Enọ Ahwo nọ A s’Ebe

Okenọ Jesu Kristi o vi ikọ 12 na kpohọ usiuwoma, kọ ọ ta kẹ ae re a wha ọkpọ je ku eviẹ họ?

Ahwo jọ a ta inọ eme nọ Matiu, Mak, gbe Luk a kere inọ Jesu ọ ta kẹ ikọ na okenọ o vi ai kpohọ usiuwoma ota e wọso ohwohwo. Rekọ ma tẹ rọ eme na wawo ohwohwo, ma rẹ ruẹ inọ o rrọ ere he. Joma kake rọ eme nọ Mak o kere rọ wawo erọ Luk. Mak o kere nọ: ‘Jesu ọ tẹ vẹvẹ ai unu inọ u te no ọkpọ no, jọ a wha oware ovo kpohọ erẹ rai na ha; a rẹ wha ebrẹdi hi, hayo ẹkpa ha, hayo igho eva igbe rai hi, a wha iwu ivẹ hẹ, rekọ jọ a fi eviẹ họ awọ rai.’ (Mak 6:7-9) Luk o kere nọ: “Wha wha oware ovo kpo [erẹ] rai hi, wha wha ọkpọ họ, hayo ẹkpa ha, hayo ebrẹdi hi, hayo igho ho, hayo wha rehọ iwu ivẹ hẹ.” (Luk 9:1-3) Etenẹ o jọ wọhọ nọ Ikereakere ivẹ na e wọso ohwohwo na. Mak o kere inọ a ta kẹ ikọ na re a wha ọkpọ je ku eviẹ họ, rekọ Luk o kere inọ a rẹ wha oware ovo lele oma ha, makọ ọkpọ dede. Mak ọ fodẹ eviẹ rekọ Luk ọ fodẹ eviẹ hẹ.

Re ma riẹ oware nọ Jesu ọ jẹ ta kẹ ikọ riẹ na, muẹrohọ eme jọ nọ e rrọ ebe Usiuwoma esa na. Evaọ ebe Ebaibol ivẹ nọ ma fodẹ no na gbe eme nọ e rrọ Matiu 10:5-10, a vuẹ ikọ na inọ a wha “iwu ivẹ” hẹ. Evaọ oke yena, u muẹro inọ ewu ọ jọ ikọ na oma. Fikiere, a rẹ wha ọfa lele oma ha. Eviẹ e jarai awọ re. Fikiere ẹme nọ Mak ọ be ta kẹ ae na họ, jọ a thuru ifi eviẹ nọ e rrọ awọ rai na re a wha eyena ọvo kpohọ erẹ na. Kọ ẹvẹ kpahe ekpọ? Obe na, The Jewish Encyclopedia o ta nọ: “O jọ uruemu ahwo Ju oke anwae re a wha ọkpọ lele oma.” (Emu. 32:10) Mak ọ ta inọ ikọ na a rẹ “wha oware ovo kpo erẹ rai na ha” ajokpaọ ọkpọ nọ ọ jarai obọ evaọ okenọ Jesu o vi ai uwou na. Fikiere, otofa eme ọ Jesu nọ imasa na a kere na họ a re du gwọlọ eviẹ gbe iwu efa kẹ erẹ na ha.

Matiu, ọnọ ọ jariẹ evaọ okenọ Jesu o je vi ikọ riẹ uwou na, o fiẹgbahọ ẹme nana. Jesu ọ ta nọ: “Wha wha igoru hayo idọlọ-efuafo, hayo eroo evaọ igbe rai hi, wha wha ekpa kpo erẹ rai hi, hayo iwu ivẹ hẹ, hayo eviẹ hẹ, wha wha ọkpọ họ; keme emu oruiruo o te rie obọ u tei.” (Mat. 10:9, 10) Kọ ẹvẹ kpahe eviẹ nọ e rrọ ikọ na awọ gbe ekpọ nọ e rrọ abọ rai? Jesu ọ be vuẹ ae inọ a du dẹ eware itieye na ha, rekọ ọ ta ha inọ a ku enọ a wo no fiẹ. Fikieme ọ rọ kẹ ae ujaje utioye? Fikinọ a rẹ kẹ oruiruo emu nọ ọ rẹ re. Onana họ oware nọ Jesu o wo họ iroro nọ ọ kẹ ujaje yena, onọ o rọwo kugbe uduotahawọ nọ ọ kẹ evaọ Ovuẹ obọ Ugbehru na inọ a ruawa oware nọ a rẹ re, da, hayo kuhọ họ.—Mat. 6:25-32.

Dede nọ o sae wọhọ nọ eme nọ e rrọ ebe Matiu, Mak gbe Luk nọ ma ta kpahe na e wọso ohwohwo, ẹme ọvona a jẹ ta na. Ukpenọ a rẹ gwọlọ eware efa dẹ re e raha oke rai, ikọ na a rẹ nya ovavo kpohọ iruo na. Fikieme? Fikinọ Jihova ọ te kẹ ae eware nọ a gwọlọ.

Kọ Itẹ 22:6 o kẹ imuẹro inọ otẹrọnọ Oleleikristi o wuhrẹ emọ riẹ ziezi, a ti ghoro no edhere Jihova ha?

Oria Ebaibol na o ta nọ: “Wuhrẹ ọmọ edhere nọ ọ rẹ nya, nọ ọ jẹ kpako no ọ gbẹ thọriẹ ẹro ho.” Wọhọ epanọ o rẹ lọhọ kẹ ure oboba nọ a gẹle re o rro fihọ epanọ a gẹle riẹ fihọ na, ere o rẹ mae lọhọ kẹ ọmọ nọ a yọrọ fihọ edhere Jihova re ọ gọ Jihova nọ ọ tẹ rro no. Wọhọ epanọ esẹgbini a riẹ, re a wuhrẹ emọ o gwọlọ oke gbe omodawọ gaga. Re emọ rai a sae gọ Ọghẹnẹ, esẹgbini a rẹ roma totọ wuhrẹ ai, kẹ ae ohrẹ, tuduhọ ae awọ, whọku ai je fi emamọ oriruo h’otọ kẹ ae. A rẹ rọ uyoyou ru onana ẹsikpobi evaọ ikpe buobu.

Kọ onana u dhesẹ inọ ọmọ ọ tẹ siọ Jihova ba ẹgọ, kiyọ ọsẹgboni na a riẹ ọmọ na wuhrẹ hẹ? Ẹsejọ o sae via inọ esẹgbini na a riẹ emọ na yọrọ lele edhere Jihova ha. (Ẹf. 6:4) Evaọ abọdekọ riẹ, orọnikọ obe itẹ na o be ta nnọ ọmọ kpobi nọ a riẹ wuhrẹ ọ te daji ukoko Ọghẹnẹ hẹ. Esẹgbini a rẹ sae gba emọ rai fihọ oghẹrẹ kpobi nọ a gwọlọ họ. Emaha, wọhọ ekpako na, a wo ufuoma iroro-ejẹ, fikiere a rẹ sae salọ oghẹrẹ uzuazọ nọ a gwọlọ yeri. (Izie. 30:15, 16, 19) Ghelọ omodawọ esẹgbini na, emọ jọ a rẹ sai kie no egagọ Ọghẹnẹ, wọhọ epanọ Solomọn, ọnọ o kere eme nọ ma be ta kpahe na, o kie no egagọ Ọghẹnẹ. Ijẹle jọ dede a kie no egagọ Jihova.

Fikiere, eme nọ ikere na e be ta na họ, evaọ ẹsibuobu eware nọ ma wuhrẹ ọmọ mai e rẹ “thọriẹ ẹro ho,” rekọ orọnikọ ẹsikpobi o rẹ via ere he. Onana o rrọ uvi uduotahawọ kẹ esẹgbini. Jọ eva e were esẹgbini keme a riẹ inọ omodawọ nọ a be rọ yọrọ emọ rai evaọ edhere Jihova o te wha emamọ iyẹrẹ ze. Nọ orọnọ iruo esẹgbini e r’oja gaga na, a tuduhọ ae awọ re a se iruo rai gboja ziezi.—Izie. 6:6, 7.

Otẹrọnọ emọ a maki kie no egagọ Jihova, esẹgbini nọ i wuhrẹ emọ rai ziezi a rẹ sai rẹro inọ ẹdẹjọ emọ na a ti bruoma kpiroro. Eme ọ Ebaibol i wo ẹgba, yọ eware nọ esẹgbini i wuhrẹ emọ rai e rẹ kake thọrọ ae ẹro ho.—Ol. 19:7.