Ọtadhesẹ Jesu ọrọ Emaina Ikpe Na

Obọ Jerusalẹm Jesu ọ be nya, rekọ o wọhọ nọ avọ ilele riẹ a gbẹ rrọ uwou Zakiọs. Ilele na a roro nọ a be te rọ “Uvie Ọghẹnẹ” mu okioke yena, Jesu o ve ti muhọ esuo. (Luk 19:11) A wo otoriẹ ẹme nana ha, wọhọ epanọ a wo otoriẹ ẹme nọ Jesu ọ ta kẹ ae kpahe uwhu riẹ hẹ na. Fikiere Jesu ọ tẹ kẹ ọtadhesẹ jọ ro ru ai riẹ nọ o te gbẹ rehọ oke re Uvie na o tẹ te ze.

Ọ ta nọ: “Ọzae jọ nọ o no orua ovie ze o kpohọ ẹkwotọ ugbothabọ jọ nyai wo ogaga uvie tobọ re o zihe ze.” (Luk 19:12) Erẹ otiọye na ọ rẹ rehọ oke. O rrọ vevẹ nọ Jesu họ ‘ọzae nọ o no orua ovie ze’ na, ọnọ o kpohọ “ẹkwotọ ugbothabọ” koyehọ obọ odhiwu, obonọ Ọsẹ riẹ ọ rrọ re ọ kẹe ogaga uvie.

Evaọ ọtadhesẹ na, taure ‘ọzae nọ o no orua ovie ze’ na o te ti kpohọ erẹ na, o te se erigbo ikpe riẹ jẹ kẹ ae omomọvo emaina isiliva, ọ tẹ ta kẹ ae nọ: “Wha rehọ ai thueki bẹsenọ mẹ rẹ nyaze.” (Luk 19:13) Emaina isiliva yọ okolo ugho ho. Re a sae hwa emaina ọvo kẹ ohwo nọ a rehọ iruo ẹwọ, o re ru iruo vrẹ emerae esa.

Ẹsejọhọ ilele na a vuhumu nọ ae họ erigbo ikpe nọ a fodẹ evaọ ọtadhesẹ na, keme evaọ oke nọ u kpemu Jesu ọ rehọ e rai dhesẹ ahwo nọ a bi ru iruo ivuẹvu. (Matiu 9:35-38) Orọnikọ iruo ivuẹvu eka a bi ru hu. Ukpoye, ivuẹvu nana yọ onọ amọfa a re ro zihe ruọ ilele Jesu re a ruọ Uvie Ọghẹnẹ. Ilele na a rehọ uzuazọ rai kpobi fiobọhọ kẹ amọfa nọ i ti kuomagbe ai su evaọ Uvie na.

Eme ọfa Jesu o dhesẹ via evaọ ọtadhesẹ nana? Ọ ta nọ ahwo ẹwho ọzae nọ o no orua ovie ze na a “mukpahe iẹe, a te vi ahwo lele iei nọ, ‘Ma gwọlọ nọ ọzae nana ọ jọ ovie mai hi.’” (Luk 19:14) Ilele na a riẹ nọ ahwo Ju a jẹ Jesu rehọ họ, yọ ejọ e be gwọlọ epanọ a re ro kpei no dede. Nọ Jesu o whu jẹ kparoma kpobọ odhiwu no, ahwo Ju na a dhesẹ epanọ a mukpahe Jesu te nọ a muọ ilele riẹ họ ekpokpo. Ahwo ọwọsuọ nana a dhesẹ vevẹ nọ a gwọlọ nọ Jesu ọ jọ Ovie he.—Jọn 19:15, 16; Iruẹru Ikọ 4:13-18; 5:40.

Kọ eme erigbo ikpe na a rehọ emaina nọ a kẹ rai na ru bẹsenọ ‘ọzae nọ o no orua ovie ze’ na o ro wo “ogaga uvie tobọ” je kpozi? Jesu ọ ta nọ: “Nọ o wo ogaga uvie tobọ zihe ze no, o te se erigbo riẹ nọ ọ kẹ igho na re ọ riẹ erere nọ a wo evaọ eki nọ a tho. Fikiere ọrọ ọsosuọ na ọ tẹ nyaze ọ tẹ ta nọ, ‘Olori, me wo erere emaina ikpe no emaina ra na ze.’ Ọ tẹ ta kẹe nọ, ‘Whẹ kobiruo, emamọ ọrigbo! Fikinọ whọ jọ oware osese dhesẹ nọ a re fievahọ owhẹ, mẹ rehọ owhẹ mu ọnowuzou ikpewho ikpe.’ Ọrọ avọ ivẹ ọ tẹ nyaze, inọ, ‘Olori, me wo erere emaina isoi no emaina ra na ze.’ Ọ tẹ ta kẹ ọnana re nọ, ‘Whẹ omara, mẹ rehọ owhẹ mu ọnowuzou ikpewho isoi.’”—Luk 19:15-19.

Otẹrọnọ ilele na a bi fiobọhọ kẹ amọfa zihe ruọ ilele wọhọ epanọ erigbo na a rehọ emaina rai thueki na, o rẹ sai mu ai ẹro nọ Jesu ọ te were eva kugbe ai. Yọ Jesu ọ te se ae ba ẹghale he fiki emamọ iruo rai. Ghele na, orọnikọ ilele Jesu kpobi a rẹ sai ru iruo epọvo na ha, keme aikpobi a wo ọvuọ uyero gbe ẹgba riẹ. Rekọ Jesu nọ a kẹ “ogaga uvie” no na o bi muẹrohọ oma nọ a be dawo re a fiobọhọ kẹ amọfa zihe ruọ ilele, yọ ọ te ghale ae evaọ iruo na.—Matiu 28:19, 20.

Nọ Jesu o je ku ọtadhesẹ na họ, ọ fodẹ ekpehre uruemu nọ ọrigbo jọ o dhesẹ, inọ: “Rekọ [ọrigbo] ọfa ọ tẹ nyaze, inọ, ‘Olori, emaina ra nọ mẹ rehọ ohọ variẹ sino ọna. Ozọ ra u je mu omẹ keme who re dhuaro; whọ rẹ rehọ onọ who fihọ oria ha, yọ who re vu onọ whọ kọ họ.’ Ọ tẹ ta kẹe nọ, ‘Ọrigbo omuomu, eme obọra me bi ro brukpe owhẹ. Whọ riẹ nọ me re dhuaro, inọ mẹ rẹ rehọ onọ me fihọ oria ha, je vu onọ mẹ kọ họ, o gbẹ rrọ ere? Kọ fikieme who gbe fi ugho mẹ họ obọ uwou-igho ho? Nọ mẹ nyaze na mẹ hae rehọ iẹe avọ isuo.’ Kẹsena ọ tẹ ta kẹ enọ i dikihẹ etẹe nọ, ‘Wha mi ei emaina na re wha rehọ iẹe kẹ ọnọ o wo emaina ikpe na.’”—Luk 19:20-24.

Fikinọ ọrigbo nana o ru iruo re efe olori riẹ o bu hu, oware ovo u te rie obọ họ. Ikọ na a bi rẹro oke nọ Jesu o ti ro su evaọ Uvie Ọghẹnẹ. Fikiere, ẹsejọhọ a vuhumu nọ ẹme nọ Jesu ọ ta kpahe ọrigbo urere na u dhesẹ nọ a gbe ru iruo kẹ olori na ha, a te sae ruọ Uvie na ha.

Avro ọ riẹ hẹ, ẹme Jesu na o ru ilele riẹ nọ i wo ajọwha kru oma ga ziezi. Ọ ta nọ: “Mẹ be ta kẹ owhai nọ, ohwo kpobi nọ o wo a rẹ te kẹe efa kugbe, rekọ ọnọ o wo ho, a ti mi ei makọ onọ o wo na dede.” O te fibae nọ a ti kpe ewegrẹ riẹ nọ e gwọlọ nọ ọ rẹ “jọ ovie kẹ ae” he na no. Kẹsena Jesu ọ tẹ ruabọhọ erẹ riẹ bi kpohọ Jerusalẹm.—Luk 19:26-28.