Hẹrẹ avọ Odiri

OTHURU-IGODẸ nọ o je mu bo nnọ “Adaka!” ọ tẹ ruẹ nọ ohwo ọvo ọ kezọ họ nọ ọ wariẹ b’ubo kẹ obufihọ. Epọvona nẹnẹ, ahwo buobu a bi gbolo aro kẹ ẹkẹle ẹdẹ Jihova keme a yo unuovẹvẹ buobu nọ i rugba ha no. Uzẹme na inọ ibuobu a bi vuhu unuovẹvẹ uzẹme na mu re a yoi hi a te bi kie ruọ obọ Setan, ọwegrẹ ologbo Ọghẹnẹ, ‘ẹnjẹle elo’ ọrue na.—2 Ahwo Kọrint 11:14.

Ẹzi ababọ-ezọdawo o rẹ jọ enwoma makọ rọ kẹ enọ e gọ Jihova kri no. Fikieme? Roro kpahe unuovẹvẹ Pita ukọ na evaọ ikpe-udhusoi ọsosuọ.

Roro Vevẹ

Ileta avivẹ Pita nọ a kẹ ẹgba o jọ ekareghẹhọ kẹ Ileleikristi ọsosuọ, yọ o rọ ere k’omai re. O kere nọ: “Onana họ obe ovuẹ avivẹ no me kere se owhai iyoyou mẹ, mẹ jọ eva rai ivẹ na rọ edhere ekareghẹhọ jaja iroro rai vi.” (2 Pita 3:1) Eme ọ lẹliẹ Pita wo ọdawẹ ọnana? Pita o fiẹgba họ eme ọ ise-ẹkoko nọ e jariẹ nọ e be rehọ ẹkoko rai galova ahwo no osegboja nọ a wo kẹ etoke ovẹrẹ nọ idibo Ọghẹnẹ a jẹ rria. Enẹna họ oke nọ ma rẹ rọ yọrọ oma kẹ ekie kẹ ise-ẹkoko. Fikiere Pita ọ tẹ kpakpa enọ i bi se ovuẹ riẹ re a “wo ekareghẹhọ eware nọ eruẹaro ẹri na e ta.” (2 Pita 3:2; Iruẹru 3:22, 23) Eme eruẹaro na a ta no vẹre?

Idibo ẹrọwọ Ọghẹnẹ a fodẹ epanọ ẹdhoguo Ọghẹnẹ ọ rọ rehọ oba te emuemu unuẹse buobu no. Pita ọ kareghẹhọ enọ i bi se ovuẹ riẹ kpahe Ẹvo ẹdẹ Noa nọ Ọghẹnẹ ọ rọ j’owọ okenọ eyoma ọ vọ otọakpọ na. Ẹvo ologbo ọyena ọ raha akpọ oke oyena muotọ. Rekọ Ọghẹnẹ o siwi Noa gbe uviuwou riẹ evaọ okọ kugbe erao nọ a salọ no udevie “eware kpobi nọ i wo uzuazọ” ze. Ikuigbe nọ e rọ oria kpobi i s’isẹi kẹ ẹgbagba ekere Ebaibol ọnana.a—Emuhọ 6:19; 2 Pita 3:5, 6.

Pita o se omadhehọ Ọghẹnẹ oyena ‘uzẹme nọ u vru no iroro’ ahwo jọ. A te su amọfa kie ruọ oyẹlẹ fiki ise-ẹkoko edẹ eyena. Oware nọ Jihova o ru no o rẹ thọrọ omai ẹro ho. Pita ọ ta k’omai nọ: “Rekọ jẹ ruọ ẹme ọvo na a rọ ruẹrẹ ihru gbe akpọ nọ erọ enẹna kpahe kẹ erae, enọ a ruẹrẹ kpahe bọ ẹdẹ oziẹobro gbe ẹraha otu nọ ekare erọ Ọghẹnẹ.” (2 Pita 3:7) Ẹhẹ, omadhehọ Ọghẹnẹ o te wariẹ via.

O rẹ Kpẹlẹ Ọghẹnẹ Obọ Họ

Idu-ikpe buobu e vrẹ no. Fikieme Ọghẹnẹ ọ jẹ hẹrẹ kri t’enẹ re o te furie ebẹbẹ ahwo-akpọ? Pita ọ wariẹ riobọ kpohọ uzẹme ofa. Ọ ta nọ: “Rekọ, iyoyou, wha ri uzẹme ovo nana evevere he, nnọ, ẹdẹ ọvo ọ rọ aro Ọnowo na wọhọ odu-ikpe, jegbe odu-ikpe, e wọhọ ẹdẹ ọvo.” (2 Pita 3:8) Epanọ Jihova o re rri oke u wo ohẹriẹ no omai. Rọ kẹ Ọghẹnẹ ebẹdẹ na, n’umuo okenọ a rọ ma Adamu rite obọnana u ri te ẹkpoka dede he. Rekọ epanọ eriwo oke mai o rọ kpobi, odu-ikpe gbe okpẹdẹ kpobi nọ o vrẹ u bi si omai kẹle orugba ẹjiroro Jihova.

“Ẹbẹ nọ a rẹ hẹrẹ ọ rẹ kaki ye he” yọ ẹme nọ o dhesẹ nọ oware nọ a be hẹrẹ u re lehie viofa. Dede na, Pita ọ j’iroro ‘ẹhẹrẹ gbe irẹro ẹtha ẹdẹ Ọghẹnẹ.’ (2 Pita 3:12) Ẹvẹ ma re ro wo uruemu nọ o rẹ lẹliẹ omai jaja aro vi kẹ ẹkẹle omadhehọ Ọghẹnẹ?

Uruemu O rẹ Ruae Vi Egede

Pita ọ rẹriẹ ova ku uruemu gbe owojẹ. Ọ t’ẹme fodẹ “uzuazọ ẹfuọ” gbe “orọ Ọghẹnẹ.” (2 Pita 3:11) Eme enana i kugbe?

Uvi odibo Ọghẹnẹ o re ru oware nọ o rẹ were Iẹe. Ẹrọwọ ọgegagọ uzẹme otiọye na u re dhesẹ oma via evaọ uruemu riẹ. Onana o rẹ hẹriẹe no enọ e rẹ ta kpahe orọwọ fihọ Ọghẹnẹ avọ eyaa riẹ ọvo. Ẹsejọhọ who muẹrohọ no inọ odibọgba ẹgbede Isẹri Jihova o hẹriẹ e rai wọhọ enọ e rọ sa. A re weze ziọ uwou ra re a si ẹjiroro kpohọ eyaa Ọghẹnẹ nọ e rọ Ebaibol na. Rekọ a re je se isẹri re kpahe ẹruore gbe ẹrọwọ rai evaọ oria nọ a rẹ jọ nyaku ahwo kpobi.

Osẹri nọ o bi ruiruo gaga bi whowho ẹrọwọ riẹ kẹ amọfa o re ru ẹrọwọ riẹ ga viere. Ọtavia ọ rẹ lẹliẹ ẹme kodo viere evaọ udu ohwo o vẹ jẹ wha oghọghọ gbe edẹro obeva ze. Okenọ ma te bi whowho emamọ usi Uvie Ọghẹnẹ, yọ ma bi ru Jihova eva were re. Ma riẹ nọ ọ ‘kare ẹrẹreokie he re iruo mai gbe uyoyou nọ ma dhesẹ kẹ odẹ riẹ e thọrọ iẹe ẹro,’ wọhọ epanọ ibe ukọ Pita, Pọl, o whowho.—Ahwo Hibru 6:10; Ahwo Rom 10:9, 10.

Eme họ iyẹrẹ ọ emamọ usi Uvie na nọ ma rẹ vaha evaọ edẹ urere eyero-akpọ omuomu ọnana? Idu egba ahwo udu-oruọzewọ a bi wuhrẹ epanọ a rẹ rọ ziọ usu okpekpe kugbe Jihova, re a wo erere no uyoyou ẹwo riẹ ze re a jẹ ruẹ uvi evawere evaọ ẹruore uzuazọ ebẹdẹ bẹdẹ evaọ otọakpọ aparadase.

Ẹriẹ Haro

Dede nọ ma riẹ no Ebaibol na ze inọ Jihova Ọghẹnẹ ọ te jowọ evaọ ẹruoke riẹ, u fo re ma kezọ kẹ unuovẹvẹ ofa nọ Pita ọ kẹ. “Epanọ wha riẹ onana vẹre ino na, wha sẹro oma, ogbẹrọ erehe iruthọ ahwo omuomu e rẹte wọ owhai vrẹ, odikihẹga rai ọ vẹ te va owhai abọ vru.”—2 Pita 3:17.

Ababọ avro Jihova ọ riẹ no anwẹdẹ inọ udu u ti no ahwo jọ nọ e kare ẹrọwọ ọgaga fikinọ a roro nọ Ọghẹnẹ o bi lehie evaọ omadhehọ. Ọ tẹ jẹ riẹ nnọ okpomahọ ahwo omuomu o rẹ sai gbe idibo uzẹme riẹ ku hayo, o tẹ kawo, a rẹ raha orọwọ rai inọ orufuọ odẹ Ọghẹnẹ o kẹlino. Ẹvẹ u re yoma te re a kie no edikihẹ ga evaọ edẹ urere enana!

Onana o rọ oke nọ a re ro wo avro kpahe oware nọ Jihova o ti ru hu. (Ahwo Hibru 12:1) Ukpoye, enẹna họ oke nọ ma rẹ rọ rro evaọ ovuhumuo kẹ oware nọ odiri Jihova o wha ze no—irẹro usiwo kẹ ima ahwo buobu nọ i zihe ruọ abọ ogbotu obuobu akpọ soso no je bi rẹro ẹzọ no uye ulogbo nọ o be tha na. (Eviavia 7:9, 14) Pita ọ kẹ uduotahawọ nọ: “Rekọ wha ro eva aruoriwo gbe ẹriẹ ọrọ Ọnowo gbe [Osiwi] mai Jesu Kristi. Oruaro u tei enẹna je rite ẹdẹ ebẹdẹ bẹdẹ.”—2 Pita 3:18.

‘Fi Oma Rai họ Uyoyou Ọghẹnẹ’

Usiuwoma Uvie na nọ ma rẹ ta je kpohọ iwuhrẹ Ileleikristi ẹsikpobi kẹ egagọ gbe uwuhrẹ Ẹme Ọghẹnẹ o rẹ k’omai uketha. Fikiere, ma re gbe wo oke nọ ma rẹ rọ ruawa thesiwa kpahe eware nọ i bi dhe eyeyoma evaọ eyero omuomu inẹnẹ na ha. U du fo re ozodhẹ gbe awaọruọ e kobaro evaọ uzuazọ Ileleikristi uzẹme he. (1 Ahwo Kọrint 15:58) Epanọ ma bi ruiruo gọ Jihova te, ere oke o rẹ dhẹ siawọ te.

Jud, oniọvo Jesu gbe ọnọ ọ rria evaọ etoke Pita, ọ tudu họ omai awọ nọ: “Whai, iyoyou, wha rọ orọwọ ọrẹri rai yọrọ oma rai whẹro, wha lẹ evaọ Ẹzi Ẹri na; jẹ yọre oma rai eva uyoyou Ọghẹnẹ na; wha hẹrẹ ohrọ-oriọ Ọnowo mai Jesu Kristi rite uzuazọ ebẹdẹ bẹdẹ.” (Jud 20, 21) Muẹrohọ epanọ irẹro ewoma u w’uzou te nọ ithihakọ evaọ olẹ o rẹ wha ze. (1 Ahwo Tẹsalonika 5:17) Kẹsena Jud o te fibae nọ: “Wha ru imuẹro kẹ otu jọ, nọ e gbẹrọ gede-gede; wha si ejọ no erae ze, wha siwi ae; wha rehọ omoyọrọ re ohrọ, evaọ e jọ dede nọ who mukpahe ewu umuomu nọ ọ rọ ae oma.” (Jud 22, 23) Ẹvẹ u w’uzou te re ma bọ ohwohwo ga evaọ oke obẹbẹ nana! Yọ ẹvẹ u w’uzou te re ma siọ ẹdawọ ba ekie ro, re ma siọ “ẹdẹ usiwo” onana ba ẹrọ f’oma kẹ uruemu “igberedha,” onọ o dafia evaọ akpọ ogbekuo uruemu inẹnẹ na.—Jud 4; 2 Ahwo Kọrint 6:1, 2.

Ẹkwoma eyo ohrẹ uyoyou Pita, Pọl, avọ Jud gbe iruo Ọghẹnẹ nọ who re dhoma kpobi họ, whọ rẹ sae rehọ odiri hẹrẹ omadhehọ Jihova. Rekọ who ti ru ere?

Whọ raha oke he evaọ ẹnyabru Isẹri na evaọ oria ra kẹ obufihọ re a bọ ẹrọwọ ra ga fihọ eyaa uzuazọ ebẹdẹ bẹdẹ Ọnọma na. Wuhrẹ oware nọ a gwọlọ re a te kẹ abọ nọ a re wo evaọ iruo isẹri akpọ soso nọ a te wariẹ hẹ na, onọ u ti kuhọ eva uye ulogbo nọ o be tha na. (Mak 13:10) Ere who ti ro wo irẹro ẹrria evaọ akpọ ọkpokpọ ẹrẹreokie nọ Jihova ọ yaa na. (2 Pita 3:13) Kezọ kẹ ekareghẹhọ riẹ! Hẹrẹ avọ odiri! Ruiruo buobu!

[Footnotes]

[Picture on page 7]

Wuhrẹ kpahe eyaa Aparadase Ọghẹnẹ enẹna

[Picture Credit Line on page 5]

Adaka: Animals/Jim Harter/Dover Publications, Inc.; othuru-igodẹ ọboba: Children: A Pictorial Archive from Nineteenth-Century Sources/Grafton/Dover Publications, Inc.