Ezekiele

9 Ebuna yandi bingaka na ndinga ya ngolo na makutu na mono mpi tubaka nde: “Beno binga bantu yina ta pesa mbanza ndola, konso muntu na diboko na yandi ti kinwaninu na yandi ya kufwila!”

2 Mono monaka babakala sambanu me katuka na ndambu ya kielo ya zulu+ yina ke tala na ndambu ya nordi, konso muntu vandaka ti kinwaninu na maboko na yandi sambu na kubuka mbanza; kuvandaka ti muntu mosi na kati na bo yina vandaka me lwata lele ya lino, mpi na luketo na yandi, yandi vandaka ti kima yina sekretere ke tulaka tinta,* ebuna bo kwisaka mpi telamaka na lweka ya mesa-kimenga ya kwivre.+

3 Na nima, nkembo ya Nzambi ya Izraele+ telamaka kisika yina yo vandaka na zulu ya basherube mpi kwendaka na munoko ya kielo ya nzo,+ mpi yandi yantikaka kubinga na ndinga ya ngolo muntu yina lwataka lele ya lino, yina vandaka na luketo na yandi ti kima yina sekretere ke tulaka tinta. 4 Yehowa tubilaka yandi nde: “Luta na mbanza, na Yeruzalemi, mpi tula kidimbu na bambunzu ya bantu yina ke dila mpi ke bokuta+ sambu na mambu yonso ya nzanzi yina ke salama na mbanza.”+

5 Mpi yandi tubaka na bantu yina ya nkaka na makutu na mono nde: “Beno luta na mbanza na nima na yandi mpi beno fwa bantu. Beno bika ve nde disu na beno kuwa mawa, mpi beno monisa ve ata fioti ntima ya mawa.+ 6 Beno fwete fwa kibeni mbuta, leke, mwense, mwana-fioti, mpi bankento.+ Kansi beno kwenda ve pene-pene ya konso muntu yina kele ti kidimbu.+ Beno fwete yantika na kisika na mono ya santu.”+ Yo yina bo yantikaka na kufwa bankuluntu yina vandaka na ntwala ya nzo.+ 7 Ebuna yandi tubilaka bo nde: “Beno bebisa nzo mpi beno fulusa bibansala ti bantu yina beno ta fwa.+ Beno kwenda!” Yo yina bo basikaka mpi fwaka bantu na kati ya mbanza.

8 Ntangu bo vandaka kufwa bo, mono mosi mpamba bikalaka, ebuna mono fukamaka luse na ntoto mpi bokaka nde: “O Yehowa Mfumu ya Kuluta Nene! Keti nge ta fwa bantu yonso ya Izraele yina me bikala, awa ya nge ke wila Yeruzalemi makasi?”+

9 Ebuna yandi tubilaka mono nde: “Kifu ya nzo ya Izraele mpi ya Yuda kele nene, nene kibeni.+ Insi me fuluka ti menga ya bo me tiamuna,+ mpi mbanza me fuluka ti mambu ya mbi.+ Sambu bo ke tuba nde, ‘Yehowa me yambula insi, Yehowa ke mona ve.’+ 10 Kansi sambu na mono, disu na mono ta wa ve mawa; mono ta monisa mpi ve ntima ya mawa.+ Mono ta sala nde bo buka mbuma ya banzila na bo.”

11 Ebuna mono monaka muntu yina lwataka lele ya lino, na luketo na yandi ti kima ya bo ke tulaka tinta, yandi ke vutula ndinga mpi ke tuba nde: “Mono me sala kaka mutindu nge songaka mono.”