2 Bantotila

4 Ntangu yai, nkento ya mbikudi mosi yina vandaka na kati ya kimvuka ya bambikudi+ didilaka Elisha nde: “Nsadi na nge, bakala na mono, me fwaka, mpi nge me zaba mbote nde nsadi na nge vandaka kuwa Yehowa boma+ ntangu yonso. Kansi, muntu mosi ya beto kele ti mfuka na yandi me kwisa kubaka bana na mono zole sambu bo kuma bampika na yandi.” 2 Elisha tubilaka yandi nde: “Inki mono lenda sala sambu na nge? Songa mono, inki nge kele na yo na nzo?” Yandi vutulaka nde: “Nsadi na nge kele ata na kima ve na nzo, katula kaka dibungu mosi ya mafuta.”*+ 3 Ebuna Elisha tubaka nde: “Kwenda na nganda, lomba mabungu na bantu yonso ya ke zingaka pene-pene na nge, mabungu ya mpamba. Kubaka ve kaka mabungu fioti. 4 Na nima kota, nge ti bana na nge, mpi beno kanga kielo. Fulusa mabungu yina yonso, mpi tula mabungu ya kufuluka na lweka.” 5 Ebuna nkento yina kwendaka.

Ntangu yandi ti bana na yandi kotaka na nzo na bo mpi kangaka kielo, bana vandaka kupesa yandi mabungu, ebuna yandi vandaka kutula mafuta.+ 6 Ntangu mabungu fulukaka, nkento yina tubilaka mosi na kati ya bana na yandi nde: “Natila mono dibungu ya nkaka.”+ Kansi mwana yina tubilaka yandi nde: “Mabungu me mana.” Ebuna mafuta yambulaka kubasika.+ 7 Yo yina yandi kotaka mpi songaka muntu ya Nzambi ya kieleka, mpi muntu yina tubaka nde: “Kwenda, teka mafuta yina mpi futa bamfuka na nge, ebuna nge ti bana na nge beno lenda zingila mbongo yina ta bikala.”

8 Kilumbu mosi Elisha kwendaka na Shunemi;+ nkento mosi ya lukumu vandaka na bwala yina, ebuna nkento yina bondilaka Elisha na kudia kuna.+ Konso mbala yina yandi vandaka kuluta kuna, yandi vandaka kukwenda kudia kuna. 9 Yo yina nkento yina tubilaka bakala na yandi nde: “Mono ke zaba nde muntu yina ke lutaka awa mbala na mbala kele muntu ya santu ya Nzambi. 10 Pardo, beto sala suku mosi ya fioti na ludi+ mpi beto tudila yandi mbeto, mesa, kiti, mpi kima ya kutudila mwinda. Mpidina, konso ntangu yina yandi ke kwisa kutala beto, yandi lenda vanda kuna.”+

11 Kilumbu mosi yandi kwisaka kuna, ebuna yandi kwendaka na suku na zulu ya ludi sambu na kulala. 12 Na nima yandi tubilaka nsadi na yandi Gehazi+ nde: “Binga nkento yina ya Shunemi.”+ Yandi bingaka nkento yina, mpi nkento yina telamaka na ntwala na yandi. 13 Ebuna yandi tubilaka Gehazi nde: “Songa yandi nde, ‘Nge me kudiyangisa mingi sambu na beto.+ Inki mono lenda sala sambu na nge?+ Keti mono fwete kwenda kutubila ntotila+ to mfumu ya basoda sambu na nge?’” Kansi nkento yina vutulaka nde: “Mono ke zingaka na kati ya bantu na mono.” 14 Yo yina yandi tubaka nde: “Ebuna, nki mono lenda sala sambu na yandi?” Gehazi tubaka nde: “Yandi kele na mwana ve,+ mpi bakala na yandi kele mununu.” 15 Na mbala mosi yandi tubaka nde: “Binga nkento yina.” Ebuna yandi bingaka nkento yina, mpi nkento yina telamaka na kielo. 16 Na nima yandi tubaka nde: “Na ntangu yai na mvula ya ke kwisa, nge ta simba mwana ya bakala.”+ Kansi nkento yina tubaka nde: “Ve, mfumu na mono, muntu ya Nzambi ya kieleka! Kukusa ve nsadi na nge.”

17 Ata mpidina, nkento yina bakaka divumu mpi butaka mwana ya bakala na ntangu yina mosi, na mvula yina landaka, mutindu Elisha songaka yandi. 18 Mwana yina yelaka, mpi kilumbu mosi yandi basikaka mpi kwendaka kisika tata na yandi vandaka; tata na yandi vandaka ti bantu yina ke katulaka bima na bilanga. 19 Yandi vandaka kutubila tata na yandi nde: “Ntu na mono, O ntu na mono!” Ebuna tata na yandi tubilaka nsadi nde: “Nata yandi na mama na yandi.” 20 Yo yina nsadi yina nataka yandi na mama na yandi, ebuna yandi lalaka na makulu na yandi tii na midi, na nima yandi fwaka.+ 21 Nkento yina tombukaka mpi ladisaka yandi na mbeto ya muntu ya Nzambi ya kieleka,+ ebuna yandi kangaka kielo mpi kwendaka. 22 Yandi bingaka bakala na yandi mpi tubaka nde: “Pardo, tindila mono nsadi mosi ti mpunda mosi, mpi mono ke kwenda nswalu kisika ya muntu ya Nzambi ya kieleka ebuna mono ke kwisa kuvutuka.” 23 Kansi yandi tubaka nde: “Sambu na nki nge ke kwenda kutala yandi bubu yai? Yo kele ve ngonda ya mpa+ to kisabatu.” Kansi, nkento tubaka nde: “Mambu yonso kele mbote.” 24 Yo yina yandi yidikaka mpunda mpi tubilaka nsadi na yandi nde: “Nata ntinu. Kunata ve malembe sambu na mono kana mono songa nge ve.”

25 Yo yina nkento yina kwendaka na Ngumba ya Karmele kisika muntu ya Nzambi ya kieleka vandaka. Ntangu muntu ya Nzambi ya kieleka monaka yandi na ntama, yandi tubilaka nsadi na yandi Gehazi nde: “Tala! Nkento ya Shunemi yandi yina kuna. 26 Kwenda ntinu kukutana ti yandi mpi yula yandi nde, ‘Keti nge kele mbote? Keti bakala na nge kele mbote? Keti mwana na nge kele mbote?’” Ebuna nkento yina tubaka nde: “Mambu yonso kele mbote.” 27 Ntangu nkento yina kumaka kisika ya muntu ya Nzambi ya kieleka na ngumba, na mbala mosi yandi simbaka yandi na makulu.+ Ebuna Gehazi pusanaka sambu na kuyina yandi, kansi muntu ya Nzambi ya kieleka tubaka nde: “Bika yandi, sambu yandi kele na mpasi ya ngolo,* mpi Yehowa me bumbila mono yo mpi me songa mono ve.” 28 Ebuna nkento yina tubaka nde: “Keti mono lombaka mfumu na mono mwana? Keti mono tubaka ve nde, ‘Nge fwete pesa mono ve kivuvu ya luvunu’?”+

29 Na mbala mosi yandi tubilaka Gehazi nde: “Kanga bilele na nge na luketo,+ baka nti na mono na diboko na nge, mpi kwenda. Kana nge kutana ti muntu, kupesa yandi ve mbote; mpi kana muntu kupesa nge mbote, kupesa yandi ve mvutu. Kwenda mpi tula nti na mono na luse ya mwana.” 30 Ebuna mama ya mwana yina tubaka nde: “Ya kieleka mutindu Yehowa kele na luzingu mpi mutindu nge* kele na luzingu, mono ta yambula nge ve.”+ Yo yina yandi telamaka mpi kwendaka ti nkento yina. 31 Gehazi kwendaka na ntwala na bo mpi tulaka nti na luse ya mwana, kansi makelele to mvutu vandaka ve.+ Yandi vutukaka sambu na kukutana ti Elisha mpi songaka yandi nde: “Mwana me telama ve.”

32 Ntangu Elisha kumaka na nzo yina, mwana vandaka me lala ya kufwa na mbeto na yandi.+ 33 Yandi kotaka mpi kangaka kielo, bo zole na kati, ebuna yandi yantikaka kusamba Yehowa.+ 34 Yandi mataka na mbeto, lalaka na zulu ya mwana, mpi tulaka munoko na yandi na zulu ya munoko ya mwana, meso na yandi na zulu ya meso ya mwana, bipala-pala ya maboko na yandi na zulu ya bipala-pala ya maboko ya mwana mpi yandi bikalaka ya kuditandula na zulu na yandi, ebuna nitu ya mwana yantikaka kubaka tiya.+ 35 Yandi tambulaka ndambu na ndambu na kati ya nzo, mpi yandi mataka na mbeto mpi kuditandulaka diaka na zulu na yandi. Mwana salaka nsia mbala nsambwadi, na nima mwana yina kangulaka meso.+ 36 Ebuna Elisha bingaka Gehazi mpi tubaka nde: “Binga nkento ya Shunemi.” Yandi bingaka yandi, mpi nkento yina kotaka kisika yandi vandaka. Ebuna yandi tubaka nde: “Baka mwana na nge.”+ 37 Nkento yina kotaka, bwaka na makulu na yandi, mpi fukamaka na ntwala na yandi, na nima yandi bakaka mwana na yandi mpi basikaka.

38 Ntangu Elisha vutukaka na Gilgale, nzala vandaka na insi yina.+ Kimvuka ya bambikudi+ vandaka na ntwala na yandi, ebuna yandi tubilaka nsadi na yandi+ nde: “Tula nzungu ya nene mpi lambila kimvuka ya bambikudi madia.” 39 Mosi na kati na bo kwendaka na nseke sambu na kubuka ndunda, mpi yandi monaka nti mosi ya vinu ya mfinda ebuna yandi bukaka bambuma ya nti yina, yandi fulusaka yo na lele na yandi. Na nima yandi vutukaka, mpi yandi zengaka yo bitini-bitini na nzungu ya kulambila madia, kansi yandi zabaka ve kana yo vandaka nki. 40 Na nima, bo pesaka yo na bantu yina sambu bo dia, kansi ntangu bo diaka madia yina, bo bokaka nde: “Lufwa kele na kati ya nzungu, O muntu ya Nzambi ya kieleka.” Mpi bo monaka ve mpila ya kudia yo. 41 Yo yina yandi tubaka nde: “Beno nata ndambu ya fufu.” Yandi losaka yo na kati ya nzungu, na nima yandi tubaka nde: “Pesa yo na bantu.” Mpi kima mosi ve ya mbi vandaka na kati ya nzungu yina.+

42 Muntu mosi katukaka na Baale-shalisha,+ mpi yandi natilaka muntu ya Nzambi ya kieleka mampa 20 ya orze+ ya bo me sala na bambuma ya ntete ya kuyela, mpi saki ya bambuma ya mpa.+ Ebuna Elisha tubaka nde: “Pesa yo na bantu sambu bo dia.” 43 Kansi nsadi na yandi tubaka nde: “Inki mutindu mono lenda tula yo na ntwala ya bantu 100?”+ Ebuna yandi tubaka nde: “Pesa yo na bantu sambu bo dia, sambu Yehowa ke tuba nde, ‘Bo ta dia mpi ndambu ta bikala.’”+ 44 Yo yina yandi tulaka yo na ntwala na bo, ebuna bo diaka mpi ndambu bikalaka,+ kaka mutindu Yehowa tubaka.