1 Bakorinto

11 Beno landa mbandu na mono, kaka mutindu mono ke landaka mbandu ya Kristu.+

2 Mono ke sikisa beno, sambu na mambu yonso beno ke yibuka mono mpi beno ke simba ngolo bansiku kaka mutindu mono pesaka beno yo. 3 Kansi mono ke zola beno zaba nde mfumu ya konso bakala kele Kristu;+ mpi mfumu ya nkento kele bakala;+ ebuna mfumu ya Kristu kele Nzambi.+ 4 Konso bakala yina ke samba to ke bikula ti kima mosi na zulu ya ntu, yandi ke pesa mfumu na yandi nsoni; 5 kansi konso nkento yina ke samba to ke bikula+ kukonda kufika ntu na yandi ke pesa mfumu na yandi nsoni, sambu yo kele kibeni bonso nde yandi kele nkento yina me kulula nsuki. 6 Sambu kana nkento ke fika ve ntu na yandi, yandi fwete zenga nsuki na yandi; kansi, kana yo kele nsoni sambu na nkento nde yandi zenga nsuki na yandi to kukulula yo, yandi fwete fika ntu na yandi.

7 Bakala fwete fika ve ntu na yandi, sambu yandi kele kifwani+ mpi nkembo ya Nzambi, kansi nkento kele nkembo ya bakala. 8 Sambu bakala katukaka ve na nkento, kansi nkento katukaka na bakala.+ 9 Nzambi salaka ve bakala sambu na nkento, kansi yandi salaka nkento sambu na bakala.+ 10 Yo yina nkento fwete vanda ti kidimbu ya kimfumu na ntu na yandi, sambu na bawanzio.+

11 Kansi, sambu na Mfumu, nkento kele ve ya kukabwana ti bakala mpi bakala kele ve ya kukabwana ti nkento. 12 Sambu mutindu nkento katukaka na bakala,+ mutindu mosi mpi bakala kele na nzila ya nkento; kansi bima yonso katukaka na Nzambi.+ 13 Beno tuba beno mosi: Keti yo kele mbote nde nkento kusamba Nzambi kukonda kufika ntu na yandi? 14 Keti beno ke bakaka ve dilongi na kikalulu ya bantu nde nsuki ya nda kele nsoni sambu na bakala, 15 kansi kana nkento kele ti nsuki ya nda, keti yo kele nkembo sambu na yandi? Sambu bo me pesaka yandi nsuki sambu na kufika ntu na yandi. 16 Kansi kana muntu ke zola kutula ntembe sambu na kunwanina mutindu ya nkaka ya kusala mambu, beto kele ve ti mutindu ya nkaka ya kusala mambu, mabundu ya Nzambi mpi kele ti yo ve.

17 Kansi ntangu mono ke pesa bansiku yai, mono ke sikisa beno ve, sambu ntangu beno ke vukanaka, yo kele ve sambu na mambu ya mbote, kansi sambu na mambu ya mbi. 18 Ntete, ntangu beno ke vukanaka na dibundu, mono ke wa nde kukabwana kele na kati na beno; mpi na kiteso mosi buna mono ke kwikila yo. 19 Sambu ya kieleka, tu-mabundu ta vanda mpi na kati na beno,+ sambu bantu yina Nzambi ke ndima na kati na beno kumonana pwelele.

20 Ntangu beno ke vukana kisika mosi, beno ke vukanaka kibeni ve sambu na kudia Madia ya Nkokila ya Mfumu.+ 21 Sambu ntangu beno ke diaka yo, konso muntu ke diaka ntete madia na yandi ya nkokila, yo yina muntu mosi kele na nzala kansi muntu ya nkaka me lawuka malafu. 22 Keti beno kele ve ti banzo sambu na kudia mpi kunwa? To keti beno ke vweza dibundu ya Nzambi mpi ke pesa bantu yina me konda kima nsoni? Inki mono lenda tubila beno? Keti mono fwete sikisa beno? Na mambu yai, mono ke sikisa beno ve.

23 Sambu mono bakaka na Mfunu mambu yina mono mpi longaka beno, nde Mfumu Yezu, na mpimpa+ yina bo zolaka kuteka yandi, yandi bakaka dimpa, 24 mpi na nima ya kupesa matondo, yandi zengaka yo mpi tubaka nde: “Yai ke tendula nitu na mono+ yina mono fwete pesa sambu na beno. Beno landa kusala yo sambu na kuyibuka mono.”+ 25 Yandi salaka mpi mutindu mosi ti dikopa,+ ntangu bo manisaka kudia madia ya nkokila, mpi tubaka nde: “Dikopa yai ke tendula kuwakana ya mpa+ na nsadisa ya menga na mono.+ Beno landa kusala yo, konso ntangu ya beno ke nwa yo, sambu na kuyibuka mono.”+ 26 Sambu konso ntangu ya beno ke dia dimpa yai mpi ke nwa dikopa yai, beno ke landa kuzabisa lufwa ya Mfumu, tii kuna yandi ta kwisa.

27 Yo yina, konso muntu yina ke dia dimpa to ke nwa dikopa ya Mfumu na mutindu yina me fwana ve ke sala disumu na nitu mpi na menga ya Mfumu. 28 Ntete, muntu fwete kuditala kana yandi me fwana,+ na nima yandi lenda dia dimpa mpi kunwa dikopa. 29 Sambu muntu yina ke dia mpi ke nwa, yandi ke dia mpi ke nwa lusambisu na yandi kana yandi ke bakisa ve ntendula ya nitu. 30 Yo yina bantu mingi na kati na beno kele ngolo ve mpi kele na maladi, mpi mingi me fwaka.*+ 31 Kansi kana beto bakisa bantu ya nki mutindu beto mosi kele, bo ta sambisa beto ve. 32 Ata mpidina, ntangu bo ke sambisa beto, Yehowa* muntu ke sungikaka beto,+ sambu bo bedisa beto ve ti nsi-ntoto.+ 33 Yo yina bampangi na mono, ntangu beno ke vukana sambu na kudia yo, beno vingila bankaka. 34 Kana muntu kele na nzala, mbote yandi dia na nzo na yandi, sambu ntangu beno ke vukana, yo vanda ve sambu na lusambisu.+ Kansi mambu yina me bikala, mono ta yidika yo ntangu mono ta kwisa kuna.