‘Họre Gaga Kẹ Ẹrọwọ Na’!

‘Họre gaga kẹ ẹrọwọ na onọ a rehọ kẹ erezi na kpobi ẹsiẹvo ọvo.’—JUD 3.

 1. Edhere vẹ Ileleikristi uzẹme nẹnẹ a bi ro fiẹmo?

UZUAZỌ isoja eva ẹmo o rẹ jọ bẹbẹ. Dai roro ẹgọ ẹmo nọ whọ rẹ whẹhọ be nya ikilomita buobu evaọ oghẹrẹ oke kpobi, nọ a be k’owhẹ uwuhrẹ obẹbẹ kpahe ero ruiruo ekwakwa ẹmo, hayo re whọ thọ oma ra mukpahe eware nọ e rẹ wha uwhu hayo enwoma ze. Rekọ, Ileleikristi uzẹme i re w’abọ evaọ emo erẹwho na ha. (Aizaya 2:2-4; Jọn 17:14) Ghele na, jọ o thọrọ omai ẹro ho inọ evaọ oghẹrẹ jọ mai kpobi na ma rọ ẹmo. Setan ọ vọ avọ omukpahe kẹ Jesu Kristi avọ ilele riẹ nọ e rọ otọakpọ na. (Eviavia 12:17) U dhesẹ nnọ, ahwo kpobi nọ a jiroro nọ a rẹ gọ Jihova Ọghẹnẹ yọ a bi kere edẹ rai fihọ otọ wọhọ isoja re a fiẹmo abọ-ẹzi.—2 Ahwo Kọrint 10:4.

 2. Ẹvẹ Jud o dhesẹ ẹmo-ofio Ileleikristi, kọ ẹvẹ ileta nana o sai ro fiobọhọ k’omai thihakọ evaọ eva riẹ?

² Nwani fo, Jud oniọvo Jesu o kere nọ: “Iyoyou, o jọ omẹ ẹro gaga nọ me re kere se owhai kpahọ usiwo mai nọ ma wo kugbe, mẹ ruẹ nọ u te omẹ te ekere, be yare owhai re wha họre kẹ orọwọ na onọ a rehọ kẹ erezi na kpobi ẹsiẹvo ọvo.” (Jud 3) Okenọ Jud ọ kpakpa Ileleikristi re a ‘họre gaga,’ ọ t’ẹme nọ u wo otofa ovo kugbe “akọriọ.” Ẹhẹ, ohọre onana o rẹ sae jọ bẹbẹ, tubọ avọ akọriọ! Kọ o rẹ jọ bẹbẹ k’owhẹ ẹsejọ re who thihakọ evaọ ẹmuofio ọnana? Ileta ekpẹkpẹe Jud nọ i w’ẹgba na o rẹ sai fiobọhọ k’omai. O kpakpa omai re ma whaha ọfariẹ-ogbe, re ma rọ adhẹẹ kẹ udu-esuo nọ a fihọ, re ma je fi oma mai họ uyoyou Ọghẹnẹ. J’oma ruẹ epanọ ma re ro fi ohrẹ onana họ iruo.

Whaha Ọfariẹ-Ogbe

 3. Didi uyero okpẹtu o rẹriẹ ova ku ukoko Ileleikristi na evaọ edẹ Jud?

³ Jud ọ sae ruẹ inọ evaọ ẹmo mukpahe Setan na orọnikọ ibe Ileleikristi riẹ kpobi e jẹ kparobọ họ. Okpẹtu ọ rẹriẹ ova ku uthuru na. Ahwo ogbekuo a “bẹbẹ” rueva no, ere Jud o kere. Ahwo nana a be rehọ ẹghẹ wha ọfariẹ-ogbe haro. Yọ a be rọ ẹghẹ ta oma rai woma, be “rẹriẹ aruoriwo Ọghẹnẹ mai kpo igberedha.” (Jud 4) Ẹsejọhọ, wọhọ ahwo anwae jọ nọ a rọwo Ọghẹnẹ hẹ, a re roro nọ epanọ ohwo o ruthọ te, ere ohwo o re wo aruoriwo Ọghẹnẹ te—fikiere, u re dhugbe woma re ohwo ọ raha uzi! Hayo ẹsejọhọ a roro nọ Ọghẹnẹ owowolẹ ọ sae te kẹ ae uye he. Epanọ o rọ kpobi, a ru thọ.—1 Ahwo Kọrint 3:19.

 4. Didi iriruo esa Ikereakere erọ ẹdhoguo anwae Jihova Jud ọ fodẹ?

⁴ Jud ọ vro kpahe iroro emuemu rai ẹkwoma iriruo ẹdhoguo esa anwae Jihova nọ ọ fodẹ: o brukpe emọ Izrẹl nọ e “rọwo ho”; o brukpe “ikọ-odhiwu nọ e . . . siọ oria ẹria rai ba” re a ruẹsi lele eyae raha uzi; gbe o brukpe ahwo Sodọm avọ Gomora, “enọ i bru igberedha je fi oma rai họ urusio nọ u fori hi.” (Jud 5-7; Emuhọ 6:2-4; 19:4-25; Ikelakele 14:35) Evaọ aikpobi na, Jihova o bruoziẹ kpe irumuomu na.

 5. Ẹme ọruẹaro anwae vẹ Jud ọ wariẹ, kọ ẹvẹ eruẹaruẹ yena i ro dhesẹ imuẹro orugba riẹ?

⁵ Uwhremu na, Jud ọ t’ẹme fodẹ ẹdhoguo nọ ọ mae rro. Ọ wariẹ eme eruẹaruẹ Enọk—ovuẹ nọ a rẹ jọ uvumọ oria ofa ruẹ evaọ Ikereakere efuafo na ha.a (Jud 14, 15) Enọk ọ ruẹaro kpahe oke nọ Jihova o ti ro guẹdhọ ahwo omuomu na avọ iruẹru imuomu rai. Avọ isiuru, Enọk ọ t’ẹme na kpemu, keme ẹdhoguo Ọghẹnẹ i muẹro wọhọ epaọ ẹsenọ i rugba no. O sae jọ nọ ahwo a rọ Enọk se ẹkoko jegbe Noa evaọ obaro riẹ, rekọ ise-ẹkoko itieye na kpobi a d’ame whu evaọ Ẹvo akpọ soso na.

 6. (a) Eme u fo nọ a rẹ kareghẹhọ Ileleikristi edẹ Jud? (b) Fikieme ma je si ekareghẹhọ Jud t’udu?

⁶ Fikieme Jud o ro kere kpahe ẹdhoguo Ọghẹnẹ enana? Keme ọ riẹ nọ ahwo jọ evaọ ukoko Ileleikristi na evaọ edẹ riẹ a bi ru eware etọtọ nọ i fioka ha wọhọ enọ e wha ẹdhoguo anwae ze na. Fikiere, Jud o kere nọ u fo re a kareghẹhọ ikoko na kpahe igogo izẹme abọ-ẹzi jọ. (Jud 5) Ẹsejọhọ o thọrọ e rai ẹro no inọ Jihova Ọghẹnẹ ọ be ruẹ oware nọ a bi ru. Ẹhẹ, okenọ idibo riẹ a te keke aro fihọ raha izi riẹ, bi gbe oma rai gbe amọfa ku, ọ rẹ ruẹ. (Itẹ 15:3) Iruemu itieye na e rẹ dae gaga. (Emuhọ 6:6; Olezi 78:40) O rọ iroro igbunu inọ mai ahwo-akpọ gheghe ma rẹ sai kpomahọ iroro Olori Osu ehrugbakpọ na. O bi rri omai kẹdẹ kẹdẹ, yọ okenọ ma tẹ be dao utho oma mai re ma lele ithihi Ọmọ riẹ, Jesu Kristi, uruemu mai u re ru ei udu ghọghọ. Fikiere, joma gbolo aro kẹ ekareghẹhọ itieye na nọ Jud ọ be kẹ na ha, rekọ j’oma si ai te udu.—Itẹ 27:11; 1 Pita 2:21.

 7. (a) Fikieme enọ i duomahọ oruthọ ọgaga a jẹ gwọlọ obufihọ kpata kpata? (b) Ẹvẹ mai kpobi ma sae rọ whaha ọfariẹ-ogbe?

⁷ Orọnikọ Jihova ọ be ruẹ ọvo ho rekọ ọ rẹ j’owọ. Wọhọ Ọghẹnẹ uvi-oziẹ, ọ rẹ kẹ irumuomu uye—evaọ ẹruoke riẹ. (1 Timoti 5:24) Ahwo nọ a bi roro nọ ẹdhoguo riẹ yọ ikuigbe anwae gheghe jegbe nnọ ọ be daezọ eyoma nọ a bi ru hu a be viẹ oma rai họ gheghe. Ẹvẹ o kpata te nẹnẹ rọ kẹ enọ i zuawọ họ ọfariẹ-ogbe no re a gwọlọ obufihọ ekpako Ileleikristi vẹrẹ vẹrẹ! (Jemis 5:14, 15) Awa ọfariẹ-ogbe evaọ ẹmo abọ-ẹzi mai na o rẹ sai gb’omai kpobi unu. Kukpe kukpe ibuobu i bi kie ẹta na—ahwo nọ a bi si no ukoko, ibuobu rai fiki uruemu ọfariẹ-ogbe ababọ ekurẹriẹ. O rẹ jọ ọtamuo mai gaga re ma whaha edawọ nọ i re tube mu omai họ esu kpohọ edhere ọyena.—Wawo Matiu 26:41.

Rọ Adhẹẹ kẹ Udu-Esuo nọ A Fihọ

 8. Amono họ “otu ehru” nọ a fodẹ evaọ Jud 8 na?

⁸ Ẹbẹbẹ ọfa nọ Jud ọ t’ẹme te họ ababọ adhẹẹ kẹ udu-esuo nọ a fihọ. Wọhọ oriruo, evaọ owọ avọ 8 ọ whọku ahwo omuomu evo na inọ a be “rehọ otu ehru jijehwẹ.” Amono họ “otu ehru” na? A jọ ezae sebaẹgba, rekọ a wo owha-iruo nọ ẹzi ọfuafo Jihova o muhọ ai obọ. Wọhọ oriruo, ikoko na i wo ekpako, enọ a kẹ iruo ẹruorote uthuru Ọghẹnẹ. (1 Pita 5:2) Esẹro ọnyawariẹ e riẹ re, wọhọ Pọl ukọ na. Yọ ugboma ekpako na evaọ Jerusalẹm a je ruiruo wọhọ ugboma esuo, enọ e jẹ j’iroro nọ i kpomahọ ukoko Ileleikristi na kpobi. (Iruẹru 15:6) O jẹ kẹ Jud idhọvẹ gaga inọ ahwo jọ evaọ ukoko na a be ta eme iyoma hayo rehọ ezae itieye na j’ijehwẹ.

 9. Didi iriruo kpahe orivo udu-esuo Jud ọ fodẹ?

⁹ Re ọ whọku eme orivo itieye na, evaọ owọ avọ 11, Jud ọ fodẹ iriruo esa efa wọhọ ekareghẹhọ: Keni, Belam, gbe Kora. Keni ọ se ohrẹ uyoyou Jihova o te keke aro fihọ le edhere omukpahe ojihẹ riẹ t’oba. (Emuhọ 4:4-8) Unuovẹvẹ buobu u te Belam obọ no ehru ze—makọ eketekete riẹ dede ọ t’ẹme kẹe! Rekọ Belam avọ oriobọ ọ tẹ gbẹ nyaharo gbẹgwae oyoma kpahe ahwo Ọghẹnẹ. (Ikelakele 22:28, 32-34; Iziewariẹ 23:5) Kora o wo ọkwa owha-iruo riẹ, rekọ o da riẹ ẹro ho. O koko ahwo họ re a kpareso ọzae nọ ọ mai wou evaọ otọakpọ na kpobi, Mosis.—Ikelakele 12:3; 16:1-3, 32.

10. Ẹvẹ ejọ nẹnẹ a sai ro kie ruọ ẹta ‘otu ehru nọ a re ro j’ijehwẹ,’ kọ fikieme a jẹ whaha eme itieye na?

¹⁰ Ẹvẹ iriruo enana i wuhrẹ omai te re ma rọ adhẹẹ kẹ ahwo nọ Jihova o bi ro ruiruo evaọ ekwa owha-iruo! (Ahwo Hibru 13:17) O rẹ lọlọhọ re ma jọ oma ekpako nọ a ro mu na ruẹ afuẹwẹ, keme a gba ha, wọhọ epanọ mai kpobi ma gba ha na. Rekọ ma tẹ t’ẹro vi iruthọ rai je bi rri rai vo, kọ o sae jọ nọ ma be “rehọ otu ehru jijehwẹ”? Evaọ owọ avọ 10, Jud ọ fodẹ enọ e be “ta eme iyoma kpahe eware nọ a riẹ otọ rai hi.” Ẹsejọ, ejọ e rẹ wọso ẹjiroro nọ ugboma ekpako na o jẹ hayo ẹdhọ jọ nọ a gu. Ghele na, a riẹ kpahe eware nọ ekpako na a kiẹriwi kpobi re a tẹ te j’iroro na ha. Fikiere eme jabọ a jẹ ta eme iyoma kpahe oware nọ a ghinẹ riẹ hẹ? (Itẹ 18:13) Ahwo nọ a ruabọhọ eme iyoma itieye na a rẹ sae wha ohẹriẹ fihọ ukoko na yọ ẹsejọhọ a vẹ jẹ rehọ ai dhesẹ “itho nọ e rọ otọ ame” eva oria omakokohọ ibe enọ e rọwo. (Jud 12, 16, 19, NW ) J’oma jọ enwoma abọ-ẹzi kẹ amọfa ha. Ukpoye, jọ o jọ ọtamuo mai omomọvo re ma wo ọjẹrehọ kẹ enọ e rọ ọkwa fiki iruo egaga rai gbe oma nọ a rọ kẹ uthuru Ọghẹnẹ.—1 Timoti 5:17.

11. Fikieme Maekẹl o je si oma kpemu no ẹdhọ nọ o re gu Setan?

¹¹ Jud ọ kẹ oriruo ohwo jọ nọ ọ rehọ adhẹẹ kẹ udu-esuo nọ a fihọ. O kere nọ: “Rekọ nọ Maekẹl ukọ-odhiwu oride na, o je lele ukumuomu na họre, vroavro kpahọ oma Mosis, ọ jobọ nọ o ro rovie unu riẹ poviẹ e he, rekọ, anọ, ‘Ọnowo na ọ whọku owhẹ.’ ” (Jud 9) Ikuigbe isiuru nana, onọ Jud ọvo o kere evaọ Ikereakere efuafo na, u wuhrẹ iwuhrẹ ivẹ sa-sa. Evaọ abọ jọ, u wuhrẹ omai re ma nyasiọ ẹdhoguo ba kẹ Jihova. O wọhọ nọ Setan ọ gwọlọ rehọ ugboma Mosis ọzae ẹrọwọ na ruiruo thọthọ re ọ ruẹse wha egagọ erue haro. Ẹvẹ onana u muomu te! Ghele na, Maekẹl avọ omarokpotọ o sioma kpemu no ẹdhoguo, keme Jihova ọvo o wo udu na. Kọ ẹvẹ u fo te inọ ma whaha ẹdhoguo ezae ẹrọwọ nọ e be daoma gọ Jihova.

12. Eme ahwo nọ a wo ọkwa owha-iruo evaọ ukoko Ileleikristi na a re wuhrẹ no oriruo Maekẹl ze?

¹² Evaọ abọdekọ riẹ, ahwo nọ a dina wo udu-esuo evaọ ukoko na a rẹ sai wuhrẹ uwuhrẹ jọ no obọ Maekẹl ze re. Whaọ, dede nọ Maekẹl họ “ukọ-odhiwu oride na,” olori enjẹle na kpobi, ọ rehọ ọkwa ogaga riẹ ruiruo thọthọ họ, nọ a maki ru ei eva dha dede. Ekpako ẹrọwọ a re lele oriruo ọyena kpekpekpe, vuhumu nnọ ọkwa rai nọ a re ro ruiruo thọthọ yọ ababọ adhẹẹ kẹ esuo Jihova. Ileta Jud o t’ẹme buobu kpahe ezae nọ i wo ọkwa adhẹẹ evaọ ukoko na rekọ a tẹ rehọ ogaga rai ruiruo thọthọ. Wọhọ oriruo, evaọ owọ avọ 12 rite 14, Jud o kere ọwhọkuo ọgaga ọrọ ‘ithuru-igodẹ nọ e be wharo ko oma rai.’ (Wawo Izikiẹl 34:7-10.) Ẹme na họ, erere omobọ rai a be rọ karo, orọnikọ orọ uthuru Jihova ha. Nẹnẹ na ekpako e rẹ sai wuhrẹ eware buobu no iriruo ethọthọ eyena ze. Uzẹme, eme ọ Jud evaọ etenẹ i dhesẹ oware nọ ma gwọlọ jọ họ vevẹ. Nọ ma te kie kẹ oriobọ, ma rẹ sae jọ isoja Kristi hi; omobọ mai ọvo ma be họre kẹ. Ukpoye, j’omai kpobi ma rria lele eme Jesu: “Ẹkẹ oghale o mae rọ vi emio.”—Iruẹru 20:35.

“Yọre Oma Rai eva Uyoyou Ọghẹnẹ”

13. Fikieme o jẹ jọ isiuru mai kpobi re ma daji uyoyou Ọghẹnẹ?

¹³ Ubrobọ ekuhọ ileta riẹ, Jud ọ kẹ ohrẹ omosasọ onana: “Yọre oma rai eva uyoyou Ọghẹnẹ.” (Jud 21) Uvumọ oware u re fiobọhọ k’omai fiẹmo Ileleikristi nana t’uwou vi oware ovo nana ha, koyehọ re ma jọ otọ uyoyou Jihova Ọghẹnẹ. Whaọ, uyoyou họ okwakwa ulogbo Jihova. (1 Jọn 4:8) Pọl o kere se Ileleikristi evaọ Rom nọ: “Umuomẹ ẹro nọ makọ uwhu, hayo uzuazọ, hayo ikọ-odhiwu, hayo iride, hayo eware nọ erọ enẹna, hayo eware nọ e be tha, hayo egaga, hayo ekpehru, hayo ekodo, hayo oware ovo eva emama na kpobi, no rẹ sae hẹriẹ omai no uyoyou Ọghẹnẹ evaọ Kristi Jesu Ọnowo mai na, ọ rọhọ.” (Ahwo Rom 8:38, 39) Rekọ, ẹvẹ ma rẹ rọ daji uyoyou oyena? Muẹrohọ eware esa nọ ma re ru, wọhọ epanọ Jud ọ fodẹ.

14, 15. (a) Eme u dhesẹ re ma bọ oma mai ga evaọ “orọwọ ọrẹri” mai? (b) Ẹvẹ ma sae rọ kiẹ uyero ekwakwa-ẹmo abọ-ẹzi mai?

¹⁴ Orọ ọsosuọ, Jud ọ ta k’omai nnọ ma hae bọ oma mai ga evaọ “orọwọ ọrẹri” na. (Jud 20) Wọhọ epanọ ma ruẹ evaọ uwuhrẹ n’ukpo na, a re dhe onana erueru. Ma wọhọ uwou nọ o gwọlọ ekpọfia buobu re o sae za ofou dhe. (Wawo Matiu 7:24, 25.) Fikiere, joma rẹro so omobọ mai hi. Ukpoye, j’oma gwọlọ oria nọ ma sae jọ bọ oma mai ga evaọ otọhotọ ẹrọwọ mai, re ma jọ isoja egaga Kristi nọ i wo ẹrọwọ ziezi. Wọhọ oriruo, ma rẹ sai roro ekwakwa ẹgọ ẹmo abọ-ẹzi nọ a dhesẹ eva Ahwo Ẹfẹsọs 6:11-18 na.

¹⁵ Ẹvẹ ẹgọ abọ-ẹzi mai ọ rọ? Kọ “ojese orọwọ” mai o ga te epanọ u fo nọ o rẹ jọ? Nọ ma te rri kpemu kpahọ umutho ikpe nọ e vrẹ na, kọ ma be ruẹ oka ewhrehe jọ, wọhọ iwuhrẹ nọ a rẹ nya godo godo, ababọ ọwhọ kẹ odibọgba na, hayo ọwhọ nọ o bi kpotọ kẹ uwuhrẹ omobọ mai? Eka itieye na e rọ imuozọ! U fo re ma j’owọ obọnana re ma bọ je ru oma mai ga evaọ uzẹme na.—1 Timoti 4:15; 2 Timoti 4:2; Ahwo Hibru 10:24, 25.

16. Eme u dhesẹ re ma lẹ avọ ẹzi ọfuafo, kọ oware jọ vẹ ma rẹ yare Jihova ẹsikpobi?

¹⁶ Edhere avivẹ nọ ma rẹ rọ daji uyoyou Ọghẹnẹ họ ma rẹ gbẹ “lẹ evaọ Ẹzi Ẹri na.” (Jud 20) Oyena u dhesẹ nọ ma rẹ lẹ evaọ otọ okpomahọ ẹzi Jihova jẹ rọwo kugbe Ẹme riẹ nọ ẹzi ọ kẹ ẹgba. Olẹ yọ obọdẹ abọ nọ ma re ro sikẹle Jihova je dhesẹ kẹe nọ ma be gọe. Ma re rri uvẹ-ọghọ onana vo vievie he! Yọ okenọ ma tẹ be lẹ, ma sae yare—evaọ uzẹme, dhe ẹyẹyare—kẹ ẹzi ọfuafo na. (Luk 11:13) Oye họ ogaga nọ o mae ga nọ ma wo. Avọ obufihọ utioye na, ma rẹ sae daji uyoyou Ọghẹnẹ je thihakọ wọhọ isoja Kristi.

17. (a) Fikieme oriruo Jud evaọ ẹme ohrọ o je gbunu? (b) Ẹvẹ mai omomọvo ọ sae rọ ruabọhọ edhere ohrọ?

¹⁷ Orọ avọ esa, Jud ọ kpakpa omai re ma ruabọhọ edhesẹ ohrọ. (Jud 22) Oriruo obọ riẹ evaọ abọ ọnana o gbunu. Whaọ, ọ jẹ ruawa ziezi kpahe ogbekuo, ọfariẹ-ogbe, gbe ekieno-ẹrọwọ nọ o jẹ bẹbẹ ruọ ukoko Ileleikristi na. Ghele na, orọnikọ o je brudu hu, ẹsejọhọ je roro nnọ oke na u yoma vi epanọ a re ro dhesẹ okwakwa “ẹwo” utioye wọhọ ohrọ. Ijo, ọ kpakpa inievo riẹ re a ruabọhọ edhesẹ ohrọ nọ o tẹ lọhọ, re a rehọ ẹwo j’iroro kugbe enọ i wo avro re a tube si enọ i bi sikẹle uzioraha ulogbo ‘no erae ze.’ (Jud 23; Ahwo Galesha 6:1) Ẹvẹ uduotahawọ na u woma te kẹ ekpako evaọ oke obẹbẹ nana! A be daoma dhesẹ ohrọ re evaọ oria nọ u je fo, a ve ru obọ gaga evaọ oria nọ o jọ gwọlọ ere. Epọvo na mai kpobi ma re dhesẹ ohrọ kẹ ohwohwo re. Wọhọ oriruo, ukpenọ ma fi ẹgo họ eva, ma rẹ sae rọ vrẹ n’eva ze.—Ahwo Kọlọsi 3:13.

18. Ẹvẹ ma sai ro wo imuẹro obokparọ evaọ ẹmo-ofio abọ-ẹzi mai?

¹⁸ Ẹmo nọ ma bi fi ọ lọhọ họ. Wọhọ epanọ Jud ọ ta, o rọ ‘ohọre ogaga.’ (Jud 3) Ewegrẹ mai e rọ gaga. Orọnikọ Setan ọvo ho rekọ akpọ omuomu riẹ gbe sebaẹgba mai e be họre omai. Ghele na, ma rẹ sai fi eva mai kpobi họ nọ ma te kparobọ! Fikieme? Keme abọ Jihova ma rọ. Jud o ku ileta riẹ họ avọ ekareghẹhọ nnọ Jihova o fo ọnọ a rẹ kẹ “oruaro, ogaga, adhẹ gbe udu-ogaga . . . enẹna je rite bẹdẹ bẹdẹ.” (Jud 25) Kọ oyena o gbẹ rọ iroro idudu? Kọ avro jọ ọ riẹ inọ Ọghẹnẹ ọvo nana ọ rẹ sae ‘yọrọ omai no ekie’? (Jud 24) Vievie! Jọ o jọ ọtamuo mai omomọvo re ma gbẹ whaha ọfariẹ-ogbe, rehọ adhẹẹ kẹ udu-esuo nọ a fihọ, je fi oma mai họ otọ uyoyou Ọghẹnẹ. Evaọ edhere ọyena, ma rẹ te reawere obokparọ oruaro kugbe.

[Footnotes]

Enọ Ọkiẹkpemu

◻ Ẹvẹ ileta Jud i wuhrẹ omai re ma whaha ọfariẹ-ogbe?

◻ Fikieme u je wuzou tere re ma rọ adhẹẹ kẹ udu-esuo nọ a fihọ?

◻ Eme ọ thọ evaọ udu-esuo ukoko nọ a re ro ruiruo thọthọ?

◻ Ẹvẹ ma re ruiruo re ma daji uyoyou Ọghẹnẹ?

[Picture on page 25]

Wo ohẹriẹ no isoja ahwo Rom, Ileleikristi a rọ ẹmo-ofio abọ-ẹzi

[Picture on page 28]

Ithuru-igodẹ Ileleikristi a bi ruiruo, orọnikọ fiki oriobọ họ, rekọ fiki uyoyou