Ẹgọ Avọ Omurokpotọ Kugbe Ukoko Jihova

“Whọ rẹ rehọ oma kpotọ kẹ enọ e rehọ oma kpotọ.”—2 SAMUẸLE 22:26.

 1, 2. Eme họ iriruo omurokpotọ jọ nọ mai kpobi a rẹ sae ruẹ evaọ ukoko na?

ASO ẹdẹjọ ọkpako-ukoko jọ ọ tẹ be ruẹrẹ ẹme họ kẹ ewuhrẹ Ileleikristi. Ọ gwọlọ nọ o re s’omahọ; ukpoye, ọ tẹ ruabọ họ iruo na, be gwọlọ iriruo Ikereakere gbe etadhesẹ nọ e rẹ nyate udu jẹ tuduhọ uthuru na. Evaọ aso ewuhrẹ na, esẹ gbe ini ivẹ jọ a gwọlọ omasehọ owọwọ evaọ obọ uwou; ukpoye, a tẹ rehọ odiri ruẹrẹ emọ rai họ re a kpohọ ewuhrẹ na. Nọ ewuhrẹ na o kuhọ no, Ileleikristi jọ a tẹ jẹ t’ẹme kpahe ẹme nọ ọkpako na o ru na. Oma o jẹ wọ oniọvo-ọmọtẹ jọ re ọ ta inọ oniọvo nọ o ru ẹme na o ru rie eva dha ẹdẹjọ; ukpoye, ọ tẹ rehọ ọwhọ jiri ẹme jọ nọ oniọvo na o duobọ te. Kọ whọ ruẹ ugogo oware ovo nọ o nya ahwo enana kpobi duwu na?

² Oware yena họ omurokpotọ. Ọkpako na ọ rehọ oma kpotọ gbodibo kẹ uthuru Ọghẹnẹ; esẹ gbe ini na a rehọ oma kpotọ kpohọ iwuhrẹ ukoko na; oniọvo ọmọtẹ na ọ rehọ oma kpotọ tha ekpako na uke. (Ahwo Hibru 10:24, 25; 13:17; 1 Pita 5:2) Ẹhẹ, evaọ kabọ kabọ uzuazọ, ma be ruẹ ahwo Ọghẹnẹ nọ a tamu no nọ a rẹ rehọ omurokpotọ gọ kugbe ukoko Jihova.

 3. Fikieme u je wuzou tere inọ ma kru omurokpotọ mai kẹ ukoko otọakpọ Jihova?

³ Nọ Jihova o bi rri otọ ruẹ akpọ ogbekuo mai nana, omurokpotọ nọ ọ be ruẹ o rẹ kakao. (Maeka 7:2) Ẹvẹ udu riẹ o rẹ ghọghọ te nọ ọ tẹ ruẹ omurokpotọ ahwo riẹ! Ẹhẹ, omurokpotọ ra o rẹ were iẹe. Ghele na, o rẹ dha Setan eva, ọkparesuọ anwae na, u ve je dhesẹ iẹe fihọ ọtọrue. (Itẹ 27:11; Jọn 8:44) Rẹro nọ Setan ọ te gwọlọ raha omurokpotọ ra kẹ Jihova jẹ rọ kẹ ukoko otọakpọ Riẹ. Joma roro kpahe idhere jọ nọ Setan o bi ro ru onana. Ma vẹ sae rọ ere ruẹ epanọ ma rẹ rọ roma kpotọ viere rite urere.—2 Ahwo Kọrint 2:11.

Ẹrotọvi Sebaẹgba-Ohwo U re Whrehe Omurokpotọ

 4. (a) Fikieme o jẹ rọ lọlọhọ re ma rehọ ẹro oyoma rri enọ a kẹ udu na? (b) Ẹvẹ Kora o ro dhesẹ ababọ omurokpotọ kẹ ukoko Jihova?

⁴ Nọ oniọvo jọ o te wo ọkwa iruo, kẹsiẹe iruthọ riẹ e rẹ mae via. Ẹvẹ o lọhọ te re ma muẹrohọ ‘orara nọ o rọ oniọvo mai ẹro yọ ma bi gbabọ kẹ ubro-ure nọ o rọ ẹro obọ mai’! (Matiu 7:1-5) Ma tẹ be tẹrovi iruthọ o rẹ wha ababọ omurokpotọ ze. Evaọ ọtadhesẹ, roro ohẹriẹ nọ o rọ udevie Kora avọ Devidi. Ewha-iruo buobu e jọ Kora uzou, yọ ẹsejọhọ ọ rehọ omurokpotọ gọ evaọ ikpe buobu no, rekọ o te mu uke họ efuo. O te muọ udu-esuo Mosis avọ Erọn họ ẹwọso, enọ a gbẹ rọ emọ-iruọmọ ọsosuọ. Dede nọ Mosis ọ jọ ọnọ ọ mai wou, o sae jọ nọ Kora ọ jẹ rehọ ẹro oyoma rri riei. Ẹsejọhọ ọ jọ oma Mosis ruẹ iruthọ jọ. Rekọ iruthọ yena i ru ababọ omurokpotọ Kora kẹ ukoko Jihova fihọ oware ezi hi. A te kpei no udevie ukoko na.—Ikelakele 12:3; 16:11, 31-33.

 5. Fikieme o jẹ hae lọhọ kẹ Devidi re o veghe uzou kẹ Sọl?

⁵ Evaọ abọdekọ riẹ, Devidi ọ jẹ jọ otọ Sọl Ovie na gọ. Dede nọ ọ jọ emamọ ovie vẹre, Sọl o te ti yoma. Devidi ọ gwọlọ ẹrọwọ, ithihakọ, tubọ areghẹ dede re ọ zọ no obọ ohọre ihrieriọ Sọl. Ghele na, okenọ Devidi o wo uvẹ nọ o re ro rukele, ọ tẹ ta nọ ‘o kare iroro, no eriwo Jihova ze,’ re o ru oware nọ o thọ mukpahe ọnọ Jihova o ro mu.—1 Samuẹle 26:11.

 6. Ma tẹ make jọ oma ekpako na ruẹ oyẹlẹ gbe ẹthọthọ jọ, eme ma re ru vievie he?

⁶ Okenọ ahwo jọ nọ e be k’obaro evaọ udevie mai a te guẹdhọ thọ, t’ẹme avọ edo, hayo a dina dhesẹ ọriẹwẹ, kọ ma ti gu inoma kpahe ai, ma vẹ rọ ere wha ẹzi inoma iguo fihọ ukoko na? Kọ ma rẹ siọ iwuhrẹ Ileleikristi ba ro dhesẹ evedha mai? O rẹ j’ere vievie he! Wọhọ Devidi, ma rẹ kuvẹ kẹ iruthọ amọfa re i ru omai kare omurokpotọ kẹ Jihova gbe ukoko riẹ hẹ!—Olezi 119:165.

 7. Eme họ iruemu ofruriọ jọ nọ e roma via kpahe etẹmpol na evaọ Jerusalẹm, kọ ẹvẹ onana o jọ Jesu oma?

⁷ Oriruo omurokpotọ ohwo-akpọ nọ o mae rro họ Jesu Kristi, nọ a jọ eruẹaruẹ dhesẹ wọhọ ‘ọrọ omurokpotọ’ Jihova. (Olezi 16:10) Etẹmpol obọ Jerusalẹm nọ a je ro ruiruo ofruriọ o ru omurokpotọ fihọ use-abọ. Jesu ọ riẹ nọ iruo ozerẹ okpehru na gbe idheidhe riẹ i dhesẹ odibọgba gbe idheidhe uwhu riẹ, yọ ọ riẹ epanọ u wuzou te re ahwo a wuhrẹ no enana ze. Fikiere ọ tẹ vọ avọ ofu okiẹrẹe nọ ọ ruẹ nọ a ru etẹmpol na “họ uwou iwhewheriwhe” no. Avọ udu nọ Ọghẹnẹ ọ kẹ riẹ, isiava ọ j’owọ re o ru etẹmpol na fo.a—Matiu 21:12, 13; Jọn 2:15-17.

 8. (a) Ẹvẹ Jesu o ro dhesẹ omurokpotọ kẹ ọruẹrẹfihọ etẹmpol na? (b) Ẹvẹ ma re ro dhesẹ nọ ma wo ovuhumuo ẹgọ Jihova kugbe ukoko ofuafo riẹ?

⁸ Ghele na, Jesu ọ rehọ oma kpotọ tha ọruẹrẹfihotọ etẹmpol na uke. No emaha ze, ọ jẹ hai kpohọ ehaa eva etẹmpol na ọ vẹ jẹ jọ etẹe wuhrẹ ẹsibuobu. Ọ tubẹ hwa osa-uzou etẹmpol na—dede nọ o gba riẹ họ nọ o re ru ere he. (Matiu 17:24-27) Jesu o jiri aye-uku oyogbere jọ fikinọ o fi “eyero riẹ” kpobi họ etehe unevaze etẹmpol na. U kri hi, Jihova ọ tẹ siọ etẹmpol yena riẹriẹriẹ. Rekọ taure okioye na u te te, Jesu ọ roma kpotọ kẹe. (Mak 12:41-44; Matiu 23:38) Ukoko otọakpọ Ọghẹnẹ nẹnẹ u woma gaga no vi eyero ahwo Ju na avọ etẹmpol riẹ. Uzẹme, ukoko na o gba ha; oyejabọ nọ a je ru inwene ẹsejọ na. Yọ orọnikọ ogbekuo o vọ riẹ eva gbe he, hayo kọ Jihova Ọghẹnẹ o bi ti nwene iei kẹle he. Wha joma kuvẹ hẹ re sebaẹgba jọ nọ ma jọ eva riẹ ruẹ o wha ọkora s’omai hayo re u ru omai wo ẹzi inoma iguo. Ukpoye, joma raro kele omurokpotọ Jesu Kristi.—1 Pita 2:21.

Sebaẹgba Omobọ Mai

 9, 10. (a) Ẹvẹ eyero-akpọ Setan ọ be rọ rehọ sebaẹgba mai ruiruo re o viẹ omai họ kpohọ uruemu nọ o kare omurokpotọ? (b) Eme ohwo nọ ọ raha uzi ulogbo jọ o re ru?

⁹ Setan ọ be jẹ daoma wha ababọ omurokpotọ haro ẹkwoma eroruiruo sebaẹgba mai. Eyero-akpọ riẹ o be rọ oyẹlẹ mai ruiruo, be dawo omai re ma ru oware nọ o thọ evaọ aro Jihova. Avọ uweri, kukpe kukpe idu ahwo buobu a bi kie ruọ ẹta ọfariẹ-ogbe. Ejọ i bi fi eyero uzuazọ agbava kugbe ababọ omurokpotọ na, be ruabọ họ eyoma-oruo yọ a bi dhesẹ oma via nọ Ileleikristi ẹrọwọ a gbẹ rọ. Evaọ uyo kẹ izoeme kpahe ẹme ọnana evaọ ukere ọ “Uzoge A nọ Inọ . . . ” evaọ emagazini Awake!, uvovo aye jọ o te kere nọ: “Izoeme enana i gbiku uzuazọ mẹ.” Evaọ idhere, o je mu usu kugbe izoge akpọ enọ i you Jihova ha. Eme u no rie ze? O kere nọ: “Mẹ tẹ raha uzuazọ mẹ muotọ, me te kie ruọ ọfariẹ-ogbe fikiere a tẹ jọ ukoko na whọku omẹ. Usu mẹ kugbe Jihova o tẹ raha, yọ etẹe evaifihọ nọ ọsẹ gbe oni mẹ gbe ekpako na a wo k’omẹ u je kuhọ.”b

¹⁰ Ekpako ukoko a te fiobọhọ kẹ uvovo aye ọnana o te zihe ziọ iruo omurokpotọ kẹ Jihova. Rekọ avọ edada, eware nọ e rẹ via kẹ otujọ i re yoma vi enana, yọ ejọ a sai zihe ziọ uthuru na ha. Ẹvẹ o rẹ mai woma te re ohwo o wo omurokpotọ jẹ whaha edawọ akpọ omuemu ọnana! Yo unuovẹvẹ nọ u no emagazini Uwou-Eroro na ze gbe Awake! evaọ eme wọhọ usu akpọ gbe eghaghọ ogbekuo. Wha joma kie ruọ uruemu nọ o kare omurokpotọ họ. Rekọ whọ tẹ maki kie, whọ viẹ oma ra họ ru wọhọ ẹsenọ oware ovo o via ha ha. (Olezi 26:4) Ukpoye, gwọlọ obufihọ. Oye họ oware nọ esẹ gbe ini gbe ekpako ukoko Ileleikristi a rọ kẹ.—Jemis 5:14.

11. Eme o jẹ thọ re ma rehọ ẹro oyoma rri omobọ mai, kọ didi uzi Ebaibol u re fiobọhọ k’omai kpọ eriwo mai viẹ?

¹¹ Sebaẹgba mai u re fi omai họ enwoma evaọ edhere ọfa. Ejọ nọ i kie ruọ uruemu ababọ omurokpotọ no a whaha omodawọ nọ a re ro ru Jihova eva were. Kareghẹhọ, Devidi ọ raha uzi ulogbo. Ghele na, makinọ Devidi o whu kri no, Jihova ọ kareghẹhọ iẹe wọhọ odibo ẹrọwọ. (Ahwo Hibru 11:32; 12:1) Fikieme? Keme ọ siọ omodawọ nọ o re ro ru Jihova eva were ba ha. Itẹ 24:16 o ta nọ: “Keme ohwo okiẹrẹe o te kie isiahrẹ, ọ rẹ kparoma.” Uzẹme, ma te kie fihọ izieraha esese jọ—ẹhẹ ẹwẹwariẹ—fiki ọ oyẹlẹ jọ nọ ma bi lele muabọ, ma rẹ gbẹ sai kiẹrẹe evaọ aro Jihova otẹronọ ma rẹ “kparoma”—koyehọ, kurẹriẹ no eva ze jẹ wariẹ ruabọhọ iruo omurokpotọ.—Wawo 2 Ahwo Kọrint 2:7.

Yọroma kẹ Eghẹrẹ Ababọ Omurokpotọ Ototọ!

12. Wọhọ oware nọ o via kẹ ahwo Farisi, ẹvẹ eriwo okeke kpahe uzi u re ro su kpohọ ababọ omurokpotọ?

¹² Ababọ omurokpotọ o rẹ nyaze evaọ edhere ototọ re. Ẹsejọ o rẹ sai dhesẹ oma riẹ wọhọ omurokpotọ! Wọhọ oriruo, o sae jọ nọ ahwo Farisi edẹ Jesu a roro oma rai wọhọ ahwo omurokpotọ.c Rekọ a riẹ ẹhẹriẹ nọ o rọ udevie ohwo omurokpotọ gbe ohwo nọ ọ rẹ roma k’uzi ohwo-akpọ nọ o rẹ jẹlẹ ha ha, keme a jọ kekeke jẹ hẹ rọ arodha gu amọfa ẹdhọ. (Wawo Ọtausiuwoma Na 7:16.) Evaọ onana a tẹ ghinẹ kare omurokpotọ—rọ kẹ ahwo nọ a hae gbodibo kẹ, rọkẹ otofa Uzi nọ a ta nọ a bi wuhrẹ na, jẹ rọ kẹ Jihova omariẹ. Evaọ abọdekọ riẹ, Jesu, ọ roma kpotọ kẹ otofa Uzi na, nọ u wo owọ no uyoyou ze. Fikiere ọ tẹ bọ ahwo ga jẹ t’udu họ ahwo awọ, nwane wọhọ epanọ eruẹaruẹ Mesaya e ta no vẹre.—Aizaya 42:3; 50:4; 61:1, 2.

13. (a) Ẹvẹ esẹ gbe ini Ileleikristi a sae rọ kare omurokpotọ? (b) Ẹvẹ esẹ gbe ini a sae rọ whaha ẹwhọkuo emọ rai avọ evedha, inoma, hayo eriwo ọthọthọ?

¹³ Ileleikristi nọ i wo ọkwa iruo jọ a wo erere gaga no oriruo Jesu ze no evaọ ẹme ọnana. Wọhọ oriruo, esẹ gbe ini omurokpotọ a riẹ nọ a rẹ whọku emọ rai. (Itẹ 13:24) Ghele u re mu ai ẹro nọ a rẹ whọku avọ ofu ọgaga hayo edo afuẹwẹ kẹse kẹse rọ kpọ emọ rai eva ha. Emọ nọ i roro nọ a sai ru esẹ gbe ini rai eva were he hayo enọ i roro nọ egagọ ọsẹ gbe oni rai u ru rai họ enọ i re wo afuẹwẹ ọvo hayo gu inoma a rẹ sai wo ọkora a vẹ jẹ rọ fiki ere sioma no ẹrọwọ uzẹme na.—Ahwo Kọlọsi 3:21.

14. Ẹvẹ ithuru-igodẹ Ileleikristi a sai ro dhesẹ omurokpotọ kẹ uthuru nọ a be gbodibo kẹ?

¹⁴ Epọvo na, ekpako gbe esẹro ọnyawariẹ Ileleikristi a rẹ rẹriẹ ova dhe ebẹbẹ gbe enwoma nọ uthuru na o rẹ rẹriẹ ova ku. Wọhọ ithuru-igodẹ omurokpotọ, a rẹ kẹ ohrẹ nọ ẹgwọlọ o tẹ riẹ, u re mu ai ẹro nọ a rẹ riẹ ẹme na vevẹ ziezi a vẹ jẹ rehọ ẹme nọ a ta kpobi no Ebaibol ze je no ebe Ukoko-Ulogbo na ze. (Olezi 119:105; Itẹ 18:13) A tẹ jẹ riẹ nọ igodẹ na a rẹro so ai kẹ ọbọga gbe ẹkuọ ẹzi. Fikiere a tẹ gwọlọ epanọ a rẹ rọ raro kele Jesu Kristi, Othuru-Igodẹ Owoma na. A be roma kpotọ gbodibo kẹ igodẹ na koka koka evaọ iwuhrẹ Ileleikristi—orọnikọ a be rọ unu raha ai fihọ otọ họ rekọ, ukpoye, a be bọ ai ga jẹ kẹ ẹrọwọ rai ẹgba.—Matiu 20:28; Ahwo Ẹfẹsọs 4:11, 12; Ahwo Hibru 13:20, 21.

15. Ẹvẹ ahwo jọ evaọ ikpe-udhusoi ọsosuọ na a ro dhesẹ nọ a wo omurokpotọ ọthọthọ?

¹⁵ Ababọ omurokpotọ ototọ ofa họ omurokpotọ ọthọthọ. Uvi omurokpotọ no eriwo Ebaibol na ze o rẹ kuvẹ re ma fi egagọ ọfa haro omurokpotọ mai kẹ Jihova Ọghẹnẹ hẹ. Ahwo Ju buobu evaọ ikpe-udhusoi ọsosuọ a talamu Uzi Mosis na jẹ talamu eyero-akpọ ahwo Ju. Ghele na, oke Jihova o ze no re o go oghale riẹ no orẹwho aghẹmeeyo ọyena bru orẹwho Izrẹl ẹzi na. Umutho ahwo jọ ọvo e roma kpotọ kẹ Jihova nọ e k’ezọ kẹ enwene ologbo ọnana. Makọ evaọ udevie Ileleikristi uzẹme dede, ahwo Ju jọ a je si ikẹ inọ a re zihe bru “eware oyẹlẹ gbe eware esese ọsosuọ” Uzi Mosis na, enọ e jọ oma Kristi rugba no na.—Ahwo Galesha 4:9; 5:6-12; Ahwo Filipai 3:2, 3.

16. Ẹvẹ idibo omurokpotọ Jihova a rẹ kuyo kẹ inwene?

¹⁶ Wo ohẹriẹ, ahwo Jihova evaọ ọgbọna a kru omurokpotọ rai no evaọ oke enwene. Nọ elo uzẹme nọ a rovie via u bi lo ga na, a bi ru enwene. (Itẹ 4:18) Kẹle na, ‘ọrigbo ẹrọwọ gbe areghẹ’ na o fiobọhọ k’omai no re ma ru otoriẹ mai woma viere kpahe “oge” nọ a t’ẹme te eva Matiu 24:34 gbe oke ẹdhoguo “igodẹ” gbe “ewe” na nọ a fodẹ eva Matiu 25:31-46, jegbe eriwo mai kpahe oghẹrẹ iruo nọ i kpomahọ erọ isoja ha. (Matiu 24:45) Ababọ avro, ikọ-erue jọ buobu a hae wereva otẹrọnọ Isẹri Jihova buobu a rẹ talamu otoriẹ anwae ọrọ izoeme enana a vẹ jẹ senọ a rẹ nyaharo ho. Oghẹrẹ oware utioye o re via ha. Fikieme? Keme ahwo Jihova a wo omurokpotọ.

17. Ẹvẹ iyoyou mai a sai ro fi omurokpotọ mai họ odawọ ẹsejọ?

¹⁷ Rekọ ẹme omurokpotọ ọthọthọ o rẹ sae kpomahọ omai. Nọ ogbẹnyusu ọghaghae hayo ohwo uviuwou jọ ọ tẹ salọ edhere nọ o raha izi Ebaibol, ma re roro nọ omurokpotọ mai o bẹre abava no. Notọ ze, ma rẹ roma kpotọ kẹ ahwo uviuwou mai. Rekọ ma re fi oma nọ ma rọ kẹ ahwo yena haro omurokpotọ mai kẹ Jihova ha! (Wawo 1 Samuẹle 23:16-18.) Ma re fiobọhọ kẹ ahwo nọ i ruthọ ko uzioraha rai dhere hayo jọ abọ rai mukpahe ekpako na ha enọ e be daoma ‘nwene ai evaọ ẹzi omurokpotọ.’ (Ahwo Galesha 6:1) Ma te ru ere yọ ma kare omurokpotọ kẹ Jihova, ukoko riẹ, gbe enọ ma you. Whaọ, nọ ma te dikihẹ wọhọ ọzadhe nnọ ọrahauzi o wo ọwhọkuo nọ ọ gwọlọ họ, koyehọ, ma bi bru uyoyou Jihova dhe re o siẹe oma ba ete. (Ahwo Hibru 12:5-7) Jẹ kareghẹhọ inọ “omonwa ohwo nọ who you o rẹ dheva ha.” (Itẹ 27:6) Uzẹme, ohrẹ uyoyou nọ u no Ẹme Ọghẹnẹ ze o rẹ jọ enwoma kẹ omoya oyoyou mai nọ o ruthọ, rekọ u re siwi uzuazọ riẹ evaọ uwhremu na!

Omurokpotọ U re Thihakọ Ukpokpoma

18, 19. (a) Eme Ehab ọ jọ obọ Nebọt gwọlọ, kọ fikieme Nebọt ọ jẹ se? (b) Kọ omurokpotọ Nebọt u fo oware nọ o via kẹe na? Ru ei vẹ.

¹⁸ Ẹsejọ ohọre nọ Setan ọ rẹ họre omurokpotọ mai o rẹ jọ orọ ovadhova. Roro kpahe oware nọ o via kẹ Nebọt. Okenọ Ehab Ovie na ọ jẹ gbaehọ nọ ọ zẹ udhu evaene riẹ kẹe, ọ tẹ kuyo nọ: “ỌNOWO na ọ rẹ ghọ nọ mẹ rẹ rọ rehọ ukuoriọ esẹ mẹ rọ kẹ owhẹ.” (1 Ivie 21:3) Orọnikọ Nebọt o je veghe uzou hu; ọ jẹ roma kpotọ. Uzi Mosis na o ta nọ ọmọ Izrẹl ọvuọvo ọ rẹ zẹ ute ukuoriọ riẹ kufiẹ hẹ. (Iruo-Izerẹ 25:23-28) Nebọt ọ riẹ nọ ovie ọgeva ọnana o ti kpei, keme Ehab ọ kuvẹ no re aye riẹ, Jezibẹl, o kpe eruaro Jihova buobu no! Rekọ Nebọt o dikihẹ kothi.—1 Ivie 18:4.

¹⁹ Ẹsejọ omurokpotọ o rẹ wha osohwa ze. Jezibẹl, avọ obufihọ ‘ezae jọ nọ i fioka ha,’ a tẹ gbeku họ Nebọt uzou kẹ oware nọ o ru hu. Fikiere, a te kpei gbe emọ riẹ. (1 Ivie 21:7-16; 2 Ivie 9:26) Kọ onana u dhesẹ nọ omurokpotọ Nebọt o thọ? Ijo! Nebọt ọ rọ usu ezae gbe eyae omurokpotọ nọ e rọ ‘uzuazọ’ evaọ ekareghẹhọ Jihova enẹna, enọ e be wezẹ eva uki rai gbẹsinẹdẹ bẹsenọ oke ẹkparomatha na u re ti te.—Luk 20:38; Iruẹru 24:15.

20. Ẹvẹ ẹruore o re ro fiobọhọ k’omai yọrọ omurokpotọ mai?

²⁰ Eyaa ovo na o be kẹ ahwo omurokpotọ Jihova nẹnẹ na ẹruore re. Ma riẹ nọ omurokpotọ mai o sae wha enwoma s’omai evaọ akpọ ọnana. Jesu Kristi ọ rehọ uzuazọ riẹ hwosa omurokpotọ riẹ, ọ tẹ jẹ ta kẹ ilele riẹ nọ epọvo na a ti ru ai. (Jọn 15:20) Epanọ ẹruore riẹ kẹ obaro o kẹ riẹ ẹgba na, ere o rẹ k’omai ẹgba re. (Ahwo Hibru 12:2) Fikiere ma rẹ sai kru omurokpotọ mai ga evaọ aro oghẹrẹ ukpokpoma kpobi.

21. Didi imuẹro Jihova ọ rọ kẹ ahwo omurokpotọ riẹ?

²¹ Uzẹme, umutho ahwo jọ evaọ usu mai ae a be họre fiki omurokpotọ rai evaọ edhere nọ o kpomafihọ. Rekọ ahwo Ọghẹnẹ a te rẹriẹ ova dhe ukpokpoma viere taure urere na o tẹ ze. Ẹvẹ o sai ro mu omai ẹro nọ ma te yọrọ omurokpotọ mai? Ẹkwoma omurokpotọ mai nọ ma rẹ yọrọ enẹna. Jihova ọ k’omai iruo ilogbo no—ẹta usiuwoma gbe ewuhrẹ kpahe Uvie riẹ. Joma roma kpotọ ru iruo obọdẹ nana. (1 Ahwo Kọrint 15:58) Ma tẹ se re sebaẹgba ohwo-akpọ o siọ omurokpotọ mai kẹ ukoko Jihova ba ewhrehe yọ ma tẹ jẹ yọrọ oma mai no eghẹrẹ ababọ omurokpotọ ototọ kpobi wọhọ omurokpotọ othọthọ, ere ma te rọ ruẹrẹ oma mai kpahe otẹrọnọ a dawo omurokpotọ mai viere. Oghẹrẹ kpobi nọ o rọ, ma wo imuẹro kpobi nọ Jihova o wo uyoyou-evifihọ kẹ idibo omurokpotọ riẹ. (2 Samuẹle 22:26) Ẹhẹ, ọ te sẹro erọ omurokpotọ riẹ!—Olezi 97:10.

[Footnotes]

Ẹvẹ Whọ te k’Uyo?

◻ Ẹvẹ ma rẹ rọ whaha sebaẹgba amọfa re i si omai ruọ ababọ omurokpotọ?

◻ Evaọ idhere vẹ sebaẹgba mai u re ro su omai ruọ uruemu nọ o kare omurokpotọ?

◻ Ẹvẹ ma rẹ rọ whaha odawọ omurokpotọ othọthọ?

◻ Eme u re fiobọhọ k’omai yọrọ omurokpotọ mai makọ evaọ oke ukpokpoma?

[Box on page 21]

Ẹgọ Avọ Omurokpotọ eva Ebẹtẹle

“U fore a ru eware kpobi ziezi gba kiete.” Ere Pọl ukọ na o kere. (1 Ahwo Kọrint 14:40) Pọl ọ riẹ nọ re ukoko u ruiruo, u fo re ‘ọruẹrẹfihotọ’ jọ o jariẹ. Epọvo na re nẹnẹ, ekpako na a rẹ jiroro kpahe eware nọ i fo, wọhọ ahwo nọ a re fihọ utu obe ukoko nọ a re kpohọ, ẹruẹrẹhọ iwuhrẹ usiuwoma ota, jẹ kiẹ ẹkuotọ na nọ a re ru fo. Eruẹrẹfihotọ itieye na e rẹ sae wha edawọ omurokpotọ ze. Orọnikọ Ọghẹnẹ ọ be kẹ ijaje enana ha, yọ e rẹ sae nyate ẹgwọlọ ahwo na kpobi hi.

Kọ whọ be rueriẹ bẹbẹ ẹsejọ re whọ roma kpotọ kẹ eruẹrẹfihotọ jọ nọ a re ru evaọ ukoko Ileleikristi na? Otẹrọ ere, whọ te ruẹ oriruo Ebẹtẹle wọhọ obufihọ. A rehọ odẹ na Ebẹtẹle, ubiẹme Hibru nọ u dhesẹ “Uwou Ọghẹnẹ,” ro se iwou-ogha 104 erọ Ukoko-Ulogbo Watch Tower na, kugbe oria nọ u w’uzou evaọ obọ U.S.d Ahwo unevaze nọ e be rria je ruiruo eva Ebẹtẹle a gwọlọ nọ eria enana i dhesẹ ẹfuọ gbe urirẹ ozodhẹ kẹ Jihova. Onana o gwọlọ omurokpotọ mi omomọvo.

Erara nọ i weze kpobọ Ebẹtẹle no a rẹ t’ẹme ẹsikpobi kpahe ẹkpatiẹ gbe ẹfuọ nọ a jọ obei ruẹ. Iruiruo na a rọ kpatiẹ jẹ be wereva; ẹmeunu rai, uruemu, gbe ẹgọ rai kpobi u bi dhesẹ ẹgba-iroro Ileleikristi nọ e kpako, nọ a rehọ Ebaibol wuhrẹ. Ahwo nọ e be rria evaọ uviuwou Ebẹtẹle kpobi a be rọ omurokpotọ koko izi nọ e rọ Ẹme Ọghẹnẹ.

Kugbe onana, Ugboma Esuo na o kẹ rai obe jọ nọ uzoẹme riẹ o rọ Dwelling Together in Unity, onọ o kẹ ọruẹrẹfihotọ nọ u fo kẹ uviuwou ulogbo otiọye re a sai ruiruo kugbe. (Olezi 133:1) Wọhọ oriruo, u duobọ te iwou, emuore, ẹfuọ, ẹgọ gbe osẹ, gbe oghẹrẹ eme itieye na. Ahwo uviuwou Ebẹtẹle a be roma kpotọ thọ je koko eruẹrẹfihotọ itieye na, o tẹ make rọnọ ẹgwọlọ omobọ rai o bi su ai kpohọ ofẹ ọfa. A rri obe onana, orọnikọ wọhọ obe nọ izi gbe ijaje e vọ họ, rekọ wọhọ obe nọ a kere ekpọvio nọ i wiruo fihọ re o ruẹse wha okugbe gbe ọrọwokugbe haro. Esẹro na a be roma kpotọ kru izi enana nọ i no Ebaibol ze na kpehru, yọ a be rehọ ai ruiruo evaọ edhere nọ u fo kẹ ọbọga gbe uduotahawọ uviuwou Ebẹtẹle je le iruo efuafo Ebẹtẹle rai haro.

[Footnote]

[Box on page 22]

Ọrọ Omurokpotọ gbe Ọrọ Izi-Koko

Evaọ ukpe ọ 1916, Encyclopædia of Religion and Ethics o muẹrohọ inọ “ẹhẹriẹ ọnana evaọ erọ omurokpotọ gbe erọ izi-koko a rẹ sae rueriẹ evaọ oke kpobi gbe eria kpobi.” O ru rie vevẹ nọ: “Ọrọ izi-koko na o re ru oware nọ a ta kẹe, ọ rẹ thọ uzi hi; ọ rẹ roma kpotọ kẹ eme nọ a kere nọ a rẹ sai se na. Ọrọ omurokpotọ na o re ru onana rekọ . . . a re fievahọ iẹe nọ o re ru viere, o re fi udu riẹ kpobi họ iruo riẹ, o re nwene uzuazọ riẹ kpobi rọwo kugbe oware nọ a gwọlọ nọ o ru na.” Uwhremu na, obe ovo nana o muẹrohọ nọ: “Re ohwo o wo omurokpotọ o rro vi uzi nọ a re koko ọvo. . . . Ọzae omurokpotọ o wo ẹhẹriẹ ro no ọnọ o re koko uzi wọhọ ohwo nọ ọ rẹ rehọ udu gbe iroro riẹ kpobi gọ . . . O re keke aro fihọ thọ uzi hi, o re siomano eruo eyoma, yọ ọ rẹ rọ ogbori ru hu.”