Enọ Ahwo nọ A s’Ebe

Ahwo Kọlọsi 1:16 o ta kpahe Ọmọ Ọghẹnẹ nọ “fiki riẹ a rọ ma eware na kpobi jẹ rọ kẹe.” Evaọ edhere vẹ a rọ ma eware kpobi ‘rọkẹ’ Ọmọ Ọghẹnẹ, Jesu?

Jihova ọ rehọ Ọmọ-ọvo riẹ ro ruiruo wọhọ osu iruo evaọ ẹma eware efa kpobi, koyehọ, eware kpobi u te no Jesu omariẹ no. (Itẹ 8:27-30; Jọn 1:3) Wọhọ epanọ o rẹ jọ, Ọmọ na o re wo omawere no iruo enana ze, yọ evaọ edhere ọnana a rọ ma ae “rọ kẹe.”

Ma riẹ nọ eyewọ ahwo-akpọ a re rẹro ewo omawere no oma emọ rai ze—te emezae te emetẹ rai—yọ a re ru ere ẹsibuobu. Fikiere, itẹ Ebaibol na ọ ta kpahe “ọmọ nọ [ọsẹ riẹ] o re wo omawere kpahe.” (Itẹ 3:12, NW; 29:17) Epọvo na re, Jihova Ọghẹnẹ o wo omawere no oma Izrẹl ze evaọ okenọ ahwo riẹ a te kru ẹrọwọ. (Olezi 44:3; 119:108; 147:11) O bi je wo oghọghọ no edikihẹ ga ahwo omarokpotọ riẹ ze rite edẹ mai na.—Itẹ 12:22; Ahwo Hibru 10:38.

Fikiere, u kiehọ re Ọghẹnẹ o ru re ibe-oruiruo riẹ, Jesu, o wo omawere no iruẹru riẹ ze. Evaọ uzẹme, Itẹ 8:31 o ta nọ Ọmọ na ọ “jẹ hae ghọghọ kẹ ẹria akpọ na jẹ were eva kẹ emọ ahwo.” Evaọ edhere ọnana Ahwo Kọlọsi 1:16 o rọ ta nọ: “Fiki riẹ a rọ ma eware na kpobi jẹ rọ kẹe.”