“Gaviezọ Vi Epaọ Ọsosuọ”

“U fo re ma gaviezọ vi epaọ ọsosuọ kẹ eware nọ ma yo na, re ma seba ereghe.”—AHWO HIBRU 2:1, NW.

 1. Dhesẹ epanọ iroro nọ e rrọ oria ovo ho o sai ro su kpohọ okpẹtu.

ASIDẸNTE omoto ọ be hai kpe ahwo nọ a bu te 37,000 k’ukpe k’ukpe evaọ United States ọvo. Ewena e ta nnọ a hae whaha iwhu enana buobu o hae jọ nnọ edraeva a bi muẹrohọ edhere na ziezi. Eware nọ a kere hayo ebe nọ a ta mu akotọ edhere hayo ifonu nọ i wo ufi hi e be rehọ iroro edraeva jọ. Edraeva efa e riẹ nọ e rẹ re emu yọ a be dhẹ omoto. Evaọ iyero enana kpobi, iroro nọ e rrọ oria ovo ho o rẹ sai su kpohọ okpẹtu.

 2, 3. Didi ohrẹ Pọl ọ rọ kẹ Ileleikristi Hibru, kọ fikieme ohrẹ riẹ u je fo?

² Enwenọ ikpe 2,000 taure a te ti mu imoto họ eku, Pọl ukọ na ọ fodẹ oware jọ nọ o rẹ rehọ iroro nọ o jẹ wha okpẹtu se Ileleikristi Hibru jọ. Pọl o fiẹgba họ iẹe nnọ a kẹ Jesu Kristi nọ ọ kparoma ze no na ọkwa okpehru ọnọ o vi orọ enjẹle na kpobi, keme a rehọ e riẹ keria obọze Ọghẹnẹ. Ukọ na ọ tẹ ta nọ: “Oye jabọ nọ u je fo re ma gaviezọ vi epaọ ọsosuọ kẹ eware nọ ma yo na, re ma seba ereghe.”—Ahwo Hibru 2:1, NW.

³ Fikieme u je fo re Ileleikristi Hibru na a “gaviezọ vi epaọ ọsosuọ ke eware nọ a yo” kpahe Jesu na? Keme enwenọ ikpe 30 e vrẹ no nọ Jesu o ro no akpọ na. Nọ Olori rai ọ gbẹ riẹ hẹ na, Ileleikristi Hibru jọ a muhọ ereghe no uvi ẹrọwọ na no. Egagọ ahwo Ju, enọ a jọ vẹre, e be rehọ iroro rai no.

U fo re A Gaviezọ Viere

 4. Ẹsejọhọ fikieme Ileleikristi Hibru jọ a je ro si urru ezihe kpohọ egagọ ahwo Ju?

⁴ Fikieme Oleleikristi o je si urru ezihe kpohọ egagọ ahwo Ju? Whaọ, oghẹrẹ egagọ nọ e jọ otọ Uzi na i wo eware nọ a rẹ ruẹ. Ahwo a rẹ sae ruẹ izerẹ na je s’ore idhe nọ a be mahe. Rekọ evaọ idhere jọ, Egagọ-Ileleikristi i wo ohẹriẹ. Ileleikristi a wo Ozerẹ Okpehru, Jesu Kristi, rekọ u te ọgb’ikpe no nọ a gbẹ te rọ jọ otọakpọ na rue riẹ hẹ. (Ahwo Hibru 4:14) A wo etẹmpol, rekọ odhiwu họ oria ọrẹri riẹ. (Ahwo Hibru 9:24) Wo ohẹriẹ no oyawo oma nọ o jọ otọ Uzi na, oyawo Ileleikristi yọ “ọrọ obọ eva; gbe ẹzi.” (Ahwo Rom 2:29) Fikiere, rọ kẹ Ileleikristi Hibru na, Egagọ-Ileleikristi i zihe ro oware nọ o rrọ iroro gheghe no.

 5. Ẹvẹ Pọl o ro dhesẹ nọ oghẹrẹ egagọ nọ Jesu o muhọ u kpehru vi onọ o jọ otọ Uzi na?

⁵ U fo re Ileleikristi Hibru na a vuhu oware jọ nọ u wuzou gaga mu kpahe oghẹrẹ egagọ nọ Kristi o ro mu na. O mae rọ oma hwa ẹrọwọ orọnikọ oware nọ a rẹ ruẹ hẹ, ghele na u kpehru vi Uzi nọ a kẹ rai ẹkwoma Mosis ọruẹaro na. Pọl o kere nọ: “Keme otẹrọ nọ azẹ ewe gbe ọ rọ igodẹ gbe enwo emọ eruẹ ọzae nọ a frẹ kuọ ahwo nọ a zue oma o tete epanọ o re ru uwo fua, kọ ẹvẹ o rẹ ro ute re azẹ Kristi ọ nọ ọ rọ fiki Ẹzi ebẹdẹ bẹdẹ rọ oma riẹ gọ iwẹ nọ ekare a fuẹwẹ rọ kẹ Ọghẹnẹ, ọ rẹ fa iroro eva rai fua no iruo iwhuowhu re wha gọ Ọghẹnẹ uzuazọ.” (Ahwo Hibru 9:13, 14) Ẹhẹ, erọvrẹ nọ ma re wo fiki ẹrọwọ nọ ma fihọ idhe ẹtanigbo Jesu Kristi u kpehru gaga evaọ idhere buobu vi erọvrẹ nọ a re wo ẹkwoma idhe nọ a jẹ jọ otọ Uzi na dhe.—Ahwo Hibru 7:26-28.

 6, 7. (a) Didi uyero u ru rie kpatakpata re Ileleikristi Hibru na a ‘gaviezọ vi epaọ ọsosuọ kẹ eware nọ a yo’? (b) Okenọ Pọl o kere ileta riẹ se ahwo Hibru, bro oke u kiọkọ kẹ Jerusalẹm? (Rri oruvẹ-obotọ na.)

⁶ Ẹjiroro ọfa jọ ọ jariẹ nọ u je fo re Ileleikristi Hibru a gaviezọ ziezi kẹ eware nọ a yo kpahe Jesu. Ọ ruẹaro nnọ a te raha Jerusalẹm. Jesu ọ ta nọ: “Edẹ jọ ete tha, nọ ewegrẹ ra e rẹ te tọ ewala wariẹ owhẹ, a vẹ te keria [wariẹ] owhẹ, a re ti je owhẹ nya via eva kabọ kabọ họ. A rẹ te raha owhẹ muotọ jegbọ emọ ra; a rẹ te siọ utho ovo ba ehru o jọ eva ra ha; keme whọ riẹ okenọ a bi ro bru owhẹ tha ha.”—Luk 19:43, 44.

⁷ Okevẹ onana o te rọ via? Jesu ọ fodẹ ẹdẹ gbe auwa na ha. Ukpoye, ọ kẹ uthubro nana: “Rekọ nọ wha rẹ te ruẹ Jerusalem nọ itu ẹmo e wariẹ họ, kẹsena wha rẹ riẹ nọ ẹraha riẹ ọkẹle ino. Kẹsena e nọ e rọ evaọ Judia evẹ dhẹ kpo igbehru, e nọ e rọ evaọ ẹwho a ru re a noi hi, te enọ e rọ ẹwho ho a gbẹ ruọ eva riẹ hẹ.” (Luk 21:20, 21) Evaọ etoke ikpe 30 nọ i lele i rie nọ Jesu ọ ta eme eyena no, Ileleikristi jọ evaọ Jerusalẹm a te fi oma ovẹrẹ rai h’otọ, a te reghe. O tẹ wọhọ ẹsenọ ohwo nọ ọ be dhẹ omoto o si ẹro no edhere no. A gbe nwene iroro rai hi, okpẹtu ọ te se ae ba ete he. Makọ a je roro iei ere hayo a roro i rie ere he, ọraha Jerusalẹm ọ kẹlino!a Ma rẹro nọ uthubro Pọl na o rọwo Ileleikristi nọ e jọ owezẹ abọ-ẹzi evaọ Jerusalẹm no owezẹ rai ze.

‘Ezọgaviẹ Vi Epaọ Ọsosuọ’ Nẹnẹ

 8. Fikieme u je fo re ma “gaviezọ vi epaọ ọsosuọ” kẹ uzẹme Ẹme Ọghẹnẹ?

⁸ Wọhọ Ileleikristi ikpe-udhusoi ọsosuọ, u fo re ma “gaviezọ vi epaọ ọsosuọ” kẹ uzẹme Ẹme Ọghẹnẹ. Fikieme? Keme ma rẹriẹ ovao ku ọraha re, orọnikọ rọ kẹ orẹwho ovo jọ họ, rekọ ọrọ uyerakpọ na kpobi. (Eviavia 11:18; 16:14, 16) Uzẹme, ma riẹ uzedhe ẹdẹ gbe auwa nọ Jihova ọ te rọ j’owọ nana ha. (Matiu 24:36) Ghele na, ma be ruẹ orugba eruẹaruẹ Ebaibol nọ i dhesẹ vevẹ inọ ma be rria “edẹ urere” na. (2 Timoti 3:1-5) Fikiere, ma rẹ yọroma kpahe oware kpobi nọ o rẹ sai reghe omai. U fo re ma gaviezọ kẹ Ẹme Ọghẹnẹ je wo oma ovẹrẹ. Evaọ ere oruo ọvo ma sae rọ “va eware nana kpobi abọ, enọ i re ti ruẹ na.”—Luk 21:36.