“Ijaje Riẹ Erọ Owha Ogbẹgbẹdẹ Hẹ”

4-6. (a) Eme họ otofa gheghe ubiẹme Grik nọ a fa “owha ogbẹgbẹdẹ” na? (b) Kọ fikieme ma jẹ sae ta nọ ijaje Ọghẹnẹ e rọ owha ogbẹgbẹdẹ hẹ?

⁴ “Koko izi riẹ.” No emuhọ ze, oye họ oware nọ Ọghẹnẹ ọ gwọlọ mi omai. Kọ oyena u bu ga hrọ nọ ọ rẹ nọ mi omai? Dazigbe. Jọn ukọ na ọ fodẹ oware omosasọ jọ k’omai kpahe ujaje Ọghẹnẹ, hayo ẹgwọlọ riẹ. O kere nọ: ‘Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.’—1 Jọn 5:3.

⁵ Ẹme Grik nọ a jọ etenẹ fa fihọ “owha ogbẹgbẹdẹ” na otofa gheghe riẹ u dhesẹ “ẹgbẹdẹ.” U kpoma họ oware nọ a rẹ sai ru vori hi, hayo onọ o rẹ jọ gaga re a ru gba. Eva Matiu 23:4, a rehọ e riẹ ro dhesẹ ‘ewha egbẹgbẹdẹ,’ ijaje ohwo-akpọ gbe iruemu anwae, enọ otu ikere-ebe gbe Farisi na a fihọ uzou ahwo. Kọ who wo otoriẹ oware nọ Jọn ukọ ọ kpako na ọ be ta na no? Ijaje Ọghẹnẹ e rọ owha ogbẹgbẹdẹ hẹ, hayo kọ e rẹ bẹ ekoko gbe he. (Wawo Iziewariẹ 30:11.) Ukpoye, nọ ma te you Ọghẹnẹ, ẹnyate ẹgwọlọ riẹ u re ru omai wo evawere. O rẹ k’omai uvẹ aghare nọ ma re ro dhesẹ uyoyou mai kẹ Jihova.

12. Ẹvẹ who re dhesẹ oware nọ o soriẹ nọ o gbẹ rọ owha ogbẹgbẹdẹ hẹ re a wo eriariẹ Ọghẹnẹ gbe ẹjiroro riẹ?

¹² Kọ o rọ owha ogbẹgbẹdẹ re a wo eriariẹ itieye na kpahe Ọghẹnẹ gbe ẹjiroro riẹ? Vievie! Kọ whọ sae kareghẹhọ epanọ o jọ owhẹ oma nọ who wuhrẹ nọ odẹ Ọghẹnẹ họ Jihova, inọ Uvie riẹ u ti zihe Aparadase ze otọakpọ ọnana, inọ ọ rehọ Ọmọ riẹ nọ o you kẹ wọhọ ẹtanigbo kẹ izieraha mai, gbe izẹme eghaghae efa? O gbẹ jọ wọhọ ẹsenọ a si ubere ogbori no aro ra who te mu eware họ ẹruẹ vevẹ no umuo oke oyena ze? Ewo eriariẹ Ọghẹnẹ o rọ owha ogbẹgbẹdẹ hẹ. O rọ awere!—Olezi 1:1-3; 119:97.

16. Dhesẹ epanọ o gbẹ rọ rọ owha ogbẹgbẹdẹ hẹ re a nyate ute Ọghẹnẹ kẹ uruemu ezi re a jẹ jẹ uzẹme riẹ rehọ.

¹⁶ Kọ o rọ owha ogbẹgbẹdẹ k’omai re ma nyate ute Ọghẹnẹ kẹ uruemu ezi re ma jẹ jẹ uzẹme riẹ rehọ? O rẹ jọ ere he nọ ma te roro kpahe irere riẹ—erọo nọ ọzae avọ aye a jọ you je fievahọ ohwohwo viukpọ erọo nọ e vahabọ fikiọ ababọ evaifihọ; iwou nọ emọ a jọ riẹ nọ esẹ gbe ini rai a you rai jẹ gwọlọ ai, viukpọ iviuwou nọ emọ a re jo roro nọ a mukpahe ai, gbabọ kẹ ai, nọ a jọ gwọlọ ai hi; ẹgba iroro efuafo gbe omokpokpọ viukpọ iroro obrukpe gbe oma nọ ẹnya ọ AIDS ọ da fia no hayo eyao igberẹ-ibro efa. O rọ vevẹ inọ ẹgwọlọ Jihova o rẹ whaha omai oware ovo nọ o rẹ lẹliẹ omai reawere uzuazọ họ!—Iziewariẹ 10:12, 13.

19. Dhesẹ epanọ ma re ro wo erere no edhesẹ adhẹẹ kẹ uzuazọ gbe azẹ ze.

¹⁹ Kọ o rọ owha ogbẹgbẹdẹ re ma rri uzuazọ gbe azẹ ghaghae? Vievie! Roro kpahe iẹe. Kọ o rọ owha ogbẹgbẹdẹ re ohwo o wo ufuoma no ẹyao ọta irue nọ evovo utaba o rẹ wha ze? O rọ owha ogbẹgbẹdẹ re a dhẹvabọ no imu egaga nọ e rẹ reria ẹvori gbe ugboma na? Kọ o rọ owha ogbẹgbẹdẹ re ohwo ọ whaha ẹyao AIDS, ẹyao edhẹ, hayo eyao efa nọ i re no azẹ nọ a re sefihọ oma ze? Uzẹme, re ma whaha iruemu hayo iruẹru enwoma o rọ kẹ ewoma omobọ mai.—Aizaya 48:17.

20. Ẹvẹ uviuwou jọ a ro wo erere no ewo eriwo Ọghẹnẹ ze ọrọ uzuazọ?

²⁰ Roro kpahe oriruo ọnana. Ikpe kakao nọ i kpemu, Osẹri aye jọ nọ o dihọ te emera esa gbe ubro no o te je hwẹ azẹ evaọ owọwọ jọ a tẹ wọe vẹrẹ vẹrẹ kpohọ ẹsipito. Nọ edọkita na o rri rie no, ẹme edọkita na o te fi ruọ aye na ezọ okenọ ọ jẹ vuẹ enọso jọ inọ a te kpae eva na no. Nọ ọ riẹ epanọ Jihova o rri uzuazọ ọnọ a ri yẹ hẹ no, ọ tẹ se thahethahe nọ a rẹ kpae eva na ha, ọ tẹ ta kẹ edọkita na nọ: “Otẹrọnọ ọmọ na ọ rọ uzuazọ, nyasiẹe ba etẹe!” Aye na o te gbe je hwẹ azẹ evaọ otiẹse, rekọ emerae buobu e vrẹ no o te yẹ ọmọzae nọ emera riẹ e gba ha avọ omakpokpọ ọnọ ọ kpako te ikpe 17 no enẹna. Aye na ọ tẹ ta nọ: “Ma gbiku oware nana kpobi kẹ ọmọzae mai no, ọ tẹ ta nọ eva e were riẹ inọ ma gbolo i rie fihọ ezuzu hu. Ọ riẹ nọ egagọ Jihova mai họ oware nọ u ru rie nọ ọ jẹ rọ uzuazọ nẹnẹ na.” Avọ imuẹro, ewo eriwo Ọghẹnẹ kpahe uzuazọ o jọ owha ogbẹgbẹdẹ kẹ uviuwou onana ha!

23, 24. Ẹvẹ ma sai ro dhesẹ nọ o rọ owha ogbẹgbẹdẹ hẹ re a gọ Jihova kugbe ahwo okugbe riẹ?

²³ Kọ o rọ owha ogbẹgbẹdẹ re a gọ Jihova kugbe ahwo ukoko riẹ? Ijo, vievie! Ukpoye, uvẹ ulogbo o rọ re a wo uyoyou gbe uketha ọ uviuwou akpọ soso ọrọ inievo emezae gbe emetẹ Ileleikristi. (1 Pita 2:17) Dae rehiẹe nọ whọ zọ no okọ nọ u zue, whọ tẹ ruẹ nọ whọ rọ eva ame, whọ be daoma re whọ seba ekiedi. Okenọ abọ ọ rọ owhẹ no, ohwo jọ ọ tẹ riobọ k’owhẹ no okọ-adhẹzọ ze. Ẹhẹ, amọfa nọ a zọ no a riẹ! Evaọ okọ-adhẹzọ na, whẹ avọ amọfa a tẹ be rehọ unọjọ u tọjọ bi kpohọ okpa, yọ wha be wọ amọfa nọ a zọ evaọ edhere.