Jizus konsentra na djuda kes algen ki ta xintiba tristi pamodi ses pekadu. El konvida-s pa bira se disiplus. El sabia ma kel razon prinsipal ki ta pô-nu ta sufri é pekadu. Pur isu, el ta djudaba prinsipalmenti kes algen ki es ta txomaba di pekador. Através di un ilustrason el splika: “Kes algen ki tene saúdi ka meste dotor, má é kes duenti ki meste.” Tanbê el fla: “N ka ben txoma kes algen justu, má kes pekador.” (Mat. 9:12, 13) Jizus vive di akordu ku kes palavra li. Kantu un mudjer laba pé di Jizus ku se láguas el pâpia ku el ku bondadi i el púrdua se pekadus. (Luk. 7:37-50) Jizus inxina kel mudjer samaritana un verdadi inportanti, sikrê el sabia ma el staba ta vive ku un ómi ki ka éra se maridu. (Juan 4:7, 17-19, 25, 26) Deus ti da Jizus puder pa kaba ku mórti ki é rezultadu di pekadu. Modi? Jizus resusita ómis, mudjeris i mininus. — Mat. 11:5. w24.08 4 ¶9-10

Modi ki já-já Jeová ta ben da glória pa se nómi? El ta faze kel-li óras ki el ben faze justisa. Ka ta dura el ta ben distrui Babilónia Grandi ki sta ta mantxa se nómi ki é santu. (Apo. 17:5, 16; 19:1, 2) Óras ki Babilónia Grandi distruídu alguns algen pode disidi ben sirbi Jeová djuntu ku nos. Na fin, na Armajedon, Jeová ta distrui kel mundu mau li i Satanás. El ta ben kaba ku tudu kes algen ki é kóntra el i ki ta mantxa se nómi. Má el ta salva tudu kes algen ki ta ama-l, ki ta obi ku el i ki ten orgulhu di da-l glória. (Mar. 8:38; 2 Tes. 1:6-10) Dipôs di próva final, ki ta kontise na fin di govérnu di Kristu di mil anu, Jeová ta ben linpa se nómi pa tudu ténpu. (Apo. 20:7-10) Na kel ténpu, ‘téra ta ben intxi di konhisimentu di glória di Jeová, sima agu ta kubri mar.’ (Hab. 2:14) Ta ben ser sábi dimás óras ki tudu algen ben da Jeová glória ki se nómi merese! w25.01 7 ¶15-16

Kuzê ki ta ba djudaba kes kriston ebreu aguentaba kes pirsigison ki es ta ba pasaba pa el? Apóstlu Paulu krê djudaba kes kriston odja kes bon rezultadu ki es ta tinha si es aguentaba kes prubléma. El splika ma kantu kristons pasa pa prublémas, talvês Deus uza kes prubléma pa trena-s. Kes prubléma pode djudaba es dizenvolve ô midjora kes kualidadi ki ta agradaba Jeová. Óras ki kes kriston ebreu ta konsentraba na kes bon rezultadu ki es ta tinha pamodi kes prubléma, éra más fásil pa es aguentaba firmi. (Ebr. 12:11) Paulu insentiva kristons ebreu pa ser korajozu i ka dizisti óras ki es ta pasaba pa prublémas. Apóstlu Paulu pode daba es bons konsedju sobri modi ki es ta aguentaba pirsigison. Dja ki antis el ta pirsigiba kristons, el sabia kuzê ki es staba ta pasa pa el. Tanbê, el sabia modi ki es pode aguentaba pirsigison pamodi dipôs ki el bira kriston el pasa pa txeu pirsigison. — 2 Kor. 11:23-25. w24.09 12-13 ¶16-17