Ọmọ Ohwo Ọ te Romavia

Evaọ oke nana, Jesu ọ rrọ Sameria hayo Galili. Otu Farisi a tẹ nọe kpahe ẹnyaze Uvie Ọghẹnẹ, onọ a bi rẹro nọ o te romavia avọ ehaa ilogbo. Rekọ Jesu ọ vuẹ rai nọ: “Orọnikọ Uvie Ọghẹnẹ o be nyaze evaọ oghẹrẹ nọ ahwo kpobi a re ro muẹrohọ iẹe he; hayo kọ ahwo a te ta ha inọ, ‘Rri ọna!’ hayo, ‘Ọ rrọ obei!’ Keme Uvie Ọghẹnẹ o rrọ udevie rai.”—Luk 17:20, 21.

Ahwo jọ a sai roro nọ Jesu ọ be ta nọ Uvie na o rrọ udu idibo Ọghẹnẹ. Rekọ o rrọ ere vievie he keme Uvie na o sae jọ udu otu Farisi nọ Jesu ọ be ta ẹme kẹ na ha. Dede na, Uvie na o rrọ udevie rai keme Jesu nọ Ọghẹnẹ ọ salọ re ọ jọ Ovie Uvie yena ọ rrọ kugbe ai.—Matiu 21:5.

O wọhọ nọ okenọ otu Farisi na a nyavrẹ no, Jesu ọ tẹ vuẹ ilele riẹ eware efa kpahe ẹnyaze Uvie na. Ọ kake vẹvẹ ae unu kpahe epanọ eware e te jọ nọ o te muhọ esuo no, inọ: “Edẹ e be tha nọ wha te gwọlọ ruẹ ẹdẹ ọvo jọ evaọ edẹ Ọmọ ohwo, rekọ wha te ruẹ e riẹ hẹ.” (Luk 17:22) Jesu ọ be rọ onana dhesẹ nọ esuo Ọmọ ohwo ọ be tha evaọ obaro. Taure oke yena u te ti te, ilele riẹ jọ a te gwọlọ nọ Uvie na o ze vẹrẹ vẹrẹ, rekọ o te gwọlọ nọ a rẹ ruabọhọ hẹrẹ bẹsenọ oke nọ Ọghẹnẹ o fihọ nọ Ọmọ ohwo ọ rẹ rọ ze u re te.

Jesu ọ ta haro nọ: “Ahwo a te ta kẹ owhai nọ, ‘Rri, ọ rrọ obei!’ hayo, ‘Ọ rrọ etenẹ!’ Wha lele ai hayo dhẹ lele ai hi. Keme wọhọ epanọ elo egbrara o re lo no abọjọ akpọ na ruọ abọ ọfa akpọ na, ere Ọmọ ohwo ọ te jọ evaọ ẹdẹ riẹ.” (Luk 17:23, 24) Eme o ti fiobọhọ kẹ ilele Jesu nọ a gbẹ te rọ dhẹ lele mesaya erue he? Jesu ọ ta nọ ẹnyaze uvi Mesaya na ọ te jọ wọhọ elo egbrara nọ a rẹ jọ eria sa-sa ruẹ. Oka ọzino riẹ inọ o muhọ esuo no u ti dhesẹ oma via kẹ ahwo kpobi nọ a muẹrohọ otọ.

Kẹsena Jesu ọ tẹ rọ eware jọ nọ e via evaọ oke nọ u kpemu ro dhesẹ uruemu nọ ahwo a ti wo evaọ oke yena nọ o be tha na, inọ: “Wọhọ epanọ o jọ evaọ edẹ Noa, ere o te jọ evaọ edẹ Ọmọ ohwo . . . Ere ọvona re, o te wọhọ epanọ o via evaọ edẹ Lọt: a jẹ re, a jẹ da, a jẹ dẹ, a jẹ zẹ, a jẹ kọ, a jẹ bọ. Rekọ ẹdẹ nọ Lọt o ro no Sọdọm, erae gbe isọ-ọre i te no obọ odhiwu ze i te kpe ai kpobi no. Ere ọvona o te jọ evaọ ẹdẹ yena nọ Ọmọ ohwo ọ te romavia.”—Luk 17:26-30.

Orọnikọ Jesu ọ be ta nọ ahwo oke Noa gbe oke Lọt a whu fikinọ a ru eware nọ ohwo kpobi o je ru hu, eware wọhọ emuọriọ, udi-oda, eware-edẹ gbe ẹzẹ, eware nọ a kọ, gbe iwou nọ a bọ. Makọ Noa avọ Lọt gbe ahwo uviuwou rai a ru eware yena jọ. Rekọ ahwo nọ i kiọkọ a je ru eware yena ababọ oreva Ọghẹnẹ nọ a re ru, yọ a jẹ daezọ họ inọ a be rria oke urere na. Oyejabọ nọ Jesu ọ be rọ kẹ ilele riẹ ohrẹ inọ a riẹ oreva Ọghẹnẹ jẹ daoma rai kpobi re a ru ei. Jesu ọ be rọ enẹ dhesẹ edhere nọ ilele riẹ a sae rọ zọ kẹ ae evaọ oke nọ Ọghẹnẹ ọ te raha akpọ na.

O gwọlọ nọ ilele riẹ a rẹ kuvẹ vievie he re eware akpọ na, koyehọ ‘eware nọ a nya seba’ i si iroro rai no egagọ Ọghẹnẹ. Jesu ọ ta nọ: “Evaọ ẹdẹ yena, jọ ohwo nọ ọ rrọ ehru uwou rekọ nọ eyero riẹ e rrọ evaọ uwou na, ọ ziọ otọ te kwa ae he, ere ọvona re, ohwo nọ ọ rrọ obọ ẹwọ o re zihe bru eware nọ ọ nya seba vievie he. Wha kareghẹhọ aye Lọt.” (Luk 17:31, 32) Aye Lọt o zihe ruọ ukulu uwhei.

Jesu ọ vuẹ ilele riẹ eware efa kpahe oghẹrẹ nọ o te jọ okenọ Ọmọ ohwo o te muhọ esuo no, inọ: “Evaọ aso yena, imava a te jọ ehwa ọvo; a rẹ te rehọ ọvo vrẹ a vẹ nyasiọ ọdekọ ba.” (Luk 17:34) Fikiere, ahwo jọ a ti wo esiwo, a vẹ te nyasiọ edekọ ba, koyehọ a ti whu.

Ilele riẹ a tẹ nọe nọ: “Olori, kpohọ ibovẹ?” Jesu ọ tẹ ta kẹ ae nọ: “Oria nọ ori ọ rrọ, etẹe igo i re kokohọ re.” (Luk 17:37) Ẹhẹ, ejọ e te wọhọ ugo nọ ọ rẹ ruẹ thabọ. Ilele itieye na i ti kuomagbe Kristi, koyehọ Ọmọ ohwo. Evaọ oke yena, Jesu o ti wuhrẹ ilele riẹ nọ i wo ẹrọwọ oware nọ u ti fiobọhọ kẹ ae wo esiwo.