Oware Nọ Ma Wuhrẹ Mi Jesu

Oghẹrẹ nọ Emama Ẹzi I bi ro Kpomahọ Omai

Jesu ọ jọ kugbe Ọsẹ riẹ wọhọ omama ẹzi “re a tẹ ma akpọ.” (Jọn 17:5) Fikiere, o te ọnọ ọ rẹ kẹ iyo enọ nọ e rrọ obotọ na gbagba.

Kọ ikọ-odhiwu a wo isiuru kpahe omai?

▪ Ma rẹ jọ eme nọ Jesu ọ ta ruẹ inọ ikọ-odhiwu a wo isiuru kpahe ahwo-akpọ gaga. Ọ ta nọ: “Oghọghọ o rẹ jọ aro ikọ Ọghẹnẹ fiki ọrahaizi ọvo nọ o kurẹriẹ.”—Luk 15:10.

Jesu o dhesẹ via inọ a kẹ ikọ-odhiwu owha-iruo nọ a re ro fi obọ họ kẹ idibo Ọghẹnẹ dikihẹ ga evaọ abọ-ẹzi. Fikiere, nọ Jesu ọ jẹ vẹvẹ ilele riẹ unu inọ a yọrọ oma re a siọ amọfa ba eru zoruẹ, ọ ta nọ: “Wha yọrọ oma rai re wha siọ omọvo emaha enana jọ ba ẹjẹfiẹ; keme, mẹ takẹ owhai nọ, eva obọ odhiwu, ikọ rai ebe ruẹ ovao Ọsẹ mẹ nọ ọrọ obọ odhiwu kẹse kẹse.” (Matiu 18:10) Orọnikọ Jesu ọ be rọ onana ta nọ duọ olele riẹ duọ ukọ-odhiwu nọ a ro mu nọ ọ rẹ sẹro riẹ hẹ. Rekọ ọ rọ onana dhesẹ inọ ijẹle nọ e be gbodibo kẹ Ọghẹnẹ a wo isiuru gaga kpahe ahwo nọ a rrọ ukoko Ileleikristi na.

Oghẹrẹ vẹ Ẹdhọ ọ sae rọ nwa omai oma?

▪ Jesu ọ vẹvẹ ilele riẹ unu inọ Setan ọ be daoma gwọlọ whaha ahwo re a siọ uzẹme kpahe Ọghẹnẹ ba ewuhrẹ. Jesu ọ ta nọ: “Nọ ohwo o yo ẹme uvie na ọ gbẹ riẹ otọ riẹ hẹ, oyoma na ọ vẹ nyaze soro o nọ a kọ họ eva riẹ rehọ.”—Matiu 13:19.

Jesu ọ fere edhere jọ nọ Setan ọ be rọ viẹ ahwo họ via okenọ ọ kẹ ọtadhesẹ ọrọ ọzae nọ ọ kọ eka họ udhu riẹ. Ọzae na o dikihẹ kẹ Jesu, eka na i dikihẹ kẹ Ileleikristi uzẹme nọ i ti lele Jesu su evaọ obọ odhiwu. Dede na, Jesu ọ ta nọ ọwegrẹ jọ ọ nyaze ọ tẹ “kọ ikpoko họ udevie eka na.” Ikpoko na i dikihẹ kẹ Ileleikristi erue. “Ukumuomu na họ ọwegrẹ nọ ọ kọ rae.” (Matiu 13:25, 39) Wọhọ epanọ ikpoko nọ e be dhẹ ze obọ e rẹ wọhọ eka na, ahwo nọ a bi se omarai Ileleikristi a rẹ sae wọhọ eg’Ọghẹnẹ uzẹme. Egagọ nọ i bi wuhrẹ iwuhrẹ erue a be viẹ ahwo họ ru eware nọ e wọso izi Ọghẹnẹ. Setan ọ be rehọ egagọ erue whaha ahwo ewo uvi usu kugbe Jihova Ọghẹnẹ.

Ẹvẹ ma sae rọ whaha Setan nọ ọ gbẹ nwa omai oma ha?

▪ Jesu o se Setan “okpohwo [hayo, osu] akpọ ọnana.” (Jọn 14:30) Evaọ olẹ se Ọghẹnẹ, Jesu ọ fodẹ oghẹrẹ nọ ma sai ro wo ọthọwẹ no obọ Setan. Jesu ọ lẹ se Ọsẹ obọ odhiwu riẹ kpahe ilele riẹ inọ: “Siwi ai no obọ oyoma na. A rọ e rọ akpọ na ha, wọhọ epanọ mẹ rọ ọ rọ akpọ na ha. Ru ai erẹri eva uzẹme na; ẹme ra uzẹme.” (Jọn 17:15-17) Otoriẹ Ẹme Ọghẹnẹ o rẹ sae thọ omai nọ ahwo akpọ nọ Setan o bi su a gbẹ sae rọ whẹ iruemu rai họ omai hi.

Ẹvẹ ikọ-odhiwu a bi ro kpomahọ omai nẹnẹ?

▪ Jesu ọ ta nọ: “Ere o rẹ te jọ urere akpọ na. Ikọ-odhiwu e rẹ te tha a vẹ te hẹriẹ iyoma no udevie ikiẹrẹe.” (Matiu 13:49) “Urere akpọ na” ma be rria na, yọ ima ahwo buobu a be jẹ emamọ owọ kpahe emamọ usi Uvie Ọghẹnẹ na.—Matiu 24:3, 14.

Rekọ orọnọ ahwo kpobi nọ a j’owọ nọ a bi ro wuhrẹ Ẹme Ọghẹnẹ a re wo ọjẹrehọ Ọghẹnẹ hẹ. Ikọ-odhiwu e be kpọ iruẹru idibo Ọghẹnẹ, yọ a be hẹriẹ ahwo nọ a gine wo uvi uyoyou kẹ Ọghẹnẹ no otu nọ ọ gwọlọ fi eware nọ a bi wuhrẹ h’iruo ho. Nọ o je dhesẹ ahwo nọ a re wo ọjẹrehọ Ọghẹnẹ, Jesu ọ ta nọ: “[Enana họ] enọ e rehọ eva oruọzewọ gbe ewoma yo ẹme na, a te kru ei whawha, a tẹ rehọ odiri mọ ibi.”—Luk 8:15.

Rọkẹ evuẹ efa, rri uzoẹme avọ 10 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 24]

Ikọ-odhiwu i bi fi obọ họ koko ahwo nọ a wo eva ezi ziọ ukoko Ileleikristi na