Uzou Avọ 6

Epanọ A rẹ rọ Salọ Emamọ Eware-Ẹkeriotọ

‘Ru eware kpobi rọ kẹ Ọghẹnẹ oruaro.’—1 AHWO KỌRINT 10:31.

 1, 2. Iroro vẹ ma rẹ jẹ kpahe eware-ẹkeriotọ?

DAE rehọ iẹe nọ whọ gwọlọ re ubi-ure jọ nọ o ware ziezi, rekọ who te muẹrohọ nọ abọ riẹ jọ o gbo no. Eme who re ru? U te j’owhẹ, whọ sae re oma ubi-ure na so-so, kugbe abọ nọ o gbo no na dede; whọ sai gbolo oma ubi-ure na so-so kufiẹ; hayo whọ sae biẹ abọ riẹ nọ o gbo no na kufiẹ re whọ re abọ nọ o woma na. Ovẹ who ti ru?

² Evaọ oghẹrẹ jọ, eware-ẹkeriotọ e wọhọ ubi-ure yena. Evaọ ẹsejọ, whọ rẹ gwọlọ keria wo omaweromẹ, rekọ whọ vẹ ruẹ inọ eware-ẹkeriotọ buobu nẹnẹ i fo kẹ eg’Ọghẹnẹ hẹ, e wọhọ ubi-ure ugbogbo. Nọ o rrọ ere na, eme who re ru? O rẹ were ahwo jọ re a jẹ eware iyoma kpobi nọ a nyaku evaọ eware-ẹkeriotọ rehọ. Amọfa a rẹ sae whaha oghẹrẹ eware-ẹkeriotọ kpobi re a siọ oware uyoma ba ẹruẹ. Rọ kẹ ahwo jọ, a rẹ reawere eware-ẹkeriotọ ẹsejọ rekọ a vẹ yọrọ oma gaga re a ruẹ inọ a whaha enọ i woma ha. Kọ ovẹ whọ te salọ re whọ sae daji uyoyou Ọghẹnẹ?

 3. Eme ma te ta ẹme kpahe obọnana?

³ Ahwo buobu a rẹ salọ orọ avesa na. Ma riẹ nọ eware-ẹkeriotọ jọ i wuzou, rekọ ma gwọlọ whaha enọ i fo kẹ Ileleikristi hi. Fikiere, u fo re ma ta ẹme kpahe epanọ ma rẹ rọ riẹ eware-ẹkeriotọ nọ i kiehọ gbe enọ i kiehọ họ. Orọ ọsosuọ, joma ta ẹme kpahe epanọ eware-ẹkeriotọ nọ ma salọ e sai ro kpomahọ egagọ mai kẹ Jihova.

‘RU EWARE KPOBI RỌ KẸ ỌGHẸNẸ ORUARO’

 4. Ẹvẹ omaromudhe mai u re kpomahọ oghẹrẹ eware-ẹkeriotọ nọ ma rẹ salọ?

⁴ Okejọ nọ u kpemu, Osẹri Jihova jọ nọ ọ kpako no nọ ọ họ-ame evaọ 1946 ọ ta nọ: “Mẹ gba riẹ mu re mẹ hae jariẹ evaọ oke ovuẹ ame-ọhọ kpobi nọ a be kẹ jẹ gaviezọ ziezi wọhọ ẹsenọ mẹ rrọ ohwo nọ ọ be te họ ame ẹdẹ yena.” Fikieme? Ọ ta haro nọ, “Omaromudhe mẹ nọ me bi roro kpahe ẹsikpobi u bi fi obọ họ kẹ omẹ gaga nọ mẹ be rọ yọrọ ẹrọwọ mẹ.” Ababọ avro, whọ rọwo kugbe eme yena re. Whọ tẹ be kareghẹhọ omobọ ra inọ whọ ya eyaa kẹ Jihova nọ whọ te rehọ uzuazọ ra kpobi gọe u re fi obọ họ kẹ owhẹ thihakọ. (Ọtausiuwoma Na 5:4; Ahwo Hibru 10:7) Evaọ uzẹme, omaromudhe ra nọ who re roro kpahe orọnikọ eriwo ra kpahe odibọgba na ọvo u ti kpomahọ họ, rekọ te abọfa kpobi ọrọ uzuazọ—kugbe eware-ẹkeriotọ. Pọl ukọ na o dhesẹ oyena via vevẹ nọ o kere se Ileleikristi erọ edẹ riẹ nọ: ‘Eva emu ọriọ hayo eva edada hayo eva oware kpobi nọ wha re ruo, wha ru ai kpobi rọ kẹ Ọghẹnẹ oruaro.’—1 Ahwo Kọrint 10:31.

 5. Ẹvẹ Iruo-Izerẹ 22:18-20 u ro fi obọ họ kẹ omai ruẹ unuovẹvẹ nọ o rrọ Ahwo Rom 12:1?

⁵ Oware kpobi nọ who bi ru evaọ uzuazọ u re kpomahọ egagọ ra kẹ Jihova. Evaọ ileta riẹ se ahwo Rom, Pọl ọ rehọ eme nọ i w’ẹgba ro ru uzẹme nana vẹ kẹ ibe Ileleikristi riẹ. Ọ tudu họ ae awọ inọ: “Wha ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ, nọ e rọ egagọ Ẹzi rai.” (Ahwo Rom 12:1) Iroro ra, ubiudu ra, gbe ẹgba ra, enana yọ abọjọ erọ oma ra. Enana kpobi whọ rẹ rọ gọ Ọghẹnẹ. (Mak 12:30) Pọl o dhesẹ egagọ itieye na nọ i re no udu kpobi ze na wọhọ iwẹ. Oghẹrẹ nọ Pọl ọ rehọ ubiẹme na “iwẹ” ruiruo evaọ etenẹ na u wo unuovẹvẹ jọ nọ u siomano. Evaọ otọ uzi Mosis, Ọghẹnẹ ọ rẹ jẹ idhe hayo iwẹ nọ i wo afuẹwẹ rehọ họ. (Iruo-Izerẹ 22:18-20) Epọvo na re, Oleleikristi ọ tẹ rehọ edhere jọ gbe egagọ riẹ ku, Ọghẹnẹ ọ rẹ jẹ iruo riẹ rehọ họ. Rekọ, ẹvẹ oyena o sae rọ via?

 6, 7. Ẹvẹ Oleleikristi ọ sai ro gbe oma riẹ ku, kọ eme o rẹ sai noi ze?

⁶ Pọl ọ tudu họ Ileleikristi nọ e jọ Rom awọ inọ: “Wha rọwo kẹ oma rai re ejọ ekuakua iruo umuomu . . . hu.” Pọl ọ tẹ jẹ vuẹ ai inọ a “kpe iruẹru uwo” no oma rai. (Ahwo Rom 6:12-14; 8:13) Ọ jọ ubrobọ emuhọ ileta riẹ na kẹ ae iriruo jọ erọ “iruẹru uwo.” Kpahe ahwo-akpọ nọ a gba ha, ma se nọ: ‘Enu rai ọ vọ avọ eka-ela.’ ‘Onya ahwo okpe a je siawọ.’ ‘Ozọ odhẹ Ọghẹnẹ o rọ ẹro rai gbe he.’ (Ahwo Rom 3:13-18) Oleleikristi ọ rẹ sai gbe oma riẹ ku otẹrọnọ ọ be rọ “ekuakua,” hayo abọ oma riẹ jọ ru eware iyoma itieye na. Wọhọ oriruo, otẹrọnọ Oleleikristi jọ nẹnẹ o bi keke aro fihọ rri eware nọ i fo ho, wọhọ iwoho ẹbẹba hayo erọ ozighi, yọ ọ be rọ ‘ẹro riẹ ru iruo umuomu,’ jẹ be rọ ere gbe oma riẹ soso ku. Egagọ riẹ kẹ Ọghẹnẹ e rẹ wọhọ idhe nọ e gbẹ fo ho, yọ Ọghẹnẹ ọ rẹ jẹ ae rehọ họ. (Iziewariẹ 15:21; 1 Pita 1:14-16; 2 Pita 3:11) Enẹ o rẹ via kẹ ohwo nọ o duomahọ eware-ẹkeriotọ nọ i fo ho.

⁷ U re vevẹ, Oleleikristi ọ gbẹ riẹ eware-ẹkeriotọ salọ họ, Ọghẹnẹ ọ rẹ sae siọ egagọ riẹ. Fikiere, ma gwọlọ salọ eware-ẹkeriotọ nọ e rẹ lẹliẹ Ọghẹnẹ jẹ idhe mai rehọ, orọnikọ onọ o rẹ lẹliẹ idhe mai wo afuẹwẹ hẹ. Obọnana, joma ta ẹme kpahe eware-ẹkeriotọ nọ i woma gbe enọ i woma ha.

“MU KPAHE OWARE NỌ UYOMA”

 8, 9. (a) Abava vẹ a rẹ sae ghale eware-ẹkeriotọ fihọ? (b) Oghẹrẹ eware-ẹkeriotọ vẹ ma rẹ whaha, kọ fikieme?

⁸ A rẹ sae ghale eware-ẹkeriotọ kpohọ abava. Ojọ yọ eware-ẹkeriotọ nọ Ileleikristi a rẹ whaha riẹriẹriẹ; ofa kọ eware-ẹkeriotọ nọ Ileleikristi a rẹ sae jẹrehọ hayo nọ a rẹ jẹrehọ họ. Joma kake ta ẹme kpahe ọrọ ọsosuọ na—eware-ẹkeriotọ nọ Ileleikristi e rẹ whaha.

⁹ Wọhọ epanọ ma ta no vẹre evaọ Uzou ọsosuọ obe nana, a rẹ jọ eware-ẹkeriotọ jọ dhesẹ eware nọ Ebaibol i mukpahe. Wọhọ oriruo, roro kpahe Evie evuẹ Itanẹte, ile, gbe ighe etehe-ughe nọ a rẹ jọ lahiẹ ahwo hayo nọ a rẹ jọ dhesẹ iruẹru imizi, hayo iwoho ẹbẹba, hayo nọ e be tudu họ iruẹru ọfariẹ-ogbe gbe eware iyoma efa. Nọ o rọnọ eware-ẹkeriotọ etọtọ itieye na i re dhesẹ eware nọ Ebaibol e ghọ wọhọ inọ i kiehọ na, uvi Ileleikristi a rẹ whaha ae. (Iruẹru Ikọ Na 15:28, 29; 1 Ahwo Kọrint 6:9, 10; Eviavia 21:8) Whọ tẹ be whaha ikpehre eware-ẹkeriotọ itieye na, yọ who bi dhesẹ kẹ Jihova inọ who gine “mu kpahe oware nọ uyoma” je bi “si oma no umuomu.” Ere who re ro dhesẹ inọ who wo “emamọ iroro avọ uvi orọwọ.”—Ahwo Rom 12:9; Olezi 34:14; 1 Timoti 1:5.

10. Didi oghẹrẹ iroro kpahe eware-ẹkeriotọ e vọ avọ enwoma, kọ fikieme?

¹⁰ Rekọ ahwo jọ a re roro nọ a tẹ maki rri iwoho nọ a jọ dhesẹ uruemu ọfariẹ-ogbe o rẹ wha enwoma se ai hi. A rẹ jọ udu rai roro nọ, ‘Mẹ sai rri rie evaọ etehe-ughe, rekọ mẹ sai ru eware itieye vievie he.’ Iroro itieye na e rẹ viẹ ohwo họ, e tẹ jẹ vọ avọ enwoma. (Jerimaya 17:9) Otẹrọnọ o rẹ were omai re ma rri eware nọ Jihova o mukpahe, kọ ma sae ginẹ ta nọ ma ‘mukpahe oware nọ u yoma’? Eware iyoma nọ ma re rri je se kpahe ẹsikpobi o rẹ lẹliẹ eware iyoma itieye na reria omai oma. (Olezi 119:70; 1 Timoti 4:1, 2) Onana o rẹ sai kpomahọ uruemu mai hayo oghẹrẹ nọ ma re rri ekpehre uruemu amọfa.

11. Rọ kpahe eware-ẹkeriotọ, ẹvẹ Ahwo Galesha 6:7 u ro rugba no?

¹¹ Onana o ginẹ via no. Ileleikristi jọ a gbe ọfariẹ no fiki ekpehre ighe nọ a jẹ hai rri. Nọ oware uyoma o via kẹ ae no, ẹsiẹ a vuhumu inọ “koware koware nọ ohwo ọ kọ e, oye o re vuẹ.” (Ahwo Galesha 6:7) Rekọ whọ sae whaha iyẹrẹ edada itieye na. Otẹrọnọ whọ kọ eware nọ i woma họ iroro ra, who ti yeri uzuazọ evawere.—Rri ẹkpẹti na “Oghẹrẹ Eware-Ẹkeriotọ Vẹ Mẹ rẹ Salọ?” evaọ ẹwẹ-obe avọ 67.

IRORO OBỌ RA NỌ WHỌ RẸ REHỌ EHRI-IZI EBAIBOL JẸ

12. Ẹvẹ Ahwo Galesha 6:5 u ro wobọ kpahe eware-ẹkeriotọ, kọ diẹse ma jẹ sae ruẹ ọkpọvio nọ ma rẹ nya lele nọ ma tẹ be jiroro omobọ mai?

¹² Joma ta ẹme kpahe abọ avivẹ na—eware-ẹkeriotọ nọ i wo iruẹru nọ Ebaibol na e nwani mukpahe hayo jẹrehọ họ. Nọ ma tẹ be salọ evaọ eware-ẹkeriotọ itieye, Oleleikristi kpobi ọ rẹ jiroro kẹ omobọ riẹ kpahe onọ ọ ruẹ nọ u kiehọ. (Ahwo Galesha 6:5) Rekọ, nọ ma tẹ be jiroro nana, ma wo ọkpọvio nọ ma re lele. Ebaibol na i wo ehri-izi nọ i re fi obọ họ kẹ omai riẹ idhere Jihova. Nọ ma tẹ nya lele ehri-izi itieye, ma te riẹ oware nọ ‘oreva Ọghẹnẹ o rrọ’ evaọ eware kpobi, kugbe eware-ẹkeriotọ nọ ma salọ.—Ahwo Ẹfẹsọs 5:17.

13. Eme ọ te wọ omai whaha eware-ẹkeriotọ nọ e rẹ sai ru eva dha Jihova?

¹³ U re vevẹ inọ, orọnikọ Ileleikristi kpobi a wo oghẹrẹ otoriẹ hayo orimuo ọvo na ha. (Ahwo Filipai 1:9) Ofariẹ, Ileleikristi a riẹ inọ rọ kpahe eware-ẹkeriotọ, duohwo duọ onọ o rẹ were iẹe. Fikiere, ma re rẹro vievie he inọ Ileleikristi kpobi a te jẹ oghẹrẹ iroro evona. Nọ o make rrọ ere na, epanọ ma kẹ ehri-izi Ebaibol na uvẹ te re e kpọ iroro gbe udu mai, ere o te jọ omai oja te re ma whaha eware-ẹkeriotọ nọ e rẹ sai ru eva dha Jihova.—Olezi 119:11, 129; 1 Pita 2:16.

14. (a) Eme ma re roro kpahe nọ ma tẹ be salọ eware-ẹkeriotọ? (b) Ẹvẹ ma sae rọ rehọ isiuru Uvie na karo evaọ uzuazọ mai?

¹⁴ Nọ whọ tẹ be salọ eware-ẹkeriotọ, oware ofa jọ o riẹ nọ who re roro kpahe: oke ra. Nọ oghẹrẹ eware-ẹkeriotọ nọ whọ salọ i re dhesẹ eware nọ e mae were owhẹ na, ere oke nọ whọ be raha fihọ ai i re dhesẹ eware nọ whọ rọ karo. Rọ kẹ Ileleikristi, eware abọ-ẹzi e mae rrọ ae oja. (Matiu 6:33) Kọ eme whọ rẹ sai ru re whọ ruẹ nọ eware abọ-ẹzi whọ gbẹ rọ karo evaọ uzuazọ ra? Pọl ukọ na ọ ta nọ: “Wha fiẹrohọ otọ enẹna eva onya rai, o jọ wọhọ igheghẹ hẹ rekọ iwoareghẹ, wha raha oke he.” (Ahwo Ẹfẹsọs 5:15, 16) Evaọ uzẹme, ma te fi ugogo oke jọ họ rọkẹ eware-ẹkeriotọ, u ti fi obọ họ kẹ owhẹ wo oke kẹ ‘eware nọ e mae r’oja’—eware nọ i re fi obọ họ kẹ owhẹ wo ẹnyaharo abọ-ẹzi.—Ahwo Filipai 1:10.

15. Fikieme ma jẹ kẹnoma no eware-ẹkeriotọ nọ ma viẹro ku inọ e thọ?

¹⁵ O tẹ jẹ rrọ oware areghẹ re ma kẹnoma no eware-ẹkeriotọ nọ ma viẹro ku inọ e thọ. Eme onana u dhesẹ? Wariẹ roro kpahe oriruo ubi-ure nọ ma jọ emuhọ uzoẹme nana ta ẹme te na. Re whọ siọ abọ nọ o gbo no ba ẹriọ, orọnikọ omoria nọ u gbo na ọvo whọ rẹ biẹ kufiẹ hẹ rekọ whọ rẹ biẹ amabọ jọ nọ o woma lele ei. Epọvo na re, o rrọ oware areghẹ re ma kẹnoma no eware-ẹkeriotọ nọ ma viẹro ku inọ e thọ. Orọnikọ eware-ẹkeriotọ nọ e wọso ehri-izi Ebaibol dẹẹ ọvo Oleleikristi nọ o wo areghẹ ọ rẹ whaha ha, rekọ te oghẹrẹ enọ i fo ho hayo enọ i wo amabọ jọ erọ eware nọ e rẹ sae raha usu mai kugbe Jihova. (Itẹ 4:25-27) Ithubro Ẹme Ọghẹnẹ nọ whọ rẹ nya lele ẹsikpobi u ti fi obọ họ kẹ owhẹ ru ere.

‘OWARE KPOBI NỌ O FO’

16. (a) Ẹvẹ ma sai ro dhesẹ nọ ma wo eriwo Jihova kpahe eware nọ e fo? (b) Ẹvẹ efihiruo ehri-izi Ebaibol o sai ro zihe ruọ ẹkoma ra?

¹⁶ Nọ Ileleikristi uzẹme a tẹ be salọ eware-ẹkeriotọ, a rẹ kaki roro kpahe oghẹrẹ nọ Jihova o rri rie. Ebaibol na i dhesẹ eriwo Jihova gbe itee riẹ via kẹ ahwo-akpọ. Wọhọ oriruo, Solomọn Ovie na o kere eware buobu nọ Jihova o mukpahe, wọhọ “ẹro oyoma, ọrue-ọta, gbe ahwo o kpe ọhaha, udu nọ o rẹ jẹ iroro iyoma, owọ nọ o re bruoma i ru umuomu.” (Itẹ 6:16-19) Ẹvẹ eriwo Jihova o re kpomahọ eriwo ra? Ọso-ilezi na o kere nọ: “O whai enọ i you Jihova, wha mukpahe oware uyoma.” (Olezi 97:10, NW) U fo re oghẹrẹ eware-ẹkeriotọ nọ whọ rẹ salọ i dhesẹ nọ who gine mukpahe oware nọ Jihova o mukpahe. (Ahwo Galesha 5:19-21) Jọ o thọrọ owhẹ ẹro gbe he inọ oware nọ whọ jọ idhereno ru ọ rẹ mai dhesẹ oghẹrẹ ohwo nọ whọ ginẹ rrọ. (Olezi 11:4; 16:8) Fikiere, o tẹ ginẹ rrọ isiuru ra inọ whọ rẹ jọ kabọ kabọ uzuazọ ra raro kele eriwo Jihova kpahe eware nọ e fo, whọ te salọ eware nọ e rọwo kugbe ehri-izi Ebaibol ẹsikpobi. Ere oruo u ve ti zihe ruo ẹkoma ra.—2 Ahwo Kọrint 3:18.

17. Taure ma tẹ te salọ eware-ẹkeriotọ, enọ vẹ ma rẹ nọ oma mai?

¹⁷ Eme ọfa whọ rẹ sai ru rọ ruẹ nọ who ru oware nọ o rẹ were Jihova nọ whọ tẹ be salọ eware-ẹkeriotọ? Roro kpahe onọ nana, ‘Ẹvẹ onana u ti kpomahọ omẹ gbe edikihẹ mẹ kugbe Ọghẹnẹ?’ Wọhọ oriruo, taure who te ti ku ei họ inọ who re rri oghẹrẹ ividio jọ, nọ oma ra nọ, ‘Ẹvẹ eware nọ e rrọ ividio nana i ti kpomahọ iroro mẹ?’ Joma ta ẹme kpahe ehri-izi nọ i kiekpahe onana.

18, 19. (a) Ẹvẹ ehri-uzi nọ o rrọ Ahwo Filipai 4:8 na u re ro fi obọ họ kẹ omai riẹ sọ eware-ẹkeriotọ nọ ma salọ i kiehọ? (b) Ehri-izi efa vẹ e rẹ sai fi obọ họ k’owhẹ salọ emamọ eware-ẹkeriotọ? (Rri eme oruvẹ-obotọ na.)

¹⁸ Ma rẹ ruẹ ugogo ehri-uzi jọ evaọ Ahwo Filipai 4:8, nọ o ta nọ: ‘Oware kpobi nọ o rọ uzẹme, oware kpobi nọ u wo adhẹẹ, oware kpobi nọ u kiẹrẹe, oware kpobi nọ o fo, oware kpobi nọ orọ aruoriwo, otẹrọnọ ọ riẹruo jọ o rọ, otẹrọnọ oware jọ o rọ nọ u fo ajiri, wha kareghẹhọ eware nana.’ Orọnikọ Pọl ọ jẹ ta ẹme kpahe eware-ẹkeriotọ họ, rekọ iroro nọ e rrọ omai udu, enọ e rẹ tọ vi eware nọ e rẹ were Ọghẹnẹ. (Olezi 19:14) Rekọ, ehri-uzi nọ o rrọ eme ọ Pọl na o rẹ sai kie kpahe eware-ẹkeriotọ re. Evaọ oghẹrẹ vẹ?

¹⁹ Nọ oma ra nọ, ‘Kọ oghẹrẹ ighe ividio, erozaha etẹlivisiọno, ile, hayo oghẹrẹ eware-ẹkeriotọ efa nọ mẹ salọ e be lẹliẹ iroro mẹ vọ avọ “oware kpobi nọ o fo”?’ Wọhọ oriruo, nọ who te rri ividio jọ no, oghẹrẹ iwoho vẹ e be hae ziọ owhẹ iroro? E tẹ rrọ emamọ iwoho, enọ e rẹ kẹ omosasọ, koyehọ whọ riẹ eware-ẹkeriotọ salọ. Rekọ otẹrọnọ ividio nọ who rri e be lẹliẹ owhẹ roro kpahe eware nọ e fo ho, kiyọ ividio na i woma ha, e rẹ sae wha enwoma se owhẹ. (Matiu 12:33; Mak 7:20-23) Fikieme e jẹ sae wha enwoma se owhẹ? Eware nọ e fo ho nọ who re roro kpahe e rẹ lẹliẹ udu ra jọ awawa, lẹliẹ udu nọ whọ rehọ Ebaibol wuhrẹ no gbeku, jẹ sae raha usu ra kugbe Ọghẹnẹ. (Ahwo Ẹfẹsọs 5:5; 1 Timoti 1:5, 19) Nọ eware-ẹkeriotọ itieye e rẹ wha enwoma se owhẹ na, daoma whaha ae.a (Ahwo Rom 12:2) Jọ wọhọ ọso-ilezi na ọnọ ọ lẹ se Jihova nọ: “Si aro mẹ no eware ifofe iriwo.”—Olezi 119:37.

GWỌLỌ EWOMA AMỌFA

20, 21. Ẹvẹ 1 Ahwo Kọrint 10:23, 24 u ro wobọ kpahe ẹsalọ eware-ẹkeriotọ?

²⁰ Pọl ọ ta ẹme te ugogo ehri-uzi Ebaibol jọ nọ u fo nọ ma re roro kpahe nọ ma tẹ be jiroro omobọ mai. Ọ ta nọ: “Eware kpobi e rọ uzi, rekọ orọnọ eware kpobi e gbunu hu. Wha jọ ohwo kpobi ọ kake guọlọ ewoma ọrivẹ riẹ, re ọ tẹ guọlọ ewoma omobọ riẹ.” (1 Ahwo Kọrint 10:23, 24) Ẹvẹ ehri-uzi yena u ro kiekpahe ẹsalọ eware-ẹkeriotọ nọ i woma? U fo re whọ nọ oma ra nọ, ‘Ẹvẹ eware-ẹkeriotọ nọ mẹ salọ i ti kpomahọ amọfa?’

²¹ Udu ra o sae kẹ owhẹ uvẹ reawere oghẹrẹ eware-ẹkeriotọ jọ nọ who rri nọ o “rọ uzi,” hayo kiehọ. Rekọ, who te muẹrohọ nọ eware-ẹkeriotọ nọ whọ salọ e be were ibe Ileleikristi ra ha, enọ eware itieye na i re kpokpo iroro rai, whọ sae jiroro na re whọ se iẹe ba. Fikieme? Keme whọ gwọlọ ‘ru inievo ra thọ’ họ ẹkwoma eru nọ who re ru ei bẹbẹ kẹ ae nọ a gbẹ sae yọrọ ẹgbakiete rai kẹ Ọghẹnẹ hẹ, keme who te bi ru ere yọ who bi ‘ru Kristi thọ’ re. Wo uthubro nana họ iroro: “Whọ jọ utho ezoruẹ kẹ amọfa ha.” (1 Ahwo Kọrint 8:12; 10:32, NW) Uvi Ileleikristi a rẹ jẹ uthubro Pọl nọ o vọ avọ ororokẹ gbe areghẹ na rehọ ẹkwoma ẹwhaha eware-ẹkeriotọ nọ e rẹ sae jọ “uzi” rekọ nọ e rẹ kẹ ọbọga ha.—Ahwo Rom 14:1; 15:1.

22. Fikieme Ileleikristi a jẹ kuvẹ kẹ eriwo amọfa nọ ọ hẹrioma no ọrai?

²² Rekọ, abọfa jọ ọ riẹ nọ ma rẹ jọ gwọlọ ewoma amọfa. Oleleikristi nọ eware-ẹkeriotọ buobu e rẹ were he o re sikẹ hẹ inọ ahwo nọ a rrọ ukoko Ileleikristi na soso a rẹ nya lele eriwo omobọ riẹ kpahe eware-ẹkeriotọ nọ o rri nọ i kiehọ na. O te ru ere, kiyọ ọ wọhọ edraiva omoto nọ ọ rrọ edhere dhẹ nọ o bi sikẹ inọ edraiva efa nọ e be dhẹ edhere ọvona a rẹ dhẹ kpẹlẹ kpẹlẹ wọhọ epanọ ọyomariẹ ọ be dhẹ. Areghẹ ọ rrọ ikẹ-isio itieye he. Fiki uyoyou Oleleikristi, u fo re ohwo nọ eware-ẹkeriotọ buobu e rẹ were he o dhesẹ adhẹẹ kẹ ibe Ileleikristi riẹ nọ eware itieye e rẹ were thakpinọ e wọso ehri-izi Ebaibol ho. Evaọ ere oruo, yọ o bi dhesẹ inọ “o wo ororokẹ kẹ ahwo kpobi.”—Ahwo Filipai 4:5, NW; Ọtausiuwoma Na 7:16.

23. Ẹvẹ whọ sae rọ ruẹ inọ whọ salọ eware-ẹkeriotọ nọ i woma?

²³ Re who dhesẹ iẹe kpẹkpẹe, ẹvẹ whọ sae rọ ruẹ inọ whọ salọ eware-ẹkeriotọ nọ i woma? Whaha eware-ẹkeriotọ etọtọ kpobi nọ Ebaibol i mukpahe. Lele ehri-izi Ebaibol nọ e rẹ sai kiekpahe eware-ẹkeriotọ nọ a nwane jọ Ebaibol na fodẹ gbiae he. Whaha eware-ẹkeriotọ nọ i re gbe iroro ra ku, re whọ jẹ whaha eware-ẹkeriotọ nọ e rẹ sai kpokpo iroro amọfa, maero kọ iroro ibe Ileleikristi ra. Jọ ọtamuo ra nọ whọ rọ gwọlọ ru ere o wha orro se Ọghẹnẹ, re o jẹ lẹliẹ owhẹ avọ uviuwou ra daji uyoyou riẹ.

[Oruvẹ-obotọ]

[Etehe/Uwoho nọ e rrọ ẹwẹ-obe avọ 67]

OGHẸRẸ EWARE-ẸKERIOTỌ VẸ MẸ RẸ SALỌ?

Ehri-Uzi: “Wha mu kpahe oware nọ uyoma; wha dhẹ gbalọ oware uwoma.”—Ahwo Rom 12:9.

Kọ eva e te were Ọghẹnẹ otẹrọnọ . . .

▪ ile nọ mẹ be gaviezọ kẹ i bi ru ei bẹbẹ kẹ omẹ re me roro kpahe eware nọ e fo?—1 Ahwo Kọrint 6:9, 10.

▪ mẹ be raro kele ekpehre eme gbe uruemu ahwo nọ mẹ ruẹ evaọ ifimu nọ me rri?—Luk 6:40.

▪ mẹ be za erozaha ividio nọ o gwọlọ inọ mẹ rẹ jọ ohwo ozighi hayo ohwo ọfariẹ evaọ arozaha na?—Olezi 11:5, 7.

▪ eware-ẹkeriotọ nọ mẹ be ta kẹ amọfa inọ i woma ha, me bi dede ai rehọ? —Ahwo Rom 2:21.

[Etehe nọ e rrọ ẹwẹ-obe avọ 70]

Taure Oleleikristi ọ tẹ te salọ oghẹrẹ eware-ẹkeriotọ jọ, ọ rẹ nọ oma riẹ nọ

▪ Ẹvẹ u ti kpomahọ usu mẹ kugbe Ọghẹnẹ?

▪ Ẹvẹ u ti kpomahọ omẹ?

▪ Ẹvẹ u ti kpomahọ amọfa?

[Uwoho nọ e rrọ ẹwẹ-obe avọ 68]

Ẹnya lele ehri-izi Ebaibol nọ ma tẹ be salọ eware-ẹkeriotọ o rẹ thọ omai no enwoma abọ-ẹzi