Wuhrẹ No Ẹme Ọghẹnẹ Ze

Eme Ọ te Via Evaọ Ẹdẹ Ẹdhoguo?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

 1. Eme họ Ẹdẹ Ẹdhoguo?

Wọhọ epanọ uwoho nọ o rrọ obọze na u dhesẹ na, ahwo buobu a roro nọ evaọ Ẹdẹ Ẹdhoguo, a rẹ te rehọ ima-idu ahwo buobu ziọ aro agbara-uvie Ọghẹnẹ re a rọ eware nọ a ru evaọ oke nọ u kpemu ro gu ai ẹdhọ, ejọ i ti kpohọ odhiwu, efa e vẹ te re-oja evaọ erae ehẹle. Rekọ Ebaibol na u dhesẹ nọ Ọghẹnẹ ọ te rọ ẹkwoma Ẹdẹ Ẹdhoguo siwi ahwo no okienyẹ. (Olezi 96:13) Ọghẹnẹ ọ rehọ Jesu mu re ọ jọ Oguẹdhọ, ọnọ ọ rẹ te wha uvioziẹ se ahwo-akpọ.—Se Aizaya 11:1-5; Iruẹru Ikọ Na 17:31.

 2. Ẹvẹ Ẹdẹ Ẹdhoguo ọ te rọ wha uvioziẹ ze?

Nọ Adamu, ọzae ọsosuọ na o keke aro fihọ ghẹmeeyo kẹ Ọghẹnẹ, ọ tẹ rọ ere wha uzioraha, uye-oruẹ, gbe uwhu se emọ riẹ kpobi. (Ahwo Rom 5:12) Re a sai si ai no igbo uzioraha yena, Jesu ọ te kpare ima-idu ahwo buobu zihe ziọ uzuazọ. Obe Eviavia o ta nọ onana u ti rugba evaọ oke esuo odu-ikpe Jesu Kristi na.—Se Eviavia 20:4, 11, 12.

A ti gu enọ a kpare ze na ẹdhọ, orọnikọ fiki eware nọ a ru taure a te ti whu hu, rekọ fiki eware nọ a ru evaọ okenọ a ti ro rovie ‘iko-ebe’ nọ a jọ obe Eviavia izou 20 fodẹ na. (Ahwo Rom 6:7) Pọl ukọ na ọ ta nọ a te kpare “enọ ikiete avọ enọ ikiete he” ziọ uzuazọ.—Se Iruẹru Ikọ Na 24:15.

 3. Eme ọ te via evaọ Ẹdẹ Ẹdhoguo?

A te kpare ahwo nọ e sai yo kpahe Ọghẹnẹ hẹ ziọ uzuazọ, a vẹ kẹ ae uvẹ re a wuhrẹ kpahe iẹe je ru onọ u woma. A te ru ere, ẹkparomatha rai o rẹ te jọ ‘ẹkparomatha ruọ uzuazọ.’ Rekọ ahwo jọ nọ a te kpare ze na a te gwọlọ wuhrẹ kpahe Jihova ha. Ẹkparomatha rai o rẹ te jọ ‘ẹkparomatha ruọ oziẹobro.’—Se Jọn 5:28, 29; Aizaya 26:10; 65:20.

Nọ esuo odu-ikpe Jesu ọrọ Ẹdẹ Ẹdhoguo na o te kuhọ no, yọ Jihova o zihe ahwo-akpọ nọ i yoẹme kẹe ziọ ẹgbagba no. (1 Ahwo Kọrint 15:24-28) Onana yọ irẹro igbunu nọ o rrọ obaro be hẹrẹ enọ i yoẹme kpobi. Ọghẹnẹ o ti siobọno Setan Ẹdhọ na, ọnọ a fihọ ọgọdọ-odidi evaọ odu-ikpe na re ọ dawo ahwo, onọ o te jọ odawọ urere. Setan ọ te wariẹ daoma re o ru ahwo ghẹmeeyo kẹ Jihova, rekọ enọ e siọ Setan a rẹ te reawere uzuazọ evaọ otọakpọ na bẹdẹ bẹdẹ.—Se Aizaya 25:8; Eviavia 20:7-9.

 4. Ẹdẹ ẹdhoguo ọfa vẹ o te wha erere se ahwo-akpọ?

Ebaibol na o rehọ ẹme na, “ẹdẹ oziẹobro” hayo ẹdẹ ẹdhoguo rọ ta ẹme kpahe oware nọ o te rehọ eyero-akpọ nana te oba. Ẹdẹ ẹdhoguo nana ọ rẹ te ze idudhe, wọhọ epanọ Owhe-Ologbo edẹ Noa o ze idudhe na, onọ o raha ahwo omuomu oke yena kpobi kufiẹ na. O rrọ oware evawere inọ ọraha nana nọ ọ kẹlino no na o te raha “otu nọ ekare erọ Ọghẹnẹ,” je ru nọ akpọ ọkpokpọ nọ “ẹrẹreokie ọ be ria” ọ te rọ ze.—Se 2 Pita 3: 6, 7, 13.

Re whọ gbẹ riẹ kpahe ẹme nana, rri ẹwẹ-obe avọ 213-215 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 24]

“Ẹdhoguo urere na,” uwoho nọ gustave doré, 1832-1883, ọ drọ

[Ọnọ o wo uwoho]

Onọ Doré o ru