Ezekiele

1 Na mvula ya 30, na kilumbu ya tanu ya ngonda ya iya, na ntangu mono vandaka kuzinga pene-pene ya nzadi Kebare+ na kati ya bantu yina bikisaka insi na bo,+ zulu kangukaka mpi mono yantikaka kumona bambona-meso ya Nzambi. 2 Na kilumbu ya tanu ya ngonda yina—disongidila, na mvula ya tanu yina bo katulaka ntotila Yehoyakini+ na insi na yandi— 3 ndinga ya Yehowa kwisilaka Ezekiele* mwana ya nganga-nzambi Buzi pene-pene ya nzadi Kebare na insi ya bantu ya Kaldea.+ Kuna diboko ya Yehowa kwisaka na zulu na yandi.+

4 Na ntangu mono vandaka kutala, mono monaka mupepe mosi ya ngolo+ me katuka na ndambu ya nordi, mpi kuvandaka ti nsemo mosi ya ngolo yina ziungaka dituti mosi ya nene ti tiya ya ke pela,*+ mpi na kati-kati ya tiya yina kuvandaka ti kima mosi ya vandaka kumonika bonso kibende ya ke sema.*+ 5 Na kati na yo, kuvandaka ti bima yina vandaka kumonika bonso bigangwa iya ya moyo,+ mpi konso kigangwa vandaka kumonika bonso muntu. 6 Konso kigangwa vandaka ti baluse iya mpi mapapu iya.+ 7 Makulu na yo vandaka ya kutandula, bitambi ya makulu na yo vandaka bonso ya mwana-ngombe, mpi yo vandaka kusema bonso kwivre ya bo me yidika mbote-mbote.+ 8 Yo vandaka ti maboko ya bantu na nsi ya mapapu na yo na bandambu yonso iya, yo yonso iya vandaka ti baluse mpi mapapu. 9 Mapapu na yo vandaka kututana. Yo vandaka kubaluka ve ntangu yo vandaka kukwenda; konso kigangwa vandaka kukwenda kaka na ntwala.+

10 Baluse na yo vandaka kumonika mutindu yai: Konso kigangwa na kati ya bigangwa yina iya vandaka ti luse ya muntu mpi luse ya ntambu+ na ndambu ya diboko ya kitata, luse ya ngombe+ ya bakala na ndambu ya diboko ya kimama, mpi konso kigangwa na kati ya bigangwa yina iya vandaka ti luse+ ya ngo-zulu.+ 11 Baluse na yo vandaka mutindu yina. Mapapu na yo vandaka ya kutandula na zulu na yo. Konso kigangwa vandaka ti mapapu zole yina vandaka kututana mpi mapapu ya nkaka zole yina vandaka kufika nitu na yo.+

12 Konso kigangwa vandaka kukwenda kaka na ntwala, yo vandaka kukwenda konso ndambu yina mpeve vandaka kupusa yo na kukwenda.+ Yo vandaka kubaluka ve ntangu yo vandaka kukwenda. 13 Bigangwa yina ya moyo vandaka kumonika bonso makala ya ke pela tiya, mpi kima mosi ya vandaka kumonika bonso minda ya ke pela ngolo vandaka kuvutuka na nima mpi kukwenda na ntwala na kati-kati ya bigangwa yina ya moyo, mpi nsemo ya nzasi vandaka kubasika na tiya yina.+ 14 Mpi ntangu bigangwa yina ya moyo vandaka kukwenda na ntwala mpi kuvutuka na nima, yo vandaka kumonika bonso nsemo ya nzasi.

15 Ntangu mono vandaka kutala bigangwa yina ya moyo, mono monaka dikulu mosi na ntoto pene-pene ya konso kigangwa ya moyo yina vandaka ti baluse iya.+ 16 Makulu yina ti mutindu bo salaka yo vandaka kusema bonso ditadi ya krisolite, mpi yonso iya vandaka kiteso mosi. Mutindu yo vandaka kumonika mpi mutindu bo salaka yo vandaka kumonana bonso nde dikulu mosi vandaka na kati ya dikulu ya nkaka.* 17 Ntangu yo vandaka kutambula, yo lendaka kukwenda na bandambu yonso iya kukonda kubaluka na ntangu yo vandaka kukwenda. 18 Balweka na yo vandaka nda kibeni na mpila nde yo vandaka kupesa boma, mpi balweka ya makulu yonso iya vandaka ya kufuluka ti meso na bandambu yonso.+ 19 Konso ntangu yina bigangwa ya moyo vandaka kutambula, makulu vandaka kutambula ti yo, mpi ntangu bigangwa ya moyo vandaka kukatuka na ntoto mpi kutombuka, makulu mpi vandaka kutombuka.+ 20 Yo vandaka kukwenda kisika yina mpeve vandaka kupusa yo na kukwenda, konso kisika yina mpeve vandaka kukwenda. Makulu vandaka kutombuka kumosi ti yo, sambu mpeve yina vandaka kusala na bigangwa ya moyo* vandaka mpi na makulu. 21 Ntangu bigangwa vandaka kutambula, makulu mpi vandaka kutambula; ntangu bigangwa vandaka kutelama, makulu mpi vandaka kutelama; ntangu yo vandaka kukatuka na ntoto mpi kutombuka, makulu mpi vandaka kutombuka kumosi ti yo, sambu mpeve yina vandaka kusala na bigangwa ya moyo vandaka mpi na makulu.

22 Na zulu ya ba-ntu ya bigangwa yina ya moyo kuvandaka ti kima mosi yina vandaka kumonika bonso kisika mosi ya nene yina vandaka kupesa nsemo bonso glase mosi ya ke pesa boma, ya kutandula na zulu ya ba-ntu na bo.+ 23 Na nsi ya kisika yina ya nene, mapapu na yo vandaka ya kutandula,* yo vandaka kututana. Konso kigangwa vandaka ti mapapu zole sambu na kufika lweka mosi ya nitu na yo mpi mapapu zole sambu na kufika lweka ya nkaka. 24 Ntangu mono waka makelele ya mapapu na yo, yo vandaka bonso makelele ya masa yina ke kulumuka ngolo, bonso makelele ya Nkwa-Ngolo Yonso.+ Ntangu yo vandaka kutambula, yo vandaka bonso makelele ya basoda. Ntangu yo vandaka kutelama, yo vandaka kukulumusa mapapu na yo.

25 Ndinga mosi vandaka na zulu ya kisika ya nene yina vandaka na zulu ya ba-ntu na yo. (Ntangu yo vandaka kutelama, yo vandaka kukulumusa mapapu na yo.) 26 Na zulu ya kisika ya nene yina vandaka na zulu ya ba-ntu na yo, kuvandaka ti kima mosi yina vandaka kumonika bonso ditadi ya safire,+ mpi yo vandaka kumonika bonso kiti ya kimfumu.+ Na zulu ya kiti ya kimfumu yina vandaka na zulu, kuvandaka ti kima mosi yina vandaka kumonika bonso muntu.+ 27 Mono monaka kima mosi ke sema bonso kibende ya ke sema+ yina vandaka bonso tiya yina vandaka kupela yantika na kima yina vandaka kumonika bonso luketo na yandi tii na zulu; mpi yantika na luketo na yandi tii na nsi, mono monaka kima mosi yina vandaka bonso tiya.+ Nsemo vandaka na nziunga na yandi 28 bonso nsemo ya nkongolo+ na dituti na kilumbu mosi ya mvula. Yai kele mutindu nsemo yina vandaka kusema na nziunga yina vandaka kumonika. Yo vandaka kumonika bonso nkembo ya Yehowa.+ Ntangu mono monaka yo, mono fukamaka luse na ntoto mpi yantikaka kuwa ndinga ya muntu mosi ke tuba.