Yeremia
38 Shefatia mwana ya Matani, Gedalia mwana ya Pashure, Yukale+ mwana ya Shelemia, mpi Pashure+ mwana ya Malkiya waka mambu yina Yeremia vandaka kutubila bantu yonso nde: 2 “Yehowa ke tuba nde, ‘Muntu yina ta bikala na mbanza yai ta fwa na mbele ya bitumba, na nzala, mpi na kipupa.*+ Kansi muntu yina ta kudipesa* na bantu ya Kaldea ta landa kuzinga mpi yandi ta baka luzingu* na yandi bonso kima ya yandi me botula na bitumba* mpi yandi ta bikala na luzingu.’+ 3 Yehowa ke tuba nde, ‘Bo ta pesa kibeni mbanza yai na maboko ya basoda ya ntotila ya Babilone, mpi yandi ta botula yo.’”+
4 Bamfumu tubilaka ntotila nde: “Pardo, pesa nswa bo fwa muntu yai,+ sambu yandi ke lembisa mabanza* ya basoda yina me bikala na mbanza yai, mpi maboko ya bantu yonso, na mutindu yandi ke tubila bo mambu yai. Sambu muntu yai ke sosa ve ngemba ya bantu yai, kansi mpasi na bo.” 5 Ntotila Sidikiya vutulaka nde: “Tala! Yandi kele na maboko na beno, sambu ntotila lenda sala kima ve sambu na kukanga beno.”
6 Yo yina, bo bakaka Yeremia mpi bo losaka yandi na dibulu ya masa ya Malkiya mwana ya ntotila, yina vandaka na Kibansala ya Bankengidi.+ Bo kulumusaka yandi na bansinga. Kansi masa vandaka ve na dibulu yina, kaka poto-poto, ebuna Yeremia yantikaka kudinda na poto-poto yina.
7 Ebedi-meleki,+ muntu ya Etiopia, tongu* na nzo ya ntotila, waka nde bo me tula Yeremia na dibulu ya masa. Na ntangu yina ntotila vandaka me vanda na Kielo ya Benyamini,+ 8 yo yina Ebedi-meleki basikaka na nzo ya ntotila mpi songaka ntotila nde: 9 “O mfumu na mono ntotila, mambu yina bantu yai me sala mbikudi Yeremia kele mbi! Bo me losa yandi na dibulu ya masa, mpi yandi ta fwa kuna na nzala, sambu mampa kele diaka ve na mbanza.”+
10 Ebuna ntotila songaka Ebedi-meleki, muntu ya Etiopia, nde: “Baka bantu 30 awa, mpi basisa mbikudi Yeremia na dibulu yina na ntwala nde yandi fwa.” 11 Yo yina Ebedi-meleki bakaka bantu mpi kotaka na nzo ya ntotila na kisika mosi ya kele na nsi ya kisika ya bo ke bumbaka bima ya ntalu,+ ebuna bo bakaka bilele ya kunzuluka ti bilele ya kufwa-fwa kuna mpi bo kulumusaka yo na nsinga na dibulu ya masa kisika Yeremia vandaka. 12 Na nima Ebedi-meleki, muntu ya Etiopia, tubilaka Yeremia nde: “Pardo tula bilele ya kunzuluka mpi ya kufwa-fwa na kati ya mapeka na nge mpi bansinga.” Yeremia salaka mutindu yina, 13 ebuna bo bendaka yandi na bansinga yina mpi bo basisaka yandi na dibulu yina. Mpi Yeremia bikalaka na Kibansala ya Bankengidi.+
14 Ntotila Sidikiya tindaka bantu na kusonga mbikudi Yeremia na kukwisa kisika yandi vandaka na kisika ya kukotila ya tatu, yina kele na nzo ya Yehowa, ebuna ntotila tubilaka Yeremia nde: “Mono kele ti kima mosi ya kuyula nge. Kubumbila mono ve ata kima mosi.” 15 Ebuna Yeremia tubilaka Sidikiya nde: “Kana mono songa nge, nge ta fwa mono kibeni. Mpi kana mono longisila nge, nge ta wila mono ve.” 16 Yo yina ntotila Sidikiya zengaka kieleka na kinsweki na Yeremia nde: “Ya kieleka, mutindu Yehowa kele na luzingu, yandi muntu yina me pesaka beto luzingu yai,* mono ta fwa nge ve, mpi mono ta pesa nge ve na maboko ya bantu yina ke sosa kufwa nge.”*
17 Ebuna Yeremia tubilaka Sidikiya nde: “Yehowa, Nzambi ya makesa, Nzambi ya Izraele, ke tuba nde, ‘Kana nge kudipesa* na bamfumu ya ntotila ya Babilone, bo ta tanina luzingu na nge,* mpi bo ta yoka ve mbanza yai tiya, mpi nge ti bantu ya nzo na nge, bo ta fwa beno ve.+ 18 Kansi kana nge kudipesa ve* na bamfumu ya ntotila ya Babilone, bo ta pesa mbanza yai na maboko ya bantu ya Kaldea, bo ta yoka yo tiya,+ mpi nge ta tina ve na maboko na bo.’”+
19 Ebuna ntotila Sidikiya tubilaka Yeremia nde: “Mono ke wa boma ya Bayuda yina me kwenda na bantu ya Kaldea, sambu kana bo pesa mono na maboko na bo, bo lenda sadila mono mambu na nku.” 20 Kansi Yeremia tubaka nde: “Bo ta pesa nge ve na maboko na bo. Pardo, lemfukila ndinga ya Yehowa na mambu yina mono ke zabisa nge, ebuna mambu ta kwendila mbote sambu na nge, mpi nge* ta landa kuzinga. 21 Kansi kana nge buya kudipesa,* Yehowa me songa mono nde: 22 Bankento yonso yina me bikala na nzo ya ntotila ya Yuda, bo ke nata bo na bamfumu ya ntotila ya Babilone,+ mpi bo ke tuba nde,
‘Bantu yina nge tudilaka ntima* me kusa nge mpi me nunga nge.+
Bo me dindisa dikulu na nge na poto-poto.
Ntangu yai bo me baluka mpi me tina.’
23 Bo ke nata bankento na nge yonso ti bana na nge na bantu ya Kaldea, ebuna nge ta tina ve na maboko na bo, kansi ntotila ya Babilone+ ta kanga nge, mpi bo ta yoka mbanza yai tiya+ sambu na nge.”
24 Ebuna Sidikiya tubilaka Yeremia nde: “Muntu mosi ve kuzaba mambu yai, sambu nge fwa ve. 25 Mpi kana bamfumu kuwa nde mono me solula ti nge mpi kana bo kwisa kutubila nge nde, ‘Pardo, songa beto mambu yina nge tubilaka ntotila. Kubumbila beto ve ata kima mosi, mpi beto ta fwa nge ve.+ Ntotila tubilaka nge inki?’ 26 nge fwete vutudila bo nde, ‘Mono vandaka kulomba ntotila kima mosi, nde yandi vutula mono ve na nzo ya Yehonatani kana ve mono ta fwa kuna.’”+
27 Na nima, bamfumu yonso kwisaka kisika Yeremia vandaka mpi bo yulaka yandi bangiufula. Yandi songaka bo mambu yonso yina ntotila songaka yandi na kutuba. Yo yina bo tubilaka yandi diaka kima ve, sambu muntu mosi ve waka disolo yina. 28 Tii na kilumbu yina bo botulaka Yeruzalemi, Yeremia bikalaka na Kibansala ya Bankengidi;+ yandi vandaka kaka kuna ntangu bo botulaka Yeruzalemi.+