Jesu Ọ Salọ Ikọ Ikpegbivẹ

U te enwenọ ẹgbukpe gbe emerae ezeza no nọ Jọn o ro dhesẹ Jesu kẹ ahwo inọ ọye họ Omogodẹ Ọghẹnẹ na. Nọ Jesu o mu iruo odibọgba riẹ họ, ezae jọ nọ i wo evezi a zihe ruọ ilele riẹ, ejọ rai họ Andru, Saemọn Pita, Jọn, Filip, gbe Batolomio (ọnọ a re je se Nataniẹl), yọ ẹsejọhọ Jemis (oniọvo Jọn) ọ jọ usu rai re. Nọ oke o be nyaharo na, amọfa buobu a te zihe ruọ ilele Jesu re.—Jọn 1:45-47.

Obọnana Jesu ọ be te salọ ikọ riẹ. Enana e te jọ enọ e mae kẹle iẹe oma nọ o ti wuhrẹ ziezi. Rekọ taure Jesu ọ tẹ te salọ ae, o te kpobọ ugbehru jọ, ẹsejọhọ onọ o kẹle Abade Galili nọ o nwani thabọ no Kapaniọm ho. Ọ tẹ jọ obei lẹ asohẹrioke, o wọhọ nọ ọ jẹ yare areghẹ gbe obufihọ Ọghẹnẹ. Okiokiọ riẹ o te se ilele riẹ, kẹsena ọ tẹ jọ udevie rai salọ ikọ 12.

Jesu ọ salọ ezeza nọ ma fodẹ ẹsiẹ na, ọ tẹ jẹ salọ Matiu, ọnọ Jesu o se evaọ uwou nọ a rẹ jọ mi osa-uzou na. Isoi nọ i kiọkọ nọ ọ salọ họ, Judas (ọnọ a re je se Tadiọs gbe “ọmọ Jemis”), Saemọn ohwo ajọwha na, Tọmọs, Jemis ọmọ Alfiọs, gbe Judas Iskariọt.—Matiu 10:2-4; Luk 6:16.

Re ọ tẹ te salọ 12 na, a lele i rie kperẹ no yọ ọ riẹ e rai ziezi. Ejọ evaọ usu rai yọ imoni Jesu. U muẹro nọ Jemis avọ oniọvo riẹ Jọn yọ emọ oniọvo oni Jesu. Yọ o tẹ ginẹ rọnọ Alfiọs avọ Josẹf ọsẹ otọakpọ Jesu oniọvo wọhọ epanọ ahwo jọ a ta, kiyọ Jemis ọmọ Alfiọs avọ Jesu yọ emọ inievo ivẹ.

Avro ọ riẹ hẹ inọ Jesu ọ riẹ edẹ ikọ riẹ na kpobi. Kọ whọ riẹ edẹ rai? Oware jọ nọ u ti fiobọhọ kẹ owhẹ kareghẹhọ edẹ rai ona: Saemọn ivẹ e riẹ, Jemis ivẹ, gbe Judas ivẹ. Saemọn (ọnọ a re je se Pita) o wo oniọvo nọ a re se Andru, yọ Jemis (ọmọ Zẹbẹdi) o wo oniọvo nọ a re se Jọn. Oyena u ti fiobọhọ kẹ owhẹ kareghẹhọ edẹ ikọ eree. Ene nọ i kiọkọ họ, ọnọ o je mi osa-uzou (Matiu), ọnọ ọ vro avro uwhremu na (Tọmọs), ọnọ a se no otọ ure ze (Nataniẹl), gbe ogbẹnyusu Nataniẹl (Filip).

Ikọ ikpegbọvo evaọ usu rai yọ ahwo Galili, ubrotọ nọ Jesu o no ze. Nataniẹl ohwo Kena. Filip, Pita gbe Andru yọ ahwo Bẹtsaida. Uwhremu na, Pita avọ Andru a tẹ kwa kpobọ Kapaniọm, ẹwho nọ Matiu ọ be rria. Jemis avọ Jọn a jẹ rria ẹwho nana hayo kẹle etẹe, yọ oria nọ a jẹ jọ kọ okọ iyei-ikpe rai o kẹle etẹe. Ewho nana kpobi ẹkwotọ Galili e rrọ. O wọhọ nọ Judas Iskariọt nọ o vivie Jesu uwhremu na ọvo họ ukọ nọ o no ẹkwotọ Judia ze.