1 Bakorinto

13 Kana mono ke tuba bandinga ya bantu mpi ya bawanzio kansi mono kele ve na zola, mono me kuma kibende yina ke tula makelele mingi to sembale yina ke tula makelele mingi. 2 Kana mono kele ti dikabu ya kubikula mpi mono ke bakisa binsweki yonso ya santu mpi nzayilu yonso,+ mpi kana mono kele ti lukwikilu yonso sambu na kukatula bangumba kisika mosi mpi kutula yo kisika ya nkaka, kansi mono kele ve na zola, mono kele mpamba.*+ 3 Kana mono pesa bima na mono yonso sambu na kudisa bankaka,+ mpi kana mono pesa nitu na mono sambu mono kudikumisa, kansi mono kele ve na zola,+ mono ke baka ve mambote ata fioti.

4 Zola+ kele ntima-nda+ mpi ntima-mbote.+ Zola kele na kimpala ve.+ Yo ke kudisikisaka ve, yo ke fulukaka ve na lulendo,+ 5 yo ke salaka ve mambu ya nsoni,+ yo ke sosaka ve mambote na yo mosi,+ yo ke waka makasi ve.+ Yo ke bumbaka ve mbi yina bo me sala yo.+ 6 Yo ke waka ve kiese sambu na kukonda lunungu,+ kansi yo ke waka kiese ti kieleka. 7 Yo ke fikaka mambu yonso,+ ke kwikilaka mambu yonso,+ ke tulaka ntima na mambu yonso,+ ke kangaka ntima na mambu yonso.+

8 Zola ke sukaka ve.* Kansi, kana kele ti makabu ya kubikula, yo ta suka; kana kele ti bandinga,* yo ta suka; mpi kana kele ti nzayilu, yo ta suka. 9 Sambu beto kele ti nzayilu ndambu+ mpi beto ke bikulaka ndambu mpamba, 10 kansi, ntangu kima yina kele ya kulunga ta kwisa, kima yina kele ya ndambu ta suka. 11 Ntangu mono vandaka mwana, mono vandaka kutuba bonso mwana, kubanza bonso mwana, kuyindula bonso mwana; kansi, ntangu yai ya mono me kuma mbuta, mono me bikaka bikalulu ya kimwana. 12 Sambu ntangu yai beto ke tala na nsadisa ya tala-tala ya kibende yina lenda monisa ve bima pwelele, kansi na ntangu yina yo ta vanda meso na meso. Ntangu yai mono me zaba ndambu, kansi na ntangu yina mono ta zaba mbote-mbote, mutindu bo me zaba mono mbote-mbote. 13 Kansi ntangu yai, mambu yai tatu me bikala: lukwikilu, kivuvu, zola; kansi na mambu yai yonso tatu, zola me luta mfunu.+