‘Enẹ Ọghẹnẹ O You Omai’

‘Otẹrọnọ enẹ Ọghẹnẹ o you omai, u fo re mai ohwo o you ohwo ere re.’—1 JỌN 4:11.

 1. Evaọ March 23 nọ ọre o te kiediwi no, fikieme ima ahwo a je ti ro kokohọ evaọ Egua Uvie gbe eria efa evaọ akpọ na soso?

EVAỌ Ẹdoka, March 23, 1997, nọ ọre o te kiediwi no, ababọ avro ahwo nọ i bu vi 13,000,000 evaọ akpọ na soso e te jariẹ nọ i ti kokohọ Egua Uvie gbe eria efa nọ Iseri Jihova a bi ro ruiruo. Fikieme? Keme uyoyou ulogbo nọ Ọghẹnẹ o dhesẹ kẹ ohwo-akpọ u duobọ te ai udu no. Jesu Kristi ọ rẹriẹ ova ku odhesẹvia ologbo uyoyou Ọghẹnẹ ọyena, ta nọ: “Keme Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.”—Jọn 3:16.

 2. Didi enọ mai kpobi ma rẹ nọ omobọ mai ziezi kpahe oghẹrẹ nọ ma bi ro dede uyoyou Ọghẹnẹ rehọ?

² Nọ ma bi roro kpahe uyoyou nọ Ọghẹnẹ o dhesẹ na, u fo re ma nọ oma mai nọ, ‘Kọ me ghine wo ovuhumuo kẹ oware nọ Ọghẹnẹ o ru na? Kọ edhere nọ me bi yeri uzuazọ mẹ o be kẹ imuẹro ovuhumuo ọyena?’

“Ọghẹnẹ Họ Uyoyou”

 3. (a) Fikieme edhesẹ uyoyou o gbẹ rọ oware aghẹruẹ kẹ Ọghẹnẹ hẹ? (b) Ẹvẹ ogaga gbe areghẹ i ro dhesẹ oma via evaọ iruo emama riẹ?

³ Edhesẹ uyoyou o rọ oware ulogbo evaọ abọ Ọghẹnẹ hẹ keme “Ọghẹnẹ họ uyoyou.” (1 Jọn 4:8) Uyoyou họ okwakwa ulogbo riẹ. Okenọ ọ jẹ ruẹrẹ otọakpọ na họ kẹ ẹria ohwo-akpọ, igbehru nọ ọ kpare lahwe je koko ame họ ewae gbe ebade yọ edhesẹ ogaga riẹ nọ a rẹ ruẹ ibe riẹ hẹ. (Emuhọ 1:9, 10) Okenọ Ọghẹnẹ ọ rehọ ọdhẹwariẹ ame ze gbe ọrọ ofou-ẹwẹ, okenọ ọ ma emerae esese nọ a sai kele mu hu gbe oghoghẹrẹ ẹbe re e sae rẹriẹ egẹgẹ-imu otọakpọ kpohọ eware nọ ahwo-akpọ a rẹ sae re rọ yọrọ izuazọ rai, nọ ọ thahe ughọjọ emama re o rọwo kugbe uthethei edẹ gbe emera eva Otọakpọ, onana u te dhesẹ areghẹ ologbo riẹ. (Olezi 104:24; Jerimaya 10:12) Ghele, maerro kpobi evaọ emama họ imuẹro uyoyou Ọghẹnẹ.

 4. Evaọ emama eware akpọ na, didi imuẹro uyoyou Ọghẹnẹ mai kpobi ma rẹ ruẹ je wo ovuhumuo kẹ?

⁴ Ẹrọo mai ọ vuẹ omai kpahe uyoyou Ọghẹnẹ nọ ma te duakọ họ ubi-ure awere, nọ ọ ware ziezi onọ a ma orọnikọ re o vọ omai eva ọvo ho rekọ re ọ k’omai omawere. Ibiaro mai e rẹ ruẹ imuẹro riẹ vevẹ nọ ma tẹ ruẹ ọre owoma nọ o bi kiediwi, idhiwu nọ e vọ avọ isi evaọ aso ovevẹ, ekọlọ wowoma idodo, aroza emọ erao, jegbe ehwẹ sa-sa egbẹnyusu. Inwe mai o re ru omai riẹ kpahe iẹe nọ ma te se ore awere idodo ẹgbowhe. Ezọ mai e rẹ riẹ kpahe iẹe nọ ma tẹ gaviezọ kẹ edo ame, ile evra, gbe irru iyoyou. U re duobọ te omai nọ oyoyou ọ tẹ gbalọ omai. A kẹ erao jọ ẹgba nọ a rẹ rọ ruẹ, yo, hayo se ore eware nọ ahwo-akpọ a riẹ kpahe he. Rekọ ohwo-akpọ, ọnọ a ru evaọ uwoho Ọghẹnẹ na, o wo ẹgba nọ ọ rẹ rọ ruẹ uyoyou Ọghẹnẹ evaọ edhere nọ arao ọvuọvo ọ sae ruẹ hẹ.—Emuhọ 1:27.

 5. Ẹvẹ Jihova o ro dhesẹ uyoyou ulogbo rọ kẹ Adamu avọ Ivi?

⁵ Okenọ Jihova Ọghẹnẹ ọ ma imava ọsosuọ na, Adamu avọ Ivi, ọ rehọ imuẹro uyoyou riẹ wariẹ ai họ. Ọ kọ ọgbọ, aparadase, o te ru oghoghẹrẹ ire dhẹ ze evaọ eva riẹ. O ru ethẹ re o ku ame ku ei ọ tẹ jẹ rehọ evra gbe erao igbunu rọ vọe. Ọ rehọ enana kpobi kẹ Adamu avọ Ivi wọhọ uwou rai. (Emuhọ 2:8-10, 19) Jihova o yeri kugbe ai wọhọ emọ riẹ, abọ uviuwou ehrugbakpọ riẹ. (Luk 3:38) Nọ ọ rehọ Idẹn kẹ no wọhọ oriruo, Ọsẹ obọ odhiwu imava ọsosuọ na o te fi iruo edẹro ọrọ ẹkẹre Aparadase họ aro rai re ọ vọ akpọ na kpobi. A re je yẹ emọ vọ otọakpọ na kpobi re.—Emuhọ 1:28.

 6. (a) Ẹvẹ who roro kpahe edhere ọwọsuọ nọ Adamu avọ Ivi a nya? (b) Eme o rẹ sai dhesẹ nọ ma wuhrẹ no oware nọ o jọ Idẹn via na jegbe nọ ma wo erere no eriariẹ yena ze?

⁶ Rekọ, u kri hi, Adamu avọ Ivi a tẹ rẹriẹ ova ku ẹdawọ ẹmeoyo rai, ẹdawọ omarokpotọ. Unọjọ utọjọ a gbe dhesẹ ovuhumuo kẹ uyoyou nọ a dhesẹ kẹ ai hi. Oware nọ a ru o tọtọ kẹhẹ. A rẹ sai gu inoma ovo ho! Fikiere, a te ku usu rai kugbe Ọghẹnẹ fiẹ, a te si ai no usu uviuwou riẹ, a te le ai no Idẹn no. Oware nọ uzioraha rai o wha ze o gbẹ rọ omai oma nẹnẹ. (Emuhọ 2:16, 17; 3:1-6, 16-19, 24; Ahwo Rom 5:12) Kọ eme ma wuhrẹ no oware nọ o via na ze no? Didi uyo ma be kpahe kẹ uyoyou Ọghẹnẹ? Kọ ẹjiroro mai kẹdẹ kẹdẹ i bi dhesẹ nọ ma wo ovuhumuo kẹ uyoyou riẹ?—1 Jọn 5:3.

 7. Ghelọ oware nọ Adamu avọ Ivi a ru, ẹvẹ Jihova o ro dhesẹ uyoyou kẹ emọ rai?

⁷ Dede nọ ọsẹ gbe oni ọsosuọ ohwo-akpọ a ghine dhesẹ ababọ ovuhumuo kẹ eware nọ Ọghẹnẹ o ru kẹ ai kpobi na, u si uyoyou Ọghẹnẹ kpemu hu. Fiki ohrọ kẹ ahwo-akpọ nọ a ri yẹ evaọ okioye he—nọ u kugbe omai nọ e rọ uzuazọ nẹnẹ na—Ọghẹnẹ ọ tẹ kẹ Adamu avọ Ivi uvẹ re a yẹ emọ taure a te ti whu. (Emuhọ 5:1-5; Matiu 5:44, 45) O gbe ru ere hi, a hai ti yẹ omai ọvuọvo ho. Ẹkwoma oreva riẹ nọ o rovie ẹrera, Jihova omariẹ ọ tẹ jẹ rọ ehri ẹruore rọ kẹ ahwo nọ e te jọ emọ Adamu kpobi enọ i wo ẹrọwọ. (Emuhọ 3:15; 22:18; Aizaya 9:6, 7) Ọruẹrẹfihotọ riẹ u kugbe edhere nọ ahwo erẹwho kpobi a sae rọ wariẹ wo oware nọ Adamu o kufiẹ na, koyehọ, uzuazọ ogbagba wọhọ ahwo ọjẹrehọ uviuwou ehrugbakpọ Ọghẹnẹ. O ru onana ẹkwoma ẹtanigbo nọ ọ rọ kẹ.

Fikieme A jẹ Kẹ Ẹtanigbo?

 8. Fikieme o gbẹ lọhọ tere he re Ọghẹnẹ o j’uzi na nọ dede nọ Adamu avọ Ivi a re whu hrọ, ọmọ rai ọvuọvo nọ o yoẹme o re whu hu?

⁸ Kọ u ghine wuzou re a rehọ uzuazọ ohwo-akpọ rọ hwosa wọhọ ẹtanigbo? Kọ Ọghẹnẹ ọ hae sae gbe j’uzi na nọ dede nọ Adamu avọ Ivi a re whu hrọ kẹ ọkparesuọ rai, emọ rai kpobi enọ i yoẹme Ọghẹnẹ a sae rria bẹdẹ bẹdẹ? No iroro ekpuakpua ohwo-akpọ ze, o rẹ sae wọhọ nọ oyena yọ oware areghẹ. Ghele, Jihova yọ ọnọ “ẹruoziẹ gbe ẹrẹreokie ọ rẹ were.” (Olezi 33:5) Adamu avọ Ivi a zihe ruọ erahaizi no taure a te ti mu emọ họ eyẹ; fikiere emọ enana ọvuọvo nọ a yẹ gbagba ọ ja riẹ hẹ. (Olezi 51:5) Aikpobi a reuku uzioraha, yọ osaohwa uzioraha họ uwhu. Otẹrọnọ Jihova o gbolo aro kẹ onana, didi oriruo o hae jọ kẹ ahwo uviuwou ehrugbakpọ riẹ? O rri ute okiẹrẹe obọriẹ vo ho. Ọ rehọ adhẹẹ kẹ ẹgwọlọ ẹdhoguo-okiẹrẹe. Ohwo ọvuọvo nọ ọ rẹ jọ oghẹrẹ nọ Ọghẹnẹ o ro yeri kugbe avro na ruẹ afuẹwẹ jọ ọ riẹ hẹ.—Ahwo Rom 3:21-23.

 9. Nya lele ute ẹdhoguo-okiẹrẹe Ọghẹnẹ, didi oghẹrẹ ẹtanigbo a gwọlọ?

⁹ Kọ ẹvẹ a sae rọ rehọ emamọ edhere ze rọkẹ esiwo emọ Adamu enọ i ti dhesẹ uyoyou ẹmeoyo kẹ Jihova na? Otẹrọnọ ohwo ọgbagba o re whu uwhu idhe, ẹdhoguo-okiẹrẹe o rẹ k’uvẹ kẹ uzuazọ ogbagba oyena re u ruru izieraha enọ e te rọ ẹrọwọ jẹ ẹtanigbo na rehọ. Nọ uzioraha ọzae ọvo, Adamu, o whae ze nọ uviuwou ohwo-akpọ a jẹ rọ erahaizi na, ehwẹ azẹ ohwo-akpọ ọfa nọ ọ gba, nọ ọ rọ ẹrẹrẹe kugbe ọrọ ọsosuọ na, o rẹ jẹ nwane nyate ute ẹdhoguo-okiẹrẹe na. (1 Timoti 2:5, 6) Kọ diẹse a sae jọ ruẹ oghẹrẹ ohwo otiọye na?

Ẹvẹ O Ghare Te?

10. Fikieme emọ Adamu a gbẹ sae rehọ ẹtanigbo nọ a gwọlọ na ze he?

¹⁰ Evaọ udevie emọ Adamu ọrahauzi na, ọvuọvo ọ riẹ nọ ọ rẹ sae kẹ oware nọ a gwọlọ re a ruẹse dẹ ẹruore uzuazọ nọ Adamu o kufiẹ na zihe ze he. “Uzẹme ohwo ọ sae ta [oniọvo] riẹ hẹ, hayo hwaosa uzuazọ riẹ kẹ Ọghẹnẹ hẹ, keme ẹta uzuazọ riẹ o rẹ ghaghae, o re te he, re ọ jọ bẹdẹ, nọ ọ rẹ ruẹ Ọgọdọ họ.” (Olezi 49:7-9) Ukpenọ ọ nyasiọ ahwo-akpọ ba ababọ ẹruore, Jihova omariẹ ọ tẹ rọ ohrọ ru ọruẹrẹfihotọ.

11. Evaọ edhere vẹ Jihova ọ rọ rehọ uzuazọ ohwo-akpọ ọgbagba onọ a gwọlọ kẹ ẹtanigbo nọ u fo ze?

¹¹ Jihova o vi ẹnjẹle ziọ otọakpọ re o ti whu uwhu ẹghẹ hẹ ẹkwoma oma nọ o re nwene o ve whu kpakiyọ ọ gbẹ be rria uzuazọ wọhọ ẹzi. Ukpoye, ẹkwoma eruo oware igbunu nọ Ọghẹnẹ ọvo, Ọnọma na, ọ rẹriẹ ze, o te kpeze ogaga uzuazọ gbe ekwakwa ọmọ obọ odhiwu riẹ ziọ edhede aye jọ, Meri ọmọtẹ Hilai, ọrọ orua Juda. Ogaga iruo Ọghẹnẹ, ẹzi ọfuafo riẹ, ọ rọ sẹro ọmọ na evaọ edhede oni riẹ, a te yẹe gbagba. (Luk 1:35; 1 Pita 2:22) Fikiere ọnana o te wo aghare nọ u fo nọ a rẹ rọ kẹ ẹtanigbo na re o nyate ẹgwọlọ ẹdhoguo-okiẹrẹe Ọghẹnẹ vọvọ.—Ahwo Hibru 10:5.

12. (a) Evaọ edhere vẹ Jesu ọ rọ rọ “Ọmọvo” Ọghẹnẹ? (b) Ẹvẹ ohwo ọnana nọ Ọghẹnẹ o vi ze re ọ kẹ ẹtanigbo na o jẹ rọ odhesẹvia uyoyou Riẹ k’omai?

¹² Kọ ono evaọ usu emọ ibuobu obọ odhiwu riẹ kpobi na Jihova ọ rehọ iruo ọnana kẹ? Rọ kẹ ọnọ a jọ Ikereakere na dhesẹ wọhọ “Ọmọvo” riẹ na. (1 Jọn 4:9) A rọ ẹme ọnana dhesẹ, orọnikọ oware nọ o zihe ro nọ a yẹe wọhọ ohwo-akpọ họ, rekọ oware nọ ọ jọ evaọ obọ odhiwu taure a te ti yẹe. Ọye ọvo Jihova ọ rehọ obọ riẹ ma dẹẹ ababọ obufihọ omọfa. Ọyehọ Ọtuyẹ emama kpobi. Ọye Ọghẹnẹ ọ rọ ẹkwoma riẹ rọ ma emama edekọ kpobi. Enjẹle na yọ emọ Ọghẹnẹ, wọhọ epanọ Adamu ọ jọ ọmọ kẹ Ọghẹnẹ na. Rekọ a dhesẹ Jesu wọhọ nọ o wo “oruaro wọhọ ọmọ ọvo nọ Ọsẹ na o yẹ.” A dhesẹ i rie wọhọ “nọ ọ rọ igbama Ọsẹ na.” (Jọn 1:14, 18) Usu riẹ kugbe Ọsẹ na o jọ usu okpekpe, ọrọ idhere, owowolẹ. Ọ ghale uyoyou Ọsẹ riẹ kẹ ohwo-akpọ. Itẹ 8:30, 31 o dhesẹ epanọ Ọmọ ọnana ọ rọ Ọsẹ na oma gbe epanọ ohwo-akpọ ọ rọ Ọmọ na oma: ‘Mẹ jọ eva-ewerọ kẹ Jihova kẹdẹ kẹdẹ jẹ hae ghọghọ eva aro riẹ kẹse kẹse, . . . yọ eware nọ e jẹ were omẹ [Jesu, Olori Iruo Jihova, ehri areghẹ] na họ emọ ahwo.’ Ọmọ ọghaghae ọnana ọye Ọghẹnẹ o vi ziọ otọakpọ re ọ rehọ ẹtanigbo na kẹ. Fikiere, ẹvẹ eme Jesu i wo otofa te: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ”!—Jọn 3:16.

13, 14. Ẹvẹ okerefihotọ Ebaibol ọrọ omodawọ Abraham re ọ rehọ Aiziki dheidhe u je fiobọhọ k’omai wo ovuhumuo oware nọ Jihova o ru na? (1 Jọn 4:10)

¹³ Re o dina fiobọhọ k’omai wo otoriẹ oware nọ oyena u dhesẹ, krẹkri taure Jesu ọ tẹ te ziọ otọakpọ, Ọghẹnẹ o j’uzi kẹ Abraham, ole ikpe 3,890 nọ i kpemu, anọ: “Rehọ ọmọzae ra na, ọmọzae ọvo ra na Aiziki, ọnọ who you, re whọ nya kpo otọ obọ Moraya, whọ jọ etẹe rehọ iẹe dhe-idhe emahọ evaọ ugbehru jọ nọ me re ti dhesẹ kẹ owhẹ.” (Emuhọ 22:1, 2) Evaọ ẹrọwọ, Abraham o te yoẹme. Fi oma ra họ oria Abraham. Kọ o hae jọ nọ ọyena yọ ọmọ ra, ọmọ ọvo ra nọ who you gaga? Ẹvẹ oma o hai ru owhẹ nọ whọ be bẹre ire idhe emahọ na, nọ whọ rọ edhere be nya edẹ buobu kpohọ ẹkuotọ Moraya na, gbe okenọ whọ wọ ọmọ ra họ ehru agbada-idhe na?

¹⁴ Fikieme oma u je ru ọyewọ nọ o wo ohrọ ere? Obe Emuhọ 1:27 ọ ta nọ Ọghẹnẹ ọ ma ohwo evaọ uwoho Riẹ. Iroro uyoyou gbe ohrọ mai o dina dhesẹ uyoyou gbe ohrọ Jihova evaọ edhere kakao. Rọ kẹ Abraham, Ọghẹnẹ ọ za riẹ dhẹ, fikiere ọ gbẹ ghinẹ rọ Aiziki dheidhe he. (Emuhọ 22:12, 13; Ahwo Hibru 11:17-19) Ghele, rọ kẹ ọye omariẹ, Jihova o siuke kpemu evaọ ẹrọze ẹtanigbo na ha, dede nọ u mi rie avọ Ọmọ riẹ eware buobu. Oware nọ o via na, orọnikọ o jọ ọgbahọ rọ kẹ Ọghẹnẹ hẹ, rekọ, ikpoye, o jọ edhesẹ aruoriwo nọ o rro thesiwa. Kọ ma wo ovuhumuo kẹe vọvọ?—Ahwo Hibru 2:9.

Oware nọ U Ru Lọhọ

15. Ẹvẹ ẹtanigbo na o ro kpomahọ izuazọ no makọ evaọ eyero eware enana?

¹⁵ Ọruẹrẹfihotọ uyoyou oyena nọ Ọghẹnẹ o ru na u wo iruo ologbo gaga evaọ izuazọ ahwo nọ e rehọ ẹrọwọ jẹe rehọ. Vẹre a hẹriẹ oma no Ọghẹnẹ fiki uzioraha. Wọhọ epanọ Ẹme riẹ ọ tae, a jọ ‘ewegrẹ fikinọ iroro gbe iruo rai i yoma.’ (Ahwo Kọlọsi 1:21-23) Rekọ a tẹ ‘ruẹrẹhọ kugbe Ọghẹnẹ fiki uwhu Ọmọ riẹ.’ (Ahwo Rom 5:8-10) Nọ a nwene edhere uzuazọ rai no jẹ jẹ erọvrẹ nọ Ọghẹnẹ o ru lọhọ rehọ no onọ ọ rọ kẹ ahwo nọ i fi ẹrọwọ họ idhe Kristi, a tẹ kẹ ai aruoriwo iroro efuafo.—Ahwo Hibru 9:14; 1 Pita 3:21.

16. Didi eghale a rọ kẹ uthuru okakao na fiki ẹrọwọ rai kpahe ẹtanigbo na?

¹⁶ Jihova ọ rehọ aruoriwo rọ kẹ umutho ahwo enana, uthuru okakao, re a jọ kugbe Ọmọ riẹ evaọ Uvie obọ odhiwu, avọ irẹro erugba ẹjiroro ọsosuọ Ọghẹnẹ rọ kẹ otọakpọ na. (Luk 12:32) A rehọ enana no ‘k’oria k’oria gbe evẹrẹ gbe ahwo gbe orẹwho ze, je ru ai otọ-uvie gbe izerẹ kẹ Ọghẹnẹ mai, a ve ti su otọakpọ na.’ (Eviavia 5:9, 10) Rọ kẹ enana, Pọl ukọ na o kere nọ: “Wha mi ẹzi nọ o ru owhai emọ, onọ ma je bo nọ, ‘Abba! Ọsẹ!’ Ukpuzou oma Ẹzi na ọvo ọrọ izi mai isẹri ese kẹ nọ mai arọ emọ Ọghẹnẹ. Ma tẹ rọ emọ, koyehọ ereuku; ereuku Ọghẹnẹ, ereuku kugbe Kristi.” (Ahwo Rom 8:15-17) Nọ Ọghẹnẹ o dede ai rehọ no wọhọ emọ riẹ, a tẹ kẹ ai usu oghaghae nọ Adamu o kufiẹ na; rekọ a te rọ ọghọ ọfa ọrọ iruo evaọ obọ odhiwu rọ kẹ emọ enana—utio oware nọ u te Adamu obọ vievie he. Agbẹta nọ Jọn ukọ na ọ rọ ta nọ: “Ri oghẹrẹ uyoyou nọ Ọsẹ na ọ kẹ omai na, re a ti se omai emọ Ọghẹnẹ”! (1 Jọn 3:1) Orọnikọ uvi uyoyou ovo (a·gaʹpe) Ọghẹnẹ o dhesẹ kẹ itieye na ha rekọ uyoyou wowolẹ re (phi·liʹa), oghẹrẹ ọgbakugbe nọ o rẹ jọ udevie uvi egbẹnyusu.—Jọn 16:27.

17. (a) Rọ kẹ ahwo nọ i fi ẹrọwọ họ ẹtanigbo na kpobi, didi uvẹ a ti wo? (b) Eme “uvẹ oruaro emọ Ọghẹnẹ” u ti dhesẹ rọ kẹ ai?

¹⁷ Rọ kẹ amọfa re—aikpobi enọ i dhesẹ ẹrọwọ evaọ ọruẹrẹfihotọ ọghọ Ọghẹnẹ kẹ uzuazọ ẹkwoma Jesu Kristi na—Jihova o rovie uvẹ rọ kẹ ai nọ a re ro wo usu oghaghae onọ Adamu o kufiẹ na. Pọl ukọ na o ru rie vevẹ nọ: “Keme ọwhọ ẹruore enama [emama ohwo-akpọ nọ i no oma Adamu ze] ọ be hẹrẹ odhesẹvia emọ Ọghẹnẹ [koyehọ, a be hẹrẹ oke nọ u ti dhesẹ oma via vevẹ inọ emọ Ọghẹnẹ enọ e te jọ ereuku Uvie obọ odhiwu kugbe Kristi na a be jẹ emamọ owọ fiki ahwo-akpọ]. Keme [emama] na e jọ ọthobọ eware ifofe [a yẹ rai evaọ uzioraha avọ ẹruore uwhu, yọ edhere ọvo ọ riẹ nọ a rẹ rọ dhẹ vabọ họ], orọnikọ oreva riẹ hẹ, rekọ fiki epa ọnọ o ru họ ọtahobọ eva ẹruore [onọ Ọghẹnẹ ọ kẹ]; kemena ukpuzou [emama] na a reti si ei no igbo egbogbo eruọ eva uvẹ oruaro emọ Ọghẹnẹ.” (Ahwo Rom 8:19-21) Kọ eme ufuoma oyena u ti dhesẹ? Inọ a kẹ rai ufuoma no igbo uzioraha gbe uwhu. A re ti wo ẹgbagba iroro gbe ugboma, Aparadase wọhọ uwou rai, gbe uzuazọ ebẹdẹ bẹdẹ nọ a te jọ reawere ẹgbagba rai je dhesẹ ovuhumuo rai kẹ Jihova, Ọghẹnẹ uzẹme ọvo na. Kọ ẹvẹ a ro ru onana kpobi lọhọ? Ẹkwoma idhe ẹtanigbo Ọmọ ọvuọvo Ọghẹnẹ.

18. Evaọ March 23 nọ ọre o te kiediwi no, eme ma ti ru, kọ fikieme?

¹⁸ Evaọ Nisan 14, 33 C.E., evaọ uwou ehru evaọ Jerusalẹm, Jesu ọ tẹ rehọ ehaa Ekareghẹhọ uwhu riẹ mu. Eruo ehaa ẹgbukpe uwhu riẹ nana u zihe ruọ obọdẹ ehaa no evaọ izuazọ Ileleikristi uzẹme kpobi. Jesu omariẹ o j’uzi nọ: “Wha ru onana roro omẹ.” (Luk 22:19) Evaọ 1997 a re ti ru ehaa Ekareghẹhọ na nọ ọre o te kiediwi no evaọ March 23 (okenọ Nisan 14 o ro muhọ). Evaọ ẹdẹ ọyena, oware ovo u re wuzou vi ehaa Ekareghẹhọ na nọ who re kpohọ họ.

Ẹvẹ Whọ te k’Uyo?

◻ Evaọ idhere vẹ Ọghẹnẹ o ro dhesẹ uyoyou ulogbo kẹ ahwo-akpọ na?

◻ Fikieme a jẹ gwọlọ uzuazọ ohwo ọgbagba re a sae ta emọ Adamu no igbo?

◻ Oware ulogbo vẹ u mi Jihova no evaọ ẹrọze ẹtanigbo na?

◻ Eme ẹtanigbo na o ru lọhọ?

[Picture on page 22]

Ọghẹnẹ ọ rehọ Ọmọ ọvo riẹ kẹ