“Wha Roro” Fikieme U ro Wuzou Tere?

“EME ọ rẹ te jọ oka ẹtha ra gbe urere akpọ na?” (Mat. 24:3) Nọ Jesu ọ jẹ k’uyo onọ yena, ọ kẹ ilele riẹ oka jọ nọ o rrọ vevẹ wọhọ epanọ a kere fihọ Matiu uzou avọ 24, Mak uzou avọ 13, gbe Luk uzou avọ 21 na. Jesu o fibae nọ: “Wha roro.”—Mat. 24:42.

Otẹrọnọ o te jọ lọlọhọ re a vuhu oka na, fikieme Jesu ọ rọ ta kẹ ilele riẹ inọ a rroro? O sae jọnọ eware ivẹ jọ e wha riẹ ze. Orọ ọsosuọ, eware akpọ na e rẹ sae lẹliẹ ohwo gbolaro kẹ oka na, o gbe se egagọ Ọghẹnẹ gboja ha hayo jaja aro vi hi. Orọ avivẹ, Oleleikristi ọ rẹ sai vuhu abọjọ oka na mu rekọ fiki oria nọ ọ be rria, oka na o bi kpomahọ iẹe tere he. Onana u ve ru ei roro nọ ‘uye ulogbo’ na nọ o rrọ ukuhọ eruẹaruẹ Jesu na, u gbe thabọ fikiere oke nọ o re ro “roro” u ri te he.—Mat. 24:21.

“A Riẹ Hẹ”

Jesu ọ kareghẹhọ ilele riẹ kpahe ahwo oke Noa. Usiuwoma ota Noa, okọ ulogbo nọ o ku, gbe ozighi nọ ọ jọ evaọ oke yena yọ eware nọ ahwo a jẹ ruẹ vevẹ. Ghele na, ahwo buobu “a riẹ hẹ” bẹsenọ ẹvo na ọ rọ ze. (Mat. 24:37-39) Epọvo na ahwo inẹnẹ a be gaviezọ kẹ unuovẹvẹ hẹ. Wọhọ oriruo, eka e rẹ jọ edhere nọ i re dhesẹ epanọ omoto ọ rẹ dhẹ vẹrẹ te, rekọ ahwo buobu a re rri eka yena vo. Oye jabọ nọ egọmeti ọ rẹ rọ ma igbuhru fihọ edhere na re enọ e be dhẹ imoto a ruẹse dhẹ erera. Epavo na re, Oleleikristi o sae ruẹ oka edẹ urere na rekiyọ o bi dhomahọ eware jọ nọ u dhesẹ nọ o bi gbabọkẹ oka na. Ere o via kẹ Arielle, ọmọ ikpe ikpegbọ jọ evaọ Africa.

O jẹ hae were Arielle re ọ jọ etẹlivisiọno rri aruọzaha eyae nọ e be rọ obọ fa ebọro. Nọ a muọ aruọzaha yena họ evaọ isukulu riẹ, ọ were riẹ te epanọ o gbe ro muẹrohọ enwoma nọ aruọzaha na ọ rẹ sae wha sei evaọ abọ-ẹzi hi. Ọ tẹ ta nọ ọ rẹ jọ ọnọ o re mu ebọro. Eme ọ via? Arielle ọ ta nọ: “Emọ jọ nọ ma gbẹ be fa ebọro na a wo egbẹnyusu emezae nọ e rẹ rehọ imu egaga je vovo isigareti. A jẹ hae hwẹ omẹ fikinọ me wo ohẹriẹ, rekọ me roro nọ oyena u ti kpomahọ omẹ hẹ. U kri hi, aruọzaha na o te bi kpomahọ edikihẹ abọ-ẹzi mẹ. Aruọzaha na ọvo me je roro kpahe ẹsikpobi. Nọ ma tẹ rrọ obọ ewuhrẹ, obonọ ma rẹ jọ fa ebọro na iroro mẹ e rẹ jọ. Aruọzaha na u kpomahọ uruemu mẹ re. Oke ọsosuọ, aruọzaha na ọ jẹ were omẹ rekọ uwhremu na, epanọ me re ro fi kparobọ ọvo ọ jọ omẹ oja. Mẹ jẹ raha oke gaga rọ ruẹrẹ oma kpahe kẹ aruọzaha na re mẹ sae kparobọ. Me gbe je wo uvẹ serihọ họ. Usu mẹ kugbe emamọ egbẹnyusu mẹ o tubẹ raha fiki aruọzaha na.

“Ẹdẹjọ nọ ma jẹ fa ebọro na, uvẹ u te rovie fihọ kẹ ahwo nọ a rrọ abọdekọ re a kẹ igolu. Mẹ tẹ kpomamu re me mu ebọro na. Mẹ riẹ okenọ mẹ rọ lẹ se Jihova ha re o fi obọ họ k’omẹ mu ebọro na! Onana u ru omẹ riẹ epanọ me kiekpotọ te no evaọ abọ-ẹzi. Kọ ẹvẹ mẹ rọ wariẹ kruga evaọ ukoko na?

“Me rri ividio mai na no, onọ uzoẹme riẹ o rrọ Young People Ask—What Will I Do With My Life?a Mẹ tẹ wariẹ rri rie je se eware nọ mẹ ruẹ gboja ziezi. Ẹbẹbẹ ọvona mẹ avọ André, ọnọ ọ rrọ ividio na, ma wo. Me muẹrohọ oware nọ ọkpako ukoko jọ ọ ta kẹ André nnọ o ru, inọ o se je roro kpahe eme nọ e rrọ Ahwo Filipai 3:8. Oware nọ u fi obọ họ kẹ omẹ oye. Me te no aruọzaha na.

“Nọ me ru ere, mẹ tẹ ruẹ ohẹriẹ ulogbo evaọ uzuazọ mẹ! Ẹzi oma-hrowo gbe idhọvẹ nọ oyena o wha ze i te no omẹ oma. Me te mu eva họ ẹwere jẹ kẹle egbẹnyusu mẹ evaọ ukoko na. Me te ti se iruẹru abọ-ẹzi gboja. Me te muọ ezọ họ ẹgaviẹ ziezi evaọ obọ iwuhrẹ jẹ be reawere rai. Me te je wo ẹnyaharo evaọ usiuwoma ota mẹ. Obọnana, me re ru ọkobaro obufihọ n’oke t’oke.”

Otẹrọnọ oware jọ u bi ru owhẹ gbabọkẹ oka nọ Jesu ọ kẹ na, daoma ru oware jọ kpahe iẹe, wọhọ epanọ Arielle o ru na. Whọ rẹ sae dawo eware jọ nọ ma be te fodẹ na. Whọ rẹ sae rọ obe na Watch Tower Publications Index ru ekiakiẹ, onọ a se omaa-edhere nọ u re su kpohọ efe nọ o siomano. A jọ obe yena fodẹ ebe nọ whọ sae jọ se emamọ ehrẹ gbe ikuigbe ahwo nọ a thihakọ ebẹbẹ. Wo erere ziezi no iwuhrẹ ukoko ze ẹkwoma oma nọ whọ rẹ ruẹrẹ kpahe ziezi kẹ iwuhrẹ na, whọ vẹ jẹ hai kere eme nọ i ti fi obọ họ kẹ owhẹ fihọ obe. Ahwo jọ a ruẹ no inọ o rẹ mai woma re a keria kẹle obaro nọ a te kpohọ iwuhrẹ. Otẹrọnọ a bi ru ẹme ọ ẹkpahefihọ ogbotu, daoma kake kpahe ẹme. Ofariẹ, jaja aro vi evaọ abọ-ẹzi ẹkwoma eware awhusi nọ whọ rẹ gaviezọ kẹ, whọ vẹ rehọ ae wawo oka nọ Jesu ọ kẹ na gbe eware efa nọ e be via evaọ “edẹ urere” na.—2 Tim. 3:1-5; 2 Pita 3:3, 4; Evia. 6:1-8.

‘Wha Ruẹrẹ Oma Kpahe’

Ma be jọ “akpọ na kpobi” ruẹ eware oka nọ i dhesẹ inọ edẹ urere na ma rrọ na. (Mat. 24:7, 14) Ima ahwo buobu a be rria eria nọ ẹyao, ohọo, etọ nọ i bi nuhu, gbe eware efa nọ Ebaibol ọ ta e be jọ via kiti kiti. Wo ohẹriẹ, ezọ ahwo jọ a bi ro yo eware nana. Kọ otẹrọnọ eware nana e re via kẹ owhẹ hẹ, kọ who re roro inọ uye ulogbo na u gbe thabọ? Otẹrọ ere, kiyọ who roro thọ.

Wọhọ oriruo, roro ẹme nọ Jesu ọ ta kpahe ẹyao gbe ohọo. (Luk 21:11) Orọ ọsosuọ, Jesu ọ ta ha inọ eware nana e te via evaọ oria kpobi evaọ oke ovona hayo evaọ oghẹrẹ ovona. Ukpoye, ọ ta inọ e te via ‘eva egheghẹrẹ eria.’ Fikiere ma re rẹro ho inọ eware nana kpobi e te jọ oria kpobi via evaọ oke ovona. Orọ avivẹ, nọ Jesu ọ nwane fodẹ ohọo no, ọ tẹ ta kẹ ilele riẹ inọ jọ a yọroma re a whaha emuọriọ obuobu: “Wha yọrọ oma rai ogbẹrọ ere he emuọriọ obuobu [o] ve ti ru owhai zoruẹ.” (Luk 21:34) Fikiere, Ileleikristi a re rẹro ho inọ abọ kpobi erọ oka na i ti kpomahọ ae. Ukpoye, Jesu ọ ta nọ: ‘Nọ wha ruẹ eware enana nọ i biti ruẹ, wha riẹ nọ uvie Ọghẹnẹ o kẹle ino.’ (Luk 21:31) Eware awhusi wọhọ etẹlivisiọno gbe irediyo e be lẹliẹ omai riẹ kpahe orugba oka na o tẹ make rọnọ eware na e be jọ oria nọ ma rrọ via ha.

Kareghẹhọ re inọ Jihova o fi ‘ẹdẹ gbe oke’ họ no, onọ uye ulogbo na u ti ro muhọ. (Mat. 24:36) Eware nọ e rrọ akpọ via i ti nwene ẹdẹ ọyena ha.

Jesu ọ kẹ Ileleikristi evaọ oria kpobi ohrẹ inọ: “Wha ruẹrẹ oma kpahe.” (Mat. 24:44) Ma rẹ ruẹrẹ oma kpahe ẹsikpobi. Uzẹme, orọnikọ eware nọ i kiekpahe egagọ Ọghẹnẹ ọvo ma re ru ẹsikpobi hi. Ofariẹ, ma riẹ oware nọ obọ mai o te jọ họ evaọ uzedhe oke nọ uye ulogbo na u ti ro muhọ. Ẹsejọhọ ejọ e te jọ obọ ẹwọ hayo bi ru iruo jọ evaọ uwou rai. (Mat. 24:40, 41) Fikiere, eme ma rẹ sai ru rọ ruẹrẹ oma kpahe?

Emmanuel, Victorine, gbe emetẹ ezeza rai a be rria ẹwho jọ evaọ Africa nọ eware nọ i dhesẹ nnọ edẹ urere na ma rrọ na e be jọ via tere he. Fikiere a tẹ gbaemu inọ a rẹ rehọ eme Ebaibol jẹ iroro kugbe kẹdẹ kẹdẹ re u fi obọ kẹ ae ruẹrẹ oma kpahe. Emmanuel ọ ta nọ: “O jọ bẹbẹ re ma fi oke jọ họ, onọ u kiehọ kẹ omai kpobi. Ma te fi oke na họ ohiohiẹ, no ighọjọ ezeza rite ighọjọ ezeza gbe abọ. Nọ ma te se obe okpẹdẹ no, ma vẹ ruẹrẹ oma kpahe kẹ abọjọ ewuhrẹ oka yena.” Kọ ọruẹrẹfihotọ nana o fi obọ họ kẹ ae jaja aro vi? Ee! Emmanuel họ ọnọ o re koko iruẹru ugboma ekpako na họ evaọ ukoko na. Victorine o re ru iruo ọkobaro obufihọ ẹsikpobi yọ o fi obọ họ kẹ ahwo buobu kurẹriẹ no. Emetẹ rai na kpobi a bi ru ziezi evaọ ukoko na.

Jesu ọ kẹ omai ohrẹ nọ: “Wha yọrọ oma, wha roro.” (Mak 13:33) Whọ jọ oware ovo u ru owhẹ kie ruọ owezẹ abọ-ẹzi hi. Ukpoye, nya lele emamọ ohrẹ sa-sa nọ e rrọ ebe mai gbe enọ ma be hai yo evaọ iwuhrẹ ukoko, wọhọ epanọ Arielle o ru na. Wọhọ uviuwou Emmanuel, ru oware jọ kẹdẹ kẹdẹ nọ u re fi obọ họ k’owhẹ ruẹrẹ oma kpahe re whọ jẹ hai rroro.

[Oruvẹ-obotọ]

[Uwoho nọ o rrọ ẹwẹ-obe avọ 4]

Eme ọ Ebaibol nọ Emmanuel avọ uviuwou riẹ a be rọ jẹ iroro kugbe kẹdẹ kẹdẹ u bi fi obọ họ kẹ ae “ruẹrẹ oma kpahe”