UWUHRẸ AVỌ 54

Iruo “Ọrigbo nọ A re Fievahọ nọ O Wo Areghẹ Na”

Onọ A Printi

Jesu họ ọnọ o wuzou ukoko Ileleikristi na. (Ahwo Ẹfisọs 5:23) Nẹnẹ, Jesu nọ ọ rrọ obọ odhiwu na ọ be rehọ “ọrigbo nọ a re fievahọ nọ o wo areghẹ na” kpọ ilele riẹ nọ e rrọ otọakpọ na. (Se Matiu 24:45.) Jesu họ ọnọ ọ rehọ “ọrigbo” na mu, yọ ọ kẹ riẹ udu nọ ọ sae rọ jiroro eware jọ kẹ ilele riẹ. O make rrọ ere na, ọrigbo na ọ rrọ otọ Kristi, yọ ọ rẹ jẹ gbodibo kẹ inievo Kristi. Ono họ ọrigbo yena? Oghẹrẹ vẹ ọrigbo na ọ be rọ rẹrote omai?

1. Ono họ “ọrigbo nọ a re fievahọ nọ o wo areghẹ na”?

Notọ avọ otọ ze Jihova ọ be hae rọ rehọ ohwo jọ hayo utu ahwo jọ vuẹ ahwo riẹ oware nọ a re ru. (Malakae 2:7; Ahwo Hibru 1:1) Nọ Jesu o whu no, ikọ na avọ ekpako nọ e jọ Jerusalẹm họ enọ e jẹ rẹrote iruẹru ukoko na. (Iruẹru Ikọ 15:2) Wọhọ epanọ o jọ evaọ oke yena, umutu ahwo jọ nọ e rrọ ekpako nọ a re se Utu Ẹruorote Iruẹru Isẹri Jihova họ enọ e be rọ Ẹme Ọghẹnẹ wuhrẹ ahwo ukoko na jẹ be kpọ iruo usi uwoma ota na. Utu nana a re se “ọrigbo nọ a re fievahọ nọ o wo areghẹ na, ọnọ [Jesu] o ro mu.” (Matiu 24:45a) Inievo nọ e rrọ Utu Ẹruorote na kpobi yọ Ileleikristi nọ a rọ ẹzi wholo, yọ a bi rẹro nọ a ti kuomagbe Kristi su evaọ obọ odhiwu nọ a te whu no.

2. Oghẹrẹ vẹ ọrigbo nọ a re fievahọ na ọ be rọ rehọ emu Ẹme Ọghẹnẹ kuọ omai?

Jesu ọ ta nọ ọrigbo nọ a re fievahọ na ọ te “rehọ emu kẹ [ibe Ileleikristi riẹ] evaọ ẹruoke.” (Matiu 24:45b) Wọhọ epanọ emu gheghe nọ ma rẹ re u re ru omai wo ẹgba jẹ jọ sasasa na, ere ọvona emu Ẹme Ọghẹnẹ o re ru omai wo ẹgba nọ ma re ro yoẹme kẹ Jihova je ru iruo nọ Jesu ọ kẹ omai. (1 Timoti 4:6) A be kẹ omai emu Ẹme Ọghẹnẹ na evaọ iwuhrẹ, ikokohọ esese, ikokohọ ilogbo, ebe ukoko na, gbe ividio nọ i bi fiobọhọ kẹ omai riẹ epanọ ma re ro ru oreva Ọghẹnẹ je wo usu okpekpe kugbei.

GBE WUHRẸ EWARE EFA

Wuhrẹ oware nọ ma rọ gwọlọ “ọrigbo nọ a re fievahọ nọ o wo areghẹ na,” nọ a re se Utu Ẹruorote na.

Iwoho: Isẹri Jihova nọ e rrọ akpọ na soso nọ Utu Ẹruorote na o be kẹ ehrẹ, a te je bi lele ehrẹ na. 1. Uviuwou jọ nọ u bi rri JW Broadcasting. 2. Isẹri Jihova nọ e fialoma via, nọ e be wọ eware nọ a be rọ dhogbo fihọ omoto. 3. Isẹri Jihova ivẹ nọ i dikihẹ kẹle oware ebe nọ a be rọ ta usi uwoma. 4. Ọkpako ukoko nọ o bi se ileta evaọ ewuhrẹ ukoko. — Utu Ẹruorote na o be rọ Ẹme Ọghẹnẹ kuọ Isẹri Jihova evaọ akpọ na soso. O rẹ jẹ kẹ ae ithubro je ru epanọ a re ro fiobọhọ kẹ ae nọ eware okpẹtu e tẹ via

3. O gwọlọ nọ a re koko ahwo Jihova họ

Utu Ẹruorote na o be rẹrote iruẹru Isẹri Jihova wọhọ epanọ Jesu ọ be kpọ ae. Ere o jọ re evaọ oke Ileleikristi ọsosuọ na. Kporo IVIDIO na.

IVIDIO: Jihova O Koko Ahwo Riẹ Họ (6:18)

Se 1 Ahwo Kọrint 14:33, 40, kẹsena wha vẹ ta ẹme kpahe onọ nana:

Ẹvẹ eria Ebaibol nana i ro dhesẹ nọ Jihova ọ gwọlọ nọ a koko Isẹri riẹ họ?

4. Ọrigbo nọ a re fievahọ na ọ be rẹrote iruo usi uwoma ota mai

Iruo usi uwoma ota na họ iruo nọ e mai wuzou nọ Ileleikristi ọsosuọ a je ru. Se Iruẹru Ikọ 8:14, 25, kẹsena wha vẹ ta ẹme kpahe enọ nana:

Amono a jẹ kpọ iruo usi uwoma ota na evaọ oke Ileleikristi ọsosuọ na?
Eme Pita avọ Jọn a ru nọ ahwo nọ a gbẹ jọ ikọ a vi ai kpobọ Sameria fiki usi uwoma ota na?

Iruo usi uwoma ota na họ iruo nọ Utu Ẹruorote na o mae tẹrovi. Kporo IVIDIO na.

IVIDIO: Iruo Usi Uwoma Ota na A rọ Karo (1:24)

Jesu ọ ta epanọ usi uwoma ota na u wuzou te. Se Mak 13:10, kẹsena wha vẹ ta ẹme kpahe enọ nana:

Fikieme usi uwoma ota na u ro wuzou kẹ Utu Ẹruorote na gaga?
Fikieme o rọ gwọlọ nọ “ọrigbo nọ a re fievahọ nọ o wo areghẹ na” ọ rẹ rẹrote iruo nana nọ a bi ru evaọ akpọ soso na?

5. Ọrigbo nọ a re fievahọ na ọ rẹ vuẹ ikoko na eware nọ a re ru

Utu Ẹruorote na o rẹ vuẹ Ileleikristi nọ e rrọ akpọ na soso eware nọ a re ru. Ẹvẹ ọrigbo na ọ be hae rọ riẹ oware nọ ọ rẹ vuẹ ikoko na? Rri epanọ utu ẹruorote ikpe-udhusoi ọsosuọ u ro ru ere. Se Iruẹru Ikọ 15:1, 2, kẹsena wha vẹ ta ẹme kpahe enọ nana:

Ẹme vẹ ọ wha avro fihọ udevie Ileleikristi oke ọsosuọ na?
Amono Pọl, Banabas, gbe amọfa a nyabru re a ruẹsi ku ẹme na họ?

Se Iruẹru Ikọ 15:12-18, 23-29, kẹsena wha vẹ ta ẹme kpahe onọ nana:

Re utu ẹruorote ọsosuọ na o sae riẹ oware nọ Ọghẹnẹ ọ gwọlọ nọ a ru, eme a ru taure a tẹ te jiroro ẹme jọ?—Rri owọ avọ 12, 15, gbe 28.

Se Iruẹru Ikọ 15:30, 31 gbe 16:4, 5, kẹsena wha vẹ ta ẹme kpahe enọ nana:

Eme Ileleikristi oke ọsosuọ na a ru kpahe eware nọ utu ẹruorote na u kere se ai?
Oghẹrẹ vẹ Jihova ọ rọ ghale ae fikinọ a yoẹme?

Se 2 Timoti 3:16 gbe Jemis 1:5, kẹsena wha vẹ ta ẹme kpahe onọ nana:

Eme Utu Ẹruorote na o be hai ru nẹnẹ nọ a tẹ gwọlọ jiroro jọ?

AHWO JỌ A RẸ TA NỌ: “Ma te bi yoẹme kẹ Utu Ẹruorote na yọ ezae jọ gheghe ma bi lele na.”

Eme ọ kẹ owhẹ imuẹro nọ Jesu họ ọnọ ọ be kpọ Utu Ẹruorote na?

EME WHO WUHRẸ NO?

Utu Ẹruorote na họ “ọrigbo nọ a re fievahọ nọ o wo areghẹ na,” ọnọ Kristi o ro mu. A be rehọ emu Ẹme Ọghẹnẹ kuọ Ileleikristi nọ e rrọ akpọ na soso jẹ kẹ ae ehrẹ evaọ eware efa sa-sa.