Wha Gbodibo Kẹ Jihova

 1. Ohẹriẹ vẹ o rrọ iruo odibo nọ a jọ obe Ahwo Rom 12:11 fodẹ gbe oghẹrẹ nọ ahwo buobu a rri iruo odibo nẹnẹ?

ODIBỌGBA Oleleikristi u wo ohẹriẹ gaga no oghẹrẹ nọ ahwo buobu a rri iruo odibo nẹnẹ. Nọ a tẹ fodẹ odibo hayo ọrigbo, iroro rai i re kpohọ ohwo nọ olori riẹ ọ be gbahọ ru iruo jẹ be lahiẹ. Rekọ Ebaibol na ọ ta kpahe oghẹrẹ iruo odibọgba jọ nọ a rẹ rọ unevaze ru kẹ emamọ Olori. Okenọ Pọl ukọ na ọ ta kẹ Ileleikristi ikpe-udhusoi ọsosuọ nọ a “gọ Ọnowo na” hayo gbodibo kẹ Jihova, ọ jẹ ta kpahe epanọ uyoyou nọ ohwo o wo kẹ Jihova o rẹ wọ ohwo otiọye na gọe. (Rom 12:11) Eme odibọgba nana ọ kẹre te? Eme ma re ru nọ ma gbẹ rọ jọ ọrigbo kẹ Setan avọ akpọ riẹ hẹ? Irere vẹ ma ti wo nọ ma tẹ be hae gbodibo kẹ Jihova ẹsikpobi?

 2. (a) Eme o rẹ wọ ọrigbo daji otọ olori riẹ nọ ọ tẹ maki wo uvẹ nọ o re ro no otọ riẹ? (b) Eme ozọ ọrigbo na nọ a rẹ zahiẹ na u wuhrẹ omai?

² Uzi nọ Ọghẹnẹ ọ kẹ emọ Izrẹl u re ru omai riẹ oghẹrẹ odibọgba nọ Jihova ọ gwọlọ mi omai. Uzi na o ta nọ ọrigbo o te ru iruo kẹ olori riẹ te ikpe ezeza no, olori na o ve siobọnoi evaọ ukpe avọ ihrẹ. (Ọny. 21:2) Rekọ ọrigbo na o te gine you olori riẹ gaga yọ ọ gwọlọ nọ ọ rẹ gbẹ gbodibo kẹe, uzi ovona o ta nọ ọ rẹ sai ru ere. Olori riẹ ọ rẹ rehọ iẹe ziọ unuwou hayo unuẹthẹ, ọ vẹ rọ ukẹti hayo ododo zahiẹ eghogho fihọ ozọ riẹ. (Ọny. 21:5, 6) Muẹrohọ nọ ozọ ọrigbo na a rẹ zahiẹ. Evaọ ẹvẹrẹ Hibru, ẹme nọ o wobọ kpahe ezọ hayo ezọgaviẹ a re ro dhesẹ ẹmeoyo. Onana u dhesẹ nọ ọrigbo na ọ gwọlọ nọ o re gbe yoẹme kẹ olori riẹ jẹ jọ otọ riẹ. Ere omauromudhe mai kẹ Jihova o rrọ, uyoyou nọ ma wo kẹe o rẹ wọ omai yoẹme kẹe.

 3. Eme ọ be wọ omai roma mudhe kẹ Ọghẹnẹ?

³ Ma jọ udu mai gbaemu nọ ma rẹ gọ Jihova jẹ jọ odibo riẹ taure ma tẹ te ta nọ ma rẹ họ-ame. Isiuru nọ ma rọ gwọlọ ru oreva riẹ o wọ omai roma mudhe kẹe. Uvumọ ohwo ọ gba omai họ họ. Makọ emaha nọ e be họ-ame dede, a be hai jiroro na kẹ omarai inọ a rẹ roma mudhe kẹ Jihova, orọnikọ fiki eva nọ a gwọlọ ru were ọsẹgboni rai hi. Uyoyou nọ ma wo kẹ Jihova o be wọ omai Ileleikristi roma mudhe kẹe. Jọn ukọ na o kere nọ: “Uyoyou Ọghẹnẹ ona, nnọ ma re koko ijaje riẹ.”—1 Jọn 5:3.

 4. Ẹvẹ ma sae rọ jọ “idibo ẹrẹreokie”?

⁴ Ma yere Jihova nọ ọ kẹ omai uvẹ nọ ma rẹ rọ jọ erigbo riẹ. Ẹrọwọ nọ ma fihọ idhe ẹtanigbo Kristi u ru omai wo ufuoma no igbo uzioraha. Dede nọ ma gba ha, ma rọ unevaze fi oma hotọ kẹ Jihova gbe Jesu nọ a kpọ omai. Pọl ọ jọ ileta riẹ jọ ru ẹme nana vẹ nọ ọ ta nọ: ‘Wha rri oma rai wọhọ ahwo nọ a ghine whu kẹ eware iyoma no; rekọ nọ a rrọ uzuazọ kẹ Ọghẹnẹ ẹkwoma Jesu Kristi.’ Kẹsena o te fibae nọ: “Kọ wha gbẹ riẹ nọ wha tẹ rehọ oma rai ru erigbo kẹ ohwo jọ, yọ erigbo ọnọ wha bi yo ẹme riẹ na wha rọ; otiẹsejọ ọ vẹ jọ orọ umuomu, onọ u re su ohwo kpo uwhu, hayo ọrọ ẹmeoyo, onọ u re su ohwo kpo ẹrẹreokie? Rekọ [ma] rọ uyere kẹ Ọghẹnẹ, nnọ wha jọ erigbo umuomu okejọ, rekọ enẹna whai ọvo a mate no eva rai ze bru uwuhrẹ nọ a kẹ owhai na. Rekọ enẹna a ru owhai emuyẹ fo uno uzioraha rai no, wha tẹ ze ruọ idibo ẹrẹreokie.” (Rom 6:11, 16-18) Muẹrohọ nọ Pọl ọ ta nọ a “mate no eva rai ze.” Ẹhẹ, oma nọ ma ro mudhe kẹ Jihova u ru nọ ma rọ rrọ “idibo ẹrẹreokie.”

 5. Eme ma bi lele họre evaọ oma, kọ fikieme?

⁵ Dede na, ezadhe sa-sa e riẹ nọ o gwọlọ nọ ma re fi kparobọ re ma sai yeri uzuazọ ohwo nọ ọ roma mudhe kẹ Ọghẹnẹ no. Ma rẹriẹ ovao dhe ohọre ivẹ. Orọ ọsosuọ họ, ọkpọ onọ Pọl ọ rẹriẹ ovao dhe. O kere nọ: “[Me] wo evawere kẹ uzi Ọghẹnẹ no obọ eva mẹ kpobi ze: rekọ mẹ jọ ekuakua oma mẹ ruerẹ uzi ofa, nọ u bi kpokpo uzi eva mẹ, nọ o be rehọ omẹ ze igbo uzi umuomu, onọ o [rrọ] eva oma mẹ.” (Rom 7:22, 23) Wọhọ Pọl, sebaẹgba nọ ma reuku riẹ o be kẹ omai uye noke toke. Fikiere ma rrọ ohọre wọso isiuru ugboma mai. Pita ukọ na ọ ta udu họ omai awọ nọ: “Wha yeri kerọ emuyẹ, rekọ wha rehọ uvẹ emuyẹ nọ wha rọ ru umuomu hu; rekọ wọhọ epaọ idibo Ọghẹnẹ.”—1 Pita 2:16.

6, 7. Ẹvẹ Setan ọ be rọ gwọlọ ru akpọ nana si omai urru?

⁶ Ohọre avivẹ nọ ma wo họ, ohọre wọso akpọ nana nọ ọ rrọ otọ Setan na. Setan nọ ọ rrọ osu akpọ nana ọ be gale ekwakwa ẹmo riẹ vi omai re ọ ruẹsi ru omai ghẹmeeyo kẹ Jihova gbe Jesu. Setan ọ gwọlọ nọ ma ru ẹgwọlọ riẹ re ma rọ ere jọ erigbo riẹ. (Se Ahwo Ẹfẹsọs 6:11, 12.) Edhere jọ nọ Setan o bi ro ru onana họ, ẹkwoma eware akpọ nana nọ o bi ru re i si omai urru. Jọn ukọ na ọ vẹvẹ omai unu nọ: “Ohwo jọ o te you akpọ na, uyoyou Ọsẹ na o riẹ eva ha. Keme eware kpobi nọ e rọ eva akpọ na, urusio uwo, gbe urusio ibiaro gbe eheri uzuazọ, o rọ orọ Ọsẹ na ha rekọ yọ o rọ akpọ na.”—1 Jọn 2:15, 16.

⁷ Ahwo a be dhogbo epanọ a re ro fe evaọ akpọ na. Setan o bi ru ahwo roro nọ ohwo o te fe yọ evawere e ze no. Iwou-eki ilogbo e da oria kpobi fia. Ahwo nọ a re whowho eki a rẹ ta udu họ ahwo awọ nọ a dẹ eware rai re a jẹ riakpọ kuoma. Otu nọ ọ rẹ ruẹrẹ onya erẹ họ kẹ ahwo re a hwosa kẹ ae a rẹ ta udu họ owhẹ awọ nọ who kpohọ eria nọ e mai woma evaọ akpọ na, re whọ jẹ jọ usu kugbe ahwo nọ a rovie aro. Oria kpobi nọ ma rrọ, ahwo a rẹ ta udu họ omai awọ nọ ma le eware akpọ na re u woma kẹ omai.

8, 9. Eme ọ rẹ sai noi ze nọ ma te bi kielele efe, kọ fikieme?

⁸ Nọ Pita ukọ na ọ jẹ ta kpahe Ileleikristi ikpe-udhusoi ọsosuọ nọ i je kielele akpọ na, o kere nọ: “A se rie gbe oro nọ a re ru ozighi eva oke uvo. A wo afuẹwẹ gbe eka, a re ru edo ghọghọ eva oke ọfariẹ rai, nọ avọ owhai a te re da ghọghọ kugbe. Fiki enuodo eha-ise ugheghẹ rai, a tẹ rehọ ogberuo urusio iwo nọ a re kielele [hrowo] enọ e rehọ udugaga va ahwo nọ a be ria eva oruthọ abọ. A yeya kẹ ae nọ a rẹ kẹ ae omofọwẹ, rekọ yọ ae omarai a rọ erigbo egbegbe, keme koware koware nọ o gavi ohwo, oye ohwo ọ rẹ jọ igbo riẹ.”—2 Pita 2:13, 18, 19.

⁹ “Urusio ibiaro” nọ a re ru lele u re ru ohwo wo ufuoma ha. Ukpoye u re ru ohwo họ ọrigbo Setan, osu akpọ na. (1 Jọn 5:19) Uzẹme riẹ họ, ma te bi kielele eware akpọ na, yọ ma bi fi omamai họ igbo nọ ohwo ọ rẹ sae kaki no ho.

10, 11. Amono Setan ọ be mae tẹrovi nẹnẹ, kọ ẹvẹ iruẹru isukulu ikpehru e sae rọ jọ ẹbẹbẹ kẹ ae?

¹⁰ Ohwo nọ ọ rrọ ogbori ọye Setan ọ rẹ gwọlọ dawo, wọhọ epanọ o ru evaọ ogba Idẹn na. Ọ be tẹrovi izoge na gaga nẹnẹ. Eva e rẹ were Setan vievie he nọ uzoge hayo omọfa jọ kpobi ọ tẹ salọ nọ ọ rẹ gbodibo kẹ Jihova. Ọwegrẹ Ọghẹnẹ nana ọ gwọlọ nọ ohwo kpobi nọ ọ roma mudhe kẹ Jihova no o kie no ẹrọwọ na.

¹¹ Joma wariẹ ta ẹme kpahe ọrigbo nọ ọ rọwo nọ a zahiẹ ezọ riẹ na. Ababọ avro, oware nana o wha edada sei evaọ omoke jọ, o tẹ jẹ ka oka họ iẹe oma nọ u dhesẹ nọ ọyomariẹ yọ ọrigbo. Ere ọvona o rẹ sae da uzoge umutho oke jọ re nọ ọ tẹ salọ oghẹrẹ uzuazọ uyero nọ u wo ohẹriẹ no orọ ibe riẹ. Setan o bi ru ahwo roro nọ ohwo o te bi le eware akpọ na ọ sai ro wo evawere, rekọ u fo nọ Oleleikristi ọ rẹ kareghẹhọ nọ u wuzou gaga re o duomahọ iruẹru egagọ Ọghẹnẹ. Jesu ọ ta nọ: “Ahwo nọ a wo ẹzi iwhrori, eva e were ae.” (Mat. 5:3) Oreva Ọghẹnẹ Ileleikristi a gwọlọ ru, orọnikọ orọ Setan he. Izi Jihova e rẹ were ai ẹsikpobi, yọ a re roro kpahe ae taso tuvo. (Se Olezi 1:1-3.) Rekọ fiki eware ibuobu nọ a be jọ isukulu ikpehru wuhrẹ nẹnẹ, o rẹ sae jọ bẹbẹ kẹ odibo Jihova nọ o bi kpohọ isukulu itiena re o wo uvẹ nọ o re ro roro didi je duomahọ egagọ riẹ.

12. Uvẹ ẹsalọ vẹ izoge buobu a wo nẹnẹ?

¹² Nọ Oleleikristi ọ tẹ rrọ otọ olori jọ evaọ obọ akpọ, o rẹ sai ru eware jọ bẹbẹ kẹe. Evaọ ileta ọsosuọ nọ Pọl o kere se inievo obọ Kọrint, ọ nọ rae nọ: “Whọ jọ ọrigbo oke nọ a se owhẹ?” Kẹsena ọ tẹ kẹ ae ohrẹ nọ: “Whọ dawo [ezọ] họ. Rekọ uvẹ ọmuyẹ ọ tẹ rọ kẹ owhẹ rehọ iẹe.” (1 Kọr. 7:21) U fo nọ a rẹ salọ oware nọ o rẹ kẹ ae ufuoma, viukpọ onọ u re ru ai họ erigbo. Evaọ erẹwho buobu nẹnẹ, o gbahọ nọ ohwo o re kpohọ isukulu te umuo jọ. Kẹsena ọ vẹ jiroro kẹ omariẹ sọ o re gbe wuhrẹ haro. Nọ ohwo o te bi kpohọ isukulu ikpehru re ọ ruẹse jọ ohwo ologbo jọ evaọ akpọ nana, o rẹ sae jọ bẹbẹ re o wo uvẹ nọ o re ro ru iruo odibọgba oke-kpobi.—Se 1 Ahwo Kọrint 7:23.

13. Oghẹrẹ isukulu vẹ o rẹ mai kẹ idibo Jihova erere?

¹³ Pọl ọ kẹ Ileleikristi obọ Kọlọsi unuovẹvẹ nọ: “Wha yọrọ oma re ohwo ọvo ọ siọ eriariẹ ifofe gbe ẹghẹ rai ba ẹ rọ viẹ owhai họ, enọ erọ uwuhrẹ ahwo akpọ avọ izi akpọ na, e nọ e rọ e rọ Kristi hi.” (Kọl. 2:8) Egbaeriariẹ akpọ na a be wha “eriariẹ ifofe gbe ẹghẹ rai” haro evaọ akpọ na soso. Otu buobu nọ o nwrotọ no isukulu ikpehru ze a wo onaa eware-iruo nọ a sai ro yeri uzuazọ ikẹdẹ kẹdẹ hẹ, keme ebe ọvo a be mae jọ obei se. Wo ohẹriẹ, idibo Jihova a rẹ salọ oghẹrẹ ewuhrẹ nọ o re fi obọ họ kẹ ai wo eriariẹ gbe onaa nọ a sai ro yeri umutho uzuazọ nọ o rẹ kẹ ai uvẹ ruabọhọ egagọ Ọghẹnẹ. A bi ru lele ohrẹ nọ Pọl ọ kẹ Timoti, inọ: “Erere ologbo ọ ghinẹ rọ kẹ ohwo nọ o bi lele Ọghẹnẹ otẹrọnọ utho oware nọ o woi o rẹ dae ẹro: rekọ otẹrọnọ ma wo emuore gbe emuẹgọ jọ enana e da omai ẹro.” (1 Tim. 6:6, 8) Ukpenọ Ileleikristi a rẹ dhogbo epanọ a re ro wo obe-erae orọ isukulu ikpehru gbe okpodẹ nọ u re lele ae, a be tẹrovi epanọ a re ro wo “obe ujiro,” koyehọ ahwo nọ a re fi obọ họ kẹ kurẹriẹ ẹkwoma iruo usiuwoma ota rai.—Se 2 Ahwo Kọrint 3:1-3.

14. Wọhọ epanọ o rrọ obe Ahwo Filipai 3:8, ẹvẹ Pọl o rri uvẹ-ọghọ nọ ọ be rọ gbodibo kẹ Ọghẹnẹ gbe Kristi?

¹⁴ Muẹrohọ oghẹrẹ uzuazọ nọ Pọl o yeri. Ọgba uwuhrẹ izi ahwo Ju nọ a re se Gamaliẹl o wuhrẹ i rie. Uwuhrẹ yena o wọhọ isukulu ikpehru nẹnẹ. Rekọ ẹvẹ Pọl o rri onana nọ ọ rehọ iẹe wawo uvẹ-ọghọ nọ ọ be rọ gbodibo kẹ Ọghẹnẹ gbe Kristi? O kere nọ: “Me roro eware kpobi gbe odẹ-oware ovo ho, keme ute mẹ o [mae rrọ] epanọ mẹ [rẹ rọ] riẹ Kristi Jesu Ọnowo mẹ.” O fibae nọ: “Fiki riẹ mẹ ruẹ uye ku eware kpobi fiẹ, me te kele ai wọhọ eware uzuahọ, re mẹ ruẹse wo erere Kristi.” (Fil. 3:8) Nọ a te bi rri oware na enẹ, u re fi obọ họ kẹ izoge Ileleikristi gbe eyewọ nọ e be dhozọ Ọghẹnẹ salọ onọ u fo evaọ ẹme isukulu. (Rri iwoho na.)

15, 16. Isukulu jọ vẹ ma wo evaọ ukoko Jihova, kọ eme a be jọ isukulu nana tẹrovi?

¹⁵ Ẹvẹ okegbe isukulu ikpehru buobu ọ rrọ nẹnẹ? O rrọ oria nọ ozighi o re no ho fiki esuo-ohrowo gbe ohọre omoma. (Ẹf. 2:2) Wo ohẹriẹ, Jihova o bi wuhrẹ omai evaọ ukoko riẹ nọ udhedhẹ o da fia, yọ ewuhrẹ nọ o kpehru te ọnana ọ rrọ họ. Mai kpobi ma bi wo erere no Isukulu Odibọgba Esuo-Ọghẹnẹ ze. U te no ere no, isukulu obọdẹ efa e riẹ kẹ inievo-emezae nọ i ri wo eyae he nọ e rrọ ekobaro (Isukulu Ebaibol Rọkẹ Inievo-Emezae nọ E re Rọo Ho) gbe ezae-avọ-eyae nọ e rrọ ekobaro (Isukulu Ebaibol Rọkẹ Ezae Ileleikristi avọ Eyae Rai). Oghẹrẹ isukulu itienana i re fi obọ họ kẹ omai yoẹme kẹ Olori mai nọ ọ rrọ obọ odhiwu, Jihova.

¹⁶ Ma rẹ sae jọ obe na, Watch Tower Publications Index hayo Watchtower Library nọ a ru fihọ CD-ROM kiẹ gwọlọ efe ọghaghae ọrọ iwuhrẹ Ọghẹnẹ. Iwuhrẹ nana kpobi e be tẹrovi epanọ ma rẹ rọ gọ Jihova ziezi. I bi wuhrẹ omai epanọ ma sai ro fi obọ họ kẹ amọfa ruẹrẹ usu rai họ kugbe Ọghẹnẹ. (2 Kọr. 5:20) Ahwo nana a vẹ te jẹ riẹ epanọ a re ro wuhrẹ amọfa re.—2 Tim. 2:2.

17. Erere vẹ ohwo o re wo nọ ọ tẹ salọ isukulu nọ e mai kpehru na?

¹⁷ Evaọ ọtadhesẹ Jesu ọrọ erigbo nọ a kẹ etalẹnte na, a jiri erigbo ivẹ nọ e riẹ ru na, oware nọ a ru o wha evawere se ae gbe olori rai je ru nọ olori na ọ rọ kẹ ai iruo efa ro dhesẹ nọ ọ jẹ rae rehọ. (Se Matiu 25:21, 23.) Ohwo ọ tẹ salọ isukulu nọ e mai kpehru na nẹnẹ o re wo oghọghọ gbe eghale. Wọhọ oriruo, oniọvo mai jọ nọ a re se Michael ọ riobe ga te epanọ iticha riẹ a ro sei ẹgwa re a ta kpahe isukulu ikpehru nọ ọ te nya evaọ obaro. Rekọ u gbe rai unu gaga nọ Michael ọ ta nọ ọ gwọlọ wuhrẹ iruo-abọ nọ i re fi obọ họ kẹe rẹrote omariẹ evaọ iruo ọkobaro. Kọ o rri nọ oware jọ u vru mi ei? Michael ọ ta nọ: “Eware nọ me wuhrẹ evaọ isukulu ọkobaro gbe enẹna nọ mẹ rrọ ọkpako ukoko no na, a rẹ ruẹ obọ rai hi. Uvẹ-ọghọ gbe eghale nọ mẹ be reawere rai i vi okposa kpobi nọ a hae te hwa omẹ evaọ iruo jọ kpekufiẹ. Eva e be were omẹ gaga nọ me le isukulu ikpehru hu.”

18. Fikieme whọ rọ salọ isukulu nọ e mai kpehru na?

¹⁸ Isukulu nọ e mai kpehru na i bi wuhrẹ omai oreva Ọghẹnẹ je bi fi obọ họ kẹ omai gbodibo kẹ Jihova. I bi fi obọ họ kẹ omai rẹro okenọ a ti ro ‘si omai no igbo egbogbo nọ ma ti ro wo ufuoma oruaro emọ Ọghẹnẹ.’ (Rom 8:21) Mae tubẹ rro na, i bi wuhrẹ omai edhere nọ ọ mai woma nọ ma re ro dhesẹ nọ ma gine you Olori mai nọ ọ rrọ obọ odhiwu, Jihova Ọghẹnẹ.—Ọny. 21:5.