Kọ Whọ Rrọ Usu Ahwo Nọ Ọghẹnẹ O You?

“Ọ nọ ọ riẹ ijaje mẹ o je koko ai, ọye họ ọnọ o you omẹ; ọnọ o you omẹ, Ọsẹ mẹ o re ti yo yei.”—JỌN 14:21.

 1, 2. (a) Ẹvẹ Jihova o ro dhesẹ uyoyou riẹ kẹ ahwo-akpọ? (b) Didi ehaa Jesu o ro mu evaọ aso Nisan 14, 33 C.E.?

JIHOVA o you emama ahwo-akpọ riẹ. Evaọ uzẹme, o you akpọ ahwo “na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” (Jọn 3:16) Nọ oke nọ a re ro ru ehaa Ekareghẹhọ uwhu Kristi o be kẹle na, Ileleikristi uzẹme a rẹ riẹ vi epaọ anwẹdẹ inọ Jihova “o you omai, o je vi Ọmọ riẹ kere ọ ze jọ okiofu izieraha mai.”—1 Jọn 4:10.

² Evaọ aso Nisan 14, 33 C.E., Jesu avọ ikọ 12 riẹ a kokohọ ubrukpẹ ehru jọ evaọ Jerusalẹm re a ru ehaa Ọnyavrẹ na, rọ kareghẹhọ esiwo emọ Izrẹl no Ijipti. (Matiu 26:17-20) Nọ a ru ehaa ahwo Ju nana no, Jesu o te vi Judas Iskariọt vrẹ ọ tẹ rehọ emu-owọwọ ekareghẹhọ ro mu onọ u re ti zihe ro Ekareghẹhọ uwhu Kristi ọrọ Ileleikristi.a Ẹkwoma ebrẹdi nọ e kare ẹvi gbe udi owawae wọhọ eka ọ uwo gbe azẹ ugboma riẹ, Jesu o ru re ikọ 11 nọ i kiọkọ na a w’obọ evaọ emuore ọrekugbe ọnana. Ikere-ebe Okugbe erọ Usiuwoma na, Matiu, Mak, gbe Luk a gbiku epanọ a ru ehaa na, gbe Pọl ukọ na, ọnọ o se rie “emu-owọwọ Ọnowo na.”—1 Ahwo Kọrint 11:20; Matiu 26:26-28; Mak 14:22-25; Luk 22:19, 20.

 3. Idhere jọ nọ i w’uzou vẹ ikuigbe Jọn ukọ na kpahe euwa urere Jesu kugbe ilele riẹ evaọ ubrukpẹ ehru na e rọ hẹriẹ oma no ikuigbe efa?

³ Avọ isiuru, Jọn ukọ na ọ fodẹ eghoro ebrẹdi gbe udi na ha, ẹsejọhọ fikinọ evaọ oke nọ o ro kere ikuigbe Usiuwoma riẹ (oware wọhọ 98 C.E.), yọ Ileleikristi ọsosuọ na a riẹ uruemu ehaa na ziezi. (1 Ahwo Kọrint 11:23-26) Dede na, evaọ otọ ekpakpọ ẹzi na, Jọn ọvo ọ k’omai evuẹ jọ nọ i wuzou kpahe eme nọ Jesu ọ ta gbe eware nọ o ru taure Ọ tẹ te rọ Ekareghẹhọ uwhu Riẹ mu, gbe okenọ a nwani ru ehaa na no. Ikuigbe isiuru enana e rehọ izou isoi soso erọ Usiuwoma Jọn. I dhesẹ oghẹrẹ ahwo nọ Ọghẹnẹ o you vevẹ. Joma kiẹ Jọn izou 13 rite 17 riwi.

Wuhrẹ No Uyoyou Oriruo Jesu Ze

 4. Ẹvẹ Jọn o ro fiẹgba họ ugogo uzoẹme orọ ẹkeriotọ Jesu kugbe ilele riẹ evaọ okenọ ọ rehọ Ekareghẹhọ na mu? (b) Kọ ẹjiroro jọ vẹ nọ u wuzou o soriẹ nọ Jihova o ro you Jesu?

⁴ Uyoyou yọ ugogo uzoẹme nọ o dhẹ izou enana nọ i wo ohrẹ akodẹ Jesu kẹ ilele riẹ na duwu. Evaọ uzẹme, oghẹrẹ sa-sa ubiẹme na “uyoyou” o jọ etẹe roma via isia 31. Uyoyou udidi nọ Jesu o wo kẹ Ọsẹ riẹ, Jihova, je wo kẹ ilele riẹ e jọ oria ofa vẹ te epanọ e rọ izou enana ha. A rẹ sae ruẹ uyoyou Jesu kẹ Jihova no ikuigbe uzuazọ riẹ nọ e rrọ Usiuwoma na kpobi ze, rekọ Jọn ọvo o kere inọ Jesu ọ ta gbiae nọ: “Me you Ọsẹ na.” (Jọn 14:31) Jesu ọ tẹ jẹ ta nọ Jihova o you rie o te je ru oware nọ o soriẹ ze vevẹ. Ọ ta nọ: “Wọhọ epanọ Ọsẹ na o you mẹ, ere me you owhai re; wha jọ eva uyoyou mẹ. Wha te koko ijaje mẹ wha rẹ te jọ eva uyoyou mẹ, wọhọ epanọ me koko ijaje Ọsẹ mẹ, mẹ jẹ rọ eva uyoyou riẹ.” (Jọn 15:9, 10) Ẹhẹ, Jihova o you ọmọ riẹ fiki ẹmeoyo ọriẹ. Ẹvẹ onana o rrọ emamọ uwuhrẹ te kẹ ilele Jesu Kristi kpobi!

 5. Ẹvẹ Jesu o ro dhesẹ uyoyou riẹ kẹ ilele riẹ?

⁵ Uyoyou udidi Jesu kẹ ilele riẹ u dhesẹ oma via eva emuhọ ikuigbe Jọn kpahe omakugbe urere riẹ kugbe ikọ riẹ. Jọn ọ ta nọ: “Whaọ nọ Eha-Iwẹ-Ọnyavrẹ o ri te he, yọ Jesu ọ riẹ nọ oke riẹ u te no nọ o re ti ro no akpọ na no kpobọ Ọsẹ na epanọ o you erọ obọ riẹ nerọ evaọ akpọ na, o te you ai te umuo.” (Jọn 13:1) Evaọ aso yena nọ ọ rẹ thẹro ho na, ọ kẹ rai obọdẹ uwuhrẹ kpahe uyoyou nọ a rẹ rọ ga amọfa. Ọ wozẹ awọ rai. Onana yọ oware nọ omomọvo rai ọ hae rọ unevaze ru kẹ Jesu gbe inievo rai, rekọ a r’abọ muoma. Jesu o ru iruo ikuẹku nana ọ tẹ ta kẹ ilele riẹ nọ: “Kọ otẹrọnọ mẹ nọrọ Olori gbe owuhrẹ ọ wozẹ awọ rai, ufore whai ohwo ọ wozẹ awọ ohwo re. Keme mẹ kẹ owhai oriruo no, re wha ru epanọ me ru kẹ owhai na re.” (Jọn 13:14, 15) U re no Ileleikristi uzẹme eva ze jẹ were ae re a ga inievo rai.—Matiu 20:26, 27; Jọn 13:17.

Lele Ujaje Okpokpọ Na

 6, 7. Didi oware nọ u wuzou Jọn ọ fodẹ kpahe eromuo Ekareghẹhọ na? (b) Didi ujaje okpokpọ Jesu ọ rọ kẹ ilele riẹ, kọ eme o ja riẹ kpokpọ?

⁶ Ikuigbe Jọn ọ rrọ oware nọ o via evaọ ubrukpẹ obehru evaọ aso Nisan 14 na họ ikuigbe ọvo nọ a jọ fodẹ Judas Iskariọt inọ ọ ruọ otafe. (Jọn 13:21-30) Ọgbakugbe iku Usiuwoma na i dhesẹ nọ okenọ ovivie na ọ ruọ otafe no Jesu ọ rọ rehọ Ekareghẹhọ uwhu Riẹ mu. Ọ tẹ t’ẹme thethei kugbe ikọ ẹrọwọ riẹ, kẹ ae ohrẹ gbe ithubro akodẹ. Nọ ma be ruẹrẹ oma mai họ re ma kpohọ Ekareghẹhọ na, ma re wo isiuru gaga kpahe eme nọ Jesu ọ jọ ehaa na ta, maero fikinọ ma ghinẹ gwọlọ jọ usu ahwo nọ Ọghẹnẹ o you.

⁷ Uthubro ọsosuọ nọ Jesu ọ rrọ kẹ ilele riẹ nọ ọ rehọ Ekareghẹhọ uwhu riẹ mu no yọ oware okpokpọ. O whowho nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:34, 35) Eme o rrọ oware okpokpọ evaọ ujaje nana? Nọ oke o nya haro no omojọ evaọ owọwọ yena, Jesu o te ru ẹme na vẹ, ta nọ: “Onana họ ujaje mẹ, re whai ohwo o you ohwo wọhọ epanọ me you owhai na. Ohwo ọvo o wo uyoyou nọ o ro vi ona ha, re ohwo o siobọno uzuazọ riẹ fihọ otọ fiki ezọ riẹ.” (Jọn 15:12, 13) Uzi Mosis na u jie kẹ emọ Izrẹl nọ a ‘you erivẹ rai wọhọ oma rai.’ (Iruo-Izerẹ 19:18) Rekọ ujaje Jesu u kparo viere. Ileleikristi i re you ohwohwo wọhọ epanọ Kristi o you rai, u re no ai eva ze re a fi izuazọ rai h’otọ kẹ inievo rai.

 8. Eme uyoyou omolahiẹ o gwọlọ? (b) Ẹvẹ Isẹri Jihova a bi ro dhesẹ uyoyou omolahiẹ nẹnẹ?

⁸ Ezi Ekareghẹhọ na yọ oke nọ u fo nọ ma rẹ rọ kiẹ oma mai riwi, omomọvo jẹ wọhọ ukoko, re ma ruẹ sọ ma ghine wo oka nana nọ a re ro vuhu Egagọ-Ileleikristi uzẹme na—uyoyou nọ o wọhọ orọ Kristi. Uyoyou omolahiẹ kẹ amọfa nana o sai dhesẹ, yọ ẹsejọ dede u dhesẹ no, inọ Oleleikristi o re fi uzuazọ riẹ họ awa ukpenọ o vivie inievo riẹ. Rekọ ẹsibuobu, o gwọlọ unevaze nọ ma re ro siobọno isiuru omobọ mai ro fiobọhọ jẹ ga inievo mai gbe amọfa. Pọl ukọ na ọ jọ emamọ oriruo evaọ abọ nana. (2 Ahwo Kọrint 12:15; Ahwo Filipai 2:17) A jọ akpọ na soso riẹ Isẹri Jihova kẹ ẹzi omolahiẹ rai kẹ amọfa, bi fiobọhọ kẹ inievo gbe erivẹ rai jẹ be daoma re a wha uzẹme Ebaibol na se erivẹ rai.b—Ahwo Galesha 6:10.

Usu nọ A rẹ Yọrọ Ziezi

 9. Re ma yọrọ usu oghaghae mai kugbe Ọghẹnẹ gbe Ọmọ riẹ, eme ma rẹ rọ evawere ru?

⁹ Oware ofa nọ o rẹ mae ghare k’omai vi Jihova gbe Ọmọ riẹ, Kristi Jesu, nọ a re you omai, o riẹ hẹ. Rekọ re ma wo jẹ riẹ nọ a you omai, ma re ru oware jọ hrọ. Evaọ aso urere kugbe ilele riẹ, Jesu ọ ta nọ: “Ọ nọ ọ riẹ ijaje mẹ o je koko ai, ọye họ ọnọ o you omẹ; ọnọ o you omẹ, Ọsẹ mẹ o re ti yo yei, me re ti yo yei mẹ rẹ te rehọ oma mẹ rọ via kẹe.” (Jọn 14:21) Nọ ma rehọ usu mai kugbe Ọghẹnẹ gbe Ọmọ riẹ zaro ho na, ma rẹ rọ oghọghọ yoẹme kẹ ijaje rai. Onana u kugbe ujaje okpokpọ na re ma dhesẹ uyoyou omolahiẹ kẹ amọfa gbe uzi nọ Kristi o jie nọ ọ kparoma ze no “re ma vuẹ ahwo je se isẹi,” daoma ‘ru ilele ahwo’ nọ e jẹ emamọ usi na rehọ.—Iruẹru 10:42; Matiu 28:19, 20.

10. Didi usu oghaghae u rovie fihọ kẹ enọ a wholo gbe “igodẹ efa” na?

¹⁰ Uwhremuna evaọ aso ọyena, evaọ uyo kẹ onọ nọ ukọ ẹrọwọ na, Judas (Tadiọs) ọ nọ riẹ, Jesu ọ ta nọ: “Ohwo o te you omẹ, o re koko eme mẹ, Ọsẹ mẹ o re ti yo yei, me re ti bru ei tha me re ti ru uwou mai họ evaọ eva riẹ.” (Jọn 14:22, 23) Makọ okenọ a gbẹ jọ otọakpọ, Ileleikristi nọ a wholo, enọ a se re a lele Kristi su evaọ obọ odhiwu, a wo usu okpekpe kugbe Jihova gbe Ọmọ riẹ. (Jọn 15:15; 16:27; 17:22; Ahwo Hibru 3:1; 1 Jọn 3:2, 24) Rekọ egbẹnyusu “igodẹ efa” rai, enọ i wo ẹruore ẹrria bẹdẹ bẹdẹ evaọ otọakpọ, a wo usu oghaghae re kugbe “othuru igodẹ ọvo” rai na, Jesu Kristi, je kugbe Ọghẹnẹ rai, Jihova, thakpinọ a yoẹme.—Jọn 10:16; Olezi 15:1-5; 25:14.

“Wha rọ Erọ Akpọ na Ha”

11. Didi unuovẹvẹ iroro Jesu ọ kẹ ilele riẹ?

¹¹ Evaọ ẹkeria urere riẹ kugbe ilele ẹrọwọ riẹ taure o te ti whu, Jesu ọ kẹ unuovẹvẹ iroro jọ: Ọghẹnẹ o te you ohwo, akpọ na o re mukpahe iẹe. O whowho nọ: “Re akpọ na o te mukpahe owhai, wha riẹ nọ o mukpahe omẹ no re o te mukpahe owhai. Orọ nọ whai hẹ jọ erọ akpọ na, akpọ na o he you erọ obọ riẹ; rekọ fiki epanọ wha rọ erọ akpọ na ha, rekọ mẹ sanọ owhai no akpọ na no, fiki ere akpọ na oje mukpahe owhai. Wha roro ẹme nọ mẹ ta kẹ owhai nọ, ‘Odibo ọrẹ ro vi Olori riẹ hẹ.’ Re a te kpokpo mẹ, a re kpokpo owhai re; a te koko eme mẹ, a re ti koko eme rai re.”—Jọn 15:18-20.

12. (a) Fikieme Jesu ọ rọ vẹvẹ ikọ riẹ unu inọ akpọ na o ti mukpahe ae? (b) Eme u ti fo nọ mai kpobi ma re roro kpahe nọ Ekareghẹhọ na ọ be kẹle na?

¹² Jesu ọ kẹ unuovẹvẹ onana re udu o siọ ikọ 11 riẹ gbe Ileleikristi uzẹme kpobi nọ e te rọ tuae ba eno re a sioma kpemu fiki omukpahe akpọ na. O fibae nọ: “Mẹ ta eme enana kpobi kẹ o whai re wha se ba ekie. A re ti le owhai no evaọ iwou-egagọ; uzẹme oke o be tha kohwo kohwo nọ o kpe owhai, o reti roro nọ Ọghẹnẹ ọ rọ ẹgọ. A re ti ru onana fiki epanọ a riẹ Ọsẹ na ha, gbe omẹ.” (Jọn 16:1-3) Ọfeme Ebaibol jọ o ru rie vẹ nnọ oghẹrẹ jọ ubiẹme nọ a jọ etenẹ fa “ekie” na o dhesẹ nọ “re a ru ohwo mu avro họ ewo je kuomarẹriẹ no ohwo nọ ọ hae fievahọ je yoẹme kẹ; re a ru ohwo kie.” Nọ oke nọ a ti ro ru Ekareghẹhọ na o be kẹle na, u re woma re ahwo kpobi a roro kpahe edhere uzuazọ ahwo ẹrọwọ, erọ anwae gbe erọ ọgbọna, re a raro kele oriruo ẹrọwọ rai evaọ otọ ẹdawọ. Whọ kuvẹ hẹ re ọkparesuọ hayo ukpokpoma u ru owhẹ kiemuku Jihova gbe Jesu, rekọ gbae mu re who fievahọ je yoẹme kẹ ae.

13. Eme Jesu ọ yare kẹ ilele riẹ evaọ olẹ se Ọsẹ riẹ?

¹³ Evaọ olẹ urere riẹ taure a te ti no ubrukpẹ obehru oyena evaọ Jerusalẹm, Jesu ọ ta kẹ Ọsẹ riẹ nọ: “Mẹ kẹ rae ẹme ra; akpọ na o te mukpahe ae, fiki epanọ a rọ e rọ akpọ na ha, wọhọ epanọ mẹ rọ ọ rọ akpọ na ha. Mẹ lẹ nọ who si ai no eva akpọ na ha, rekọ re who siwi ai no obọ oyoma na. A rọ e rọ akpọ na ha, wọhọ epanọ mẹ rọ ọ rọ akpọ na ha.” (Jọn 17:14-16) O rẹ sai mu omai ẹro inọ Jihova ọ rẹ sẹro enọ o you, re ọ kẹ ae ẹgba nọ a be hẹrioma no akpọ na.—Aizaya 40:29-31.

Daji Uyoyou Ọsẹ gbe Ọmọ Na

14, 15. (a) Eme Jesu ọ rehọ oma riẹ dhesẹ, hẹrioma no ‘okakọ vẹ nọ o rẹ mọ ubi hi’? (b) Amono họ “egha” erọ “uvi okakọ” na?

¹⁴ Evaọ ẹme nọ tei te ilele ẹrọwọ riẹ a si uzou koko ta evaọ aso Nisan 14, Jesu ọ rehọ oma riẹ dhesẹ “uvi okakọ,” hẹrioma no ‘okakọ nọ o rẹ mọ họ’ ọrọ Izrẹl nọ o kare ẹrọwọ. Ọ ta nọ: “Mẹ họ uvi okakọ, Ọsẹ mẹ họ ọwhẹrẹ.” (Jọn 15:1) Ikpe-udhusoi buobu nọ i kpemu, Jerimaya ọruẹaro na o kere eme Jihova enana se ahwo riẹ nọ a ruọ ẹwọ no: “Mẹ kọ owhẹ wọhọ emamọ evaene . . . Fikieme wha je kurẹriẹ wọhọ evaene nọ i mudhẹ fihọ ẹwọ?” (Jerimaya 2:21) Yọ Hosia ọruẹaro na o kere nọ: “Izrẹl ọ wọhọ ure-evaene nọ o mọ ubi ufofe. Epanọ ibi riẹ i vi te na ere a jẹ rọ bọ eruẹri rai . . . Udu rai o vọ avọ eviẹhọ.”—Hosia 10:1, 2.

¹⁵ Ukpenọ a rẹ mọ ubi egagọ uzẹme, Izrẹl o kie no ẹrọwọ ọ tẹ be mọ ibi kẹ oma riẹ. Edẹ esa taure ọ tẹ te jọ ẹgwa kugbe ilele ẹrọwọ riẹ, Jesu ọ ta kẹ isu eviẹhọ ahwo Ju na nọ: “Mẹ ta kẹ owhai nọ, a re ti mi owhai uvie Ọghẹnẹ a vẹ te rehọ iẹ kẹ orẹwho nọ o rẹ mọ ibi riẹ.” (Matiu 21:43) Orẹwho okpokpọ oyena họ ‘Izrẹl Ọghẹnẹ,’ enọ Ileleikristi 144,000 nọ a wholo i ru via, enọ a ro dhesẹ “egha” erọ “uvi okakọ” na, Kristi Jesu.—Ahwo Galesha 6:16; Jọn 15:5; Eviavia 14:1, 3.

16. Eme Jesu ọ tuduhọ ikọ 11 ẹrọwọ na nọ a ru, kọ eme a rẹ sae ta kpahe okiọkotọ ẹrọwọ na evaọ oke urere nana?

¹⁶ Jesu ọ ta kẹ ikọ 11 nọ e jọ kugbei evaọ ubrukpẹ obehru na nọ: “Kogha kogha nọ o rọ omẹ no o mọ ibi hi o re si ei no, kogha kogha nọ o rọ omẹ nọ o mọ ibi, ọ rẹ ruẹ riẹ, re o gbẹ mọ ibi vi ere. Wha jọ eva mẹ, mẹ jọ eva rai. Wọhọ epanọ ogha ovo osai [mọ] ubi hi, ajokpa nọ o rẹ jọ eva okakọ na, whaọ [ere re], ajokpa eva mẹ nọ wha rẹ jọ.” (Jọn 15:2, 4) Ikuigbe ọgbọna ọrọ ahwo Jihova u dhesẹ inọ okiọkotọ ẹrọwọ ọrọ Ileleikristi nọ a wholo na a dhẹ gbalọ ọnọ o Wuzou rai no, Kristi Jesu. (Ahwo Ẹfẹsọs 5:23) A jẹ orufuọ gbe ọkpọvio riẹ rehọ no. (Malakae 3:2, 3) Anwọ 1919 ze, a mọ ibi Uvie buobu no, erọ ọsosuọ Ileleikristi efa nọ a wholo gbe, no anwọ 1935 ze, ogbẹnyusu “otu obuobu” nọ u bi dhe ebuebu.—Eviavia 7:9; Aizaya 60:4, 8-11.

17, 18. (a) Eme Jesu vẹ i bi fiobọhọ kẹ enọ a wholo gbe igodẹ efa na daji uyoyou Jihova? (b) Ẹvẹ ekpohọ Ekareghẹhọ na o ti ro fiobọhọ k’omai?

¹⁷ Rọ kẹ Ileleikristi nọ a wholo kpobi gbe egbẹnyusu rai, eme Jesu enana i w’iruo: “Onana a jẹ kẹ Ọsẹ mẹ oruaro, re wha mọ ibi buobu, re u dhesẹ nọ whai ilele mẹ. Wọhọ epanọ Ọsẹ na o you mẹ, ere me you owhai re; wha jọ eva uyoyou mẹ. Wha te koko ijaje mẹ wha rẹ te jọ eva uyoyou mẹ, wọhọ epanọ me koko ijaje Ọsẹ mẹ, mẹ jẹ rọ eva uyoyou riẹ.”—Jọn 15:8-10.

¹⁸ Mai kpobi ma gwọlọ daji uyoyou Ọghẹnẹ, yọ onana o rẹ wọ omai re ma jọ Ileleikristi nọ e rẹ mọ ibi. Ma re ru onana ẹkwoma uvẹ kpobi nọ ma re ro whowho “usiuwoma uvie na.” (Matiu 24:14) Ma rẹ jẹ dawo ẹgba mai re ma dhesẹ “ubi Ẹzi” na evaọ izuazọ mai. (Ahwo Galesha 5:22, 23) Ekpohọ Ekareghẹhọ ọrọ uwhu Kristi o te k’omai ẹgba evaọ ọtamuo mai re ma ru onana, keme a te kareghẹhọ omai uyoyou ulogbo nọ Ọghẹnẹ gbe Kristi a wo k’omai.—2 Ahwo Kọrint 5:14, 15.

19. Didi ọ obufihọ ọfa ma te t’ẹme kpahe evaọ uzoẹme n’otha na?

¹⁹ Nọ ọ rehọ Ekareghẹhọ na mu no, Jesu ọ tẹ yeyaa nọ Ọsẹ riẹ o ti vi “Ọthuke na, Ẹzi Ẹri na” se ilele ẹrọwọ riẹ. (Jọn 14:26) Ma te ta kpahe oghẹrẹ nọ ẹzi ọnana o bi ro fiobọhọ kẹ enọ a wholo na gbe igodẹ efa na daji uyoyou Jihova evaọ uzoẹme n’otha na.

[Oruvẹ-obotọ]

Enọ Ọkiẹkpemu

• Didi uwuhrẹ ọrọ iruo uyoyou Jesu ọ rọ kẹ ilele riẹ?

• Abọ vẹ ezi Ekareghẹhọ na ọ rọ rrọ emamọ oke nọ ma rẹ rọ kiẹ oma mai?

• Fikieme unuovẹvẹ Jesu kpahe omukpahe gbe ukpokpoma ọrọ akpọ na u gbe zoruẹ omai hi?

• Ono họ “uvi okakọ” na? Amono họ “egha” na, kọ eme a rẹro mi ai?

[Uwoho nọ o rrọ ẹwẹ-obe avọ 21]

Jesu ọ kẹ ikọ na uwuhrẹ nọ o rẹ thẹro ho ọrọ iruo uyoyou

[Iwoho nọ e rrọ ẹwẹ-obe avọ 22, 23]

Ilele Kristi a yoẹme kẹ ujaje na re a dhesẹ uyoyou omolahiẹ kẹ amọfa