Jihova O Re Wuhrẹ Esẹro Nọ E Rẹ Rẹrote Uthuru Riẹ

“ỌNOWO na ọ rẹ kẹ areghẹ, evaọ unu riẹ eriariẹ gbe otoriẹ i re no tha.”—ITẸ 2:6.

 1, 2. Fikieme inievo-emezae nọ e họ-ame no a be rọ gwọlọ te kẹ ewha-iruo efa evaọ ukoko na?

NICK nọ ọ rrọ ọkpako ukoko te ikpe ihrẹ no ọ ta nọ: “Eva e were omẹ gaga okenọ a rehọ omẹ mu ọkpako.” Ọ ta re inọ, “Me rri owha-iruo nana wọhọ uvẹ nọ me re ro ru odibọgba mẹ kẹre evaọ egagọ Jihova. O jọ omẹ eva nọ me re yere iei gaga kẹ eware kpobi nọ o ru kẹ omẹ no. Mẹ tẹ jẹ gwọlọ nọ mẹ rẹ rehọ uvẹ na fi obọ họ kẹ ahwo ukoko na te epanọ o rẹ lọhọ te kpobi, wọhọ epanọ ekpako efa a fi obọ họ kẹ omẹ na.” Ghelọ evawere yena nọ e da riẹ eva fia na, u wo eware efa jọ nọ ọ jẹ ruawa rai. Nick ọ ta haro nọ, “Me te ikpe 30 taure a tẹ te rehọ omẹ mu hu,” fikiere “mẹ tẹ jẹ ruawa nọ me wo eriariẹ te he—otoriẹ gbe areghẹ nọ o gwọlọ—nọ a sae rọ sẹro ukoko na ziezi.”

² Ẹjiroro buobu e riẹ nọ esẹro nọ Jihova o ro mu re a rẹrote uthuru riẹ a rẹ rọ wereva. Nọ ọ jẹ wariẹ ẹme Jesu, Pọl ukọ na ọ kareghẹhọ ekpako obọ Ẹfẹsọs kpahe ẹjiroro jọ nọ a rẹ rọ wereva inọ: “Ẹkẹ oghale o mae rọ vi emio.” (Iruẹru 20:35) Nọ a tẹ rrọ odibo oruiruo hayo ọkpako, u re rovie uvẹ efa fihọ kẹ inievo-emezae nọ e họ-ame no nọ a re ro si obọ no oke rai kẹ Jihova gbe ukoko na. Wọhọ oriruo, idibo iruiruo a re fi obọ họ kẹ ekpako na. A rẹ jẹ rẹrote iruo efa buobu nọ i wuzou, nọ e rẹ rehọ oke. Uyoyou nọ a wo kẹ Ọghẹnẹ gbe erivẹ o be wọ inievo nana ru iruo eghaghae.—Mak 12:30, 31.

 3. Fikieme inievo jọ a je bi wo ehoo nọ a re ro te kẹ ọkwa-iruo evaọ ukoko na?

³ Kọ ẹvẹ kpahe oniọvo-ọmọzae Oleleikristi nọ o wọhọ nnọ o wo ehoo nọ o re ro te kẹ uvẹ-ọghọ orọ odibo oruiruo gbe ọkpako eva oke ofa fikinọ o roro inọ o te kẹ uvẹ-iruo na ha? Wọhọ Nick, ọ rẹ sae ruawa nọ o wo eriariẹ nọ a sae rọ jọ emamọ ọsẹro ho. Wọhọ oniọvo-ọmọzae nọ ọ họ-ame no, kọ whọ rrọ usu ahwo nọ a wo eriwo nana? Awa-ọruẹ yena o gine fo. Esẹro nọ a ro mu a ti guọvunu kẹ Jihova kpahe oghẹrẹ nọ a rẹrote uthuru na. Jesu ọ ta nọ: “Ọnọ a kẹ buobu, a rẹ jọ obọ riẹ guọlọ ibuobu; gbe ọnọ a mu eware buobu họ obọ a rẹ nekpẹ ibuobu obọ riẹ.”—Luk 12:48.

 4. Ẹvẹ Jihova o bi ro fi obọ họ kẹ ahwo nọ o ro mu re a sẹro igodẹ riẹ?

⁴ Kọ Jihova o rẹro nọ ahwo nọ o ro mu wọhọ idibo iruiruo gbe ekpako na ọvo a rẹ wọ owha-iruo na kẹ omarai? Vievie. Ukpoye, orọnikọ obufihọ nọ a sai ro ru iruo na ọvo ọ rẹ kẹ ai hi rekọ te onọ a sae rọ kparobọ. Wọhọ epanọ ma ta evaọ uzoẹme nọ u kpemu na, Jihova ọ rẹ kẹ ai ẹzi ọfuafo riẹ, onọ o rẹ lẹlẹ ai mọ ubi nọ u re fi obọ họ kẹ ai rẹrote igodẹ na avọ ẹwo. (Iruẹru 20:28; Ahwo Galesha 5:22, 23) U te no ere no, Jihova ọ rẹ kẹ ai areghẹ, eriariẹ, gbe orimuo. (Itẹ 2:6) Ẹvẹ o bi ro ru onana? Joma ta ẹme kpahe idhere esa nọ Jihova o bi ro wuhrẹ omomọvo nọ o ro mu re a sẹro igodẹ riẹ.

Esẹro nọ I Wo Eriariẹ I bi Wuhrẹ Ai

 5. Eme o ru nọ Pita avọ Jọn a rọ jọ emamọ esẹro?

⁵ Okenọ Pita avọ Jọn ikọ na a ziọ aro ogbẹgwae Sanhẹdrin na, ibruoziẹ okọto yena nọ i wo eriariẹ akpọ a te je rri ikọ nọ i dikihẹ aro rai na wọhọ ahwo nọ “a wuhrẹ hẹ.” Uzẹme, ikọ na a rẹ riẹ se je kere, rekọ a kpohọ isukulu ọvuọvo erọ ahwo Ju nọ a rẹ jọ wuhrẹ Ikereakere na ha. O make jọ ere na, Pita avọ Jọn gbe ilele efa a jọ obọdẹ iwuhrẹ, iwuhrẹ rai e lẹliẹ ahwo buobu nọ a gaviezọ kẹ ai zihe ruọ ilele. Oghẹrẹ vẹ ahwo gheghe nana a sai ro wo ona uwuhrẹ ga tere? Nọ a gaviezọ kẹ ẹme Pita avọ Jọn no, ogbẹgwae Sanhẹdrin na “a te ti vuhu ai mu no nọ a lele Jesu gbẹjọ.” (Iruẹru 4:1-4, 13) Ẹhẹ, ẹzi ọfuafo na o te rai obọ no. (Iruẹru 1:8) Rekọ o jọ vevẹ re—makọ ibruoziẹ yena nọ i tuaro abọ-ẹzi na a vuhumu inọ Jesu o wuhrẹ ahwo yena. Okenọ ọ jọ kugbe ai eva otọakpọ, orọnikọ epanọ a re ro koko enọ e wọhọ igodẹ họ ọvo o wuhrẹ ikọ na ha, rekọ te epanọ a rẹ rọ sẹro rai nọ a tẹ ziọ uthuru na no.—Matiu 11:29; 20:24-28; 1 Pita 5:4.

 6. Oriruo vẹ Jesu avọ Pọl a fihotọ evaọ amọfa nọ a re wuhrẹ?

⁶ Nọ a kpare Jesu ze no, ọ tẹ ruabọhọ je wuhrẹ esẹro nọ o ro mu na. (Eviavia 1:1; 2:1–3:22) Wọhọ oriruo, ọye ọvo ọ salọ Pọl jẹ ruẹ nọ a wuhrẹ i rie ziezi. (Iruẹru 22:6-10) Pọl o rri uwuhrẹ na ghaghae je wuhrẹ ekpako efa eware nọ a wuhrẹ i rie na. (Iruẹru 20:17-35) Wọhọ oriruo, ọ rehọ oke jẹ daoma gaga wuhrẹ Timoti re ọ ruẹse jọ “oruiruo ọnọ ọ kare omaovuọ” evaọ odibọgba kẹ Ọghẹnẹ. (2 Timoti 2:15) Aimava na a wo obọdẹ usu okpekpe. Pọl o kere kpahe Timoti no vẹre inọ: “Wọhọ ọmọ avọ ọsẹ ere o lele omẹ ru iruo usiuwoma na.” (Ahwo Filipai 2:22) Pọl ọ daoma ru Timoti hayo omọfa jọ zihe ruọ olele obọriẹ hẹ. Ukpoye, ọ ta udu họ ibe enọ e rọwo awọ re a ‘raro kele iei, wọhọ epanọ ọ rọ aro kele Kristi.’—1 Ahwo Kọrint 11:1.

 7, 8. (a) Oriruo vẹ o dhesẹ erere nọ o re noi ze nọ ekpako na a tẹ raro kele oriruo Jesu avọ Pọl? (b) Oke vẹ u fo nọ ekpako a re ro mu inievo-emezae nọ ẹnyaharo rai o dhesẹ nọ a bi ti te kẹ uvẹ-iruo orọ idibo iruiruo gbe ekpako họ ewuhrẹ?

⁷ Evaọ aruorokele Jesu avọ Pọl, esẹro nọ i wo eriariẹ ziezi a rẹ rehọ iroro obọrai kake jowọ nọ a re ro wuhrẹ inievo-emezae nọ e họ ame no, onọ o rẹ wha emamọ iyẹrẹ evona ze. Rri epanọ o jọ kẹ Chad. Ọ whẹro evaọ uviuwou nọ a jarọ jọ ọvuọ egagọ riẹ, rekọ kẹlena a rehọ e riẹ mu ọkpako. Ọ ta nọ: “Anwọ ikpe buobu ze na, ekpako buobu nọ i wo eriariẹ a fi obọ họ kẹ omẹ nya haro no evaọ abọ-ẹzi. Fikinọ ọsẹ mẹ ọ jọ ukoko na ha, o tẹ whae ze nọ ekpako yena a ro wo isiuru kpahe omẹ jẹ jọ wọhọ esẹ abọ-ẹzi kẹ omẹ. A jẹ roma totọ wuhrẹ omẹ evaọ odibọgba na, yọ uwhremuna, ọkpako jọ evaọ usu rai o te wuhrẹ omẹ epanọ mẹ rẹ rọ rẹrote ewha-iruo ukoko na jọ nọ a muhọ omẹ obọ.”

⁸ Wọhọ epanọ oriruo Chad o dhesẹ na, ekpako nọ i wo orimuo a re mu inievo nọ ẹnyaharo rai o dhesẹ nọ a ti te kẹ idibo iruiruo gbe ekpako họ ewuhrẹ oke lelehie tuare a te ti ru ẹnyaharo nọ o te epanọ a rẹ rọ rehọ ai mu ekwa-iruo yena. Fikieme onana u ro wuzou? Fikinọ Ebaibol na e ta nọ ẹfuọ uruemu gbe itee abọ-ẹzi idibo iruiruo gbe ekpako o re kpehru ziezi taure a tẹ te rehọ ai mu kẹ ewha-iruo yena. ‘A rẹ kake jawo ae’ hrọ sọ a te.—1 Timoti 3:1-10.

 9. Owha-iruo vẹ o rrọ kẹ ekpako nọ i wo eriariẹ ziezi, kọ fikieme?

⁹ Re a tẹ dawo inievo nọ e họ-ame no riwi, u fo nọ a rẹ kaki wuhrẹ ai tao. Re a dhesẹ iẹe: Nọ a tẹ ta kẹ ọmọ isukulu jọ nọ o kere ẹdawọ ọgaga jọ nọ iticha na o wuhrẹ i rie kẹ hẹ, kọ ọmọ uwuhrẹ na ọ sae kparobọ evaọ ẹdawọ na? O kẹle otọ họ, o re kie. Onana u dhesẹ nọ ewuhrẹ o roja. Dede na, iticha nọ i muẹrohọ iruo rai ziezi, orọnikọ a re wuhrẹ emọ eklase rai epanọ a rẹ rọ kparobọ evaọ ẹdawọ ọvo ho rekọ te epanọ a re ro fi eware nọ a wuhrẹ na họ iruo evaọ obaro. Epọvo na re, ekpako nọ i wo osegboja a rẹ rehọ ẹkwoma ewuhrẹ fi obọ họ kẹ inievo-emezae nọ e họ-ame no wo iruemu-aghae nọ a gwọlọ mi ahwo nọ a kẹ ewha-iruo. Orọnikọ a re wuhrẹ ai re o ruẹsi fi obọ họ kẹ inievo nana te kẹ uvẹ-iruo ọvo ho rekọ re a sae jẹ rẹrote uthuru na ziezi. (2 Timoti 2:2) Uzẹme, o gwọlọ nọ inievo nọ e họ-ame no a re ru ẹkẹ abọ rai, daoma gaga epanọ a sai ro te utee nọ a gwọlọ mi odibo oruiruo hayo ọkpako. (Taitọs 1:5-9) O make rrọ ere na, esẹro nọ i wo eriariẹ ziezi a rẹ sai fi obọ họ kẹ ai ru ẹnyaharo vẹrẹ vẹrẹ ẹkwoma unevaze nọ a re ro wuhrẹ inievo nọ i bi te kẹ ewha-iruo ukoko na.

10, 11. Ẹvẹ esẹro a sai ro wuhrẹ amọfa kẹ ewha-iruo efa?

¹⁰ Oghẹrẹ vẹ esẹro nọ i wo eriariẹ ziezi a sai ro wuhrẹ amọfa kẹ ẹruorote ewha-iruo ukoko na? Orọ ọsosuọ, a re wo isiuru kpahe inievo nọ e rrọ ukoko na—jọ usu kugbe ai ẹsikpobi evaọ usiuwoma ota je fi obọ họ kẹ ai wo ẹnyaharo evaọ oghẹrẹ nọ a rẹ rọ “yọrọ ẹme uzẹme na ziezi.” (2 Timoti 2:15) Ekpako nọ i wo eriariẹ a re lele inievo yena gbiku kpahe oghọghọ nọ ohwo o re wo nọ ọ tẹ be gbodibo kẹ amọfa gbe evevọwẹ nọ ae omarai ekpako na a bi wo nọ a bi fi itee abọ-ẹzi họ je bi le ai tobọ na. A rẹ jẹ rehọ edhere ẹwo jẹ ugogo iroro jọ kpahe epanọ oniọvo ọ sae rọ nya haro evaọ utee nọ ọ rẹ rọ “jọ oriruo kẹ uthuru na.”—1 Pita 5:3, 5.

¹¹ Nọ a tẹ rehọ oniọvo mu wọhọ odibo oruiruo no, ekpako nọ i wo orimuo a rẹ ruabọhọ wuhrẹ iẹe. Bruce nọ ọ rrọ ọkpako te ikpe buobu no, ọ ta nọ: “Mẹ rẹ gwọlọ keria kẹle odibo oruiruo nọ a ro mu obọ jẹ kiẹ ithubro nọ i no obọ ọrigbo nọ o wo ẹrọwọ avọ areghẹ na ze kugbei. Ma re je se ekpọvio jọ kpobi nọ i wobọ kpahe iruo riẹ na, je lele iei ru iruo bẹsenọ ewha-iruo riẹ na e rẹ reriẹ iẹe obọ.” A rẹ sai je wuhrẹ odibo oruiruo kẹ iweze ẹruorote nọ eriariẹ riẹe e be rro haro na. Bruce ọ ta haro nọ: “Nọ mẹ tẹ wha odibo oruiruo lele oma kpohọ iweze ẹruorote, me re fi obọ họ kẹe salọ igogo ikereakere jọ nọ e rẹ kẹ ọbọga jẹ jọ uduotahawọ kẹ ohwo hayo uviuwou nọ ma bi weze bru na awọ. Re odibo oruiruo ọ ruẹse jọ obọdẹ ọsẹro, u wuzou inọ o re wuhrẹ epanọ a re ro fi Ikereakere na họ iruo evaọ edhere nọ e rẹ rọ nya te ohwo udu.”—Ahwo Hibru 4:12; 5:14.

12. Oghẹrẹ vẹ esẹro nọ i wo ona ziezi a sai ro wuhrẹ ekpako nọ a ro mu obọ?

¹² Esẹro nọ a ro mu obọ a re je wo erere ologbo no ewuhrẹ ọfa ze. Nick nọ ma ta ẹme te eva obehru na ọ ta nọ: “Uwuhrẹ nọ me wo no obọ inievo ivẹ jọ nọ e rrọ esẹro kri no ze u fi obọ họ kẹ omẹ gaga. Inievo ivẹ nana a jẹ hae kaki vuhumu epanọ u fo nọ a re ro ku eme jọ họ nọ e tẹ roma via họ. Ẹsikpobi a jẹ hae roma totọ gaviezọ kẹ omẹ je roro kpahe eriwo mẹ—otẹrọnọ a make rọwokugbe omẹ hẹ. Oghẹrẹ nọ a jẹ hae rehọ omarokpotọ avọ adhẹẹ yerikugbe inievo evaọ ukoko na u wuhrẹ omẹ eware buobu. Ekpako nana a wuhrẹ omẹ epanọ u ro wuzou je fo re a rehọ Ebaibol na ru iruo ziezi avọ ona nọ a te bi ku ebẹbẹ họ hayo tuduhọ amọfa awọ.”

Ẹme Ọghẹnẹ O bi Wuhrẹ Ai

13. (a) Eme o gwọlọ mi oniọvo-ọmọzae re ọ tẹ jọ emamọ ọsẹro? (b) Fikieme Jesu ọ rọ ta nọ: “Ewuhrẹ mẹ ọ rọ ọrobọ mẹ hẹ”?

¹³ Evaọ uzẹme, izi, ehri-izi, gbe iriruo nọ ọsẹro ọ gwọlọ re ọ “ruẹse gba kiete, . . . jẹ thomavẹre kẹ iruo iwoma i ruo kpobi” e rrọ Ẹme Ọghẹnẹ, Ebaibol na. (2 Timoti 3:16, 17) O sae jọnọ oniọvo jọ o kpohọ isukulu ziezi rekọ otoriẹ Ikereakere na nọ o wo gbe oghẹrẹ nọ o bi ro fi ai họ iruo u re ru nọ ọ jẹ jọ emamọ ọsẹro. Kareghẹhọ oriruo Jesu. Ọ jọ ohwo nọ ọ mai wo eriariẹ gbe otoriẹ, ọ tẹ jẹ jọ ọsẹro nọ ọ mai wo areghẹ kparobọ nọ ọ rria akpọ na no; ghele na, ọ rẹro so areghẹ obọ riẹ hẹ nọ o te bi wuhrẹ igodẹ Jihova. Ọ ta nọ: “Ewuhrẹ mẹ ọ rọ ọrobọ mẹ hẹ, rekọ ọrọ ọnọ o vi omẹ.” Eme ọ soriẹ nọ Jesu o ro kpeze adhẹẹ se Ọsẹ obọ odhiwu riẹ wọhọ ọnọ o wuzou uwuhrẹ riẹ? Ọ ta nọ: “Ọnọ ọ be rehọ udu obọ riẹ ta ẹme ọ guọlọ orobọ riẹ.”—Jọn 7:16, 18.

14. Ẹvẹ esẹro a sae rọ whaha orro omobọ rai?

¹⁴ Esẹro omarokpotọ a rẹ whaha orro omobọ rai. Ẹme Ọghẹnẹ a rẹ rehọ uthubro gbe uduotahawọ noze, orọnikọ ereghẹ obọ rai hi. A re vuhumu inọ iruo ọsẹro họ re o fi obọ họ kẹ igodẹ na wo “iroro Kristi,” orọnikọ iroro obọ ekpako na ha. (1 Ahwo Kọrint 2:14-16) Wọhọ oriruo, otẹrọnọ ọkpako nọ o je fi obọ họ kẹ erivẹ orọo jọ ku ebẹbẹ orọo rai họ ọ rehọ eware nọ e via kẹ ọye omariẹ no kẹ ai uthubro ukpọ ehri-izi Ebaibol hayo evuẹ nọ ‘ọrigbo nọ o wo ẹrọwọ avọ areghẹ na’ o kere? (Matiu 24:45) Iruemu-ẹwho e sai kpomahọ uthubro riẹ na, yọ ọ te nya mu umutho eriariẹ nọ o wo. Uzẹme, iruemu-ewho jọ e thọ họ, yọ o sae jọnọ ọkpako na o wo eriariẹ ziezi fiki eware nọ ọ rẹro ruẹ no evaọ uzuazọ. Rekọ igodẹ na e rẹ mai wo erere nọ esẹro a tẹ be ta udu họ ai awọ evaọ edhere nọ a rẹ rọ gaviezọ kẹ uru Jesu gbe ẹme Jihova viukpọ iroro ahwo hayo izi uruemu-ẹwho.—Olezi 12:6; Itẹ 3:5, 6.

‘Ọrigbo nọ O Wo Ẹrọwọ avọ Areghẹ na’ O bi Wuhrẹ Ai

15. Iruo vẹ Jesu ọ kẹ ‘ọrigbo nọ o wo ẹrọwọ avọ areghẹ na,’ kọ eme họ oware jọ nọ u ru nọ utu ọrigbo na o bi ro wo obokparọ?

¹⁵ Esẹro wọhọ Pita, Jọn, gbe Pọl ikọ na a jọ utu ahwo nọ Jesu o dhesẹ wọhọ ‘ọrigbo nọ o wo ẹrọwọ avọ areghẹ na.’ Inievo Jesu erọ otọakpọ nọ a rehọ ẹzi wholo, enọ i wo ẹruore nọ a ti ro su kugbe Kristi evaọ odhiwu aye a ru utu ọrigbo nana via. (Eviavia 5:9, 10) Eva etoke edẹ urere uyero akpọ nana, unu orọ inievo Kristi nana nọ i kiọkọ otọakpọ na e kawo gaga no. Dede na, iruo nọ Jesu ọ kẹ rai—orọ usiuwoma Uvie na nọ a rẹ ta taure urere na o tẹ ze—i bi dhe ẹruẹruọ enẹna vi epaọ ọsosuọ. O make rrọ ere na, utu ọrigbo na o bi ru iruo avọ obokparọ! Eme ọ be wha obokparọ na ze? Oware jọ nọ o be whai ze họ, a wuhrẹ otu ọrọ “igodẹ efa” na re a fi obọ họ kẹ ai evaọ iruo usiuwoma ota gbe ahwo wuhrẹ na. (Jọn 10:16; Matiu 24:14; 25:40) Utu igodẹ efa nana a bi ru abọ ologbo ọrọ iruo na nẹnẹ.

16. Ẹvẹ utu ọrigbo na o bi ro wuhrẹ inievo-emezae nọ a ro mu?

¹⁶ Ẹvẹ utu ọrigbo na o bi ro wuhrẹ igodẹ efa na? Evaọ ikpe-udhusoi ọsosuọ, a kẹ utu ọrigbo na udu nọ a re ro wuhrẹ jẹ rehọ esẹro mu evaọ ikoko na, esẹro na a ve je wuhrẹ ukoko na. (1 Ahwo Kọrint 4:17) Epọvo na o rrọ nẹnẹ. Ugboma Esuo na—utu osese orọ ekpako nọ a wholo nọ i dikihẹ kẹ utu ọrigbo na—a kẹ ahwo ẹro rai udu nọ a re ro wuhrẹ jẹ rehọ idibo iruiruo gbe ekpako mu evaọ ikoko nọ i te idu buobu wariẹ akpọ na họ. U te no ere no, Ugboma Esuo na o wo ọruẹrẹfihotọ isukulu nọ a rẹ jọ wuhrẹ ahwo Ogbẹgwae Uwou-Ogha, esẹro ọnyawariẹ, ekpako, gbe idibo iruiruo na evaọ edhere nọ a sae rọ mae rẹrote igodẹ na. A be jẹ kẹ ekpọvio efa ẹkwoma ileta, izoẹme nọ a kere fihọ Uwou-Eroro Na, gbe ebe efa wọhọ A Koko Omai Họ re Ma Ru Oreva Jihova.a

17. (a) Ẹvẹ Jesu o ro dhesẹ evaifihọ nọ o wo kpahe utu ọrigbo na? (b) Ẹvẹ esẹro a re ro dhesẹ nọ a fi eva họ utu ọrigbo na?

¹⁷ Eva nọ Jesu o fihọ utu ọrigbo na o ga te epanọ ọ rọ rehọ iẹe mu “uzou eware riẹ kpobi”—koyehọ, eware abọ-ẹzi riẹ kpobi nọ e rrọ otọakpọ. (Matiu 24:47) Esẹro nọ a ro mu a re je dhesẹ nọ a fi eva họ utu ọrigbo na ẹkwoma efihiruo ekpọvio nọ a wo no obọ Ugboma Esuo riẹ ze. Ẹhẹ, nọ esẹro na a te bi wuhrẹ amọfa, nọ a tẹ be kẹ uvẹ re Ẹme Ọghẹnẹ o wuhrẹ ai, gbe nọ a te bi fi uwuhrẹ nọ u bi no obọ utu ọrigbo na ze họ iruo, o rẹ wha udhedhẹ ze evaọ udevie uthuru na. Ẹvẹ eva e be were omai te inọ Jihova o wuhrẹ inievo-emezae nọ e be rẹrote inievo nọ e rrọ ukoko Ileleikristi na omomọvo!

[Oruvẹ-obotọ]

Ẹvẹ Whọ te k’Uyo?

• Oghẹrẹ vẹ esẹro nọ i wo eriariẹ ziezi a re ro wuhrẹ amọfa?

• Fikieme esẹro a gbẹ rọ rehọ otoriẹ omobọ rai wuhrẹ hẹ?

• Oghẹrẹ vẹ gbe fikieme esẹro a re ro dhesẹ nọ a fi eva họ utu ọrigbo na?

[Uwoho nọ o rrọ ẹwẹ-obe avọ 25]

Ekpako Ileleikristi a re wuhrẹ uzoge emezae nọ e rrọ ukoko na

[Uwoho nọ o rrọ ẹwẹ-obe avọ 26]

‘Ọrigbo nọ o wo ẹrọwọ avọ areghẹ na’ o bi wuhrẹ ekpako na ziezi