Ẹkẹ Abọ Ra Evaọ Ebabọ kẹ Obaro

¹ Nẹnẹ Ileleikristi a gbẹ be sẹro iruo ebabọ ẹzi nọ Jesu o muhọ ole ikpe 1,970 nọ e vrẹ no okenọ o mu ilele riẹ họ ekokohọ. (Mat. 4:17; 7:24, 25, 28; Jọn 7:46) Jihova ọ ghale iruo nana gaga no. (Itẹ 10:22) Nọ ma bi whowho Uvie Ọghẹnẹ na, ma be jẹ bọ re kẹ ẹruọsa ẹvi obaro.

² Nọ a be wariẹ Egwa Uvie buobu ru kpokpọ na, a gbẹ gwọlọ egwa efa nọ ikoko ekpokpọ nọ e be va ze e rẹ jọ. Ukpe n’ukpo ọvo ẹvi 153 eye e jọ ikoko na evaọ Nigeria. O gwọlọ ugho gbe iruiruo unevaze re a sae ru iruo ebabọ enana re. Emamọ uruemu inievo na nọ u fo ejiro nọ i bi ru onana gba u bi wo osaohwa.

³ Ahwo Buobu A be Kẹ Uketha Uyoyou: Ma re dhesẹ uyoyou mai kẹ ‘imoni na kpobi’ ẹkwoma ẹzọhọ fihọ Ẹkpa-Ugho Ukoko-Ulogbo kẹ Ọgwa Uvie. (1 Pita 2:17) Igho nọ a kpeze te obọ uwou-ogha nana i fiobọhọ no evaọ ebabọ Egwa Uvie ekpokpọ nọ i bu te 110. Rekọ ẹgwọlọ na o gbẹ be rro haro nọ iruo ilele na u bi vi haro na. Fikiere Jihova ọ gbẹ be ghale ọruẹrẹfihotọ ọnana, yọ u re mu ekpako ukoko na ẹro nọ etehe unevaze Ẹkpa-Ugho Ukoko-Ulogbo kẹ Ọgwa Uvie na a kpoka hiẹe ziezi gbe nọ ọ rẹ jọ evaọ eria ọ Obe Uwuhrẹ Ukoko sa-sa. Ugho unevaze nọ o te omai obọ, kugbe ọwariẹ hwa igho nọ a momo, a re vi ai se ikoko nọ e be bọ Egwa Uvie ekpokpọ gbe enọ i bi ru aruẹrẹ ologbo.

⁴ Ukoko-Ulogbo, gbe ikoko kpobi nọ i bi wo erere no ọruẹrẹfihọ ọnana ze, a bi dhesẹ ovuhumuo odidi kẹ ahwo buobu gbe iviuwou nọ i bi ru unevaze kẹse kẹse fihọ Ẹkpa-Ugho Ukoko-Ulogbo kẹ Ọgwa Uvie na. Ikoko kpobi a re ru unevaze fihọ Ẹkpa-Ugho Ukoko-Ulogbo kẹ Ọgwa Uvie na, makinọ ae omarai a be bọ Ọgwa Uvie hayo a be bọ họ. Koka koka ọnọ o bi ru obe uwuhrẹ na ọ rẹ kareghẹhọ re ọ vuẹ utu na kpahe unuigho nọ a zọhọ evaọ oka n’ukpo. Onana yọ emamọ uvẹ nọ ahwo kpobi a rẹ jọ w’abọ, te ekpako te emaha, ghelọ oghẹrẹ kpobi nọ eyero-ugho rai o rẹ sae jọ. Mai omomọvo ọ rẹ sae ruẹrẹ oma họ taure ma te ti kpohọ Obe Uwuhrẹ Ukoko na re ma wo oware nọ ma rẹ zọhọ fihọ Ẹkpa-Ugho Ukoko-Ulogbo kẹ Ọgwa Uvie na.

⁵ Ẹgwọlọ nọ a re ro ru unevaze kẹse kẹse ọ riẹ ẹsikpobi. Obọnana ma wo Eria Okokohọ 44 evaọ Nigeria, yọ ọvuọvo nọ a rẹ sae riwi nọ a bọ re no riẹriẹriẹ ọ riẹ hẹ. Egwa Uvie buobu e gbẹ rọ otọ ebabọ anwọ ikpe buobu nọ a re bọ re he. Ebabọ enana e be hẹrẹ fikinọ ugho o riẹ hẹ. Nọ o rọ uzẹme nọ unuigho nọ ma rẹ sae kẹ o rọ oghoghẹrẹ na, ma rẹ sae ruẹ nọ ma te nwene ẹraha igho omobọ mai ma rẹ sai w’abọ vọvọ evaọ uketha iruo ebabọ na. Joma rehọ ‘ekuakua’ mai kẹ Jihova adhẹẹ. Evaọ edhere ọnana ma re ro dhesẹ uyoyou mai kẹ’E, yọ Ọ rẹ ghale ahwo nọ a bi ru azọhọ unevaze.—Itẹ 3:9; 1 Irv. 29:14-17.

⁶ Kọ whọ riẹ kpahe iruo ebabọ jọ? Otẹrọ erei, who te wo uvẹ nọ who re ro fiobọhọ kẹ ebabọ Ọgwa Uvie, whọ rẹ sae vuẹ ekpako ukoko ra, omọvo ọ Ogbẹgwae Ebabọ Okogho ra, gbe ọsẹro ọnyawariẹ ra. Iruiruo unevaze nọ i wo ona ebabọ a gwọlọ e rai evaọ orẹwho na soso. Enwenọ Ogbẹgwae Ebabọ Okogho kpobi a be n’iyẹrẹ nọ a gbẹ gwọlọ iruiruo unevaze efa. Ofariẹ, evaọ otọ ọkpọvio Ogbẹgwae Ebabọ Okogho nọ Ukoko-Ulogbo o romu, a bi wuhrẹ inievo efa nọ i te eva ẹzi kpahe iruo nọ a gwọlọ re a sae fiobọhọ kẹ ikoko efa buobu evaọ iruo ebabọ rai.

⁷ Ẹkẹ Abọ Ogbẹgwae Ebabọ Okogho Na: Evaọ March 1994, Ukoko-Ulogbo o tẹ rehọ Ogbẹgwae Ebabọ Okogho isoi romu Nigeria. Ghele, fikinọ ẹgwọlọ ọ riẹ gaga, enẹna ma wo Ogbẹgwae Ebabọ Okogho nọ i bu te 25. Fikieme a jẹ rehọ ogbẹgwae enana mu? A rehe rai mu re a fiobọhọ kẹ oma ebabọ kpobi. A wo ona ebabọ nọ Ukoko-Ulogbo o kẹ rai nọ u re ru edhere ebabọ jọ kpatakpata. Inievo nọ i bi ruiruo evaọ ogbẹgwae na yọ ekpako ukoko nọ i wo eriariẹ kpahe ebabọ, yọ a rẹ sae kẹ ẹjiroro ebabọ nọ u w’iruo re a sae bọ Ọgwa Uvie nọ ọ rọ kpatiẹ gbe onọ o rẹ rehọ igho buobu hu. Fiki eriariẹ ebabọ rai, a rẹ sai fiobọhọ kẹ ekpako ukoko mai re a jiroro sọ o mae woma re a wariẹ Ọgwa Uvie anwae ru kpokpọ hayo re a bọ ọkpokpọ, a rẹ jẹ sae fiobọhọ kẹ ae riẹ taure a tẹ te dẹ otọ sọ oria ebabọ okpokpọ na a re ro ruiruo hayo oria anwae vẹre na oye u kiehọ. A rẹ jẹ sae fiobọhọ kẹ ekpako na wawo gbagba unuigho nọ ebabọ na o te rehọ gbe unuigho nọ a rẹ sae zẹ Ọgwa Uvie nọ abọ no vẹre na.

⁸ A kẹ Ogbẹgwae Ebabọ Okogho na ekpọvio kpahe epanọ a re ro ru emamọ iruo ọ isimeti, oghẹrẹ nọ a rẹ tehe irre uwou, unu isimeti nọ a rẹ rọ gwa uwẹkpẹ, gbe abọ iruo ebabọ efa. Ẹkwoma ẹnya lele ekpọvio nọ Ukoko-Ulogbo o kẹ gbe ẹjiroro efa nọ i no obọ Ogbẹgwae Ebabọ Okogho na ze, ma te sae bọ emamọ iwou nọ e rẹ tọ. Dede nọ unuigho nọ a rẹ rọ bọ emamọ Ọgwa Uvie o rẹ jọ ghaghae, oyena yọ edhere nọ o mae woma nọ a rẹ rọ rehọ eware nọ a rọ kẹ ruiruo ukpenọ a rẹ bọ ekpehre Ọgwa Uvie nọ o rẹ tọ họ. Iyẹrẹ i dhesẹ no inọ idhe uwou i kie hayo ofou o fou rai kufiẹ fiki ekpehre ebabọ. Onana o wha riẹ ze nọ ikoko a be rọ hwa igho isiava, nọ u dhesẹ nọ o mae rọ kuẹku re a raha igho buobu ẹsiẹvo bọ uwou na wowoma.

⁹ Taure a tẹ te dẹ otọ, o rọ oware areghẹ re a nekpẹ ọ Ogbẹgwae Ebabọ Okogho na. A rehọ egbagwae enana mu re a fiobọhọ kẹ ebabọ Ọgwa Uvie evaọ eria nọ a kẹ rai nọ i kugbe ikogho buobu, yọ a rẹ sae fiobọhọ evaọ edadẹ otọ gbe otokiẹ uzi kpahe ohwo nọ o wo otọ nọ a gwọlọ dẹ kẹ Ọgwa Uvie na. A wo ekpọvio re a fiobọhọ kẹ inievo na whaha ebẹbẹ nọ i re lele edadẹ otọ. Ma fievahọ nọ ekpako na a te gaviezọ kẹ ẹjiroro ọ ahwo Ogbẹgwae Ebabọ Okogho na re a whaha oma-olahiẹ hayo eware eghaghae Egwa Uvie.

¹⁰ Okenọ a tẹ be salọ otọ nọ a rẹ bọ Ọgwa Uvie fihọ evaọ okpẹwho nọ u wo ikoko buobu, u fo re ekpako ukoko na a t’ẹme na kugbe Ogbẹgwae Ebabọ Okogho na, ọsẹro ọnyawariẹ na, ọsẹro okpẹwho na, gbe o tẹ lọhọ kugbe ekpako ukoko nọ e kẹle rai. Onana o rẹ sai fiobọhọ kẹ ekpako ukoko na re a salọ oria nọ o rẹ kẹ ikoko nọ i ti ru ebabọ na erere re o jẹ whaha eyero ẹgbede buobu kẹ Egwa Uvie nọ e kẹle riẹ, re o jẹ kuvẹ kẹ ẹvi evaọ obaro evaọ oria na. Evaọ eria ẹwho ologbo, ẹsibuobu ikoko esa hayo bu vi erei a re ru uwuhrẹ evaọ Ọgwa Uvie ọvo. Makọ evaọ eria nọ ahwo a jo bu tere he, a rẹ sae salọ eria nọ u re w’iruo kẹ ikoko ivẹ hayo bu vi erei.

¹¹ Nọ a be rehọ ekpọvio nọ i no obọ Ukoko-Ulogbo ze ruiruo na, Ogbẹgwae Ebabọ Okogho na a bi ruiruo logbo nọ a bi ro fiobọhọ kẹ ikoko evaọ aruẹrẹ rai gbe evaọ ebabọ ekpokpọ. Evaọ etoke ebabọ, a ma-oma oke kẹ iruiruo unevaze re a jariẹ evaọ etoke ebabọ na ọvo re a ruẹse wo abọ evaọ iwuhrẹ gbe usiuwoma ota kugbe ukoko rai. Ona gbe ọruẹrẹhọ nọ a wuhrẹ evaọ ebabọ enana e te kẹ obufihọ re evaọ ebabọ Otọ Okokohọ.

¹² Mai kpobi a rẹ sae dhesẹ ubi ọ uwowou evaọ iruo ru kugbe ahwo nọ e be sẹro iruo ebabọ na. Evaọ edhere ọnana a re ‘ruiruo vọvọ’ nọ a gwọlọ je ru ei ‘avọ evawere orọnikọ avọ ofu hu.’ (Iruẹru 14:26; Hib. 13:17) Ogbẹgwae Ebabọ Okogho obọ Lagos a t’ẹme ọnana evaọ iyẹrẹ egbukpe rai: “Eware nọ ma ruẹ evaọ 1995 e vọ avọ omosasọ gbe erere. Ukoko-Ulogbo gbe ahwo nọ a ru Ogbẹgwae Ebabọ Okogho na via a fi elo họ ẹjiroro gbe iruo Ogbẹgwae Ebabọ Okogho na evaọ egwae buobu kugbe ugboma ekpako gbe ogbẹgwae ebabọ evaọ eria kpobi nọ a nyate evaọ okogho na. Ofariẹ, u fo re a muẹrohọ nọ a ru ebabọ Egwa Uvie jọ no, yọ efa buobu i dhuye họ hayo a be ma-oma rai. A wuhrẹ iruiruo unevaze mai jọ no evaọ etoke na, yọ a ghine dhesẹ nọ a rọ ekwakwa eghaghae ilogbo evaọ ọkwa-iruo uvẹ ọghaghae ọnana.”

¹³ Ugho kẹ Iruo Ebabọ Ọgwa Uvie: A rẹ kaki ru ọruẹrẹfihotọ kẹ ugho nọ a gwọlọ evaọ oke emuhọ. (Luk 14:28-30) Ekpako na a re vuhu ẹgba ukoko na nọ a sae rọ hwa unuigho kpobi nọ a gwọlọ ẹkwoma ọkiẹriwo re a sae riẹ (1) unuigho nọ a te zọhọ ẹsiẹvo re a ro fiobọhọ kẹ edadẹ otọ gbe ugho ebabọ, (2) unuigho nọ a rẹ sae momo evaọ omoma rai gbe oke nọ ugho na o te rọ jariẹ, gbe (3) unuigho nọ iwhowho-uvie na a wo họ iroro nọ a te zọhọ kamara kamara re a sae hwa ugho nọ a momo kugbe onọ a gwọlọ re a rọ rẹro te igho raha efa.

¹⁴ Fikiere, u fo re ekpako ukoko nọ e gwọlọ obọfihọ ugho no Ẹkpa-Ugho Ukoko-Ulogbo kẹ Ọgwa Uvie na ze a ta ẹjiroro ebabọ rai gbe ugho nọ o te rehọ kugbe Ogbẹgwae Ebabọ Okogho rai, nọ i re fiobọhọ kẹ ae ẹkwoma ovuẹ nọ a re vise Ukoko-Ulogbo kpahe ẹgwọlọ rai gbe eware kpobi nọ i kpomahọ ebabọ na jẹ be rehọ omobe ọ Kingdom Hall Loan Survey (Ọkiẹriwo Igho-Momo kẹ Ọgwa Uvie) na ruiruo. Nọ ekpako na a te kere abọ rai fihọ omobe na no, ọsẹro ọnyawariẹ na o ve ku ẹme riẹ gbei o ve zihe omobe na se Ogbẹgwae Ebabọ Okogho na re a kpahe ẹme rai fihiẹe. Ae omarai a re kere eme nọ ikiọkọ fihọ omobe na a ve vi ọrọ obọdẹ na se Ukoko-Ulogbo. Nọ Ogbẹgwae Ebabọ Okogho na a te vi ovuẹ se Ukoko-Ulogbo no, a ti vi ileta ovavo se ukoko nọ u kpomahọ. A rẹ kẹ obọfihọ ugho ẹmẹrera wọhọ epanọ ugho o riẹ te gbe epanọ ẹgwọlọ na ọ rọ.

¹⁵ Yọrọ Ẹzi Ajọwha: U fo nọ a re jiri ahwo kpobi kẹ ọghọoruo rai evaọ obufihọ kẹ Ẹkpa-Ugho Ukoko-Ulogbo kẹ Ọgwa Uvie na. Eme ọ ovuhumuo ikoko buobu nọ a fiobọhọ kẹ no i bi te omai obọ. Iruẹru “ẹrẹrẹe” o be roma via evaọ udevie ikoko na. (2 Kọr. 8:14, 15) Ukoko jọ evaọ Ohafia o kere nọ: “Mai, ahwo ukoko na kpobi, ma yere owhai no udu ze nọ wha ro ru ọruẹrẹfihotọ ọ Ẹkpa-Ugho Ukoko-Ulogbo kẹ Ọgwa Uvie ọnana maero kọ Ogbẹgwae Ebabọ Okogho na nọ ma bi wo erere riẹ enẹna. Ẹsikpobi ma rẹ kareghẹhọ owhai evaọ elẹ mai jẹ lẹ kẹ Jihova nọ ọ thọ owhai uke evaọ ọruẹrẹfihotọ obaro rai.”

¹⁶ Evaọ etoke ebabọ Ọgwa Uvie ọkpokpọ, ẹzẹ, ajọwha, gbe emamọ uruemu o rẹ zọhọ kugbe obọkparọ ebabọ. U fo re ẹzi ọvona ọ gbẹ nyaharo nọ ma be gwọlọ rehọ ahwo buobu ze eriariẹ uzẹme na jẹ tudu họ ae awọ re a kuomagbe omai evaọ Ọgwa Uvie na. Ajọwha otiọye na yọ edhesẹ ovuhumuo nọ u re no ẹvi enọ e nyaze ewuhrẹ gbe orro ukoko na ze.

¹⁷ Nọ ma bi gbe ru odibọgba mai kẹre haro na, ma be dawo oma mai gaga kẹ iruo nọ e rọ otọ na, ababọ avro eghale Jihova i ti lele omai. (Luk 13:24) Ma riẹ orro gbe ẹvi nọ o be hẹrẹ omai evaọ obaro ho. Rekọ u fo re ma thoma kpahe re ma dede enọ i bi zurie ze te gọ kpobi rehọ. Oyena o gwọlọ oma ruẹrẹhọ evaọ abọ mai enẹna. Fikiere, ma be lẹ kẹ ẹnyaharo eghale Jihova gbe ọkpọvio riẹ. Evaọ ebabọ kẹ obaro, jọ omai kpobi a ruiruo kugbe Jihova—evaọ ugboma, ekwakwa, gbe ẹzi. Ababọ avro ọ te ghale omai nọ ma be rẹro te ahwo nọ a be dhẹ vẹrẹ ruọ ukoko Uvie riẹ evaọ etoke urere edẹ enana.—Aiz. 60:8, 10 11, 22.