Ọghẹnẹ Ọ be Daezọ Ra

MERI, aye Oleleikristi nọ ọ kpako vrẹ ikpe 40 no, ọ ruẹ uye gaga no evaọ uzuazọ riẹ. Ovrẹ ikpe ikpe no nọ a fa orọo fiki ẹnwae-obro ọzae riẹ. Anwọ okioye, Meri ọ tẹ be thuẹ gaga re ọ ruẹse nya te owha iruo ẹruọsa emọ ene riẹ wọhọ ọyewọ ọvo. Rekọ rite inẹnẹ ọye ọvo ọ gbẹ rọ ghele, yọ ẹsejọ ọkora na o rẹ ga w’umuo ho. U gbe Meri unu n’ikọ, ‘Kọ onana u dhesẹ nọ Ọghẹnẹ ọ be daezọ mẹ hẹ gbe emọ mẹ nọ i wo ọsẹ hẹ?’

Whọ gbẹ te make nyaku ọbẹwẹ otiọye ẹdẹvo ho, ababọ avro, ohrọ Meri o rẹ sae re owhẹ. Mai kpobi a thihakọ uyerakpọ obẹbẹ edawọ no, yọ o rẹ sai gbe omai unu kpahe oke gbe oghẹrẹ nọ Jihova o ti ro fiobọhọ k’omai. Ebẹbẹ enana jọ e rẹ r’oma via fikinọ ma bi koko izi Ọghẹnẹ. (Matiu 10:16-18; Iruẹru 5:29) Efa e rẹ r’oma via fikinọ mai yọ ahwo nọ e gba ha nọ e be rria akpọ nọ Setan o bi suẹ. (1 Jọn 5:19) Pọl ukọ na o kere nọ: “Ma riẹ nọ enama na soso i bi dimẹ eva ọyawo usuovo na rifi enẹna.”—Ahwo Rom 8:22.

Ghele na, uzẹme na nọ whọ rẹriẹ ova ku odawọ ogaga u dhesẹ nọ Jihova o gbabọ k’owhẹ no hayo kọ o wo isiuru kpahe ewoma ra ha ha. Ẹvẹ onana o sai ro muowhẹ ẹro? Kọ eme u dhesẹ nọ Ọghẹnẹ ọ be daezọ ra?

Oriruo Anwae Jọ

Ebaibol na ọ kẹ imuẹro ovevẹ ọrọ ẹruọsa Jihova kẹ omomọvo. Roro kpahe Devidi. Jihova o wo isiuru kẹ othuru-igodẹ ọboba ọnana, ọ rueriẹ wọhọ “ohwo eva riẹ.” (1 Samuẹl 13:14) Uwhremu na, eva okenọ Devidi o je su wọhọ ovie, Jihova ọ tẹ yaa kẹe nọ: “Eria nọ whọ nya kpobi mẹ avọ owhẹ a gbẹ jọ.”—2 Samuẹl 7:9.

Kọ onana u dhesẹ nọ Devidi o je yeri uzuazọ “olọlọhọ,” nọ o kare ọbẹwẹ? Ijo, Devidi ọ rẹriẹ ova ku edawọ egaga taure o te muọ esuo họ gbe evaọ oke esuo riẹ. Eva ikpe buobu taure o te ti zihe ruọ ovie, Sọl Ovie nọ ọ gwọlọ nọ o re kpe i o je lei ababọ eriosehọ. Evaọ etoke uzuazọ riẹ onana, Devidi o kere nọ: “Me kiẹzẹ evie ikpohrokpo . . . emọ-ahwo, ibiakọ rai izuẹ avọ ese.”—Olezi 57:4.

Ghele, evaọ etoke ọbẹwẹ ọnana kpobi u mu Devidi ẹro nọ Jihova ọ jẹ sẹro riẹ. “Who kele unuẹse nọ a gbolo omẹ,” ere o whowho evaọ olẹ se Jihova. Ẹhẹ, rọ kẹ Devidi, o wọhọ nọ Jihova o kere oke ukpokpoma riẹ na kpobi fihọ otọ. Devidi o te fibae nọ: “Fi irui mẹ họ eva [akana] ra! Kọ e gbẹ rọ eva obe ra?”a (Olezi 56:8) Evaọ odhesẹvia ọnana, Devidi o te dhesẹ evaifihọ nọ Jihova ọ riẹ kpahe orọnikọ eyero na ọvo ho rekọ oghẹrẹ nọ u kpomahiẹe te.

Evaọ ubrobọ urere uzuazọ riẹ, Devidi ọ tẹ sai kere ẹkwoma oware nọ ọ rẹro ruẹ ze a nọ: “Ẹnyonya ohwo obọ ỌNOWO o re no tha, o re ru edhere ọnọ ọ were riẹ dọmuẹ. Ọ tẹ make kie dede, a te nwane vu ei wa nọ o kie kpare ohọe he, keme ỌNOWO o ti kri ei dikihẹ.” (Olezi 37:23, 24) Whẹ omara whọ sai wo evaifihọ otẹ make rọnọ edawọ i kri no je bi siotọ dede, Jihova ọ be ruẹ je bi rri akothiwo ra ghaghae. Pọl o kere nọ: “Keme Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ ruẹ gbe epanọ wha be ga erezi na, wọhọ epa o nọ wha ruẹabọhọ na.”—Ahwo Hibru 6:10.

Ofariẹ, Jihova ọ rẹ sae jowọ fiki ra ẹkwoma ẹgba nọ ọ rẹ k’owhẹ re who thihakọ ezadhe kpobi nọ a fihọ edhere ra. Devidi o kere nọ: “Ikpokpoma ohwo okiẹrẹe e rẹ jọ buobu; rekọ ỌNOWO ọ rẹ te thọ e no ae kpobi.” (Olezi 34:19) Eva uzẹme, Ebaibol na ọ ta k’omai nọ ibiaro Jihova “e rẹ nya akpọ na re re o dhesẹ ẹgba riẹ rọ kẹ enọ i wo eva efuafo rọ kpahe iẹe.”—2 Iruẹru-Ivie 16:9.

Jihova O Si Owhẹ gb’Oma No

Imuẹro efa ọrọ ẹruọsa obọ Jihova a rẹ sae rue rai evaọ eme Jesu. Ọ ta nọ: “Ohwo ọvo ọ sai bru omẹ tha ha ajokpa nọ Ọsẹ nọ o vi omẹ ze o si rie.” (Jọn 6:44) Ẹhẹ, Jihova o re fiobọhọ k’ahwo omomọvo re ma sai mi uvẹ irere idhe Kristi. Evaọ oghẹrẹ ovẹ? Evaọ abọ ologbo, ẹkwoma iruo usiuwoma ota Uvie na. Uzẹme, iruo enana e wọhọ “isẹi kẹ erẹwho akpọ na kpobi,” ghele o re wuhrẹ omomọvo. Uzẹme na nọ whọ be gaviezọ je bi ru lele ovuẹ usiuwoma na yọ imuẹro inọ Jihova o wo ọdawẹ kẹ owhẹ.—Matiu 24:14.

Ẹkwoma ẹzi ọfuafo, Jihova o re je si omomọvo bru Ọmọ riẹ gbe ẹruore uzuazọ ebẹdẹ bẹdẹ. Onana o rẹ lẹliẹ kohwo kohwo wo otoriẹ izẹme ẹzi je fi ai họ iruo ghele ebẹbẹ hayo sebaẹgba nọ a reuku rai. Eva uzẹme, ohwo ọ rẹ sai wo otoriẹ ẹjiroro Ọghẹnẹ ababọ obufihọ ẹzi Ọghẹnẹ hẹ. (1 Ahwo Kọrint 2:11, 12) Wọhọ epanọ Pọl o kere se ahwo Tẹsalọnika, ahwo “kpobi a wo ẹrọwọ họ.” (2 Ahwo Tẹsalọnika 3:2) Ahwo nọ i dhesẹ unevaze ọvo Jihova ọ rẹ kẹ ẹzi riẹ.

Jihova o re je siwi ahwo keme o you rai kohwo kohwo ọ tẹ jẹ gwọlọ nọ a nyate esiwo. Ẹvẹ imuẹro ẹruọsa Jihova ọnana ọ ga te! Jesu ọ ta nọ: “Ọsẹ mẹ nọ ọ rọ obọ odhiwu ọ guọlọ nọ ọvo eva emaha enana o vru hu.” (Matiu 18:14) Ẹhẹ, kohwo kohwo evaọ aro Ọghẹnẹ ọ r’oja. Oye jabọ nọ Pọl ọ sai ro kere nọ: “Ọ rẹ te hwa osa kẹ kohwo kohwo epanọ iruo riẹ e rọ.” (Ahwo Rom 2:6) Yọ Pita ukọ na ọ ta nọ: “Ọghẹnẹ ọ rọ [ọriẹwẹ hẹ], rekọ eva korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.”—Iruẹru 10:34, 35, NW.

Iruo Igbunu Jesu

Isiuru nọ Ọghẹnẹ o wo kẹ ahwo u dhesẹ oma via evaọ eware igbunu nọ Ọmọ riẹ, Jesu, o ru. Ororokẹ nọ u no eva ze u lele esiwo ọnana. (Mak 1:40, 41) Nọ o rọ nọ Jesu “ọ sai ru oware ovo ho, rekọ epanọ ọ ruẹ Ọsẹ nọ o re ruo” na, ọdawẹ riẹ o tẹ roma urirẹ dhesẹ ọdawẹ Jihova kẹ idibo riẹ ọvuọvo.—Jọn 5:19.

Dai roro kpahe oware ugbunu jọ nọ Jesu o ru, nọ a kere fihọ Mak 7:31-37. Evaọ etenẹ Jesu ọ jọ siwi ọzae nọ o diezọ gbe ọnọ ọ jẹ t’ẹme gba ha. Ebaibol na ọ ta nọ: “O te si [ọzae na] no otu obuobu na.” U no ere no, “O ri ehru no, o te kuẹwẹ, ọ tẹ ta kẹe nọ, ‘Efata,’ oye na yọ, ‘Wha rovie.’ ”

Fikieme Jesu ọ jẹ rehọ ọzae na no ogbotu na? O wọhọ nọ ohwo odiezọ nọ ọ rẹ sae t’ẹme he o re ti guegue evaọ iraro ahwo. Ẹsejọhọ Jesu o muẹrohọ eguegue ọzae ọnana, fikioye ọ jẹ sa nọ o re siwi iei evaọ idhere. Enẹ ọgba eriariẹ Ebaibol jọ o muẹrohọ: “Ikuigbe na kpobi i te dhesẹ k’omai vevẹ inọ orọnikọ Jesu o riwi ohwo na fihọ ọnọ ọ be mọ gheghe he, rekọ o rri rie wọhọ uvi ohwo. Ọzae na o wo ẹgwọlọ gbe ẹbẹbẹ obọdẹ, yọ avọ ororokẹ owowolẹ nọ ohwo ọ sae roro ku kpobi Jesu o te yeri kugbei evaọ edhere nọ o lẹliẹ udu riẹ totọ nọ ẹgba riẹ u te.”

Ikuigbe enana i dhesẹ k’omai nọ Jesu o wo ọdawẹ kẹ ahwo. U re je muowhẹ ẹro nọ ere o wo isiuru k’owhẹ re. Uzẹme, uwhu idheidhe riẹ yọ odhesẹvia uyoyou kẹ akpọ ahwo nọ e te zọ kpobi. Ghele, whọ rẹ sae j’owọ oyena k’omobọ ra, wọhọ epanọ Pọl o ru, ọnọ o kere nọ: “Ọmọ Ọghẹnẹ . . . o you omẹ, nọ ọ jẹ rehọ oma riẹ kẹ omẹ.” (Ahwo Galesha 2:20, ẹjẹlẹ ibieme na ọmai.) Yọ nọ Jesu o dhesẹ nọ “ọ nọ ọ ruẹ omẹ ọ ruẹ Ọsẹ na” no, o rẹ sai mu omai ẹro nọ Jihova o wo oghẹrẹ isiuru itieye na kẹ idibo riẹ ọvuọvo.—Jọn 14:9.

Jihova O Zihe ruọ Ọnọ Ọ rẹ Hwosa

Re a wo eriariẹ Ọghẹnẹ u kugbe ẹnyaze te riẹ abọ ọvuọvo oghẹrẹ ohwo nọ ọrọ nọ a dhesẹ evaọ Ebaibol na. Otofa odẹ na Jihova họ “Ọye O re Ru Via,” nọ u dhesẹ nọ Jihova o re zihe ruọ oware kpobi nọ u je rie re ọ ruẹse wha oreva riẹ haro. Notọ avọ otọ ze, o nwene oma riẹ evaọ iruo oghoghẹrẹ no, nọ u kugbe erọ Ọnọma, Ọsẹ, Olori Osu, Othuru, Jihova ogbaẹmo, Ọnọ o re yo olẹ, Obruoziẹ, Owuhrẹ Ologbo, gbe Ọnọ Ọ rẹ Ta Ahwo.b

Re ma wo otoriẹ odẹ Ọghẹnẹ vọvọ, ma rẹ jẹ nyaze te riẹ Jihova wọhọ Ọnọ Ọ rẹ Hwosa. Pọl o kere nọ: “O rẹ bẹbẹ re ohwo ọ were Ọghẹnẹ ababọ ẹrọwọ. Keme ohwo kpobi nọ o bikẹle Ọghẹnẹ ọ rẹ rọwo nọ Ọghẹnẹ ọ rọ, jegbe ọ rẹ te hwosa kẹ e nọ e guọlọ e riẹ.”—Ahwo Hibru 11:6.

Jihova ọ yeyaa uzuazọ ebẹdẹ bẹdẹ evaọ aparadase otọakpọ kẹ ahwo nọ e salọ nẹnẹ nọ a rẹ gọe n’eva ze. O rọ oware oriobọ họ re ohwo o riwi kpohọ orugba eyaa oruaro yena, hayo kọ o rọ omoya gbe he re ohwo o roro oma riẹ nọ ọ be rria etẹe. Mosis ‘ọ kparo ruẹ osohwa na.’ (Ahwo Hibru 11:26) Epavo na Pọl ọ rọ okpakpa je rẹro orugba eyaa Ọghẹnẹ rọ kẹ Ileleikristi ẹrọwọ nọ a kẹ ẹzi. O kere nọ: “Me bi tunye haro rri [kpohọ osa use obọ ehru, NW ] enọ Ọghẹnẹ o se eva Kristi Jesu.”—Ahwo Filipai 3:14.

Whọ sai rri kparo kpohọ osohwa nọ Jihova ọ yaa kẹ enọ i thihakọ re. Re whọ hẹrẹ osohwa oyena yọ abọ ologbo ọrọ eriariẹ Ọghẹnẹ ra gbe ithihakọ ra evaọ egagọ riẹ. Fikiere roro kẹdẹ kẹdẹ kpahe eghale nọ Jihova ọ ruẹrẹ họ k’owhẹ. Meri, ọnọ ma fodẹ evaọ emuhọ na, o ru omodawọ obọdẹ no re ọ ruẹse ru onana. Ọ ta nọ: “Evaọ oke ọsosuọ evaọ uzuazọ mẹ, mẹ tẹ te rọwo inọ idhe ẹtanigbo Jesu u kie kpahe omẹ. Me muhọ eroro no inọ Jihova ọ be daezọ mẹ wọhọ ohwo. Mẹ rọ Oleleikristi bu viọ ikpe 20 no, rekọ u ri kri nọ me ro ghine muọ onana họ ẹrọwo ho.”

Ẹkwoma ewuhrẹ gbe eroro didi kpahe Ebaibol na, Meri, kugbe ima ahwo efa, a nyaze ti wuhrẹ no nọ Jihova ọ be daezọ ahwo riẹ orọnikọ evaọ ogbotu ọvo ho rekọ kohwo kohwo. Onana u mu Pita ukọ na ẹro te epanọ o ro kere nọ: “Fi iroro ejẹ ra kpobi kpahe [Ọghẹnẹ] keme ọye ọ be sẹro ra.” (1 Pita 5:7) Ẹhẹ, Ọghẹnẹ ọ be ghinẹ daezọ ra!

[Footnotes]

[Box on on page 6]

Ẹkparomatha na—Oka-Imuẹro nọ Ọghẹnẹ Ọ be Daezọ

IMUẸRO nọ i dhesẹ isiuru Ọghẹnẹ k’omai omomọvo a rẹ rue rai evaọ Ebaibol na eva Jọn 5:28, 29: “Oke o be tha nọ enọ e rọ eva [iki ekareghẹhọ] kpobi i je ti yo urru riẹ, a vẹ te nya via.”

U woma kẹhẹ, inọ ubiẹme ahwo Grik mne·meiʹon (iki ekareghẹhọ) oye a jọ etenẹ ro ruiruo viukpọ taʹphos (uki). Ubiẹme na taʹphos o faki wo otofa ukio gheghe ọvo. Rekọ mne·meiʹon u dhesẹ nọ iruo ohwo nọ o whu no na a be kareghẹhọ ai.

Evaọ ẹme ọnana, dai roro kpahe oware nọ ẹkparomatha na ọ te gwọlọ mi Jihova Ọghẹnẹ. Re a rehọ ohwo zihe ziọ uzuazọ, ọ rẹ riẹ eware kpobi kpahe ohwo ọyena—kugbe iruemu nọ ọ reuku riẹ gbe iroro riẹ kpobi. Ere ọvo a sai ro zihe ohwo na ze avọ oghẹrẹ ovo na nọ ọ jọ vẹre.

Evaọ uzẹme, onana o re bẹbẹ evaọ eriwo ohwo, rekọ “Ọghẹnẹ ọ rẹ sai ru eware kpobi.” (Mak 10:27) Ọ rẹ sai tubẹ riẹ oware nọ o rọ udu ohwo. Otẹ make rọnọ ohwo o whu te ikpe udhusoi buobu no, ekareghẹhọ Ọghẹnẹ kpahe ohwo ọyena i re vru hu; e rẹ hiẹ hẹ. (Job 14:13-15) Fikiere, nọ ọ jẹ fodẹ Abraham, Aiziki, gbe Jekọp, Jesu ọ sae ta makọ ikpe udhusoi buobu nọ a whu no inọ Jihova “yọ Ọghẹnẹ, orọnikọ ọrọ ahwo iwhuowhu hu, rekọ ọ rọ enọ erọ uzuazọ, keme ahwo na kpobi a be rria kẹe.”—Luk 20:38, NW.

Fikiere, ima-idu ahwo nọ i whu no a ghinẹ rọ ekareghẹhọ Jihova Ọghẹnẹ. Ẹvẹ onana o rọ oka-imuẹro igbunu te inọ Ọghẹnẹ ọ be daezọ ahwo-akpọ omomọvo!

[Pictures on page 7]

Jesu o wo isiuru kẹ ahwo nọ o siwi