Eruẹaruẹ na họ: “Rri! Odibo mẹ ọnọ mẹ salọ, oyoyou mẹ, ọnọ mẹ jẹrehọ! Mẹ te kẹe ẹzi mẹ, yọ o re ti dhesẹ oware nọ uvioziẹ o rrọ kẹ erẹwho na. Ọ te whọ ẹwhọ họ hayo ru edo ho, yọ ohwo ọvo o ti yo urru riẹ evaọ oko-ore he. O ti wiri ukpoko nọ u wiri rẹrẹ no ho, yọ o ti furie uwhiki nọ u bi kuye iwiri hi bẹsenọ ọ rẹ kpọ eware kpobi nọ e thọ vi no. Evaọ uzẹme, erẹwho na a ti fi ẹruore họ odẹ riẹ.”—Matiu 12:18-21; Aizaya 42:1-4.

U te no ere no, Jesu o whowho ovuẹ omosasọ riẹ kẹ enọ oma o lọhọ no wọhọ ukpoko nọ u wiri rẹrẹ. A tẹ jẹ rrọ wọhọ uwhiki nọ u bi kuye iwiri nọ o joma fu no. Jesu o wiri ukpoko nọ u wiri rẹrẹ no ho, yọ o furie uwhiki nọ u bi kuye iwiri nọ o joma fu no ho. Ukpoye, ọ rọ ohrọ gbe uyoyou sasa iwhrori oma. Evaọ uzẹme, Jesu họ ọnọ erẹwho na kpobi a fi ẹruore rai họ.