Amono Họ Ikọ-Odhiwu, Kọ Eme A re Ru?

Jihova ọ gwọlọ nọ ma riẹ kpahe uviuwou riẹ nọ o rrọ obọ odhiwu. Ikọ-odhiwu nọ a se “emọ Ọghẹnẹ” a rrọ uviuwou nana. (Job 38:7) Kọ eme Ebaibol na ọ ta kpahe ikọ-odhiwu? Kọ a wo oware jọ nọ a bi ru kugbe ahwo-akpọ? Kọ ikọ-odhiwu kpobi a rrọ uviuwou Ọghẹnẹ?

1. Amono họ ikọ-odhiwu?

Jihova ọ ma ikọ-odhiwu no taure ọ tẹ te ma otọakpọ na. Emama ẹzi a rrọ, yọ obọ odhiwu a rrọ kugbe Ọghẹnẹ. (Ahwo Hibru 1:14) Ikọ-odhiwu na a bu te ima buobu, yọ aikpobi a rrọ oghẹrẹsa. (Eviavia 5:11) A “bi ru lele ẹme [Jihova], . . . bi yoẹme kẹ urru riẹ.” (Olezi 103:20) Evaọ oke anwae, Jihova ọ jẹ hai vi ikọ-odhiwu nyae vuẹ idibo riẹ uwou, yọ a jẹ hai fiobọhọ kẹ ai je siwi ae. Evaọ oke mai na, ikọ-odhiwu a be kpọ Ileleikristi bru ahwo nọ a gwọlọ wuhrẹ kpahe Ọghẹnẹ.

2. Ono họ Setan avọ idhivẹri riẹ?

Nọ u te oke jọ, ikọ-odhiwu jọ a gbe je yoẹme kẹ Jihova ha. Ukọ-odhiwu ọsosuọ nọ ọ wọso Ọghẹnẹ họ “ọnọ a re se Ẹdhọ gbe Setan, nọ o bi su akpọ na soso thọ na.” (Eviavia 12:9) Fikinọ Setan ọ gwọlọ nọ o re su amọfa, o te ru ahwo-akpọ ọsosuọ gbe ikọ-odhiwu efa kuomagbei wọso Ọghẹnẹ. Ikọ-odhiwu ọwọsuọ nana họ idhivẹri na. Jihova o ru nọ a ro le ai no obọ odhiwu ziọ otọakpọ, yọ a ti kpe ai no bẹdẹ bẹdẹ.​—Se Eviavia 12:9, 12.

3. Oghẹrẹ vẹ Setan avọ idhivẹri na a be rọ daoma re a su omai thọ?

Setan avọ idhivẹri na a bi ru ahwo buobu ru iruẹru-imizi. Nọ ohwo ọ tẹ be daoma re o lele imizi ta ẹme yọ iruẹru-imizi. Yọ onana u yoma gaga. Wọhọ oriruo, ahwo jọ a rẹ nyabru ahwo nọ a rẹ gbẹva, gbe ijelẹ. Amọfa a rẹ gwọlọ idhere sa-sa nọ i wobọ kugbe imizi ro siwi omarai. A viẹ ahwo jọ họ no bi roro nọ a rẹ sae ta ẹme kẹ ahwo nọ a whu no. Rekọ Jihova ọ be vẹvẹ omai unu nọ: “Wha rẹ nyabru ahwo nọ a re lele izi ta ẹme he, yọ wha rẹ nyae nekpẹ mi egbẹva ha.” (Iruo-Izerẹ 19:31) Ọ be vẹvẹ omai unu re ma gbe kieruọ abọ Setan avọ idhivẹri hi. Ewegrẹ Ọghẹnẹ a rrọ, yọ a gwọlọ nwa omai oma.

GBE WUHRẸ EWARE EFA

4. Ikọ-odhiwu a re fiobọhọ kẹ ahwo wuhrẹ kpahe Jihova

Ikọ-odhiwu Ọghẹnẹ a rẹ nyabru ahwo ovavo nyae ta usi uwoma kẹ ae he. Ukpoye, a sae kpọ eg’Ọghẹnẹ re a nyabru ahwo nọ a gwọlọ wuhrẹ kpahe Ọghẹnẹ. Se Eviavia 14:6, 7, kẹsena wha vẹ ta ẹme kpahe enọ nana:

• Fikieme o rọ gwọlọ nọ ikọ-odhiwu a re fiobọhọ kẹ omai re ma sae ta usi uwoma?

• Kọ eva e were owhẹ nọ whọ rọ riẹ nọ ikọ-odhiwu e sae kpọ owhẹ bru ahwo nọ a gwọlọ wuhrẹ Ebaibol na? Fikieme?

5. Who wobọ evaọ iruẹru-imizi vievie he

Setan avọ idhivẹri na yọ ewegrẹ Jihova. Yọ ewegrẹ mai a rrọ re. Se Luk 9:38-42, kẹsena wha vẹ ta ẹme kpahe onọ nana:

• Oghẹrẹ vẹ idhivẹri na a re ru ahwo?

Ma rẹ kuvẹ re idhivẹri a su omai vievie he. Se Iziewariẹ 18:10-12, kẹsena wha vẹ ta ẹme kpahe enọ nana:

• Idhere vẹ idhivẹri na a rẹ rọ gwọlọ ru omai re a ta ẹme kugbe omai? Eware jọ vẹ nọ i wobọ kugbe imizi ahwo a re ru gaga evaọ oborai?

• Kọ who roro nọ u woma nọ Jihova ọ rọ ta nọ ma ghọ iruẹru-imizi? Fikieme whọ rọ ta ere?

Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.

IVIDIO: “Wha Wọso Ẹdhọ” (5:02)

• Kọ who roro nọ oware nọ Palesa o thuru fihọ obọ ọmọtẹ riẹ na o thọ? Fikieme whọ rọ ta ere?

• Eme o gwọlọ nọ Palesa o re ru re idhivẹri i gbe kpokpo iei hi?

No otọ avọ otọ ze Ileleikristi uzẹme a re ru oware ovo kugbe idhivẹri hi. Se Iruẹru Ikọ 19:19 gbe 1 Ahwo Kọrint 10:21, kẹsena wha vẹ ta ẹme kpahe onọ nana:

• Fikieme u ro wuzou re whọ raha oware kpobi nọ who wo nọ u wobọ kugbe iruẹru-imizi no?

6. Fi Setan avọ idhivẹri riẹ kparobọ

Setan họ ọnọ o bi su idhivẹri na. Rekọ Maekẹl nọ ọ rrọ ukọ-odhiwu oride na ọ be kpọ emamọ ikọ-odhiwu na. Maekẹl yọ odẹ ofa Jesu. Ẹvẹ Maekẹl o wo ogaga te? Se Eviavia 12:7-9, kẹsena wha vẹ ta ẹme kpahe enọ nana:

• Ono ọ mai wo ogaga? Maekẹl avọ ikọ-odhiwu riẹ manikọ Setan avọ idhivẹri riẹ?

• Kọ who roro nọ u du gwọlọ nọ ilele Jesu a rẹ dhozọ Setan avọ idhivẹri riẹ?

Whọ sai fi Setan avọ idhivẹri riẹ kparobọ. Se Jemis 4:7, kẹsena wha vẹ ta ẹme kpahe onọ nana:

• Ẹvẹ whọ sae rọ thọ omara no obọ Setan avọ idhivẹri riẹ?

EME WHO WUHRẸ NO?

Emamọ ikọ-odhiwu a re fiobọhọ kẹ omai. Setan avọ idhivẹri riẹ yọ ewegrẹ Jihova, yọ a be rọ iruẹru-imizi su ahwo thọ.

Ọkiẹkpemu

• Ẹvẹ ikọ-odhiwu Jihova a bi ro fiobọhọ kẹ ahwo wuhrẹ kpahe iẹe?

• Amono họ Setan avọ idhivẹri riẹ?

• Fikieme whọ rọ gwọlọ kẹnoma kẹ iruẹru-imizi?

KIẸ KPAHE EFA

Se kpahe oware nọ o kẹ imuẹro nọ Jesu họ Maekẹl nọ ọ rrọ ukọ-odhiwu oride na.

“Ono Họ Maekẹl Ukọ-Odhiwu Oride Na?” (Uzoẹme nọ o rrọ itanẹte)

Se kpahe oware nọ o kẹ imuẹro nọ orọnikọ Ẹdhọ yọ emuemu nọ ọ rrọ omai eva gheghe he.

“Kọ Ẹdhọ Ọ Ginẹ Rrọ?” (Uzoẹme nọ o rrọ itanẹte)

Se kpahe oghẹrẹ nọ aye jọ ọ sae rọ vabọ no iruẹru idhivẹri na.

“Epanọ Aye Jọ O ro Wo Evawere Evaọ Uzuazọ” (Uwou-Eroro Na, Ahrẹ 1, 1993)

Se kpahe oghẹrẹ nọ Setan ọ be rọ rehọ iruẹru-imizi su ahwo thọ.

“Uzẹme Kpahe Emajiki, Ẹva-ọgba, gbe Eda” (Edhere nọ O Re Su Kpohọ Uzuazọ Ebẹdẹ Bẹdẹ, abọ avọ 5)