Eme họ otọ ẹme Jesu na? O ru ẹme na vẹ nọ: “Jọn ọ nyaze, ọ be re hayo da wọhọ ahwo edekọ họ, ghele na ahwo a be ta nọ, ‘Idhivẹri ọ riẹe oma.’ Ọmọ ohwo ọ nyaze, ọ be re jẹ da, ghele na ahwo a be ta nọ, ‘Rri! Ọgba-ore gbe ọgba-udi ọ rrọ, ogbẹnyusu enọ i re mi osa-uzou gbe erahaizi.’” (Matiu 11:18, 19) Jọn o yeri uzuazọ Nazarait, koyehọ ohwo nọ ọ roma mudhe kẹ Ọghẹnẹ no yọ ọ jẹ tubẹ da udi hi, ghele na oge nana ọ ta nọ idhivẹri i bi kpokpo iei. (Ikelakele 6:2, 3; Luk 1:15) Evaọ abọdekọ riẹ, Jesu o je yeri uzuazọ wọhọ ahwo edekọ kpobi. Ọ jẹ re emu yọ ọ jẹ da umutho udi, rekọ ahwo a jẹ ta nọ ọ be re jẹ da vrẹ oma. Oware ovo nọ ohwo o re ru nọ o rẹ were ahwo na o rrọ họ.

Jesu ọ ta nọ oge yena ọ wọhọ emaha nọ e rrọ oria eki nọ i nuhu oma ha okenọ emaha ibe rai a kporo urete, yọ a weri hi okenọ emaha edekọ e jẹ viẹ. Jesu ọ tẹ ta nọ: “Oghẹrẹ kpobi kẹhẹ, iruo nọ areghẹ o ru a rẹ rọ riẹ nọ o kiẹrẹe.” (Matiu 11:16, 19) Ẹhẹ, “iruo” nọ Jọn avọ Jesu a ru i dhesẹ nọ eme iyoma nọ a jẹ ta kpahe ae na ọrue.

Nọ Jesu ọ ta nọ oge na ọrọ aghẹmeeyo no, ọ tẹ whọku ikpewho jọ wọhọ Korazin, Bẹtsaida, gbe Kapaniọm nọ ọ jọ ru iruo igbunu buobu. Jesu ọ ta nọ o hae jọnọ eva Taya gbe Saedọn ọ jọ ru iruo igbunu yena, ahwo nọ e rrọ ikpewho yena a hai kurẹriẹ. Ọ tẹ jẹ fodẹ Kapaniọm, oria nọ ọ be rria anwọ oke jọ ze na. Makọ ibuobu ahwo nọ a rrọ eva riẹ dede a kurẹriẹ hẹ. Jesu ọ ta kpahe okpẹwho yena nọ: “O te mae lọhọ kẹ Sọdọm vi owhẹ evaọ Ẹdẹ Ẹdhoguo.”—Matiu 11:24.

Kẹsena Jesu o te jiri Ọsẹ riẹ, ọnọ ọ ko eware ididi nọ e rrọ ikere na dhere “iwoareghẹ gbe enọ e riẹ ikpebe,” o te rovie ai via kẹ iruori nọ e wọhọ emaha. (Matiu 11:25) Ọ kẹ ahwo otiọye na obọdẹ uzizie jọ nọ: “Wha nya bru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma. Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ. Keme owhowha mẹ o rẹ nyaoma ha, yọ owha mẹ o rrọ vovori.”—Matiu 11:28-30.

Oghẹrẹ vẹ Jesu ọ jẹ rọ kẹ ahwo omosasọ? Isu egagọ na a jẹ rọ owha ogbẹgbẹdẹ bẹ ahwo, je fi izi obọrai ba enọ Ọghẹnẹ ọ kẹ rai, wọhọ uzi Ẹdijala na nọ a je si kekeke. Rekọ Jesu ọ jẹ sasa ahwo oma ẹkwoma uzẹme nọ o rrọ ikere na nọ o je ro wuhrẹ ai, o je fi orọ obọriẹ bae he. O te je dhesẹ kẹ ahwo nọ isu orẹwho na a be nwẹ gbe enọ e rrọ uweri fiki izieraha rai, epanọ a sai ro wo ufuoma. Ẹhẹ, Jesu o dhesẹ kẹ ae epanọ a sai ro wo erọvrẹ izieraha rai gbe epanọ a sae rọ ruẹrẹ usu rai họ kugbe Ọghẹnẹ.

Ahwo kpobi nọ a jẹ uzizie Jesu na rehọ a sae rọ oma mudhe kẹ Ọghẹnẹ, jẹ gọ Ọsẹ obọ odhiwu mai nọ ọ vọ avọ ohrọ-oriọ na. Oyena yọ owha ogbẹgbẹdẹ hẹ, keme izi Ọghẹnẹ e rrọ owha ogbẹgbẹdẹ vievie he.—1 Jọn 5:3.