UWUHRẸ AVỌ 17
Oghẹrẹ Ohwo Vẹ Jesu Ọ Rrọ?
Nọ ma te bi wuhrẹ kpahe eware nọ Jesu ọ ta je ru evaọ otọakpọ, ma rẹ ruẹ emamọ iruemu riẹ nọ i re si omai kẹle iẹe gbe Jihova, Ọsẹ riẹ. Emamọ iruemu jọ vẹ Jesu o wo? Kọ ẹvẹ ma sae rọ rehọ aro kele Jesu evaọ uzuazọ mai?
1. Oghẹrẹ vẹ Jesu ọ rọ wọhọ Ọsẹ riẹ?
Okenọ Jesu ọ jọ obọ odhiwu, o je wuhrẹ mi Ọsẹ obọ odhiwu riẹ evaọ ikpe ima-idu buobu. Fikiere o re roro, rri eware, je ru eware wọhọ Ọsẹ riẹ. (Se Jọn 5:19.) Uzẹme riẹ họ, Jesu ọ rọ aro kele iruemu Ọsẹ riẹ te epanọ ọ rọ ta nọ: “Ohwo kpobi nọ ọ ruẹ omẹ ọ ruẹ Ọsẹ na no re.” (Jọn 14:9) Nọ who bi wuhrẹ kpahe iruemu Jesu na, u ti ru owhẹ riẹ Jihova ziezi. Wọhọ oriruo, ọdawẹ nọ Jesu o wo kẹ ahwo u dhesẹ epanọ Jihova o bi rri owhẹ.
2. Ẹvẹ Jesu o ro dhesẹ nọ o you Jihova?
Jesu ọ ta nọ: “Re akpọ na ọ riẹ nọ me you Ọsẹ na, me bi ru epanọ Ọsẹ na o jie uzi kẹ omẹ nọ me ru dẹẹ.” (Jọn 14:31) Okenọ Jesu ọ jọ otọakpọ, o yoẹme kẹ Ọsẹ riẹ makọ okenọ o jọ bẹbẹ re o ru ere, yọ ọ rọ ere dhesẹ nọ o you Ọsẹ riẹ. O jẹ hae were Jesu gaga re ọ ta kpahe Ọsẹ riẹ je fiobọhọ kẹ ahwo mu usu kugbei.—Jọn 14:23.
3. Ẹvẹ Jesu o ro dhesẹ nọ o you ahwo?
Ebaibol ọ ta kpahe Jesu nọ, “oware nọ o jẹ mae were omẹ oma kọ ahwo-akpọ.” (Itẹ 8:31, ẹme-obotọ) Ẹvẹ o ro dhesẹ nọ o you ahwo? Ọ jẹ tuduhọ ahwo awọ je fiobọhọ kẹ ae. O ru iruo igbunu nọ i dhesẹ nọ orọnikọ ogaga ọvo o wo ho rekọ o wo ọdawẹ re. (Mak 1:40-42) Jesu ọ jọ wowou yọ o wo ọriẹwẹ hẹ. Eme riẹ i ru ahwo kpobi nọ i wo emamọ eva nọ e kezọ kẹe wo omosasọ gbe ẹruore. O ruọ Jesu nọ ọ rẹ ruẹ uye je whu fikinọ o you ahwo-akpọ kpobi. Rekọ ahwo nọ a bi lele eware nọ o wuhrẹ ọ rẹ mai you.—Se Jọn 15:13, 14.
GBE WUHRẸ EWARE EFA
Gbe wuhrẹ kpahe iruemu Jesu. Je wuhrẹ epanọ whọ sai ro dhesẹ uyoyou je ru ọghọ wọhọ Jesu.
4. Jesu o you Ọsẹ riẹ
Oriruo Jesu u wuhrẹ omai epanọ ma re ro dhesẹ nọ ma you Ọghẹnẹ. Se Luk 6:12 gbe Jọn 15:10; 17:26. Wha te se oria Ebaibol jọ no, wha vẹ ta ẹme kpahe onọ nana:
Ẹvẹ ma sae rọ rehọ aro kele Jesu dhesẹ nọ ma you Jihova?
Jesu o you Ọsẹ obọ odhiwu riẹ yọ ọ jẹ hae lẹ ẹsikpobi
5. Jesu ọ jẹ daezọ amọfa
Jesu o je roro kẹ amọfa vi omobọ riẹ. Okenọ oma o make rrọe no, ọ rehọ oke gbe ẹgba riẹ fiobọhọ kẹ ahwo. Se Mak 6:30-44, kẹsena wha vẹ ta ẹme kpahe enọ nana:
Evaọ iku nana, eware jọ vẹ Jesu o ru nọ i dhesẹ nọ ọ jẹ daezọ amọfa?—Rri owọ avọ 31, 34, 41, gbe 42.
Eme ọ jẹ lẹliẹ Jesu fiobọhọ kẹ ahwo?—Rri owọ avọ 34.
Nọ orọnọ Jesu ọ rọ aro kele Jihova na, eme oyena u wuhrẹ owhẹ kpahe Jihova?
Idhere jọ vẹ ma sae rọ rehọ aro kele Jesu daezọ amọfa?
6. Jesu o re ru ọghọ
Dede nọ Jesu o wo eware buobu hu, o je ru ọghọ, yọ ọ tuduhọ omai awọ nọ ma hai ru ọghọ. Se Iruẹru Ikọ 20:35, kẹsena wha vẹ ta ẹme kpahe onọ nana:
Wọhọ epanọ Jesu ọ ta, ẹvẹ ma sai ro wo evawere?
Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
Idhere jọ vẹ ma sae rọ kẹ okẹ nọ ma gbẹ maki wo eware buobu hu?
Kọ whọ riẹ?
Ebaibol na o wuhrẹ omai nọ odẹ Jesu ma rẹ rọ lẹ se Jihova. (Se Jọn 16:23, 24.) Nọ ma tẹ be rọ odẹ Jesu lẹ yọ ma bi dhesẹ nọ oware nọ Jesu o ru ro fiobọhọ kẹ omai rrọ egbẹnyusu Jihova o da omai ẹro.
AHWO JỌ A RẸ TA NỌ: “Ọghẹnẹ ọ be daezọ sọ ma be ruẹ uye he.”
Nọ orọnọ Jesu o bi dhesẹ iruemu Ọsẹ riẹ na, ẹvẹ eware nọ o ru i ro dhesẹ nọ Jihova ọ be daezọ mai?
EME WHO WUHRẸ NO?
Jesu o you Jihova, o te je you ahwo. Nọ orọnọ Jesu ọ wọhọ Ọsẹ riẹ na, epanọ who wuhrẹ kpahe Jesu te, ere whọ rẹ riẹ Jihova te.
Ọkiẹkpemu
Ẹvẹ ma sai ro dhesẹ nọ ma you Jihova wọhọ epanọ Jesu o ru?
Ẹvẹ ma sai ro dhesẹ nọ ma you ahwo wọhọ epanọ Jesu o ru?
Uruemu Jesu vẹ o mae were owhẹ?
KIẸ KPAHE EFA
Se kpahe iruemu Jesu jọ nọ whọ rẹ sae rọ aro kele.
Se kpahe oware nọ u ro wuzou re ma lẹ evaọ odẹ Jesu.
“Fikieme Ma rẹ rọ Lẹ Evaọ Odẹ Jesu?” (Uwou-Eroro Na, Ava 1, 2008)
Kọ Ebaibol na ọ ta ẹme jọ kpahe oghẹrẹ nọ Jesu ọ jọ evaọ ugboma?
Eme ma rẹ sai wuhrẹ no oghẹrẹ nọ Jesu o je ru eyae ze?
“Ọghẹnẹ Ọ Gwọlọ nọ A Bru Ọghọ Họ Eyae na Oma” (Uwou-Eroro Na, Azie 1, 2012)