“Wha Jọ Eva Uruemu Rai Kpobi Jọ Fuafo Re”

“Rekọ epanọ ohwo nọ o se owhai ọ rọ fuafo na, whai omarai wha jọ eva uruemu rai kpobi jọ fuafo re; keme a kere nọ, ‘Wha rẹte [jọ] ọrẹri, keme mẹ ọrẹri.’”—1 PITA 1:15, 16.

 1. Fikieme Pita ọ jẹ tudu họ Ileleikristi awọ nọ a jọ fuafo?

FIKIEME Pita ukọ na ọ jẹ kẹ ohrẹ obehru na? Keme ọ ruẹ ẹgwọlọ nọ Oleleikristi kpobi ọ rẹ rọ sẹro iroro gbe iruẹru riẹ re ọ kpọ ai lele ẹfuọ Jihova. Fikiere, ọ tẹ kake ta eme enana lele eme obehru na: “Wha kru iroro rai ga, wha yọroma . . . Wọhọ emọ nọ i re yo ẹme, wha duoma họ urusio ho enọ wha rehọ ogbori ru vẹre na.”—1 Pita 1:13, 14.

 2. Fikieme isiuru mai e jẹ kare ẹfuọ taure ma te ti wuhrẹ uzẹme na?

² Isiuru mai vẹre e jọ gbegbe. Fikieme? Fikinọ ibuobu mai a je lele idhere akpọ na taure ma tẹ te jẹ uzẹme Ileleikristi rehọ. Pita ọ riẹ onana nọ o kere vevẹ nọ: “Rure oke nọ o vrẹ no na, u te kẹ eware nọ otu Egedhọ a guọlọ nọ a re ruẹ, nọ a re yerẹ uzuazọ odode, urusio, ọgba-edada, omawere, enu-ovoro, gbe ogbẹgọ.” Dede, Pita ọ fodẹ iruẹru igbegbe nọ i kie kpahe oke mai na ha, keme a riẹ rai evaọ okioye he.—1 Pita 4:3, 4.

 3, 4. (a) Ẹvẹ ma rẹ sai ro fi isiuru ethọthọ kparobọ? (b) Kọ Ileleikristi a rẹ jọ kpimẹ? Ru ei vevẹ.

³ Kọ who muẹrohọ nọ isiuru eyena yọ enọ i re si uwo na, ereghẹ na, jegbe ọwhọ na urru? Ma tẹ kuvẹ re enana e kpọ omai, o rẹ jọ lọlọhọ re iroro gbe iruẹru mai e jọ gbegbe. Onana u dhesẹ ẹgwọlọ nọ ma rẹ rọ kuvẹ re ẹgba iroro o kpọ owojẹ mai. Enẹ Pọl o dhesẹ i rie: “Fikiere, imoni, mẹ rehọ epa ehrọ Ọghẹnẹ lẹ owhai re wha ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ, nọ e rọ egagọ Ẹzi rai.”—Ahwo Rom 12:1, 2.

⁴ Re ma rọ idhe efuafo kẹ Ọghẹnẹ, ma rẹ kuvẹ re ẹgba iroro, orọnikọ ọwhọ họ, e kpọ omai. Bro ahwo ọfariẹ-ogbe u su thọ no fikinọ a kuvẹ re ọwhọ rai ọ kpọ uruemu rai! Onana u dhesẹ nọ ma rẹ do ọwhọ mai nyaotọ họ; o tẹ rọ ere, ẹvẹ ma sai ro dhesẹ oghọghọ evaọ egagọ Jihova? Ghele, otẹrọnọ ma gwọlọ mọ ibi ẹzi na viukpọ iruo uwo, kọ ma re nwene iroro mai kie fihọ edhere iroro Kristi.—Ahwo Galesha 5:22, 23; Ahwo Filipai 2:5.

Uzuazọ Ofuafo, Osaohwa Ofuafo

 5. Fikieme ẹgwọlọ ẹfuọ ọ jẹ jọ Pita oja?

⁵ Fikieme ẹgwọlọ ẹfuọ Ileleikristi o jẹ rọ Pita oja tere? Fikinọ ọ riẹ kpahe osaohwa ọfuafo nọ a hwa rọ dẹ ahwo-akpọ ẹmeoyo. O kere nọ: “Wha riẹ nọ a ta owhai no idhere uvru nọ e reria owhai obọ nobọ esẹ rai ze, orọnikọ orọ eware ne rẹ raha rọ idọlọ-efuafo hayo idọlọ-oro ho; rekọ orọ azẹ ọghaghae Kristi, wọhọ ọrọ omogodẹ nọ kare ẹnyao hayo epe.” (1 Pita 1:18, 19) Ẹhẹ, Ehri ẹfuọ na, Jihova Ọghẹnẹ, o vi Ọmọ ọvo riẹ ze, ‘Ọfuafo na,’ ziọ otọakpọ re ọ hwosa ẹtanigbo na nọ u ti ru ahwo wo emamọ usu kugbe Ọghẹnẹ.—Jọn 3:16; 6:69; Ọnyano 28:36; Matiu 20:28.

 6. (a) Fikieme o gbẹ lọhọ k’omai re ma yọrọ uruemu ofuafo ho? (b) Eme u re fiobọhọ k’omai yọrọ uruemu mai fuafo?

⁶ Ghele, ma re vuhumu nọ o lọhọ re a yere uzuazọ ofuafo ho nọ ma rọ akpọ ogbekuo Setan na. Ọ kpahe egbefẹ fihọ kẹ Ileleikristi uzẹme, enọ e be daoma zọ evaọ eyero eware enana. (Ahwo Ẹfẹsọs 6:12; 1 Timoti 6:9, 10) Ọyawọ iruo egọmeti, ọrọ ọkparesuọ uviuwou, ọrọ ẹkoko isukulu, gbe ọrọ otunyẹ ọhwa o soriẹ ze nọ edikihẹ gaga eva ẹzi ọ jẹ rọ oja re ma ruẹse jọ fuafo. Oyena u te dhesẹ epanọ uwuhrẹ omobọ mai gbe iwuhrẹ Ileleikristi nọ ma re kpohọ ẹsikpobi e rọ oja te. Pọl ọ hrẹ Timoti nọ: “He lele oghẹrẹ eme oma ojaja eyena enọ whọ jọ unu mẹ yo na eva ẹrọwọ gbe uyoyou nọ e rọ eva Kristi Jesu.” (2 Timoti 1:13) Ma re yo eme omokpokpọ eyena evaọ Ọgwa Uvie mai gbe evaọ uwuhrẹ Ebaibol omobọ mai. E rẹ sai fiobọhọ k’omai jọ fuafo evaọ uruemu ikẹdẹ kẹdẹ mai evaọ oghẹrẹ eria kpobi.

Uruemu Ofuafo Evaọ Uviuwou Na

 7. Ẹvẹ ẹfuọ o re kpomahọ uzuazọ uviuwou mai?

⁷ Nọ Pita ọ t’ẹme no Iruo-Izerẹ 11:44 ze, ọ rehọ ubiẹme Grik haʹgi·os ruiruo, onọ u dhesẹ, “hẹriẹ oma no emuemu, fikiere o tẹ rọ orọ Ọghẹnẹ, ọrẹri.” (An Expository Dictionary of New Testament Words, onọ W. E. Vine o kere) Ẹvẹ onana u re ro kpomahọ omai evaọ uzuazọ uviuwou Ileleikristi mai? Onana u dhesẹ nọ uzuazọ uviuwou mai u re wo ehri no uyoyou ze, keme “Ọghẹnẹ họ uyoyou.” (1 Jọn 4:8) Uyoyou omolahiẹ kẹ amọfa họ ewhri nọ u re fi ewoma họ udevie ọzae avọ aye gbe udevie eyewọ gbe emọ.—1 Ahwo Kọrint 13:4-8; Ahwo Ẹfẹsọs 5:28, 29, 33; 6:4; Ahwo Kọlọsi 3:18, 21.

 8, 9. (a) Didi eyero jọ ọ rẹ sae roma via evaọ uwou Ileleikristi? (b) Didi ohrẹ owoma Ebaibol ọ kẹ kpahe ẹme ọnana?

⁸ Ma rẹ sai roro nọ edhesẹ uyoyou otiọye na evaọ uviuwou Oleleikristi ọ rẹ nyaze idudhe. Ghele, a rẹ rọwo iẹe nọ uyoyou o rẹ rro te oghẹrẹ nọ u fo nọ o rẹ jọ evaọ iwou Ileleikristi jọ họ. O sae wọhọ nọ o rọ ere evaọ obọ Ọgwa Uvie na, rekọ ẹvẹ o lọhọ te re ẹfuọ mai o kiekpotọ evaọ obọ uwou. Evaọ etẹe o vẹ nwane thọrọ omai ẹro inọ aye mai ọ gbẹ rọ oniọvo ọmọtẹ Oleleikristi mai hayo inọ ọzae mai ọ gbẹ rọ oniọvo ọmọzae ọvo na (ẹsejọhọ odibo oruiruo hayo ọkpako) nọ whọ rẹ kẹ adhẹẹ gaga na evaọ obọ Ọgwa Uvie na. Eva e rẹ dha omai, edo ọ vẹ rọ oma via. Ute agbava o sae tubẹ ruọ izuazọ mai. O gbẹ rọ usu ọzae avọ aye nọ i bi lele uruemu Kristi hi, rekọ ọzae avọ aye nọ e be whọ. O thọrọ e rai ẹro no inọ oyerikugbe ọfuafo ọ rẹ jọ uwou na. Ẹsejọ a ve mu eme họ ẹta wọhọ ahwo akpọ. Ẹvẹ o lọhọ te re eme izuehọ, nọ e rẹ gbẹre oma i no unu na ze!—Itẹ 12:18; wawo Iruẹru 15:37-39.

⁹ Ghele, Pọl ọ hrẹ nọ: “Wha jọ eme ogbẹta [Grik, loʹgos sa·prosʹ, “eme izuehọ,” nọ e rọ gbegbe] u no enu rai ze he, rekọ onọ uwoma nọ o rẹ wha ohwo udu wọhọ epanọ u kiehọ, re o ruẹse rehọ aruoriwo kẹ otu nọ o re yo.” Yọ oyena u kugbe enọ i re yo evaọ uwou na kpobi, kugbe emọ na.—Ahwo Ẹfẹsọs 4:29; Jemis 3:8-10.

10. Ẹvẹ ohrẹ kpahe ẹfuọ u ro kpomahọ emọ?

¹⁰ Whaọ ọkpọvio ọnana o kpomahọ emọ na re evaọ uviuwou Oleleikristi. Ẹvẹ o rẹ lọhọ kẹ ai te nọ a te no isukulu ze a muọ aro họ erokele eme ọwọsuọ gbe ababọ adhẹẹ ọhwa obọ akpọ rai! Emọ, wha kie ruọ ẹta uruemu emezae ethọthọ nọ e jẹ la ọruẹaro Jihova eka ha gbe enọ e rẹ t’eme igbegbe nọ i wo otọ họ. (2 Ivie 2:23, 24) Whọ kuvẹ re eme etọtọ nọ ahwo nọ i wo otọ họ a be ta i gbe eme ezi ra ku hu. Wọhọ Ileleikristi, ẹmeọta mai ọ rẹ jọ fuafo, avọ awere, ọbọga, wowolẹ, jẹ “mere wọhọ uwhei.” Ẹmeọta mai ọ rẹ hẹriẹ omai no ahwo edekọ.—Ahwo Kọlọsi 3:8-10; 4:6.

Ẹfuọ gbe Ahwo Uviuwou Mai nọ E Rọwo Ho

11. Fikieme ẹjọ fuafo u gbe dhesẹ ekiete evaọ aro omobọ ohwo ho?

¹¹ Nọ ma be ghinẹ dao ẹgba mai kpobi dhesẹ ẹfuọ na, ma rẹ yoma hayo dhesẹ nọ ma kiẹrẹe vi amọfa ha, maero nọ ma te bi yerikugbe ahwo uviuwou mai nọ e rọwo ho. Uruemu Ileleikristi uwowolẹ mai u re fiobọhọ kẹ ai ruẹ nọ ma wo ohẹriẹ evaọ edhere owoma, inọ ma riẹ epanọ ma re ro dhesẹ uyoyou gbe ohrọ, nwane wọhọ epanọ emamọ ohwo Sameria na o ru evaọ ọtadhesẹ Jesu.—Luk 10:30-37.

12. Ẹvẹ eyae hayo ezae Ileleikristi a rẹ sai ro ru uzẹme na mai siuru kẹ erivẹ-orọo rai?

¹² Pita o fi ẹgba họ epanọ u wuzou te re a dhesẹ emamọ uruemu kẹ ahwo uviuwou nọ e rọwo ho nọ o kere se eyae Ileleikristi nọ: “Ere owhai re whai eyae na, wha rọ oma kpotọ kẹ ezae rai, re otẹrọnọ ejọ e kezọ ẹme na ha, a vẹ te rọ fiki uruemu eyae rai ze edhere na, omake rọnọ a yo ẹme na ha, okenọ a ruẹ uruemu rai fuafo avọ adhẹ.” Aye (hayo ọzae dede) nọ ọ rọ Oleleikristi ọ rẹ sae ru uzẹme na siuru viere kẹ ọrivẹ-orọo riẹ nọ ọ rọwo ho otẹrọnọ uruemu riẹ o rọ kpatiẹ, avọ ororokẹ, gbe adhẹẹ. Onana u te dhesẹ nọ a re riorio obọ evaọ iruo uvie na re ọnọ ọ rọwo ho na a siẹe ba e go họ akotọ hayo gbabọ kẹe.a—1 Pita 3:1, 2.

13. Ẹvẹ ekpako gbe idibo iruiruo a sai ro fiobọhọ ẹsejọ kẹ ezae nọ e rọwo ho wo ovuhumuo kẹ uzẹme na?

¹³ Ekpako gbe idibo iruiruo a rẹ sai fiobọhọ ẹsejọ re a gwọlọ riẹ ọzae nọ ọ rọwo ho na evaọ oke iweze gheghe. Evaọ edhere ọnana ọ rẹ ruẹ nọ Isẹri na a rọ ahwo aruro, nọ e rọ kpatiẹ nọ i ghine wo isiuru, kugbe isiuru kpahe eware efa nọ u te no Ebaibol na no. Evaọ oria jọ, ọkpako jọ o te wo isiuru kẹ akiruo iyei-ikpe ọzae jọ. Oyena o soriẹ ze nọ a ro mu ogbẹnyusu. U kri hi ọzae na o te zihe ruọ oniọvo nọ ọ họ-ame no. Evaọ oriruo ọfa, ọzae jọ nọ ọ rọwo ho o wo isiuru kẹ ọkuẹ nọ a fihọ ikeji. Ekpako na a fioma họ otọ họ. Omọvo rai jọ o te wuhrẹ kpahe ọkuẹ re a tẹ wariẹ zihe bru ọzae na, re a rehọ ọkuẹ nọ ọ rẹ were ọzae na t’ẹme kugbe ei! Fikiere re a jọ fuafo u dhesẹ nọ a rẹ jọ kpimẹ hayo ru aro tuẹtu hu.—1 Ahwo Kọrint 9:20-23.

Ẹvẹ Ma Sae rọ Jọ Fuafo Evaọ Ukoko Na?

14. (a) Eme họ ona Setan jọ nọ ọ rẹ rọ wha ẹwhọ họ ukoko na? (b) Ẹvẹ ma rẹ sae rọ whaha egbefẹ Setan?

¹⁴ Setan Ẹdhọ na yọ ọtaraha, keme odẹ Grik rọ kẹ Ẹdhọ, di·aʹbo·los, u dhesẹ “oguiguẹgu” hayo “ọtaraha.” Ọtaraha yọ obọdẹ uruemu riẹ, yọ ọ be daoma rehiẹe ruiruo evaọ ukoko na. Ona obọdẹ riẹ họ iguẹgu. Kọ ma be k’oma mai uvẹ re ma jọ enọ ọ rẹ kake viẹhọ evaọ uruemu ugbegbe onana? Ẹvẹ oyena o rẹ sae rọ via? Ẹkwoma ẹwhaharo iguẹgu, ẹwariẹ iguẹgu, hayo ezọgaviẹ kẹ iguẹgu. Itẹ areghẹ na o ta nọ: “Ohwo oyoma ọ rẹ gwọlọ ohọre, ọzewa ọ rẹ hẹriẹ igbẹnyusu.” (Itẹ 16:28) Eme họ ifue iguẹgu gbe ọtaraha? U re mu omai ẹro nọ ẹmeọta mai ọ rẹ bọga ẹsikpobi jẹ roma hwa uyoyou. Otẹrọnọ ma bi riwi ewoma viukpọ eyoma evaọ oma inievo mai, ẹmeọta mai ọ rẹ jọ wowoma ẹsikpobi jẹ jọ orọ abọ ẹzi. Kareghẹhọ nọ o re lọlọhọ re a fo ohwo. Yọ ohwo nọ o bi gu amọfa k’owhẹ ọ rẹ sai je gu owhẹ kẹ amọfa re!—1 Timoti 5:13; Taitọs 2:3.

15. Didi ekwakwa nọ e wọhọ erọ Kristi i re fiobọhọ ru ahwo ukoko na kpobi jọ fuafo?

¹⁵ Re ma ruẹse ru ukoko na fuafo, u fo re mai kpobi ma wo iroro Kristi, yọ ma riẹ nọ okwakwa ulogbo riẹ họ uyoyou. Fikiere, Pọl ọ hrẹ ahwo Kọlọsi nọ a jọ wowolẹ wọhọ Kristi: “Fiki epanọ wha rọ enọ Ọghẹnẹ ọ sanọ, wha whẹ ọrẹri gbe eyowo họ oma, eva [ohrọ], ọriẹruo, iroro idhedhẹ iwo, oma-urokpotọ, odiri, . . . wha rẹ rọ vrẹ . . . Rekọ onọ omae ro vi enana kpobi, wha whẹ uyoyou họ oma, onọ orọ ọwhẹgbe eware kpobi.” O te fibae nọ: “Jọ udhedhẹ Kristi o jọ eva rai.” Avọ imuẹro ẹzi erọvrẹ onana, ma rẹ sae yọrọ okugbe gbe ẹfuọ ukoko na.—Ahwo Kọlọsi 3:12-15.

Kọ Ẹfuọ Mai U bi Dhesẹ Oma Via Evaọ Okegbe Mai?

16. Fikieme egagọ efuafo mai e jẹ jọ egagọ evawere?

¹⁶ Kọ ẹvẹ kpahe okegbe mai? Didi ubiẹro a bi ro rri omai? Kọ ma bi dhesẹ oghọghọ uzẹme na, hayo kọ a be jọ oma mai ruẹ uzẹme na wọhọ owha ogbẹgbẹdẹ? Ma tẹ rọ fuafo wọhọ epanọ Jihova ọ rọ fuafo na, u re dhesẹ oma via evaọ ẹmeunu gbe uruemu mai. O rẹ jọ vevẹ nọ egagọ fuafo mai yọ egagọ evawere. Fikieme? Fikinọ Jihova Ọghẹnẹ mai yọ Ọghẹnẹ evawere, ọnọ ọ gwọlọ nọ ahwo riẹ a ghọghọ. Fikiere, ọnọ ọ so ilezi na ọ tẹ ta kpahe ahwo Jihova evaọ oke anwae nọ: ‘Eva e were ahwo nọ Jihova ọ rọ Ọghẹnẹ rai!’ Kọ ma bi dhesẹ evawere yena via? Kọ emọ mai a bi dhesẹ edẹro inọ a rọ udevie ahwo Jihova evaọ Ọgwa Uvie na gbe eva ikokohọ?—Olezi 89:15, 16; 144:15b.

17. Eme ma rẹ sai ru evaọ edhere nọ u w’iruo re ma dhesẹ ẹfuọ nọ o kpomamu?

¹⁷ Ma rẹ sai je dhesẹ owowa ẹfuọ mai ẹkwoma ẹzi unevaze mai gbe uwowou evaọ okegbe. Ẹsejọ u wuzou re erivẹ i kuomagbe re a ru okegbe na fo hayo, wọhọ epanọ o rọ evaọ erẹwho jọ, re a fiobọhọ ruẹrẹ idhere owotọ gbe erọ imoto. Evaọ abọ ọnana, ẹfuọ mai o re dhesẹ oma via evaọ epanọ ma be rọ rẹro te udhu mai, iyẹ mai, hayo ekwakwa efa. Ma tẹ kuvẹ re ezuzu ọ jọ oria kpobi hayo ma te wo etegu nọ ọ rọ whọhọwhọhọ, ẹsejọ avọ imoto nọ e raha fihọ eria nọ ahwo a rẹ ruẹ, kọ ma sae ghinẹ ta nọ ma be rọ adhẹẹ kẹ erivẹ mai?—Eviavia 11:18.

Ẹfuọ eva Iruo gbe eva Isukulu

18. (a) Eme ọ rọ ọzadhe kẹ Ileleikristi nẹnẹ? (b) Ẹvẹ ma sai ro wo ohẹriẹ no akpọ na?

¹⁸ Pọl ukọ na o kere se Ileleikristi eva orẹwho Kọrint ogbegbe na nọ: “Eva ileta mẹ nọ me kere se owhai nọ wha kuomagbe igberedha ha; orọnikọ ibruẹnwae, hayo egbọ-oke gbe ijihẹ, hayo egedhọ akpọ ọnana ha, ogbẹrọ ere he wha rẹ te dhẹ no akpọ no.” (1 Ahwo Kọrint 5:9, 10) Onana yọ odawọ kẹ Ileleikristi, enọ e rẹ gua kugbe ahwo ọfariẹ-ogbe kẹdẹ kẹdẹ hayo enọ e riẹ eyoma gbe ewoma ha. Onana yọ odawọ ẹgbakiete ologbo, maero evaọ okegbe nọ a rẹ jọ tudu họ hayo rọwo kugbe ọfariẹ-ogbe, egbogbo, gbe iwhayo. Evaọ eria enana, ma re gbabọ kẹ ute mai re ahwo nọ e wariẹ omai họ a rri omai wọhọ ahwo “aruro” ho. Ikpoye, uruemu Oleleikristi owowolẹ mai na u re ru omai wo ohẹriẹ eva aro ahwo otoriẹ, rọ kẹ ahwo nọ a wo ovuhumuo ẹgwọlọ ẹzi rai gbe enọ e be gwọlọ ewoma.—Matiu 5:3; 1 Pita 3:16, 17.

19. (a) Didi edawọ whai emọ wha rẹriẹ ova ku eva isukulu? (b) Eme esẹ gbe ini a rẹ sai ru ro fiobọhọ kẹ emọ rai gbe uruemu ofuafo rai?

¹⁹ Ere re, edawọ buobu e riẹ nọ e rẹriẹ ova ku emọ mai eva isukulu. Kọ whai esẹ gbe ini wha bi weze kpohọ isukulu nọ emọ rai a be nya? Kọ whọ riẹ oghẹrẹ uruemu nọ o rọ obei? Whọ be hae t’ẹme kugbe iticha na? Fikieme enọ enana e jẹ rọ oja? Fikinọ evaọ eria akpọ na buobu nọ i rovie aro, a zihe isukulu ruọ eria ozighi no, eria imu-egaga, gbe eria ọfariẹ-ogbe. Ẹvẹ emọ rai a rẹ sai ro kru ekiete gbe uruemu rai fuafo otẹrọnọ esẹ gbe ini rai a be thae uke vọvọ họ? Pọl ọ hrẹ esẹ gbe ini gbagba nọ: “Whai esẹ, wha ru emọ rai eva dha ha, ogbẹrọ ere he o vẹ te wha oyẹlẹ họ ae oma.” (Ahwo Kọlọsi 3:21) Edhere jọ nọ a re ro ru emọ eva dha họ nọ who gbe bi wo otoriẹ ebẹbẹ gbe edawọ nọ a be rẹriẹ ova ku hu. Oma oruẹrẹ kpahe kẹ edawọ eva isukulu u re muhọ evaọ okegbe ẹzi uwou Oleleikristi.—Iziewariẹ 6:6-9; Itẹ 22:6.

20. Fikieme ẹfuọ ọ jẹ rọ oja k’omai kpobi?

²⁰ Evaọ ukuhọ, fikieme ẹfuọ ọ jẹ rọ oja kẹ omai kpobi? Keme o rẹ thọ omai no ọwhẹruọ akpọ gbe iroro Setan. O rọ oghale enẹna gbe eva obaro. U re fiobọhọ k’omai wo imuẹro uzuazọ enẹna gbe uvi uzuazọ evaọ akpọ ọkpokpọ ẹrẹreokie na. U re fiobọhọ k’omai kpomamu, whoma h’ahwo, gbe Ileleikristi nọ i re yoẹme—orọnikọ ọwhọmuo nọ o rẹ vrẹ ẹta ha. Ẹme na họ, o rẹ lẹliẹ omai jọ wọhọ Kristi.—1 Timoti 6:19.

[Footnotes]

Kọ Whọ Kareghẹhọ?

◻ Fikieme Pita ọ jẹ ruẹ ẹgwọlọ re ọ hrẹ Ileleikristi kpahe ẹfuọ?

◻ Fikieme o gbẹ lọhọ re a yere uzuazọ ofuafo ho?

◻ Eme mai kpobi a rẹ sai ru rọ wha ẹfuọ haro evaọ uviuwou?

◻ Re ukoko na o jọ fuafo, didi uruemu ugbegbe ma rẹ whaha?

◻ Ẹvẹ ma rẹ sae rọ jọ fuafo evaọ obọ iruo gbe obọ isukulu?

[Pictures on pages 26, 27]

Wọhọ Isẹri Jihova, ma rẹ ghọghọ evaọ egagọ Ọghẹnẹ gbe iruẹru efa