Ọruẹrẹfihotọ Nọ Ọghẹnẹ O Bi Ro Ru Ẹjiroro Riẹ Gba

“[Ọghẹnẹ] o re ru eware kpobi lele epanọ eroro eva riẹ e rọ.”—AHWO ẸFẸSỌS 1:11.

 1. Fikieme ikoko Isẹri Jihova kpobi a ti ro kuomagbe evaọ April 12, 2006?

EVAỌ owọwọ Edesa-Oka, April 12, 2006, ole ahwo ima 16 a ti kokohọ re a ru Emu Owọwọ Olori na. Evaọ oria kpobi nọ a bi ti kokohọ, emẹjẹ jọ e te jariẹ nọ a fi ebrẹdi nọ e kare ẹvi họ, onọ u dikihẹ kẹ ugboma Kristi, gbe udi owawae nọ u dikihẹ kẹ azẹ riẹ. Evaọ ubrobọ ekuhọ ovuẹ nọ a ti jo dhesẹ otofa Ekareghẹhọ uwhu Jesu na, a te wọ ebrẹdi na nya ahwo na kpobi wariẹ, a vẹ te jẹ wọ udi na re. Evaọ umutho ikoko Isẹri Jihova jọ, ibi-ahwo jọ gheghe e te re ebrẹdi na jẹ da udi na. Rekọ evaọ ikoko buobu, uvumọ ohwo o ti dhe ai t’unu hu. Fikieme o jẹ rrọ nọ umutho Ileleikristi jọ ọvo, enọ i wo ẹruore ẹrria evaọ obọ odhiwu, a rẹ re ebrẹdi jẹ da udi na, rekọ ibuobu gbidigbidi, enọ e te rria bẹdẹ bẹdẹ evaọ otọakpọ, a rẹ re jẹ da ha?

 2, 3. (a) Ẹvẹ Jihova ọ rọ ma eware wọhọ epaọ ẹjiroro riẹ? (b) Ẹjiroro vẹ Jihova ọ rọ ma otọakpọ na gbe ahwo-akpọ?

² Jihova yọ Ọghẹnẹ nọ o re ru eware lele ẹjiroro. Evaọ erugba ẹjiroro riẹ, “o re ru eware kpobi lele epanọ eroro eva riẹ e rọ.” (Ahwo Ẹfẹsọs 1:11) Ọmọ riẹ họ ohwo ọsosuọ nọ ọ ma. (Jọn 1:1, 14; Eviavia 3:14) Kẹsena, ẹkwoma Ọmọ nana, Jihova ọ tẹ ma ijẹle buobu, jẹ ma ehrugbakpọ na, ọ tẹ te ma ohwo fihọ otọakpọ na.—Job 38:4, 7; Olezi 103:19-21; Jọn 1:2, 3; Ahwo Kọlọsi 1:15, 16.

³ Orọnikọ Jihova ọ ma otọakpọ na wọhọ oria nọ ọ rẹ jọ dawo ahwo-akpọ re a je te o ve ku ai kugbe ijẹle nọ e rrọ obọ odhiwu hu, wọhọ epanọ ichọche Kristẹndọm buobu a re wuhrẹ na. O wo ugogo ẹjiroro jọ họ eva rọ ma otọakpọ na, “re a ria ae.” (Aizaya 45:18) Ọghẹnẹ ọ ma otọakpọ na kẹ ahwo re a rria ae. (Olezi 115:16) Ẹjiroro riẹ họ re otọakpọ na kpobi u zihe ruọ aparadase, nọ ahwo-akpọ ikiẹrẹe e vọ, enọ e rẹ rẹro tei. Ọ ta kẹ ọzae avọ aye ọsosuọ na ẹdọvo nnọ ọ te rehọ ae kpohọ odhiwu hu.—Emuhọ 1:26-28; 2: 7, 8, 15.

A Wọso Ẹjiroro Jihova

 4. Ẹvẹ a rọ wọso edhere nọ Jihova o bi ro su eva emuhọ ikuigbe ohwo-akpọ?

⁴ Ọmọ ẹzi Ọghẹnẹ jọ ọ tẹ wọso, ọ tẹ gbẹ edhere nọ ọ rẹ rọ raha ẹjiroro Jihova, be rehọ uvẹ ufuoma iroro-ejẹ nọ Ọghẹnẹ ọ kẹ emama riẹ na ruiruo thọthọ. Ọ raha udhedhẹ nọ u re te enọ e rehọ uyoyou be roma kpotọ kẹ esuo-okpehru Jihova. Setan ọ lẹliẹ ọzae avọ aye ọsosuọ na họ jowọ nọ a ro si oma no Ọghẹnẹ. (Emuhọ 3:1-6) Ọ vro ogaga Jihova ha, rekọ o fi avro họ oghẹrẹ edhere nọ O bi ro su, bi dhesẹ nnọ O wo udu nọ o re ro su hu. Fikiere, ẹme-avro kpahe esuo Jihova ọ tẹ roma lahwe evaọ otọakpọ obonẹ, eva uzedhe emuhọ ikuigbe ohwo-akpọ.

 5. Ẹme-avro avivẹ vẹ a kpare ze, kọ amono u kpomahọ?

⁵ Ẹme-avro avivẹ nọ Setan ọ kpare ze evaọ edẹ Job u wobọ kugbe ẹme-avro ọsosuọ ọrọ udu nọ Jihova o wo nọ o re ro su na. Setan o fi avro họ ẹjiroro nọ emama Jihova a be rọ roma kpotọ kẹe jẹ be gọe. Setan o dhesẹ nọ iroro oriobọ a bi ro ru ere gbe nnọ, a tẹ dawo ae, a ti kiuke ku Ọghẹnẹ. (Job 1:7-11; 2:4, 5) Dede nọ odibo Jihova jọ evaọ otọakpọ obonẹ ọ riobọhọ ta ẹme yena, use-abọ nana u wholo ijẹle Ọghẹnẹ re, makọ Ọmọ ọvo Jihova.

 6. Ẹvẹ Jihova o ro ru lele ẹjiroro gbe otofa odẹ riẹ?

⁶ Bi ru lele ẹjiroro gbe otofa odẹ riẹ, Jihova o te ru oma riẹ zihe ruọ Ọruẹaro gbe Osiwi.a Ọ ta kẹ Setan nọ: “Me re ti fi egrẹ họ udevie ra avọ aye na, gbe udevie [ubi] ra avọ [ubi] riẹ. Ọ rẹ te nwa owhẹ uzou, whọ vẹ te royẹe ithihrawọ.” (Emuhọ 3:15) Ẹkwoma Ubi “aye” riẹ, hayo abọ obọ odhiwu ọrọ ukoko riẹ, Jihova ọ te kuyo kẹ use-abọ Setan ọ vẹ jẹ kẹ emọ Adamu ẹruore esiwo gbe uzuazọ.—Ahwo Rom 5:21; Ahwo Galesha 4:26, 31.

“Iroro Ididi Riẹ”

 7. Didi ẹjiroro Jihova ọ rehọ ẹkwoma Pọl ukọ na dhesẹ via?

⁷ Evaọ ileta riẹ se Ileleikristi evaọ obọ Ẹfẹsọs, Pọl ukọ na ọ nabi dhesẹ epanọ Jihova ọ ruẹrẹ eware họ re ọ ruẹsi ro ru ẹjiroro riẹ gba. Pọl o kere nọ: “Ọ jọ eva areghẹ kpobi dhesẹ iroro ididi riẹ kẹ omai, epaọ iroro riẹ nọ ọ ma fihọ vẹre eva Kristi. Wọhọ [ọruẹrẹfihotọ] rọ kẹ oke nọ u te no, re eware kpobi nọ e rọ ehru gbe enọ e rọ akpọ, a wo okugbe ọvo eva riẹ.” (Ahwo Ẹfẹsọs 1:9, 10) Ẹjiroro oruaro Jihova họ re o ru ehrugbakpọ na wo okugbe, nọ emama nọ e be rehọ uyoyou roma kpotọ kẹ esuo riẹ e rrọ. (Eviavia 4:11) A ve ti ru odẹ riẹ fuafo, dhesẹ Setan fihọ ọtọrue, oreva Ọghẹnẹ o vẹ te jọ otọakpọ na rugba wọhọ epanọ o rrọ obọ odhiwu na.—Matiu 6:10.

 8. Eme họ otofa ubiẹme nọ a fa “ọruẹrẹfihotọ” na?

⁸ “Iroro” Jihova hayo ẹjiroro riẹ o ti rugba ẹkwoma “ọruẹrẹfihotọ” jọ nọ o ru. Otofa gheghe orọ ubiẹme nọ Pọl ọ rọ ta ẹme evaọ etenẹ na u dhesẹ “ẹruorote iruẹru uwou.” Ubiẹme nana u dhesẹ edhere nọ a rẹ rọ rẹrote eware. Edhere igbunu nọ Jihova ọ rẹ rọ ruẹrẹ eware họ re o ro ru ẹjiroro riẹ gba u kpomahọ “iroro ididi” nọ a ti dhesẹ via ẹmẹrera evaọ ikpe udhusoi buobu.—Ahwo Ẹfẹsọs 1:10; 3:9.

 9. Ẹvẹ Jihova ọ rọ rehọ ẹmẹrera dhesẹ ẹjiroro odidi riẹ via?

⁹ Ẹkwoma evọ sa-sa nọ ọ re kugbe idibo riẹ jọ, Jihova ọ rehọ ẹmẹrera dhesẹ epanọ ẹjiroro riẹ kpahe Ubi nọ a yeyaa riẹ evaọ Idẹn na u ti ro rugba. Ọvọ nọ o lele Abraham re o dhesẹ nnọ Ubi nọ a yeyaa riẹ na u ti no uyẹ Abraham ze o vẹ te jẹ jọ edhere nọ “erẹwho akpọ na kpobi” a ti ro wo oghale. Ọvọ yena o te je dhesẹ nnọ a ti ku amọfa kugbe ugogo abọ ubi na. (Emuhọ 22:17, 18) Ọvọ Uzi nọ o lele Izrẹl uwo re u dhesẹ ẹjiroro Jihova onọ o ti ro wo “uvie izerẹ” via. (Ọnyano 19:5, 6) Ọvọ nọ a lele Devidi na u dhesẹ nnọ Ubi na o te jọ ọnọ o wo Uzou Uvie nọ o te jọ ribri. (2 Samuẹle 7:12, 13; Olezi 89:3, 4) Nọ ọvọ Uzi na o su ahwo Ju te Mesaya na oma no, Jihova o te dhesẹ abọ efa erọ erugba ẹjiroro riẹ. (Ahwo Galesha 3:19, 24) Ahwo-akpọ nọ a ti kugbe abọ ọsosuọ ubi na a ti ru “uvie izerẹ” nọ a ruẹaro kpahe na via, a vẹ te re ‘ọvọ ọkpokpọ’ kugbe ai wọhọ “Izrẹl” ọkpokpọ na, ọrọ abọ-ẹzi.—Jerimaya 31:31-34; Ahwo Hibru 8:7-9.b

10, 11. (a) Oghẹrẹ vẹ Jihova o ro dhesẹ Ubi nọ a yeyaa riẹ na via? (b) Fikieme Ọmọ ọvo Ọghẹnẹ ọ rọ ziọ otọakpọ?

¹⁰ Nya lele epaọ ẹjiroro Ọghẹnẹ, oke u te te re Ubi nọ a yeyaa riẹ na ọ roma via evaọ otọakpọ. Jihova o vi Gebriẹl ẹnjẹle na re ọ nyae vuẹ Meri inọ o ti yẹ ọmọzae nọ a ti se Jesu. Ẹnjẹle na ọ ta kẹe nọ: “Ọ rẹ te jọ ruaro, a re ti sei Ọmọ Oride na; Ọnowo na Ọghẹnẹ ọ rẹ te kẹe akaba-uvie Devidi Ọsẹ riẹ. Ọ rẹ te ria uvie uwou Jekọp bẹdẹ bẹdẹ; uvie riẹ u re ti wo urere he.” (Luk 1:32, 33) Ohwo nọ Ubi nọ a yeyaa riẹ na ọ be te jọ u te vẹ viere.—Ahwo Galesha 3:16; 4:4.

¹¹ Ọmọ ọvo Jihova ọ be te ziọ otọakpọ, a vẹ te dawo iẹe te oka. Uyo ogbagba kẹ use-abọ Setan o te jọ Jesu obọ. Kọ o ti kru ẹrọwọ riẹ wọhọ epanọ Ọsẹ riẹ ọ gwọlọ mi ei? Onana o jọ oware udidi. Uwhremu na Pọl ukọ na o dhesẹ abọ nọ Jesu o wo evaọ onana: “Ma be ta nọ, oware udidi egagọ mai na o rẹ ruaro gaga: A jọ eva uwo fere iẹe via, jẹjọ eva Ẹzi dhesẹ iẹe vevẹ, otu ikọ-idhiwu a rue riẹ, ọ jọ udevie erẹwho ta usiuwoma, akpọ ọ rọwo riẹ, a tẹ rehọ iẹ kpo ehru eva oruaro.” (1 Timoti 3:16) Ẹhẹ, ẹkwoma ẹgbakiete ọgbagba riẹ rite uwhu, Jesu ọ kẹ uvi uyo rọkẹ use-abọ Setan. Rekọ abọ efa erọ oware udidi na e gbẹ riẹ nọ i ri vẹ hẹ.

“Eware Ididi Uvie Ọghẹnẹ”

12, 13. (a) Ovẹ họ abọjọ ọrọ “eware ididi uvie Ọghẹnẹ”? (b) Eme o gwọlọ re Jihova ọ salọ umutho ahwo-akpọ jọ re a kpohọ odhiwu?

¹² Evaọ erẹ usiuwoma ota riẹ jọ evaọ Galili, Jesu o dhesẹ nnọ oware udidi na avọ egọmeti Uvie Mesaya riẹ e jẹhọ ohwohwo. Ọ ta kẹ ilele riẹ nọ: “A kẹ owhai ẹriẹ kpahọ eware ididi uvie odhiwu [“uvie Ọghẹnẹ,” Mak 4:11].” (Matiu 13:11) Abọjọ ọrọ oware udidi yena u kie kpahe ẹsalọ nọ Jihova ọ te salọ “uthuru okakao,” ahwo-akpọ 144,000 re a kuomagbe Ọmọ riẹ wọhọ abọ ubi na, re a lele iei su evaọ obọ odhiwu.—Luk 12:32; Eviavia 14:1, 4.

¹³ Nọ o rọnọ a ma ahwo-akpọ re a rria otọakpọ na, o gwọlọ ‘emama ekpokpọ’ mi Jihova re ahwo-akpọ jọ a kpohọ odhiwu. (2 Ahwo Kọrint 5:17) Nọ ọ jẹ ta ẹme wọhọ omọvo enọ a salọ kẹ ẹruore odhiwu nana, Pita ukọ na o kere nọ: “Oghale u te Ọghẹnẹ na gbe Ọsẹ Ọnowo mai Jesu Kristi; fiki ohrọ ulogbo riẹ a rọ wariẹ omai yẹ zihe ruọ ọkpokpọ, e ruọ ẹruore ebẹdẹ fiki ẹkparomatha Jesu kristi no iwhuowhu, je wo ukuoriọ nọ o rẹ raha ha, nọ o kare izue, onọ o rẹ hiẹ hẹ, nọ a ruẹrẹ kpahe obọ odhiwu kẹ owhai.”—1 Pita 1:3, 4.

14. (a) Ẹvẹ “eware ididi uvie Ọghẹnẹ” u ro kpomahọ enọ e rrọ ahwo Ju hu? (b) Ẹvẹ ma sai ro wo otoriẹ “eware ididi Ọghẹnẹ” nana?

¹⁴ Abọ ọfa ọrọ oware udidi nọ u kie kpahe egọmeti Uvie na họ ẹjiroro Ọghẹnẹ re o kuọ enọ e rrọ ahwo Ju hu kugbe umutho ahwo-akpọ nọ a ti se re a lele Kristi su evaọ obọ odhiwu na. Pọl o dhesẹ abọ nana ọrọ “ọruẹrẹfihotọ” Jihova, hayo edhere nọ ọ be rọ kpọ orugba ẹjiroro riẹ: “A sai ru emọ ahwo riẹ eva ige nọ e vrẹ hẹ, wọhọ epanọ a jọ enẹna rehọ ai via kẹ ikọ na gbe eruẹaro eva Ẹzi na; re ahwo Egedhọ a jọ ereuku re, a vẹ jẹ jọ otu oma-ovo na, a vẹ gbẹ jọ otu aghale eya na eva Kristi Jesu fiki usiuwoma na.” (Ahwo Ẹfẹsọs 3:5, 6) A dhesẹ abọ nana ọrọ oware udidi na kẹ “ikọ” na. Epọvo na re nẹnẹ, o gbẹ rrọ obufihọ ẹzi ọfuafo na ha, ma re wo otoriẹ “eware ididi Ọghẹnẹ” hẹ.—1 Ahwo Kọrint 2:10; 4:1; Ahwo Kọlọsi 1:26, 27.

15, 16. Fikieme Jihova ọ rọ salọ ibe isu erọ Kristi no udevie ahwo-akpọ ze?

¹⁵ A ta nnọ a dẹ “ahwo idu udhuhrẹ gbe ene” nọ a ruẹ nọ i dikihẹ gba “Omogodẹ” na evaọ Ugbehru Zayọn obọ odhiwu na “no obọ otọ akpọ na ze,” “no udevie [ahwo ze, wọhọ] ibi ọsosuọ kẹ Ọghẹnẹ avọ Omogodẹ na,” Kristi Jesu. (Eviavia 14:1-4) Jihova ọ jọ udevie emọ obọ odhiwu riẹ salọ ọmọ ọsosuọ riẹ re ọ jọ ugogo abọ ubi nọ a yeyaa riẹ evaọ Idẹn na, rekọ fikieme ọ rọ salọ egbẹnya Kristi no udevie ahwo-akpọ ze? Pọl ukọ na o dhesẹ inọ “fiki oreva Ọghẹnẹ” a ro se umutho ahwo nana “wọhọ epanọ evawere iwoma riẹ ọ rọ.”—Ahwo Rom 8:17, 28-30; Ahwo Ẹfẹsọs 1:5, 11; 2 Timoti 1:9.

¹⁶ Ẹjiroro Jihova họ re o ru odẹ ulogbo ọrẹri riẹ fo jẹ kpare esuo riẹ kpehru. Ẹkwoma “ọruẹrẹfihotọ” riẹ nọ ọ rehọ areghẹ okpehru riẹ ru na, Jihova o vi Ọmọ otuyẹ riẹ ziọ otọakpọ, a tẹ dawo iẹe te oka. Ofariẹ, Jihova ọ tẹ jiroro inọ ahwo-akpọ jọ nọ e yọrọ ẹrọwọ rai kẹ esuo okpehru Riẹ rite uwhu a rẹ jọ abọjọ egọmeti Uvie Ọmọ riẹ.—Ahwo Ẹfẹsọs 1:8-12; Eviavia 2:10, 11.

17. Fikieme eva e sae rọ were omai inọ Kristi gbe ibe isu riẹ a rria uzuazọ wọhọ ahwo-akpọ?

¹⁷ Jihova o dhesẹ uyoyou ulogbo riẹ kẹ emọ Adamu ẹkwoma Ọmọ riẹ nọ o vi ziọ otọakpọ, ọ tẹ jẹ jọ udevie ahwo-akpọ salọ enọ e te jọ ibe ereuku kugbe Ọmọ na evaọ egọmeti Uvie na. Erere vẹ onana u wo kẹ amọfa nọ a yọrọ ẹrọwọ kẹ Jihova no rono oke Ebẹle vrẹ? Fikinọ a yẹ rai wọhọ erigbo kẹ uzioraha gbe uwhu, o gwọlọ nọ a re siwi ahwo-akpọ sebaẹgba evaọ abọ-ẹzi gbe abọ-iwo a ve je ru ai gbagba, rọwo kugbe ẹjiroro ọsosuọ Jihova kẹ ahwo-akpọ. (Ahwo Rom 5:12) Ẹvẹ o rrọ omosasọ te kẹ enọ i bi rẹro uzuazọ ebẹdẹ bẹdẹ evaọ otọakpọ re a riẹ nnọ Ovie rai ọ te rehọ uyoyou gbe ẹwo yeri kugbe ai wọhọ epanọ o yeri kugbe ilele riẹ evaọ etoke odibọgba otọakpọ riẹ na! (Matiu 11:28, 29; Ahwo Hibru 2:17, 18; 4:15; 7:25, 26) Yọ ẹvẹ o rrọ omosasọ te kẹ ae re a riẹ nnọ ibe ivie gbe izerẹ erọ Kristi evaọ obọ odhiwu a jọ ezae gbe eyae ẹrọwọ nọ i lele ewhrehe omobọ rai gbe ebẹbẹ uzuazọ muabọ no, wọhọ omai!—Ahwo Rom 7:21-25.

Ẹjiroro Jihova nọ O re Kie He

18, 19. Fikieme eme ọ Pọl nọ e rrọ Ahwo Ẹfẹsọs 1:8-11 i ro vẹ omai ẹro viere, kọ eme ma be te ta kpahe evaọ uzoẹme nọ o rrọ aro na?

¹⁸ Eme nọ Pọl o kere se ibe Ileleikristi nọ a wholo, nọ e rrọ Ahwo Ẹfẹsọs 1:8-11 na, i vẹ omai ẹro ziezi no enẹna. Ọ ta inọ Jihova o “dhesẹ iroro ididi riẹ” kẹ ai no, inọ a “wo ukuoriọ” kugbe Kristi, gbe nnọ a rehọ e rai “mu wọhọ epaọ oreva riẹ, ọnọ o re ru eware kpobi lele epanọ eroro eva riẹ e rọ.” Ma ruẹ inọ onana o rọwo kugbe ‘ọruẹrẹfihotọ’ igbunu Jihova kẹ orugba ẹjiroro riẹ. Onana u te je fi obọ họ kẹ omai wo otoriẹ oware nọ o soriẹ nọ umutho jọ ọvo evaọ usu Ileleikristi nọ i bi kpohọ Emu Owọwọ Olori na a be rọ re ebrẹdi jẹ da udi na.

¹⁹ Evaọ uzoẹme nọ o rrọ obaro na, ma te ruẹ oware nọ Ekareghẹhọ uwhu Kristi na u dhesẹ kẹ Ileleikristi nọ i wo ẹruore obọ odhiwu. Ma ti je wuhrẹ oware nọ ima ahwo buobu enọ ẹruore rai ọ rrọ ẹrria bẹdẹ bẹdẹ evaọ otọakpọ a re ro wo isiuru gaga kpahe oware nọ Ekareghẹhọ na u dikihẹ kẹ.

[Oruvẹ-obotọ]

[Uwoho nọ o rrọ ẹwẹ-obe avọ 8]

Ọkiẹkpemu

• Fikieme Jihova ọ rọ ma otọakpọ je fi ohwo họ eva riẹ?

• Fikieme u je fo re a dawo Ọmọ ọvo Jihova evaọ otọakpọ?

• Fikieme Jihova ọ rọ salọ ibe isu erọ Kristi no udevie ahwo-akpọ ze?