Jesu Ọ Kuyo Ẹghele Jọ nọ O Fe, Ọ tẹ jẹ Rrọ Osu

Jesu ọ gbẹ rrọ erẹ, be nya Pẹria vrẹ kpobọ Jerusalẹm. Ẹghele jọ nọ o fe ọ tẹ dhẹ bru rie je kigwẹ fihọ aro riẹ. Ọzae na yọ “omọvo isu na jọ,” ẹsejọhọ omọvo enọ i wuzou evaọ uwou-egagọ na hayo omọvo ogbẹgwae Sanhẹdrin. Ọ tẹ nọ Jesu nọ: “Owuhrẹ owoma, eme me re ru hrọ re mẹ reuku uzuazọ ebẹdẹ bẹdẹ?”—Luk 8:41; 18:18; 24:20.

Jesu ọ tẹ ta kẹe nọ: “Fikieme who ro se omẹ owoma? Ohwo ọvo o woma ha ajokpaọ omọvo, Ọghẹnẹ.” (Luk 18:19) Ẹsejọhọ ọzae nana o se Jesu “owoma” wọhọ epanọ iwuhrẹ rai a rẹ rọ edẹ-ovao ro ku edẹ họ ahwo. Dede nọ Jesu o wo onaa ewuhrẹ gaga, o ru ọzae na riẹ nọ Ọghẹnẹ ọvo a rẹ sai se “owoma.”

Jesu ọ tẹ kẹe ohrẹ nọ: “Whọ tẹ gwọlọ wo uzuazọ, hai koko ijaje na.” Ọzae na ọ tẹ nọe nọ: “Ijaje vẹ?” Jesu ọ tẹ fodẹ izi isoi evaọ udevie Izi Ikpe na, enọ e ta kpahe ohwo-okpe, ẹnwae-obro, uji-utho, isẹri ọrue, gbe ọghọ nọ a rẹ rọ kẹ ọsẹgboni. Kẹsena ọ tẹ fodẹ ujaje jọ nọ u wuzou gaga inọ: “Who re you ọrivẹ ra wọhọ omobọ ra hrọ.”—Matiu 19:17-19.

Ọzae na ọ tẹ ta kẹe nọ: “Mẹ be hai koko ijaje nana kpobi; eme ọfa o kiọkọ kẹ omẹ?” (Matiu 19:20) Ẹsejọhọ o bi roro nọ u wo oware ulogbo jọ nọ o bi ru hu, nọ u fo nọ o re ru re ọ rọ ere wo uzuazọ ebẹdẹ bẹdẹ. Nọ Jesu ọ ruẹ oghẹrẹ nọ oware na o riẹe oja te, o te wo “uyoyou” kẹe. (Mak 10:21) Rekọ ọzae na o wo ẹbẹbẹ jọ.

Ekwakwa efe ọzae nana e riẹe oja gaga, fikiere Jesu ọ tẹ ta kẹe nọ: “Oware jọ u gbe kiọkọ kẹ owhẹ: Nya, re whọ zẹ eware nọ who wo, whọ vẹ rọ igho na kẹ iyogbere, who ti wo efe evaọ obọ odhiwu; whọ vẹ nyaze te jọ olele mẹ.” Ẹhẹ, ọzae na ọ rẹ ghale igho riẹ kẹ iyogbere, ahwo nọ a rẹ sae hwa zihe kẹe he, ọ vẹ nyaze te jọ olele Jesu. Ẹsejọhọ ohrọ riẹ o re Jesu nọ ọzae na ọ kpama nyavrẹ avọ uweri. Ọzae na ọ siọ obọdẹ efe nọ o hai tei obọ fikinọ o you “eyero buobu” nọ o wo na gaga. (Mak 10:21, 22) Jesu ọ ta nọ: “O te jọ bẹbẹ gaga kẹ enọ i wo igho re a ruọ Uvie Ọghẹnẹ!”—Luk 18:24.

Ẹme yena gbe ẹme nọ Jesu ọ ta lele iei o gbe ilele Jesu unu gaga, ọ ta nọ: “O rẹ mae lọhọ re ekamẹle ọ nya eghogho ẹguede lafi viọ ọdafe nọ ọ rẹ ruọ Uvie Ọghẹnẹ.” Ẹme nana o te ru ilele na nọe nọ: “Kọ ono a te sai gine siwi?” Kọ ginọ uzẹme inọ o lọhọ vievie he re ohwo ọ sai wo esiwo? Jesu o te rri ilele riẹ, ọ tẹ ta kẹ ae nọ: “Eware nọ ahwo a rẹ sai ru hu, Ọghẹnẹ ọ rẹ sai ru ae.”—Luk 18:25-27.

Pita ọ tẹ ta nọ ọyomariẹ avọ ilele edekọ a ru epanọ ọdafe na o ru na ha, ọ ta nọ: “Rri! Ma nyasiọ eware kpobi ba ma te lele owhẹ; kọ erere vẹ o ti te omai?” Jesu ọ tẹ fodẹ oghale nọ u ti te ai evaọ obaro fiki oghẹrẹ uzuazọ nọ a salọ na, inọ: “Evaọ okenọ a ti ru eware kpobi kpokpọ na, nọ Ọmọ ohwo ọ te keria agbara-uvie oruaro riẹ, whai enọ i lele omẹ wha te keria egbara-uvie ikpegbivẹ, ti bruoziẹ erua ikpegbivẹ Izrẹl.”—Matiu 19:27, 28.

O rrọ vevẹ nọ Jesu ọ be ta kpahe oware nọ o te via evaọ obaro nọ a ti ru eware kpobi fihọ ekpokpọ wọhọ epanọ o jọ evaọ ọgbọ Idẹn. Pita avọ ilele edekọ a ti wo uvẹ-ọghọ nọ a ti ro lele Jesu su Aparadase otọakpọ. Oghale nana u gine te oware nọ a rẹ rọ fiki riẹ nyasiọ eware kpobi ba.

Ghele na, orọnikọ eghale na kpobi e rrọ obaro ho. Ejọ e riẹ nọ i bi te ilele riẹ obọ obọnana. Jesu ọ ta nọ: “Ohwo ọvo nọ ọ nyasiọ uwou hayo aye hayo inievo-emezae hayo ọsẹgboni hayo emọ ba fiki Uvie Ọghẹnẹ nọ o ti wo ai ẹko buobu evaọ oke nana ha ọ rrọ họ gbe evaọ uyero-akpọ nọ o be tha na, uzuazọ ebẹdẹ bẹdẹ.”—Luk 18:29, 30.

Ẹhẹ, oria kpobi nọ ilele riẹ a nya, a te reawere usu okpekpe kugbe ibe eg’Ọghẹnẹ rai, onọ o te tubẹ kpekpe vi orọ ahwo nọ a no uviuwou ovona ze dede. U yoma kẹhẹ, o wọhọ nọ oghale nana gbe uvẹ nọ ọdafe na ọ hai ro wo uzuazọ evaọ obọ odhiwu o bi kufiẹ na.

Jesu o fibae nọ: “Rekọ ibuobu nọ e rrọ erọ ọsosuọ e te jọ erọ urere, erọ urere e vẹ te jọ erọ ọsosuọ.” (Matiu 19:30) Eme họ otọ ẹme riẹ na?

Ẹghele nana nọ o fe na ọ rrọ usu “erọ ọsosuọ” na keme ọ rrọ omọvo isu ahwo Ju. Fikinọ ọ riẹ izi Ọghẹnẹ, ahwo a sai rẹro nọ ọ te riẹ ru ziezi. Rekọ o you igho gbe ekwakwa efe vi oware ofa kpobi evaọ uzuazọ. Evaọ abọdekọ riẹ, ahwo gheghe na a vuhumu nọ Jesu o bi wuhrẹ uzẹme nọ o rẹ kẹ uzuazọ. Ma sae ta nọ ahwo nana họ “erọ urere,” rekọ a zihe ruọ “erọ ọsosuọ” no. A bi rẹro oke nọ a te rọ keria egbara-uvie evaọ obọ odhiwu, re a lele Jesu su Aparadase otọakpọ.