2 Bansangu

33 Manase+ vandaka ti bamvula 12 ntangu yandi kumaka ntotila, mpi yandi yalaka bamvula 55 na Yeruzalemi.+

2 Yandi salaka mambu ya mbi na meso ya Yehowa, yandi landaka mambu ya mbi ya makanda yina Yehowa kulaka na ntwala ya bantu ya Izraele.+ 3 Yandi tungaka diaka bisika ya kunanguka yina tata na yandi Ezekiasi fwaka,+ yandi tedimisaka bamesa-kimenga sambu na Babaale mpi salaka banti ya santu,* mpi yandi fukiminaka makesa yonso ya zulu mpi sadilaka yo.+ 4 Yandi tungaka mpi bamesa-kimenga na nzo ya Yehowa,+ yina Yehowa tubaka sambu na yo nde: “Zina na mono ta vandaka na Yeruzalemi kimakulu.”+ 5 Yandi tungilaka makesa yonso ya zulu bamesa-kimenga na bibansala zole ya nzo ya Yehowa.+ 6 Yandi yokaka* bana na yandi na tiya+ na Muwanda ya Mwana ya Inomi;+ yandi salaka mazi,+ yandi yulaka bantu yina ke zabisaka na ntwala mambu yina ta bwa, yandi sadilaka kindoki, mpi yandi tulaka bantu yina ke solulaka ti bampeve ya bafwa mpi bantu yina ke zabisaka bantu mambu yina ta kumina bo.+ Yandi salaka mambu ya mbi na kiteso mosi ya nene na meso ya Yehowa, sambu na kupesa yandi makasi.

7 Yandi tulaka kiteki yina yandi salaka na nzo ya Nzambi ya kieleka,+ yina Nzambi tubilaka Davidi mpi mwana na yandi Salomo sambu na yo nde: “Na nzo yai mpi na Yeruzalemi, yina mono me sola na kati ya makanda yonso ya Izraele, mono ta tula zina na mono kimakulu.+ 8 Mpi mono ta katula diaka ve ata fioti makulu ya Izraele na ntoto yina mono pesaka ba-nkaka na bo, kana bo zitisa mbote-mbote mambu yonso yina mono songaka bo, Nsiku yonso, bansiku ya kusonika, mpi bankanu yina mono pesaka na nzila ya Moize.” 9 Manase landaka kuvidisa bantu ya Yuda mpi ya Yeruzalemi nzila, yandi pusaka bo na kusala mambu ya mbi kuluta makanda yina Yehowa manisaka na ntwala ya bantu ya Izraele.+

10 Yehowa landaka kutubila Manase mpi bantu na yandi, kansi bo tulaka ve dikebi.+ 11 Yo yina Yehowa tindilaka bo bamfumu ya basoda ya ntotila ya Asiria, mpi bo kangaka Manase ti bandobo* mpi kangisaka yandi miniololo zole ya kwivre ebuna bo nataka yandi na Babilone. 12 Ntangu yandi vandaka na mpasi, yandi bondilaka Yehowa Nzambi na yandi sambu yandi wila yandi mawa* mpi yandi kudikulumusaka mingi kibeni na ntwala ya Nzambi ya ba-nkaka na yandi. 13 Manase landaka kusamba Nzambi, ebuna yandi waka kisambu na yandi mpi diambu ya yandi lombaka sambu yandi wila yandi mawa, mpi Nzambi vutulaka yandi na Yeruzalemi na kimfumu na yandi.+ Ebuna Manase zabaka nde Yehowa kele Nzambi ya kieleka.+

14 Na nima, yandi tungaka kibaka ya nganda sambu na Mbanza ya Davidi,+ na westi ya Gihoni+ na muwanda, yo lutaka tii na Kielo ya Bambisi ya Masa,+ yandi ziungisaka yo tii na Ofeli,+ mpi yandi kumisaka yo nda kibeni. Diaka, yandi tulaka bamfumu ya basoda na bambanza yonso ya ngolo ya Yuda. 15 Na nima, yandi katulaka banzambi ya banzenza ti kiteki na nzo ya Yehowa+ mpi bamesa-kimenga yonso yina yandi tungaka na ngumba ya nzo ya Yehowa+ mpi na Yeruzalemi, ebuna yandi losaka yo na nganda ya mbanza. 16 Yandi yidikaka mpi mesa-kimenga ya Yehowa+ mpi yantikaka kupesa bimenga ya kinduku+ ti bimenga sambu na kupesa matondo+ na zulu na yo, ebuna yandi songaka bantu ya Yuda na kusadila Yehowa Nzambi ya Izraele. 17 Ata mpidina, bantu vandaka kaka kupesa bimenga na bisika ya kunanguka, ata bo vandaka kupesa yo kaka na Yehowa Nzambi na bo.

18 Sambu na mambu ya nkaka ya Manase salaka, kisambu yina yandi salaka na Nzambi na yandi, mpi mambu yina bantu ya ke monaka bambona-meso tubilaka yandi na zina ya Yehowa Nzambi ya Izraele, bo me sonikaka yo na mukanda ya mambu ya bantotila ya Izraele. 19 Diaka, kisambu na yandi+ mpi mutindu bo pesaka yandi diambu yina yandi lombaka, masumu na yandi yonso mpi kukonda kwikama na yandi,+ bisika yina yandi tungaka bisika ya kunanguka mpi tedimisaka banti ya santu*+ ti biteki na ntwala nde yandi kudikulumusa, bo me sonikaka yo na masonama ya bantu na yandi ya ke monaka bambona-meso. 20 Ebuna Manase lalaka sambu na kupema ti ba-nkaka na yandi, mpi bo zikaka yandi na nzo na yandi; ebuna mwana na yandi Amone kumaka ntotila na kisika na yandi.+

21 Amone+ vandaka ti bamvula 22 ntangu yandi kumaka ntotila, mpi yandi yalaka bamvula zole na Yeruzalemi.+ 22 Yandi landaka kusala mambu ya mbi na meso ya Yehowa, kaka mutindu tata na yandi Manase salaka;+ Amone pesaka bimenga na biteki yonso yina tata na yandi Manase salaka,+ mpi yandi landaka kusadila yo. 23 Kansi yandi kudikulumusaka ve na ntwala ya Yehowa+ mutindu tata na yandi Manase kudikulumusaka;+ Amone kumisaka mbi na yandi mingi kibeni.24 Nsuka-nsuka bansadi na yandi sadilaka yandi komplo+ mpi bo fwaka yandi na nzo na yandi.25 Kansi bantu ya insi yina fwaka bantu yonso yina sadilaka ntotila Amone komplo,+ ebuna bo tulaka mwana na yandi Yoziasi+ ntotila na kisika na yandi.